Vao Paia, saunia e Brent Borup

12–18 Setema

Isaia 13–14; 24–30;35

“O Se Galuega Tele ma le Ofoofogia”

A o le’i mafai ona e fesoasoani i isi ia maua upumoni i le tusi a Isaia, e manaomia lou mauaina o upumoni mo oe lava. A o e faitau i lenei vaiaso, mafaufau po o a upumoni e te lagona ua uunaia oe e faamamafa i le vasega.

Tusi Faamaumau Ou Lagona Uunaia

Valaaulia le Fefaasoaai

Ina ia uunaia tagata o le vasega e faasoa mai mea ua latou aoaoina mai ia Isaia, e mafai ona e fesili ia i latou pe faapefea ona latou tali atu i se tasi e faapea mai, “O le tusi a Isaia e matuai faigatā lava ona malamalama i ai.” O a ni mea ua fesoasoani ia i tatou e maua ai uiga o aoaoga a Isaia? O a ni fuaitau o mau na uunaia ai i tatou?

Aoao Atu le Aoaoga Faavae

Isaia 24:21–23; 25:6–8; 26:19; 28:16

Ua faasino i tatou e tusitusiga a Isaia ia Iesu Keriso.

• E pei o Nifae, atonu na fiafia tagata o lau vasega i le molimau a Isaia ia Iesu Keriso (tagai 2 Nifae 11:2). E mafai ona e fai ia i latou e faasoa mai ni fuaiupu na latou maua ia latou faitauga i lenei vaiaso na aoaoina i latou e uiga i le Faaola. Pe mafai foi ona e valaaulia tagata o le vasega e faasoa mai mea na latou aoaoina e uiga ia Iesu Keriso mai le Isaia 24:21–23; 25:6–8; 26:19; 28:16 po o isi fuaiupu na e maua i lau suesuega. Aisea e tāua ai nei upumoni ia i tatou?

  

  E Toe Afio Mai o Ia e Pule ma Nofotupu, saunia e MaryR. Sauer

Isaia 24:1–5; 28:1–8; 29:7–10; 30:8–14

O le liliuese o lona uiga o le liliuese mai le Alii ma Ana perofeta.

• O le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga ua fautuaina mai le mafaufau i nisi o tala na faaaogā e Isaia e faamatala ai taunuuga o le liliuese mai le Alii ma le teena o Ana perofeta. Valaaulia tagata o le vasega e faasoa mai ni mea sa latou aoaoina. Pe mafai ona e valaaulia i latou e iloilo taitoatasi se tasi o nei sāvali: Isaia 24:1–5; 28:7–8; 29:7–10; 30:8–14. E faalagolago i mea na latou faitauina, e mafai ona latou faauma lenei fuaiupu: “Afai tatou te liliuese mai le Alii, ua pei i tatou…” O a mea e mafai ona tatou faia e tumau ai le faatuatua i le Alii ma aloese mai le liliuese? (Tagai “Punaoa Faaopoopo” mo ni fautuaga.) E faapefea ona faamanuia e le Alii i latou o e tumau i le faatuatua ia te Ia?

• Ina ia amata se talanoaga i uiga ma amioga e mafai ona taitai atu ai i tatou i le liliuese, e mafai ona e valaaulia tagata o le vasega e suesue le Isaia 24:1–5; 28:1–8; 29:7–10; 30:8–14. Fai ia i latou e saili mo mea na mafaufau ma faia e tagata i le taimi o Isaia. Fai se pepa lapatai i le laupapa e faapea mai Lapataiga: O uiga ma amioga e mafai ona taitai atu i le liliuese. E mafai e tagata o le vasega ona lisi i luga o le laupapa mea latou te mauaina i fuaiupu. Tuu atu ia i latou se avanoa e faasoa mai ai le ala latou te puipuia ai i latou lava po o latou āiga mai le liliuese.

Isaia 29:13–24; 30:18–26;35

E mafai e le Alii ona toe fuatai mea na leiloloa pe ta’ei.

• O se fesili lenei e mafai ona e tusi i le laupapa e mafai ona fesoasoani i tagata o le vasega e mafaufau ai i le Isaia 29: E faapefea ona fesootai tusitusiga a Isaia i le Toefuataiga o le talalelei i o tatou aso? Uunaia i latou e mafaufau i lenei fesili a o latou faitau le leoa le Isaia 29:13–24. Afai latou te manaomia le fesoasoani, e mafai foi ona latou iloiloina fuaitau e pei o nei: 2 Nifae 27:6–26; Iosefa Samita—Talafaasolopito 1:17–19, 63–65. A uma ona latou talanoa i le fesili i le laupapa, e mafai ona latou talanoa pe aisea e lelei ai upu “tele” ma le “ofoofogia” (Isaia 29:14) e faamatala ai le Toefuataiga o le talalelei. O a mea ua tatou aoao e uiga i le Toefuataiga mai “The Restoration of the Fulness of the Gospel of Jesus Christ: A Bicentennial Proclamation to the World”? (ChurchofJesusChrist.org).

• O leMataupu 30 ma le35 o le Isaia o loo i ai ni nai sāvali e mafai ona musuia ai le faatuatua sili atu i le mana o le Alii e faamanuia ai i latou e liliu atu ia te Ia. Ina ia fesoasoani i tagata o le vasega ia maua nei sāvali, e mafai ona e valaaulia i latou e suesue a le o le Isaia 30:18–26 po o le Isaia35. Fai atu ia i latou e faasoa mai ni upu po o fuaitau latou te maua e mafai ona fesoasoani i se tasi e liliu atu ai i le Alii mo le laveaiga.

Punaoa Faaopoopo

Tumau i le faatuatua i le Alii ma Lana Ekalesia.

Na tuuina mai e Peresitene M.Russell Ballard lenei fautuaga e fesoasoani ia i tatou e tumau ai i le faatuatua i le Alii ma Lana Ekalesia:

“E manaomia ona tatou lagonaina se liuaina faifai pea e ala i le faateleina o lo tatou faatuatua ia Iesu Keriso ma lo tatou faamaoni i Lana talalelei i o tatou olaga atoa—e le na o le faatasi, ae ia faifai soo [tagai Alema 5:26].…

“…O afioga a le Alii o loo maua i tusitusiga paia ma aoaoga a perofeta ma aposetolo. Ua latou aumaia se fautuaga ma le taitaiga e faapea, a mulimulita’ia, o le a avea o se ofufaaola faaleagaga ma o le a fesoasoani ia i tatou ia iloa ai le auala e pipiimau ai i lima uma e lua.…

“E faaopoopo atu i le atiaeina o mausa o le faitauina o tusitusiga paia a le tagata lava ia, e manaomia ai ona tatou avea e pei o atalii o Mosaea ma tuu atu i tatou lava ‘i le tatalo tele ma anapogi’ [Alema 17:3]” (“Nofo i Totonu o le Vaa ma Pipiimau!” Liahona, Nov. 2014, 90–91).

Faaleleia o Lo Tatou Aoao Atu

Faaali atu lou talitonu i taumafaiga a tagata aoao. Atonu e lagona e nisi tagata i lau vasega le le mautonu o lo latou mafaia ona aoao le talalelei. Faamautinoa ia i latou e faapea a o latou taumafai e aoao, o le a aoao i latou e le Agaga Paia. (Tagai Aoao Atu i le Ala o le Faaola, 29–30.)