O le Auega a Ieremia le Perofeta, mai se faatagata na saunia e le Aoga Nasareta

17–23 Oketopa

Ieremia 30–33; 36; Auega1; 3

“Ou Te Liua Foi lo Outou Faanoanoa i le Fiafia”

Mafaufau i uunaiga na e maua a’o e suesue patino ia Ieremia ma le Auega. O a sāvali mai nei mataupu e te lagona o le a sili ona aogā ia i latou e te aoaoina?

Tusi Faamaumau Ou Lagona Uunaia

Valaaulia le Fefaasoaai

Ina ia fesoasoani i tagata o le vasega e faasoa mai mea na latou aoaoina mai a latou suesuega o tusitusiga paia, e mafai ona e tusia i le laupapa fuaitau faapea Ua ou aoaoina faapea…, e i ai sa’u molimau o…, po o na ou aafia… E mafai e tagata o le vasega ona faasoa mai se mea mai ia Ieremia po o le Auega e faauma ai nei fuaitau.

Aoao Atu le Aoaoga Faavae

Ieremia 30–31; 33; Auega 1:1–7; 3:1–5

O le a aumai e le Alii Isaraelu mai le nofopologa ma faapotopoto i latou.

• O sāvali o le faamoemoe i valoaga a Ieremia e mafai ona tuuina i tagata o le vasega le faamoemoe i o latou lava tulaga. Atonu e mafai e lau vasega ona talanoaina ni tulaga e ono mafua ai ona lagona e tagata i o tatou aso le leai o se faamoemoe e pei ona lagona e tagata i le taimi o Ieremia (tagai Ieremia 30:5; 31:15; Auega 1:1–7; 3:1–5; ma o le upusii i le “Punaoa Faaopoopo”). Ona mafai lea ona e vaevae tagata o le vasega i ni vaega se tolu ma valaaulia vaega taitasi e iloilo le Ieremia30; 31; ma le 33 mo sāvali e ono mafai ona aumaia le faamoemoe i tagata i aso nei. Na faapefea ona fesoasoani le faamoemoe i le Alii ia i tatou e onosaia ai faigata?

Ieremiah 31:31–34; 32:37–42

“E fai foi a’u mo latou Atua, o i latou foi e fai mo’u nuu.”

• O le iloiloina o le Ieremia 31:31–34; 32:37–42 e mafai ona fesoasoani i lau vasega e mafaufau ai i feagaiga na latou osia. O le tasi ala e uuna’ia ai se talanoaga i nei fuaiupu o le tuu atu lea i tagata o le vasega ni nai minute e faitau ai fuaiupu ona tusi lea i se fasi pepa se fesili latou te mananao e fai i le vasega i mea na latou faitauina. Mo se faataitaiga, atonu latou te mananao e talanoaina le uiga o le tusia o le tulafono a le Atua i o tatou loto (tagai Ieremia 31:33) po o le ala e fesoasoani ai feagaiga ia i tatou ia iloa le Alii (tagai Ieremiah 31:34). E mafai ona e aoina fesili ma filifili ni nai fesili e talanoaina faatasi. O le a se mea ua tatou aoao mai nei savali lea e uunaia i tatou ina ia lototoa i le tausia o a tatou feagaiga?

E mafai e tusitusiga paia ona uunaia i tatou ia salamo ma liliu atu i le Alii.

Ieremia36

E i ai le mana i tusitusiga paia e liliu ai i tatou mai mea leaga.

• Atonu na maua ni manatu o tagata o lau vasega e uiga i tusitusiga paia a o latou suesueina le Ieremia36 i le fale. Valaaulia i latou e faasoa mai mea na latou aoaoina. E mafai foi ona e tofia tagata o le vasega i se tagata i le mataupu ma valaaulia i latou e faitau e uiga i mea na faia e lena tagata i le afioga a le Atua. E mafai e tagata o le vasega ona suesue upu ma faatinoga a le Alii (tagai fuaiupu1–3, 27–31); Ieremia (tagai fuaiupu 4–7,32); Paruka (tagai fuaiupu 4, 8–10, 14–18); Ieuti ma le Tupu o Ioakima (tagai fuaiupu 20–26); ma Elenatana, Tilaia, ma Kimaria (tagai fuaiupu25). E faapefea ona faaalia e a tatou upu ma faatinoga o tatou lagona e uiga i tusitusiga paia?

Punaoa Faaopoopo

E mafai ona outou maua i taimi uma le faamoemoe.

Na taua e Peresitene M.Russell Ballard ni tulaga e ono mafua ai ona leai se faamoemoe o nisi, ma na ia ofoina atu le fautuaga i le mea e maua ai le faamoemoe:

“O nisi o i tatou e ono iloa o o tatou olaga ua tumu i le faanoanoa, lē faamalieina, ma le faavauvau. E toatele e lagona le le mautonu e feagai ma le vevesi e foliga mai ua tumu ai le lalolagi. O isi ua feita i tagata o aiga o e ua tafefea atu i alavai i se tafega malosi, mataita o mataupu autu ua faavaivaia ma teena ai tulaga mamā. … O le toatele ua malilie i latou lava e talia le amioleaga ma le matautia o le lalolagi o se vaega e le mafai ona faaleleia. Ua leai so latou faamoemoe.…

“…O nisi o i tatou atonu ua leai atoa lava se faamoemoe ona o le agasala ma le solitulafono. E mafai e se tagata ona loloto tele le aafia i ala o le lalolagi ua ia vaai ai i le leai o se auala e sao ai ma leai atoa ai lava se faamoemoe. O la’u tatalo i e ua pa’u’ū atu i totonu o lenei mailei a le fili o le aua lava nei fiu! E tusa lava po o le a le foliga faaletonu o mea po o le popole latou te oo i ai, faamolemole talitonu mai ia te a’u, e mafai lava ona outou maua le faamoemoe i taimi uma. Taimi uma” (“O le Olioli i le Faamoemoe ua Faataunuuina,” Ensign, Nov. 1992, 31–32).

“E faigofie lava, o lo tatou faamoemoe e tasi mo le saogalemu faaleagaga i nei taimi faigata o le liliu atu o o tatou mafaufau ma loto ia Iesu Keriso. … O le faatuatua i le Atua ma i Lona Alo, o Iesu Keriso, e matuai tāua lava mo i tatou e faatumau ai se vaaiga paleni i taimi o tofotofoga ma faigata” (“O le Olioli i le Faamoemoe ua Faataunuuina,”32).

Faaleleia o Lo Tatou Aoao Atu

Mulimuli i le Agaga. E le mafai ona e muai iloa pe o le a faapefea āluga o lesona taitasi, ae a e faalogo i uunaiga a le Agaga, o le a Ia taialaina oe. Afai e te saunia faaleagaga, e mafai e le Alii ona tuuina atu ia te oe “i le minute tonu lava, mea e te fai atu ai” (Mataupu Faavae ma Feagaiga 100:6; tagai foi Aoao Atu i le Ala a le Faaola, 10).