“7–13 Novemba. Hosea 1–6; 10–14; Joel: ‘Bambae Mi Lavem Yufala long Olgeta Tingting blong Mi,’” Kam Folem Mi—Blong Sandei Skul: OlTesteman 2022 (2021)
“7–13 Novemba. Hosea 1–6; 10–14; Joel,” Kam Folem Mi—Blong Sandei Skul: 2022
7–13 Novemba
Hosea 1–6; 10–14; Joel
“Bambae Mi Lavem Yufala long Olgeta Tingting blong Mi”
Taem yu stadi mo stap rere long wik ia, tingting long wanem gudfala mesej long ol buk blong Hosea mo Joel we i save mitim ol nid blong olgeta we yu stap tijim.
Raetemdaon Ol Filing mo Tingting blong Yu
Invaetem Ol Memba blong Serem Wanem Oli Gat
Blong helpem ol memba blong klas blong serem wanem oli bin lanem long wik ia, yu save invaetem olgeta blong raetem long bod wan toktok o wan sentens we i givim insperesen long olgeta long wik ia. Afta oli serem from wanem toktok ia o sentens ia i gat mining long olgeta. Ol toktok mo sentens ia oli save help blong gaedem yu long lesen we yu stap tijim.
Stap Tijim Doktrin
Lod i invaetem yumi oltaem blong kambak long Hem.
-
Yu maet wantem blong statem tok storian blong Hosea 1–3 wetem raetem mared long bod mo askem ol memba blong klas blong listim ol toktok we oli go wetem mared. ?Olsem wanem nao taem yumi mekem kavenan wetem Lod i olsem taem yumi mared? ?Olsem wanem nao taem yumi brekem kavenan ia i semmak olsem yumi no fetful long hasban o waef blong yumi? (luk long Hosea 2:5–7,13). Afta klas i save tokabaot olsem wanem rilesensip we i stap bitwin Hosea mo Goma i wan simbol blong rilesensip we Lod i gat wetem ol pipol blong Hem. ?Wanem nao Hosea 2:14–23 mo Hosea14 i tijim yumi abaot lav mo sore blong Lod? Olsem wanem nao yumi soem lav mo respek blong yumi long Lod?
-
Hosea14 i tokbaot gud plante gudfala promes we Lod i mekem long Haos blong Isrel sapos oli kambak long Hem. Maet ol memba blong klas oli save lukluk long japta ia blong lukaotem ol promes ia. ?Wanem nao Lod i talem bae Hem i mekem? Wanem nao sentens ia “Bambae mi lavem yufala long olgeta tingting blong mi” i maet minim? (ves4). Wanem nao ol simbol abaot ol plant oli ripresentem long ves 5–8 i tijim yumi abaot ol blesing blong Lod ingkludum blesing blong sakem sin long yumi?
Lod i givim long man blong sin we i ripresentem Isrel sapos i akseptem o sakemaot fasin blong pemaot man. Droing i kam long Deb Minnard, laesens i kam long goodsalt.com
Fasin blong wosipim God man i mas gat filing ia insaed long hem, be i no long skin blong hem nomo.
-
Hosea 6:6 mo Joel 2:12–13 i tokbaot sakrifaes blong animol mo fasin ia blong terem klos olsem saen blong harem nogud. Nomata we fasin ia i stap lus finis tedei, ol ves ia oli save lidim toktok raon abaot wanem nao i moa impoten long Lod. Yufala i maet rid tugeta long Hosea 6:6 mo toktok raon long wanem nao ves ia i maet minim. Invaetem sam long ol klas memba blong ridim Matiu 9:10–13 mo ol narawan blong ridim Matiu 12:1–8. Nao ol memba blong klas oli save tijim wanwan long olgeta olsem wanem ol iven we i bin stap tekem ples long taem blong ministri blong Sevya i helpem yumi andastanem ol prinsipol we oli tijim long Hosea 6:6. ?Olsem wanem yumi save laef folem prinsipol ia long dei blong yumi?
Yufala i save ridim tugeta Joel 2:12–13 mo toktok raon long wanem i maet minim blong terem hat blong yumi be i no blong terem klos blong yumi nomo. ?Wanem yumi lanem long ol ves ia abaot wanem i minim blong stap olsem ol tru disaepol blong Jisas Kraes?
“Mi bambae Mi givim Spirit blong mi long olgeta man.”
-
Blong statem wan tok storian blong Joel2, yu save serem wetem klas wanem Moronae i talem abaot profesi ia taem hem i visitim Josef Smit long 1823 (luk long Josef Smit—Histri 1:41). Ol memba blong klas oli save serem olsem wanem oli filim ol profesi long Joel 2:28–32 oli fulfil long dei blong yumi. Yu save toktok raon tu long olsem wanem ol toktok blong Elda DavidA. Bednar long “Sam Moa Risos” i go wetem profesi blong Joel. Ol memba blong klas oli maet toktok raon long wanem i minim long olgeta blong filim Tabu Spirit i fulap long olgeta long evri dei laef. ?Wanem nao yumi save mekem sapos yumi filim se yumi no fulap gud long Spirit? ?Olsem wanem yumi save helpem ol boe blong yumi mo ol gel blong yumi oli kasem Spirit? (ves28).
Sam Moa Risos
“Yumi save dipen long Tabu Spirit blong gaedem yumi.”
Elda DavidA. Bednar i bin tijim:
“Oltaem yumi mekem i had long yumi blong kasem revelesen blong yumiwan. Mi stap minim se, promes blong kavenan i, taem yumi respektem kavenan blong yumi, bae Tabu Spirit i stap oltaem olsem kompanion blong yumi. Be yumi tokbaot mo tritim olsem se yumi stap harem voes blong Lod tru long Spirit blong Hem i wan samting we i no stap hapen evri taem. … [Spirit] i mas stap wetem yumi evri taem. I no se evri smosmol seken, be sapos wan i traem bes blong hem—yu no nid blong stap stret evriwan—be sapos yu mo mi i mekem bes blong yumitu mo no komitim bigfala nogud fasin, bae yumi save putum tras long Tabu Spirit blong gaedem yumi.…
“…I luk olsem yumi biliv se Tabu Spirit i olsem tanda, i bigwan, mo i olsem laetning, be hem i kwaet mo i smol mo i gro sloslo folem taem. I no nid blong yu luk save se yu stap kasem revelesen long taem we yu stap kasem revelesen” (“Elda DavidA. Bednar Discussion” [evening with a General Authority, Feb.7, 2020], broadcasts.ChurchofJesusChrist.org).
Kam Antap long Fasin blong Yumi blong Stap Tij
Stap welkamem. Olgeta we oli stap lan oli nid blong save se yu kea abaot olgeta mo gro blong olgeta long saed blong spirit. Wan wei blong soemaot hemia long olgeta, yu save talem halo long olgeta wetem wan gudfala smael taem oli kam insaed long klas. (Luk long Teaching in the Savior’s Way, 15