O Iesu i le Sunako i Nasareta, saunia e GregK. Olsen

3–9 Oketopa

Isaia 58–66

“E Afio Mai Foi le Faaola i Siona”

A o e suesueina aoaoga faavae matagofie i nei mataupu, valaaulia le Agaga e taiala oe i sāvali o le a sili ona aogā i tagata o le vasega.

Tusi Faamaumau Ou Lagona Uunaia

Valaaulia le Fefaasoaai

E mafai ona e valaaulia tagata o le vasega e tusi i le laupapa mau fesootai mo fuaiupu na uunaia i latou i le taimi o la latou suesuega i lenei vaiaso. Ona mafai lea ona outou sue faatasi, o se vasega nei fuaiupu ma talanoa e uiga i upumoni o loo maua iina. O nei manatu e ono taitai atu i se talanoaga anoa i se tasi pe sili atu o mataupu faavae ua lisi i lalo.

Aoao Atu le Aoaoga Faavae

Isaia 58:3–12

O le anapogi e aumaia ai faamanuiaga.

• Ina ia fesoasoani i tagata o le vasega e talanoaina pe aiseā ma pe faapefea ona poloaiina i tatou e le Alii e anapopogi, e mafai ona e fatuina ni koluma se lua i le laupapa e faaigoa “Aua Tou Te Anapopogi e Pei o le Asō” ma le “Le Anapogi Ou Te Loto i Ai.” Ona mafai lea e tagata o le vasega ona faitau le Isaia 58:3–7, ma faatumu le koluma muamua i faamatalaga o le ala na anapopogi ai Isaraelu ma le koluma lona lua i faamatalaga o le anapogi e finagalo i ai le Alii. E faapefea e nei faamatalaga ona aafia ai le ala tatou te vaai atu ai i le anapogi? E mafai foi e tagata o le vasega ona faasoa mai pe faapefea, i a latou aafiaga, ona taitai atu e le anapogi i tatou i faamanuiaga ua folafola mai e le Alii i fuaiupu 8–12.

• Atonu na oo nisi o tagata o le vasega i ni aafiaga na faamatala atu ai i nisi pe aisea tatou te anapopogi ai. Valaaulia i latou e faasoa mai mea na latou fai atu ai. E mafai foi ona e valaaulia se tasi o le au epikopo e talanoa e uiga i le faaaogaina o taulaga anapogi. Pe mafai ona e faasoa atu se tasi o faataitaiga mai le sāvali a Peresitene Henry B. Eyring “E Le o Lenei ea le Anapogi Ou Te Loto I Ai?” (Liahona, Me 2015, 22–25). E faapefea ona fesoasoani le anapogi ma le totogiina o taulaga anapogi e “tatalaina fusi o le amo” a i tatou lava ma isi? (Isaia 58:6).

Isaia 61:1–3; 63:7–9

O Iesu Keriso o lo tatou Faaola ma le Togiola.

• Ina ua faailoa atu e Iesu Keriso i tagata o Nasareta o Ia o le Mesia, na Ia sii mai le Isaia 61:1–3 (tagai Luka 4:16–21; tagai foi i le vitio “Jesus Declares He Is the Messiah,” ChurchofJesusChrist.org). Atonu e mafai e tagata o le vasega ona faitau le Isaia 61:1–3 ma talanoa pe aisea ua lelei ai le faamatalaina e nei fuaiupu o le misiona a le Faaola. E mafai ona e lisiina i le laupapa mea taitasi na faauuina le Faaola e fai ma talanoaina le uiga o mea taitasi. Na faapefea ona faataunuu e le Faaola nei vaega o Lana misiona i Lona soifuaga faaletino? Na faapefea ona Ia faataunuuina nei matafaioi i o tatou olaga?

• E mafai foi e tagata o le vasega ona faitau le Isaia 63:7–9 ma faasoa mai le ala na faamanuiaina ai e Iesu Keriso i latou i nei ala.

• O loo faaaoga e leIsaia 61:1–3 le gagana matagofie ma faasolo e faamatala ai le mana o Iesu Keriso e laveai ai le ua foliga mai ua faaumatiaina. Ina ia fesoasoani e faamanino nei fuaiupu, mafaufau e faasoa atu se tala e uiga i se mea na faapea ua leiloa pe ua faaumatia ae na liua i se mea na sili atu le matagofie. Mo se faataitaiga, tagai i le vitio “Provo City Center Temple” (ChurchofJesusChrist.org; tagai foi “Punaoa Faaopoopo”) po o le tala i le amataga o le savali a Peresitene DieterF. Uchtdorf, “O Le A Ia Tuu Oe i Luga o Ona Tauau ma Ave Oe i le Aiga” (Liahona, Me 2016, 101–4). E mafai e tagata o le vasega ona talanoa i le ala na latou vaai ai i le Alii ua tuu mai i tagata se mea matagofie ina ua latou manatu ua le aogā o latou olaga.

Isaia 65:17–25

I Lona Afio Mai Faalua, o le a “faia [e le Alii] le lagi fou ma le lalolagi fou.”

• Ua faamatalaina e leIsaia 65:17–25 tulaga o le lalolagi pe a mavae le Afio Mai Faalua o le Faaola. E mafai ona e valaaulia tagata o le vasega e iloilo nei fuaiupu ma saili mo ni tali i fesili faapenei: O le a ese faapefea le olaga i le “lalolagi fou” mai le olaga o i ai nei i le lalolagi? O a ni mea ua e maua i nei fuaiupu e tatau ai ona e olioli?

Punaoa Faaopoopo

O le Alii “e le tuua i tatou i le efuefu.”

Ina ua uma ona faamatala le ala na toeitiiti faaumatia ai e le afi le Provo Tabernacle, ma mafai ona toefausia o le Malumalu o Provo City Center, na saunoa ai Sister Linda S. Reeves: “Ua faataga i tatou e le Alii ia tofotofoina ma suesueina, o nisi taimi i lo tatou mafaia silisili. Ua tatou vaaia olaga o e pele—ma atonu o i tatou lava—ua susunuina lava i le eleele ma mafaufau pe aisea e faataga ai e se Tama Faalelagi alofa ma agalelei ona tutupu nei mea. Ae Na te le tuua i tatou i le efuefu; e tu o Ia ma lima mafola, ma le naunau e valaaulia i tatou ia o mai ia te Ia. Ua Ia fausia o tatou olaga i ni malumalu matagofie lea e mafai ai ona mafuta Lona Agaga e faavavau” (“Avatu Faamanuiaga o a Tatou Feagaiga,” Liahona, Nov. 2013,119).

Faaleleia o Lo Tatou Aoao Atu

Saili e malamalama ia i latou e te aoaoina. O tagata taitoatasi e te aoaoina e i ai se tulaga, manatu, ma ni taleni tulaga ese. Mafaufau i nei eseesega a o e saili e fesoasoani ia aoao tagata uma i ni ala aogā ma manatua pea. (Tagai Aoao Atu i le Ala a le Faaola, 7.)