Keriso ma le pale tuitui ma o loo ulagia e le fitafita

O Le Ulagia o Keriso, saunia e Carl Heinrich Bloch

26 Setema–2 Oketopa.

Isaia 50–57

“Ua Na Tauave o Tatou Tigā, ma Na Tauave o Tatou Faanoanoaga”

O le auala sili ona tāua e saunia ai e aoao atu o le faitau ma mafaufau loloto i mau. O a ni ou lagona ma mea e aoaoina a o e faitau i le Isaia 50–57?

Tusi Faamaumau Ou Lagona Uunaia

aikona o le fefaasoaai

Valaaulia le Fefaasoaai

Ina ia uunaia tagata o le vasega e faasoa mai ni aafiaga a o latou faitauina le Isaia 50–57, e mafai ona e tusi i le laupapa se fuaiupu e pei Na faamalosia lo’u faatuatua ia Iesu Keriso a o o’u faitau… Valaaulia tagata o le vasega e faasoa mai le ala o le a latou faauma ai le fuaiupu.

aikona o le aoao atu

Aoao Atu le Aoaoga Faavae

Isaia 50–52

Ua susulu le lumanai mo le nuu o le Alii.

• Tatou te oo uma lava i taimi e lagona ai le vaivai. Ina ia fesoasoani i tagata o le vasega e faalagolago i le malosi o le Alii, e mafai ona e tofia i latou taitoatasi i ni nai fuaiupu mai le Isaia 51–52 ma faasoa mai le mea na latou maua o le a faamalosia ai se tasi o loo lagona le vaivai po o le faanoanoa. E mafai ona e faailoa atu o le Faaola toetū na toe ta’ua nisi o upu a Isaia i tagata i Amerika (tagai 3 Nifae 20:32–45). O a mea ua faaopoopo e upu a le Faaola i le 3 Nifae 20:30–34 i lo tatou malamalama i le taimi o le a faataunuuina ai nei valoaga?

• O le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga ua fautuaina le lisi o mea uma i le Isaia 50–52 ua valaaulia e le Alii Ona tagata e fai. Atonu e mafai e tagata o le vasega ona faasoa mai mea na latou maua ma talanoaina e uiga i nei valaaulia ia i latou. Atonu e te manao e taulai atu i valaaulia i le Isaia 51:1–2, 6–8; 52:1–3, 9–11. E faapefea ona tatou faatino i luga o nei valaaulia? E mafai ona e faasino atu o le Mataupu Faavae ma Feagaiga 113:7–10 ua saunia se faamatalaga musuia o le Isaia 52:1–2. O a mea ua faaopoopo e nei upu i lo tatou malamalama?

faatusa o Keriso o loo amoina le satauro

Ona o le Alofa, saunia e le tagata vane faatagata o Angela Johnson

Isaia 52:13–15; 53

Sa tauave e Iesu Keriso i Ona lava luga a tatou agasala ma faanoanoaga.

• Ina ia fesoasoani i tagata o le vasega e vaai faalemafaufau i upu a Isaia i le Isaia 53, e mafai ona e faaalia ni nai ata o mea na tutupu i le taimi o le Togiola a Iesu Keriso (tagai Tusiata o le Talalelei, nu. 56–60). Ona mafai lea ona e fai i tagata o le vasega e sue fuaitau i le Isaia 53 ua faamatalaina ai mea na tutupu i ata. O a mea ua aoao mai e upu a Isaia e uiga i le puapuagatia o le Faaola mo i tatou? O le a se latou fautuaga pe aisea na Ia puapuagatia ai mo i tatou? O a mea ua musuia i tatou e nei aoaoga e fai?

• Ina ia valaaulia le Agaga Paia e molimau i upumoni ua aoaoina i le Isaia 52:13–15; 53, e mafai ona e fai i tagata o le vasega e faitau le leoa nei fuaiupu a o e taina se viiga e uiga i le Togiola a Iesu Keriso. Valaaulia tagata o le vasega e vaai mo upu po o fuaitau i mau latou te lagona e faapitoa lava le tāua. Ona tuu atu lea latou te faasoa mai se mea sa latou mauaina ma o latou lagona e uiga i le Faaola. Mafaufau foi e valaaulia tagata o le vasega e faitau le Mosaea 15:10–12, lea e faamatala ai e Apinati le uiga o le fuaitau “ana fanau.” E faapefea ona fesoasoani lenei vaega tatou te malamalama ai i le Isaia 53:10?

Isaia54

E finagalo Iesu Keriso tatou te toe foi atu ia te Ia.

• O le suesueina o le Isaia54 e ono uunaia tagata o le vasega o lagona le lotovaivai ona o a latou agasala po o vaivaiga. E mafai ona e valaaulia tagata o le vasega e suesue le mataupu54 mo fuaitau po o fuaiupu ua faaalia ai lagona o le Faaola e uiga ia i tatou. O le a Lona finagalo i o tatou lagona e uiga i a tatou agasala ma vaivaiga ua tuanai? O le a Lona finagalo i o tatou lagona e uiga ia te Ia? Uunaia tagata o le vasega e faasoa mai so o se isi lava mea ua latou aoaoina e uiga ia Iesu Keriso mai lenei mataupu. E mafai ona faaopoopo le saunoaga a Peresitene DieterF. Uchtdorf i le “Punaoa Faaopoopo” i la outou talanoaga.

aikona o punaoa faaopoopo

Punaoa Faaopoopo

E mafai ona tatou maua le faamoemoe e ala mai ia Iesu Keriso.

Na aoao mai Peresitene DieterF. Uchtdorf:

“E le afaina pe ono oo i le faatāmaiaina atoa o o tatou olaga. E le afaina pe ‘ula’ula a tatou agasala, pe matuitui foi le oona, pe tuuatoatasi, tuulafoaiina, po o le nutimomoia o o tatou loto e ono oo i ai. E oo lava ia i latou ua aunoa ma se faamoemoe, o e o loo nonofo i le faanoanoa, o e ua faalataina le faatuatuaga, lafoai lo latou amiosa’o, pe upuleagaina i le Atua e mafai lava ona toe faufau.…

“O le talafou fiafia o le talalelei lenei: ona o le fuafuaga e faavavau o le fiafia ua saunia e lo tatou Tama Faalelagi alofa ma auala mai i le taulaga le iu a Iesu le Keriso, e le gata e mafai ona togiolaina i tatou mai lo tatou tulaga pa’ū ma toefuatai i le mamā, ae e mafai foi ona tatou alualu i luma e sili atu ma le mea e mafai ona mafaufauina e le tagata ma avea ai ma suli o le ola e faavavau ma ē mauaina le mamalu le mafaamatalaina o le Atua” (“O le A Ia Tuu Oe i Luga o Ona Tau’au ma Ave Oe i le Aiga,” Liahona, Me 2016,102).

Faaleleia o Lo Tatou Aoao Atu

Ola agavaa mo le taitaiga a le Agaga. A e ola agavaa i le talalelei, ua e agavaa mo le Agaga, o le faiaoga silisili lea. A o e sailia le taitaiga a le Agaga Paia, o le a Ia tuuina atu ia te oe mafaufauga, uunaiga, ma manatu fou e uiga i le ala e faafetaia’ia ai manaoga o i latou e te aoaoina. (Tagai Aoao Atu i le Ala a le Faaola, 5.)