“17–23 Oketopa. Ieremia 30–33; 36; Auega 1; 3: ‘Ou te Liua Foi lo Latou Faanoanoa i le Fiafia,’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)

“17–23 Oketopa. Ieremia 30–33; 36; Auega 1; 3,” Sau, Mulimuli Mai ia te A’u—Mo Tagata Taitoatasi ma Aiga: 2022

Ata

atavane o Ieremia le perofeta

O le Tagi a Ieremia le Perofeta, mai se atavane na saunia e le Nazarene School

17–23 Oketopa

Ieremia 30–33; 36; Auega 1; 3

“Ou te Liua Foi lo Latou Faanoanoa i le Fiafia”

A o tusifaamaumauina ou lagona uunai, mafaufau pe o faapefea ona fesootai ia mataupu faavae o loo i le Ieremia ma le Auega i isi mea ua e aoaoina i le Feagaiga Tuai.

Tusifaamaumau Ou Lagona Uunai

I le taimi muamua na valaauina ai e le Alii ia Ieremia e fai ma perofeta, sa Ia ta’u atu ia te ia o lana misiona o le “liaiina, ma lepetia” (Ieremia 1:10)—ma i Ierusalema, sa matuai tele ai le amioleaga ia liaiina ma lepetia. Ae o lenei mea sa na’o se vaega o le misiona a Ieremia—sa valaauina foi o ia e “faatuina foi ma totoina” (Ieremia 1:10). O a ni mea e mafai ona faatuina pe totoina i faatafunaga tuufua na totoe ona o le fouvale o Isaraelu? E faapena foi, a tuua e le agasala po o faigata o tatou olaga i faatafunaga, e mafai faapefea ona tatou toe faatuina ma toe totoina? O le tali o loo taoto i “le La laau amiotonu” (Ieremia 33:15), le Mesia folafolaina. Ua aumaia e le Mesia “se feagaiga fou” (Ieremia 31:31)—o se feagaiga e tele atu mea e manaomia ai nai lo o se tautinoga gaogao po o le faaaliaga i fafo o le tuuto. O Lana tulafono e ao ona “i totonu ia te i [tatou],” ma tusia “i o [tatou] loto.” O le uiga tonu lena mo le Alii ia “fai mo [tatou] Atua” ae mo tatou ia “fai [Mona] nuu” (Ieremia 31:33). O se faagasologa e fai i le olaga atoa, ma o le a tatou faia lava ni mea sese ma i ai pogai e faanoanoa ai mai lea taimi i lea taimi. Ae a tatou oo i ai, ua ia i tatou le folafolaga lenei mai le Alii: “Ou te liua foi lo latou faanoanoa i le fiafia” (Ieremia 31:13).

Mo se vaaiga aoao i le tusi a Auega, tagai i le “Auega” i le Taiala i Tusitusiga Paia (scriptures.ChurchofJesusChrist.org).

Ata

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Ieremia 30–31; 33

O le a aumai e le Alii Isaraelu mai le faatagaotauaina ma faapotopoto mai i latou.

I le Ieremia 30–31; 33 sa faailoa mai ai e le Alii le “auega, ma le tagi lotulotu” (Ieremia 31:15) o le a oo i le fanauga a Isaraelu a o latou i ai i le faatagataotauaina. Ae peitai, sa ia tuuina mai foi ni upu faamafanafana ma le faamoemoe. O a ni fuaitau o loo i nei mataupu e te manatu na ono tuuina atu ia Isaraelu le toomaga ma le faamoemoe? O a ni folafolaga e te maua mai i le Alii i Lona nuu? E ono faapefea ona faatatau nei folafolaga ia te oe i aso nei?

Ieremia 31:31–34; 32:37–42

“Ma e fai outou mo’u nuu, e fai foi a’u mo outou Atua.”

E ui ina sa solia e Isaraelu la latou feagaiga ma le Alii, sa valoia e Ieremia o le a toe faatu e le Alii se “feagaiga fou” ma “e faavavau” i Lona nuu (Ieremia 31:31; 32:40). O le feagaiga fou ma tumau-faavavau o “le atoatoa lea o le talalelei a Iesu Keriso [tagai Mataupu Faavae ma Feagaiga 66:2]. E fou i taimi uma lava faatoa faaali mai ai, i le mavae ai o se periota o le liliuese. E faavavau i le uiga e faapea, o le feagaiga a le Atua ma sa olioli ai i tisipenisione uma lava o le talalelei lea na i ai tagata e naunau e talia” (Guide to the Scriptures, “New and Everlasting Covenant,” scriptures.ChurchofJesusChrist.org; faaopoopo le faatusilima).

A o e faitauina le Ieremia 31:31–34; 32:37–42, mafaufau loloto po o le a le uiga o le avea ma vaega o le nuu o le feagaiga a le Atua. E faapefea e nei fuaiupu ona aafia ai le ala e te vaai ai i lau sootaga faalefeagaiga ma le Atua? O le a le uiga o le tusia o Lana tulafono i lou loto? (tagai Ieremia 31:33).

Tagai foi i le Ieremia 24:7; Eperu 8:6–12.

O tusitusiga paia e mafai ona musuia i tatou ia salamo ma liliu atu i le Alii.

Ieremia 36

O tusitusiga paia ua i ai le mana e liliu ese ai a’u mai mea leaga.

Sa poloaina e le Alii ia Ieremia e tusifaamaumau ana valoaga i “se tusi taai,” po o se pepa taai, ma faamalamalama mai afai e faalogo tagata i nei valoaga, “atonu e … ina ia latou toe foi mai taitasi le tagata ai lona ala leaga; ma ou faamagaloina atu i la latou amioletonu; ma la latou agasala” (Ieremia 36:2–3). Ao e faitau i le Ieremia 36, mafaufau e maitau po o a ni lagona o tagata nei e uiga i nei valoaga:

O le Alii:

Ieremia:

Paruka:

Ieuti ma le Tupu o Ioakima:

Elenatana, Tilalia, ma Kimaria:

Mafaufau loloto pe o a ni ou lagona e uiga i tusitusiga paia ma lo latou matafaioi i lou olaga. Na faapefea ona fesoasoani ia te oe e te liliu ese ai mai le amioleaga?

Tagai foi Julie B. Beck, “E Fiafia Lo’u Agaga i Tusi Paia,” Ensign po o le Liahona, Me 2004, 107–9.

Auega 1; 3

E mafai e le Alii ona tuumama le faanoanoa lea tatou te oo i ai ona o le agasala.

O le tusi o Auega o se tuufaatasiga o solo na tusia ina ua mavae le faatafunaga o Ierusalema ma lona malumalu. Aisea e te manatu ai e taua ai le faasaosaoina ma o nei auega ma faaaofia ai i le Feagaiga Tuai? Mafaufau po o le a se mea na fesoasoani talafaatusa o loo i le Auega 1 ma le 3 e te malamalama ai e uiga i le faanoanoa tele na lagonaina e Isaraelu. O a ni savali o le faamoemoe ia Keriso ua e maua ai? (tagai faapitoa i le Auega 3:20–33; tagai foi Mataio 5:4; Iakopo 4:8–10; Alema 36:17–20).

Ata

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Ieremia 31:3.O faapefea ona faaalia e le Tama Faalelagi ma Iesu Keriso lo Laua “alofa e faavavau” mo i tatou? Faaali atu ni ata o mea na foafoaina e Keriso moi tatou pe na faia i le taimi o Lana auaunaga i le tino, e mafai ona fesoasoani i lou aiga ia lagona ai Lona “alofa.”

Ieremia 31:31–34; 32:38–41.Mafaufau e fai se lisi o mea o loo i nei fuaiupu ua folafola mai e le Alii pe a tatou osi feagaiga ma Ia. O a mea o aoao mai e nei fuaiupu ia i tatou e uiga i le taua o a tatou feagaiga?

E mafai foi e tagata o le aiga ona tusitusi (pe tusi se ata) i luga o fatu pepa ia se mea ua faaalia ai o latou lagona e uiga i le Faaola. O le a le uiga o le tusia o Lana tulafono i o tatou loto? (tagai Ieremia 31:33). E faapefea ona tatou faaali atu i le Alii tatou te mananao e avea ma Lona nuu?

Ieremia 36.E ono mafai faapefea ona e faaaogaina le Ieremia 36 e fesoasoani ai i lou aiga e aoao e uiga i le taua o tusitusiga paia? (tagai, mo se faataitaiga, fuaiupu 1–6, 10, 23–24, 27–28,32). Atonu e te fesili atu i se tagata o le aiga e faitau se fuaiupu mai le mataupu lenei ae tusi i lalo e sesi tagata, e pei ona sa faia e Paruka mo Ieremia. Aisea tatou te faafetai ai mo taumafaiga a tagata e pei o Paruka, o le sa faasaosaoina upu a perofeta? O a mea e mafai ona tatou faia e faaali atu ai i le Alii tatou te faatauaina Ana upu o loo i tusitusiga paia?

Auega 3:1–17, 21–25, 31–32.O se aiga, atonu tou te talanoa e uiga i auala e mafai ai ona fesootai lagona o o loo faaalia i le Auega 3:1–17 i lagona tatou te maua pe a tatou agasala. E mafai faapefea e savali i fuaiupu 21–25, 31–32 ona faatosinaina o tatou olaga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Le Alofa o Lo’u Faaola,” Tusipese a Tamaiti, 42–43.

Faaleleia o Suesuega Faaletagata Lava Ia

Saili i faaaliga. A o e mafaufau loloto i le aluga o le aso, atonu e te maua ai ni manatu ma ni uunaiga faaopoopo e uiga i mau na e suesueina. Aua e te manatu o suesuega o le talalelei o se mea e tatau ona faaavanoa ai lou taimi ae o se mea o loo e faia i taimi uma. (Tagai Aoao Atu i le Ala a le Faaola, 15.)