O Le Tauemuga o Keriso, saunia e Carl Heinrich Bloch

26 Setema-–2 Oketopa

Isaia 50–57

“Ua Ia Tauave o Tatou Tiga, ma Tauave o Tatou Faanoanoaga”

Mafaufau loloto i se malamalama mai le Isaia 50–57 e fesoasoani ia te oe ia latalata atili i le Faaola. Tusi faamaumau lagona uunaia e te maua.

Tusi Faamaumau Ou Lagona Uunaia

I lana auaunaga atoa, sa saunoa ai Isaia e uiga i se laveaiga tele? (tagai, mo se faataitaiga Isaia 9:3-7). O nei valoaga na semanu e faapitoa le pele ia Isaraelu i seneturi mulimuli ane a o faatagataotauaina i latou i Papelonia. O se tagata na te talepeina papuipui o Papelonia o le a avea ma laveaimalo malosi moni lava. Ae pe le o le ituaiga Mesia lena na faamatalaina e Isaia i mataupu 52–53: “Ua inosia ma tuulafoaiina o ia e tagata; o le tagata faanoanoa, ua masani foi ma le tiga: e pei ua aloese mata ia te ia.… A ua tatou manatu o ia ua taia, ua fasia e le Atua, ma ua faatigaina” (Isaia 53:3–4). E ala i le auina mai o se laveaimalo sa le’i mafaufauina, na aoao mai ai e le Atua ia i tatou e uiga i le laveaiga moni. Ina ia faasao i tatou mai sauaga ma mea tiga, na auina mai ai e le Atua o le Tasi o Iē o Ia lava “sa faasauaina, ma … tigaina.” Lea sa faamoemoe nisi o se leona, ae na Ia auina mai se tamai mamoe (tagai Isaia 53:7). E mautinoa lava, o ala o le Atua, e le o o tatou ala ia (tagai Isaia 55:8–9). Ua faasaoloto i tatou e Iesu Keriso e le gata i le na o le tatalaina o le falepuipui ae e ala i le suitulaga ia i tatou iina. Ua Ia faatoomaga i tatou mai o tatou filifili o le tiga ma le faanoanoa e ala i le tauaveina e Ia lava (tagai Isaia 53:4–5,12). Na te le o Ia faasaoina i tatou mai i se mea mamao. E mafatia faatasi o Ia ma i tatou, i se faatinoga o le “alofa e faavavau” e faapea ona “le mavae atu lea ia te oe” (Isaia 54:8,10).

Manatu mo Suesuega Faaletagata Lava Ia o Tusitusiga Paia

Isaia 50–52

E susulu le lumanai mo tagata o le Alii.

E ui ina sa faaalu e Isaraelu le tele o tausaga i le faatagatauaina—ma e ui lava o le faatagataotauaina sa o se taunuuga o o latou lava filifiliga leaga—sa finagalo le Atua ia latou vaai atu i le lumanai ma le faamoemoe. O a ni savali o le faamoemoe e te maua i le Isaia 50–52? O a ni mea ua aoao mai e le Alii ia i tatou e uiga ia te Ia lava i nei mataupu, ma aisea e tuu atu ai e lenei mea ia te oe le faamoemoe? (tagai, mo se faataitaiga, Isaia 50:2, 5–9; 51:3–8, 15–16; 52:3, 9–10).

Atonu e te lisiina foi mea uma i le mataupu 51–52 ua valaaulia ai e le Alii ia Isaraelu e fai ina ia mo’i ai lenei lumanai ua faamoemoe i ai. O le a se mea e te lagona o loo valaaulia outou e le Alii e fai e ala i nei upu? Mo se faataitaiga, o le a sou manatu i le uiga o le ia “ala mai ia” ma “ofu i le malosi”? (Isaia 51:9; tagai foi Isaia 52:1; Mataupu Faavae ma Feagaiga 113:7–10). Aisea e te manatu ai ua ta’u faafia mai ai le valaaulia e “ala mai” (pe “faalogo ma le faamoemoe ia usitai”) ua faafia ona tau soo mai? (Russell M. Nelson, “Faalogo ia te Ia,” Ensign po o le Liahona, Me 2020,89).

Tagai foi Mosaea 12:20–24; 15:13–18; 3 Nifae 20:29–46.

Ona o le Alofa, saunia e le vaeata o Angela Johnson

Isaia 53

Na tauave e Iesu Keriso i Ona lava luga a’u agasala ma faanoanoaga.

E laiti ni nai mataupu i tusitusiga paia e sili atu le matagofie o le faamatala ai o le misiona faaola a Iesu Keriso nai lo le Isaia 53. Faaalu se taimi e mafaufau loloto ai i nei upu. I fuaiupu taitasi, taofi e mafaufau i mea na tigaina ai le Faaola—o “tiga,” “faanoanoaga,” ma “solitulafono” sa Ia tauaveina—mo tagata uma ae faapitoa lava mo oe. Atonu e te suitulagaina upu e pei o le “tatou” ma le “matou” i le “a’u” ma le “lo’u” ao e faitau. O a ni lagona ma ni manatu e musuia ai oe e nei fuaiupu? Fuafua e tusi i lalo.

Atonu e manao e toe iloilo le Mosaea 14; 15:1–13 e vaai pe na faapefea ona faaaoga e le perofeta o Apinati ia upu a Isaia e aoao atu ai e uiga i le Faaola.

Isaia 54; 57:15–19

E finagalo Iesu Keriso ia ou toe foi atu ia te Ia.

E tofu i tatou uma ma taimi tatou te lagona ai le taumamao mai le Aili ona o a tatou agasala po o vaivaiga. O nisi lava foi ua lafoai le faamoemoe o le a Ia faamagaloina i latou. O le Isaia 54 ma le 57 o ni mataupu maoae e faitau i ai mo le faamautinoaga ma le faamalosiauga i taimi faapenei. Ae maise lava i le Isaia 54:4–10; 57:15–19, o le a se mea ua e aoao ai e uiga i le alofa mutimutivale o le Faaola ma Ona lagona ia te oe? O le a se eseesega e faia i lou olaga i le iloa ai o nei mea e uiga ia te Ia?

E faapefea ona faatatau faamanuiaga o loo faamatalaina i le Isaia 54:11–17 ia te oe?

Isaia 55–56

Ua valaaulia e le Alii tagata uma ina ia “taofi mau i la’u feagaiga.”

Mo le tele o augatupulaga, na faailoa ai Isaraelu o le nuu o le feagaiga o le Atua. Ae peitai, o le fuafuaga a le Atua na aofia ai lava le sili atu ma le tasi se malo, aua “outou uma o e fia inu” ua valaauina e “o mai … i le vai” (Isaia 55:1). Teu i lou mafaufau le mea lenei ao e faitau i le Isaia 55 ma le 56, ma mafaufau loloto i le uiga o le avea ma nuu o le Atua. O le a le savali a le Atua ia i latou o e lagona le “matuā faate’aeseina” mai ia te Ia? (Isaia 56:3). Mafaufau e faailoga fuaiupu o loo faamatala ai uiga ma amioga a i latou o e “taofi mau i la’u feagaiga” (tagai Isaia 56:4–7).

Manatu mo Suesuega Faaleaiga o Tusitusiga Paia ma Afiafi Faaleaiga

Isaia 51–52.Ao outou talanoa i valaaulia a le Alii o loo i nei mataupu, e mafai ona outou valaaulia tagata o le aiga e faatinoina. Mo se faataitaiga, e faapei foliga o le “tepa ae ia outou i le lagi,” “ina ala mai, ina tulai mai,” po o le “lulu oe ia te oe ai le efuefu”? (Isaia 51:6,17; 52:2). O a ni mea o loo aoao mai e nei fuaitau ia i tatou e uiga i le mulimuli ia Iesu Keriso?

Isaia 52:9.A uma ona faitau lenei fuaiupu, e mafai e lou aiga ona “pepese faatasi” i se viiga po se pese a tamaiti lea e aumaia ia i latou le olioli. O a ni folafolaga o loo i le Isaia 52 e mafua ai ona tatou “alalaga fiafia faatasi”?

Isaia 52:11; 55:7.E mafai ona taitai atu e nei fuaiupu i se talanoaga e uiga i le fuaitau “Ia mama outou”. O se vaega o lenei talanoaga, e mafai ona tou toe iloiloina autu o loo i le Mo le Malosi o le Autalavou (tamaitusi, 2011) pe faitau mau e uiga i faamanuiaga o le mama faaleagaga (tagai 3 Nifae 12:8; Mataupu Faavae ma Feagaiga 121:45–46).

Isaia 53.Ina ia faalauiloa atu le faamatalaina e Isaia o le Faaola, e mafai ona talanoa lou aiga i auala e masani ona faaalia ai e tala, tifaga, ma isi ala o faasalalauga, ia tagata totoa o e laveaia tagata. E mafai ona outou faatusatusaina na faaaliga i faamatalaga e uiga i le Faaola tou te faitau i ai i le Isaia 53. E mafai foi ona tou matamata i le vitio “My Kingdom Is Not of This World” (ChurchofJesusChrist.org) ma talanoa i auala na faataunuuina ai ia valoaga o loo i le Isaia 53. O a nisi o mea tiga ma faanoanoaga o loo tauave e le Faaola mo i tatou?

Isaia 55:8–9.E faapefea ona ese se vaaiga i nei mea pe a o e maualuga a’e i le eleele? O le a le uiga ia te oe [o le iloa], o ala ma manatu o le Atua e maualuluga atu nai lo o tatou ala ma manatu?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ou te Tu ma Ofo,” Viiga, nu. 107.

Faaleleia o Suesuega Faaletagata Lava Ia

Faaaoga musika. O viiga e aoaoina mai ma le mamana ia mataupu faavae o le talalelei. Mafaufau e faalogologo pe faitau i viiga o le faamanatuga e fesoasoani e te malamalama ai i upumoni e uiga i le Togiola a Iesu Keriso o loo aoao mai i le Isaia 53. (Tagai Aoao Atu i le Ala a le Faaola, 22.)

Lona Malamalama, saunia e MichaelT. Malm