Jona long Soa blong Nineve, i kam long DanielA. Lewis

21–27 Novemba

Jona; Maeka

“Oltaem Yu Yu Glad blong Soemaot long Mifala we Yu Stap Lavem Mifala Tumas”

Fasin blong jenisim laef we i stap oltaem i nidim moa bitim wan gudfala Sandei Skul lesen wan taem long wan wik. Leftemap tingting blong ol memba blong klas blong lukaotem blong gat ol eksperiens long saed blong spirit truaot long laef blong olgeta.

Raetemdaon Ol Filing mo Tingting blong Yu

Invaetem Ol Memba blong Serem Wanem Oli Gat

Tingting blong raetem ol sentens olsem olgeta ia antap long bod: Wan trutok we oli rimaenem mi long hem, Mi lanem wan niu samting, mo Wan samting we mi laekem blong stadi moa long hem. Givim taem long ol memba blong klas blong lukluk bak long wanem oli bin lanem long Jona mo Maeka we i go wetem wan long ol sentens we i stap antap long bod.

Stap Tijim Doktrin

Jona 1–4; Maeka 7:18–19

Lod i gat sore long olgeta we oli tanem olgeta i go long Hem.

Rimaenem klas blong yu se sore blong Lod i save helpem olgeta blong filim lav blong hem we Hem i gat long olgeta, mo givim olgeta insperesen blong sakem sin. Yu save invaetem klas blong ridim Maeka 7:18–19 mo listim long bod sam samting we i hapen long Jona 1–4 we i soem se Lod i gat bigfala sore. ?Wanem ol nara eksperiens blong bigfala sore blong God we yumi save serem—we i kamaot long skripja o long wanwan laef blong yumi?

Eksperiensem sore blong Lod i save givim insperesen long yumi blong save gat moa sore. Hemia wan tingting we i save helpem klas blong yu blong lanem abaot sore insaed long buk blong Jona. Yu save raetem kwestin olsem hemia long bod: Wanem nao sore blong God, we oli soem long Jona 1–4, i tijim mi blong gat moa sore? Wanwan memba blong klas oli save jusum wan japta blong luklukbak mo lukaotem ansa blong kwestin ia. Givim taem long ol memba blong klas blong oli tingting bak long ol janis we oli gat blong tekemaot fasin blong olgeta blong jajem man mo riplesem wetem fasin blong gat sore long olgetawan mo ol narawan.

Yumi save serem gospel wetem ol pikinini blong God.

Jona1; 3–4

Evri pikinini blong God oli nidim blong harem gospel.

• Wan wei blong karemaot ol lesen aot long stori blong Jona i blong komperem wetem ol stori blong ol misinari insaed long buk blong Momon. Krietem tu(2) kolom long bod wetem ol taetel ia Jona mo Alma mo ol boe blong Mosaea. invaetem klas blong oli komperem tingting blong Jona abaot hem blong go mo tijim ol pipol blong Nineve (luk long Jona1; 3–4) wetem tingting blong ol boe blong Mosaea abaot tijim Ol Man blong Leman (Luk long Mosaea 28:1–5; Alma 17:23–25). ?Wanem nao yumi lanem aot long eksasaes ia abaot serem gospel wetem evri pikinini blong God?

• Olsem Jona plante long yumi, yumi filim fraet lelebet blong invaetem ol narawan blong kam long Lod. ?Wanem sam long olgeta risen we i mekem Jona i ronwe long koling blong hem blong go givim woning long ol pipol blong Nineve? ?From wanem nao samtaem yumi stap fraetfraet blong serem gospel? Ol memba blong klas oli save serem ol wei we Lod i bin helpem olgeta blong winim fraet. Kaonsel we i kam long Presiden HenryB. Eyring long “Sam Moa Risos” i maet helpem ol memba blong klas oli luksave ol prinsipol we i save givim paoa long ol hadwok blong yumi blong serem gospel.

Maeka 6:6–8

“Wanem nao Lod i wantem long yu?”

• Maeka 6:6–7 i talemaot sam pat blong seremoni blong bifo blong ol man Jiu. Be sam samting i moa impoten long God bitim ol seremoni we i kam aotsaed. Invaetem ol memba blong klas blong faenem ol samting ia long ves8. Maet ol memba blong klas oli save luksave ol impoten toktok long ol ves ia mo toktokraon abaot wanem ol toktok ia i minim long olgeta. Oli save pikimap ol sentens we oli laekem, faenemaot ol skripja we i go wetem long Guide to the Scriptures o wan Hym we i go wetem long hymnbook, mo serem wanem oli lanem. ?From wanem ol Prinsipol ia oli impoten long Lod?

Sam Moa Risos

Lav, eksampol, mo testemoni.

Afta we oli finis blong storian abaot Jona i givim woning long ol pipol blong Nineve, Presiden HenryB. Eyring i serem wan eksperiens we mama blong hem i givim long hem wan woning:

“Mi save stap tingbaot yet mama blong mi i stap toktok sloslo nomo long mi long wan Satedei aftenun, taem mi wan smol boe, mi bin askem raet blong hem blong mekem wan samting we mi ting se i oraet blong mekem mo we hem i save se samting ia i denja. Mi save stap sapraes yet long paoa we hem i gat long taem ia, mi bilif se i kam long Lod, blong tanem mi wetem smol toktok nomo. Olsem we mi save tingbaot olgeta, oli: ‘O, mi ting se yu save mekem hemia. Be joes hem i blong yu.’ Woning we i kamaot bigwan long ol toktok save mo joes. Yet long mi i naf ia nao.

“Paoa blong hem blong givim woning wetem smol toktok nomo i bin kamaot long tri samting we mi bin save abaot hem. Faswan, mi save hem i lavem mi. Seken, mi save hem i bin mekem finis wanem we hem i wantem mi blong mekem mo i wan blesing blong mi. Mo namba tri, hem i talemaot long mi stret testemoni blong hem we joes ia we mi mas mekem i impoten tumas se Lod bae i save talem long mi wanem blong mekem sapos mi askem Hem. Lav, eksampol, mo testemoni: olgeta ia oli ol ki blong dei ia” (“A Voice of Warning,” Ensign, Nov. 1998,32).

Kam Antap long Fasin blong Yumi blong Stap Tij

Stap Rere Yuwan. Blong tijim gospel wetem paoa, i stat wetem fasin blong mekem rere yumiwan. Bifo yu mekem rere lesen blong yu, fokas blong fulumap hat blong yu wetem Tabu Spirit tru long ol stadi we i gat mining mo prea we i gat mining. (Luk long Teaching in the Savior’s Way, 12.)