perofeta o loo saunoa atu i alii

Ieremia, saunia e Walter Rane

10–16 Oketopa

Ieremia 1–3; 7; 16–18; 20

“Na Au Iloa Oe A o Lei Faia Oe e A’u i le Manava”

Na saunoa Elder David A. Bednar: “O se tasi o auala e mafai ona ou logonaina ai [le Alii] o totonu o tusitusiga paia. O tusitusiga paia o siufofoga lea o le Alii na muaipueina” (“‘Hear Him’ in Your Heart and in Your Mind,” ChurchofJesusChrist.org).

Tusifaamaumau Ou Lagona Uunai

I le taimi, sa le’i manatu Ieremia o le a avea o ia ma se perofeta lelei. “Faauta, ou te le iloa ona tautala,” sa tetee o ia i le taimi muamua na valaauina ai o ia e le Alii (Ieremia 1:6). Sa faamautinoa atu le Alii ia te ia, “Ua ou tuu atu a’u upu i lou gutu” (fuaiupu 9). Sa manatu Ieremia o ia o se “tamaitiiti” e leai se tomai (fuaiupu 6), ae sa faamalamalama atu e le Alii o le mea moni ua leva ona saunia o ia nai lo le mea ua ia iloa—sa faauuina o ia i lenei valaauga ae le’i fanau mai o ia (tagai fuaiupu 5). O lea na tuu ese ai e Ieremia ona popolega ae talia le valaau. Sa ia lapataia tupu ma faipule o Ierusalema, o le latou paia faafoliga o le a le faasaoina ai i latou mai faatamaiaga. O le “tamaitiiti” o lē na manatu e le mafai ona tautala na oo ina lagonaina upu a le Atua i “[lona] loto e pei o se afi mumū” ma na le mafai ona faafilemu o ia (Ieremia 20:9).

O le tala o Ieremia o le tatou tala foi lea. Na silafia foi i tatou e le Atua ae tatou te lei fananau mai ma saunia i tatou e fai Lana galuega i luga o le fogaeleele. Faatasi ai ma isi mea, o lena galuega e aofia ai le mea na muai vaai i ai Ieremia: o le faapotopotoina o le nuu o le Atua, taitoatasi, e “aumaia [latou] i Siona” (Ieremia 3:14). Ma e tusa pe tatou te le iloa tonu le mea e fai pe tautala atu ai, e tatau ona “aua [le] fefe…; aua o a’u ou te ia oe e laveai ia te oe, ua fetalai mai ai Ieova” (Ieremia 1:8,19).

Mo se vaaiga aoao o le tusi o Ieremia, tagai i le “Ieremia” i le Bible Dictionary.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Ieremia 1:4–19; 7:1–7; 20:8–10

O perofeta ua valaauina e saunoa mai le fetalaiga a le Alii.

Ao e faitau i le Ieremia 1:4–19 e uiga i le valaauga o Ieremia e avea o se perofeta, mafaufau loloto i le matafaioi o perofeta i lou olaga. O le a se mea ua e aoaoina e uiga i perofeta mai fetalaiga a le Alii ia Ieremia? (tagai foi Ieremia 7:1–7). Sa masani ona teena ia talaiga a Ieremia (tagai Ieremia 20:8,10). O le a se mea e te aoaoina mai upu a Ieremia i le Ieremia 20:9? Ia tuu na manatu i lou mafaufau i le taimi atoa o lau suesuega o aoaoga a Ieremia. O a ni mea ua e maua i nei aoaoga e musuia ai oe ia mulimuli i o tatou perofeta o aso e gata ai?

Ieremia 1:5

Sa silafia e le Atua a’u ae ou te le’i fanau mai.

Ao le’i fanau mai Ieremia, sa silafia ma filifilia o Ia e le Atua, pe na muaifaauuina o ia, e faataunuu se misiona faapitoa i le lalolagi (tagai Ieremia 1:5). Aisea e te manatu ai sa taua ia Ieremia ona iloa lenei mea?

Sa silafia foi oe e le Atua ae e te le’i fanau mai ma muaifaauuina oe i ni tiutetauave faapitoa (tagai Alema 13:1–4; Mataupu Faavae ma Feagaiga 138:53–56; Aperaamo 3:22–23). O le a le eseesega e mafai e lenei malamalama ona faia i lou olaga? Afai ua maua lou faamanuiaga faapeteriaka, atonu e te toe iloiloina ma le agaga tatalo ma fesili i le Atua pe faapefea ona e ausia mea ua Ia muaifaauuina oe e fai.

Tagai foi Gospel Topics, “Foreordination,” “Premortality,” topics.ChurchofJesusChrist.org.

tagata o loo tu i totonu o le tanevai anamua

Sa faaaoga e tagata Isaraelu anamua ia tanevai e teu ai vai taua.

Ieremia 2; 7

“Ua latou tuua a’u le puna o le vai ola.”

I le pito matutū lea na nonofo ai tagata Isaraelu, sa teu e tagata le vai taua i faatanoa i lalo o le eleele na ta’ua o vaieli. Aisea e taua ai le maua o le vai mai se puna nai lo o le faalagolago i se vaieli? O le a le uiga o le tuua “le puna o le vai ola”? O le a lou manatu mata o le a le faatusa o “vaieli mavaevae” na ta’ua i le Ieremia 2:13 ? Ao e faitau i le Ieremia 2 ma le 7, maitau le ala na lafoai ai e tagata le vai ola a le Alii, ma mafaufau pe o faapefea ona e maua le vai ola i lou olaga.

O le Ieremia 7 o loo talanoa atu ia i latou o e na ulu atu “i nei faitotoa e ifo atu ai ia Ieova” (Ieremia 7:2). E ui i lenei faaaliga i fafo o le tuuto, sa ta’usalaina i latou i le amioleaga tele (tagai fuaiupu 2–11). O a ni savali e te manatu e ono i ai i le Alii mo oe i fuaiupu 21–23?

Ieremia 3:14–18; 16:14–21

O le a faapotopoto e le Alii Ona tagata.

Ina ua vavalo Ieremia e uiga i le faapotopotoina o Isaraelu faataapeapeina, sa fai mai o ia o le a sili atu ona telē nai lo le Esoto [solotele] na o ese mai Aikupito (tagai Ieremia 16:14–15). I se agaga lava faapea, na saunoa ai Peresitene Russell M. Nelson: “Na auina mai outou i le lalolagi i lenei taimi patino … e fesoasoani e faapotopoto ia Isaraelu. E leai se mea o tupu i le lalolagi i le taimi nei, e sili atu ona taua nai lo lena [faapotopotoina]. …. O lenei faapotopotoina e tatau ona avea o mea taua uma ia te oe” (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le New Era ma le Ensign, Aok. 2018, 12, ChurchofJesusChrist.org).

Ao e suesue i le Ieremia 3:14–18; 16:14–21, o le a se mea e musuia ai oe e uiga i le faapotopotoga o Isaraelu i aso e gata ai? O a ni mea o fautua mai e nei fuaiupu e uiga i le ala e tupu ai lena faapotopotoga? O a ni malamalamaaga faaopoopo e te maua i le savali atoa a Peresitene Nelson na ta’ua i luga?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Ieremia 1:5E mafai ona tou faaaogaina le fuaiupu lenei e talanoa ai e uiga i lo tatou olaga ma le Tama Faalelagi ae tatou te le’i fananau mai. E mafai ona fesoasoani punaoa e pei o le “I Lived in Heaven” (Children’s Songbook,4) ma le “Introduction: Our Heavenly Father’s Plan” (i le New Testament Stories, 1–5) . E mafai faapefea e le iloaina o lo tatou muai olaga ona aafia ai le ala tatou te ola ai i lo tatou olaga lenei?

Ieremia 2:13; 17:13–14.Ina ia fesoasoani i tagata o le aiga e vaai faalemafaufau i nei fuaiupu, e mafai ona outou faaali atu le mea e tupu pe a e tuua le vai i totonu o se koneteina e vete pe ta’e. Mata o le a le mea ua faatusa i ai le “puna o le vai ola” ma “vaieli mavaevae”? (Ieremia 2:13). E faapefea ona tatou feinu mai i le vai ola a le Alii?

Ieremia 16:16.Na faatusa e Peresitene Russell M. Nelson ia faifaiva ma tutulimanu o loo i le fuaiupu lenei i faifeautalai i aso e gata ai (tagai “The Gathering of Scattered Israel,” Ensign po o le Liahona, Nov. 2006,81). E mafai e tagata o le aiga ona “tulituli [sue]” ni mea faitino i le tou fale ma talanoa i le ala e mafai ona e fesoasoani ai e “fai faiva” ma “tutuli” mo Isaraelu na faataapeapeina.

Ieremia 18:1–6.Ina ia suesue i nei fuaiupu, atonu tou talanoaina pe faaali atu le ala e fai ai ipuomea. O le a le savali o loo i ai i le Alii mo Isaraelu i le Ieremia 18:1–6? O le a le uiga o le ia avea ma omea i aao o le Alii? (tagai foi Isaia 64:8). Mo se isi tala ua faatusa ai i tatou i le omea a le fai ipuomea, tagai i le savali a Eder Richard J. Maynes, “O Le Olioli o le Ola Ai i se Olaga e Faatotonugalemu ia Keriso” (Ensign po o le Liahona, Nov. 2015, 27–30).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Isaraelu, Ua Valaau Mai le Atua,” Viiga, nu. 6.

Faaleleia o Lo Tatou Aoao Atu

Faaaoga tala. E tele ona aoao mai e le Faaola e faaaoga ai tala. Mafaufau i tala mai lou lava olaga e mafai ona faaolaola ai se mataupu faavae mo lou aiga. (Tagai Aoao Atu i le Ala a le Faaola, 22.)

omea i luga o le uili a le fai ipu omea

“Faauta, le aiga e o Isaraelu e, e pei o le omea i le lima o le fai ipu omea, e faapea foi outou i lo’u lima, Le aiga e, o Isaraelu” (Ieremia 18:6).