Ko Hono Fakahaofi ʻo e Meʻa Naʻe Molé, tā ʻe Michael T. Malm

15–21 ʻAokosi

Saame 49–51; 61–66; 69–72; 77–78; 85–86

“Te u Fakahā ʻa e Meʻa Kuó Ne Fai Ki Hoku Lotó”

Fakakaukau ki he fale‘i ʻa ‘Eletā Tēvita A. Petinaá ʻi hoʻo teuteu ke faiakó: “Ko e lea mo e fakamatala ‘ataʻatā peé ‘oku ʻikai ko e faiako ia. ʻOku kau ʻi [hono akoʻi] ʻo e ongoongoleleí ʻi he founga ʻa e ʻEikí ʻa e mamatá mo e fakafanongó pea mo e ʻiló kimuʻa ʻi he fakamatalá” (“Becoming a Preach My Gospel Missionary,” New Era, Oct. 2013, 6).

Lekooti e Ngaahi Ongo ʻOkú ke Maʻú

Fakaafeʻi e Feʻinasiʻakí

Ko ha founga ‘e taha ke fakaafeʻi ai ‘a e kau mēmipa ʻo e kalasí ke nau vahevahe ha me‘a naʻa nau lau he ʻuike ní ko hano hiki ʻi he palakipoé ʻa e “‘E fiefia lahi hoku loungutú” pe “ʻE talanoa ʻa hoku ʻeleló foki ki hoʻo māʻoniʻoní (Saame 71:23, 24). ʻE lava ke vahevahe ʻe he kau mēmipa ʻo e kalasí ʻa e meʻa ne nau maʻu ʻoku tokoni ke nau “fiefia lahi” pe “talanoa … ki [he] māʻoniʻoni [ʻa e ʻEikí].”

Akoʻi e Tokāteliné

Saame 51; 85–86

“Ko koe, ‘e ʻEiki, ʻokú ke angalelei pea faʻa fakamolemole.”

• ‘Oku fakamatalaʻi ‘e he Saame 51 ʻa e ngaahi ongo ‘oku maʻu ʻe hatau tokolahi ʻi heʻetau feinga ke fakatomala mo fakamolemoleʻí. Ke tokoni ke mahino lelei ange ki he kau mēmipa ʻo e kalasí ʻa e fakatomalá mo nau ongoʻi ʻoku ueʻi kinautolu ke nau faʻa fakatomala, te ke ala fokotuʻu ange ke nau fakatotolo ʻi he Saame 51 mo fakakaukauʻi ʻa e fehuʻi ko ʻení: ʻOku ʻuhinga ki he hā ke fakatomalá? Pea tuku ke nau fakamatalaʻi ha ngaahi tali ʻe ala maʻu. ʻOku ʻi he (“Ngaahi Maʻuʻanga Tokoni Kehé” ha ngaahi fakakaukau ʻaonga.) Ko e hā ‘oku ngali taʻefiemaʻua ai ʻa e fakatomalá he taimi ʻe niʻihí? Ko e hā ‘oku tau maʻu ‘i he saame ko ʻení te ne lava ʻo ʻai ʻa e fakatomalá ke ongo fakafiefia?

• Te tau fakamatala‘i fēfē ʻa e ongo ko ia ʻoku maʻu he fakamolemole ʻo e angahalá tuʻunga ʻi he mālohi fakalelei ʻo Sīsū Kalaisí? Fakaafe‘i ʻa e kau mēmipa ‘o e kalasí ke nau vahevahe ʻenau ngaahi fakakaukaú, pea poupou‘i ke nau kumi ha ngaahi fakamatala ʻi he Saame 51; 85–86 ʻokú ne fakamatalaʻi ʻa e ola ʻo ʻEne fakamolemole mo e fakamaʻá ʻi heʻetau moʻuí (hangē ko ʻení, vakai, Saame 51:1–2, 7–12; 85:2–9). Fakakaukau ke ke faka‘aliʻali ha ngaahi fakatātā pe ngaahi me‘a ke tokoni ki he kau mēmipa ʻo e kalasí ke nau sioloto ki he ngaahi kupuʻi lea ko ʻení. Hili ia pea ʻe lava ke vahevahe ʻe he kau mēmipa ʻo e kalasí ʻenau ngaahi ongo fekauʻaki mo e Fakamoʻui ko Sīsū Kalaisí pea mo ʻEne āfeitaulalo ke fai e fakalelei maʻa ʻetau ngaahi angahalá kae lava ke fakamolemoleʻi kitautolú. Te mou lava ke hivaʻi fakataha ha himi fekauʻaki mo e feilaulau fakalelei ʻa e Fakamoʻuí, hangē ko e “ʻOku Fakaofo” (Ngaahi Himí, fika 102).

• Koeʻuhí ke tau fakatomala, he ʻikai ngata pē ʻi he fiemaʻu ʻetau tui ko Sīsū Kalaisi pē te ne lava ʻo fakamaʻa kitautolú ka te Ne fakahoko. Mahalo kuo maʻu ʻe he kau mēmipa ʻo e kalasí he uiké ni, ha ngaahi fakamatala ʻi he Saame 51; 85–86 kuó ne fakamālohia ʻenau tui ki he loto fiemālie ʻa e ʻEikí ke fakamolemoleʻí. Poupouʻi kinautolu ke nau vahevahe ʻa e meʻa kuo nau maʻú. Te ke lava foki ʻo fakahinohino kinautolu ki he Saame 86:5, 13, 15 mo ʻeke ange pe ko e hā ʻoku akoʻi ʻe he ngaahi vēsí ni fekauʻaki mo e ʻEikí. ʻE ala ʻuhinga ki he hā ʻokú Ne “mohu ʻaloʻofa mo e moʻoni”? (veesi 15). Ko e hā ʻoku mahuʻinga ai ke tau ʻiloʻi ʻení?

Saame 66:5–20

‘E lava ʻetau fakamoʻoni kia Sīsū Kalaisí ʻo tokoni ki ha niʻihi kehe ke nau haʻu kiate Ia.

• Ko e taha ‘o e ngaahi tāpuaki maʻongoʻonga ʻo e fakataha kotoa ʻi he Lautohi Faka-Sāpaté ko e faingamālie ke maʻu ha ivi mei he tui mo e fakamoʻoni ʻa e kau muimui kehe ʻo Sīsū Kalaisí. Ke maʻu ʻe hoʻo kalasí ʻa e faingamālié ni, te ke lava ʻo kole ki he kau mēmipa ʻo e kalasí ke nau lau ʻa e Saame 66:16 pea fakalaulauloto ki he fehuʻi ko ‘ení: Kapau te ke “fakahā ʻa ia kuo fai [ʻe he ʻEikí] ki [ho] laumālié,” ko e hā te ke fakahāʻí? ʻI heʻenau fakalaulaulotó, te nau lava ʻo lau ʻa e veesi 5–20 ke maʻu ha ngaahi fakakaukau. Tuku ke nau hiki ʻenau ngaahi talí. Hili ia pea fakaafeʻi ke nau fe- “fakahā”- ʻaki —ʻi ha fanga kiʻi kulupu iiki pe ki he kalasí fakakātoa—ʻa e meʻa kuo fai ʻe Sīsū Kalaisi maʻa honau laumālié.

  

  Te tau lava ʻo vahevahe mo ha niʻihi kehe ʻa ʻetau fakamoʻoni ki he meʻa kuo fai ʻe he ʻEikí maʻatautolú.

Ngaahi Maʻuʻanga Tokoni Kehe

ʻOku ʻuhinga ʻa e fakatomalá ko e liliu.

Na‘e fakamatalaʻi peheni ‘e Palesiteni Lāsolo M. Nalesoni ʻa e fakatomalá:

“Ko e taimi ʻoku kole mai ai ʻa Sīsū kiate koe mo au ke ta ʻfakatomalá,’ ko ʻEne fakaafe ia ke liliu ʻeta fakakaukaú, ʻeta ʻiló, hota laumālié—pea naʻa mo e anga ʻo ʻeta moʻuí. Ko ʻEne kole ia ke liliu e anga ʻo ʻeta ʻofá, fakakaukaú, ngāué, fakaʻaongaʻi hota taimí, tōʻonga ki hota uaifí, akoʻi ʻeta fānaú, pea naʻa mo hono tokangaʻi hota sinó.

“ʻOku hala ha meʻa ʻe toe fakatauʻatāina ange, fakaʻeiʻeiki ange, pe toe mahuʻinga ange ki heʻetau fakalakalaka fakafoʻituituí ka ko e tokanga fakaʻaho maʻu pē ki he fakatomalá. Ko e fakatomalá ʻoku ʻikai ko ha meʻa pē ʻoku hoko; ko ha ngāue. Ko e kī ia ki he fiefia mo e nonga ʻo e ʻatamaí. Ko e taimi ʻoku fakatahaʻi ai mo e tuí, ʻoku malava leva ʻe he fakatomalá ʻo ʻai ke tau maʻu ʻa e mālohi ʻo e Fakalelei ʻa Sīsū Kalaisí. …

“Ko e taimi ʻoku tau fili ai ke fakatomalá, ʻoku tau fili ke liliu! ʻOku tau fakaʻatā ke liliu kitautolu ʻe he Fakamoʻuí ki hotau tuʻunga lelei tahá. ʻOku tau fili ke tupulaki fakalaumālie mo fiefia—ʻa e fiefia ʻo e huhuʻi ʻiate Iá. Ko e taimi ʻoku tau fili ai ke fakatomalá, ʻoku tau fili ai ke tatau ange mo Sīsū Kalaisi!” (“Te Tau Lava ʻo Fai Lelei Ange pea Toe Lelei Ange,” Liahona, Mē 2019, 67).

Ko Hono Fakatupulaki ʻEtau Founga Akoʻí

Fai ha ngaahi fehuʻi ʻoku ongo ki he lotó mo e ʻatamaí. “Kole ki he kau akó ke nau vahevahe ʻa ʻenau ongo fekauʻaki mo ha potufolofola, anga ʻo e ongo ʻa e kakaí ki he folofolá, pe ko e fekauʻaki ʻa e ngaahi moʻoni ʻi he potufolofolá mo ʻetau moʻuí” (Ko e Faiako ʻi he Founga ʻa e Fakamoʻuí, 31).