Bred blong Laef, i kam long Chris Young

14–20 Novemba

Amos; Obadaea

“!Yufala I Mas Kambak long Mi! Mi Mi Hae God, Mo Hemia Tok blong Mi”

Taem yu stap stadi long Amos mo Obadaea, bae ol tingting mo filing oli kam long yu abaot wanem yu save tijim long ol memba blong klas. Rekodem ol tingting ia, mo lukaotem ol janis blong serem olgeta long klas blong yu long Sandei.

Raetemdaon Ol Filing mo Tingting blong Yu

Invaetem Ol Man blong Serem Wanem we Oli Gat

Semmak olsem Amos mo Obadaea oli bin givim woning long ol pipol long dei blong olgeta, ol toktok blong olgeta i givim woning tu long yumi tedei. Yu maet invaetem ol memba blong klas blong serem ol tijing blong Amos mo Obadaea we i aplae long yumi.

Stap Tijim Doktrin

Amos 3:7–8; 7:10–15

Lod i stap soemaot trutok long ol profet blong Hem.

• Invaetem ol memba blong klas blong serem ol trutok abaot ol profet we oli bin faenem long stadi blong olgetawan o wetem famli taem oli stadi long Amos3 mo Amos7. yu save mekem wan lis blong ol ansa blong olgeta long bod. ?Wanem ol nara trutok we yumi save abaot ol profet? (Blong gat sam aedia, luk long atikol blong Gospel Topics “Prophets” [topics.ChurchofJesusChrist.org].) Leftemap tingting blong sam memba blong klas blong serem olsem wanem oli kasem testemoni blong olgeta abaot impoten wok blong ol profet we oli gat insaed long plan blong God.

• ?Olsem wanem nao bae yumi save serem wetem wan fren, from wanem i impoten blong gat wan profet long dei blong yumi tedei? Yu save listim long bod ol kwestin we wan we i no memba blong Jos i save askem abaot ol profet. ?Olsem wanem yumi save ansarem sam long ol kwestin ia yusum Amos 3:7–8 mo 7:10–15?

• Olsem pat blong tok storian blong yufala abaot profet, yu maet serem wan long ol vidio ia: “We Need Living Prophets” o “Words of the Prophets” (ChurchofJesusChrist.org). ?Olsem wanem ol profet blong ol las dei ia oli helpem yumi kam moa kolosap long Jisas Kraes?

Amos5; 8:11–12

Apostasi i olsem wan hadtaem blong harem ol toktok blong Lod.

• Blong statem wan storian long saed blong hadtaem blong faenem kakae olsem we Amos i tokbaot long Amos 8:11–12, yu maet wantem blong luklukbak long kondisen long saed blong spirit blong pipol we hem i bin stap prij long olgeta. Ating hemia bae save help. ?Olsem wanem nao ol man Isrel oli nomo folem Lod? (lukaotem eksampol long, Amos 2:6–8; 5:11–12). ?From wanem hem i impoten blong save abaot wanem nao i mekem olgeta i nomo folem Lod? Naoia, ol memba blong klas oli save rid long Amos 8:11–12 mo tokbaot from wanem “hadtaem blong faenem kakae” mo “tosta from wota” i ol gudfala toktok blong tokbaot kondisen blong olgeta we oli ronwe long Lod. Ol memba blong klas oli save lukaotem tu Amos5 ol ves we i save helpem yumi blong save apostasi mo no save kam long hem long laef blong yumi (lukaotem eksampol long, ol ves 4, 11–12, 14–15, 25–26).

• Taem yumi andastanem hanggri long saed blong spirit we i go wetem apostasi, i helpem yumi andastanem bigfala kakae long saed blong spirit we yumi stap glad long hem long Restoresen. Yu maet raetem sam kwestin olsem olgeta ia long bod abaot Apostasi mo Restoresen, ?From wanem i gat Apostasi? ?Wanem Apostasi i mekem long ol pikinini blong God? ?Wanem Restoresen i mekem? Leftemap tingting blong ol memba blong klas blong yusum ol risos we i stap ia blong save faenem ol ansa long ol kwestin ia mo ol narawan: “Mesej blong Restoresen blong Gospel blong Jisas Kraes” long japta3 blong Prijim Gospel blong Mi ([2019], 36–39); ol atikol blong Gospel Topics “Apostasy” (topics.ChurchofJesusChrist.org); vidio blong “The Great Apostasy” (ChurchofJesusChrist.org); mo kwot we i stap long “Sam Moa Risos.” Invaetem ol memba blong klas blong tokbaot ol trutok we oli kambak long dei blong yumi we i gat spesel mining long olgeta.

Yumi kam ol Sevya long Hil blong Saeon taem yumi stap mekem wok blong tempol mo famli histri.

Obadaea 1:21

“Ol man ia we oli win long faet bambae oli go antap long hil ia Saeon.”

• ?From wanem toktok ia “ol man ia we oli win long faet … antap long hil ia Saeon” (Obadaea 1: 21)hem i tokbaot gud yumi taem yumi stap mekem tempol mo famli histri wok? ?Olsem wanem wok we yumi stap mekem blong ol bubu blong yumi long tempol i helpem yumi filim moa kolosap long Sevya Jisas Kraes? Ol memba blong klas oli save serem ol eksperiens blong olgeta we oli jes mekem tempol mo famli histri wok.

Sam Moa Risos

Ol lesen long pas

Presiden M. Russell Ballard i tijim:

“Afta long wan sot taem nomo blong ol yia we Niu Testeman i kavremap, … ol pipol oli tanem olgeta agensem Kraes mo ol Aposol blong hem. Hem i wan bigfala foldaon mo wan lus we yumi kam blong save long hem olsem Bigfala Apostasi, we i lid i go long ol handred yia we man i fas i stap long tudak mo i no gat wan save nating abaot laet long saed blong spirit. Oli singaotem Ol Dak Yia.

“…Papa blong yumi long Heven i lavem evri pikinini blong hem mo hem i wantem evriwan blong kasem blesing blong gospel long laef blong olgeta. Laet long saed blong spirit i no bin lus from se God i tanem bak blong hem long ol pikinini blong Hem. Laet i bin lus from se evri pikinini blong God oli tanem bak blong olgeta long Hem. Hemia i risal blong ol rong joes we i kam long wanwan man o woman, ol komuniti, ol kantri, mo wan ful sosaeti. Hemia i bin hapen bakegen mo bakegen truaot long taem. Wan long ol bigfala lesen long histri blong paten ia hem i we ol joes blong yumi, tugeta blong wanwan mo evriwan, risal blong hem long saed blong spirit bae i kasem yumi mo ol laen blong yumi we bae oli kam afta long yumi” (“Learning the Lessons of the Past,” Liahona, May 2009,32).

Kam Antap long Fasin blong Yumi blong Stap Tij

Helpem olgeta we yu stap tijim blong Luksave Tabu Spirit. “Folem smol voes blong Tabu Spirit, askem olgeta we yu stap tijim, wanem nao oli filim mo wanem nao oli harem save long olgeta se oli wantem mekem. Helpem olgeta blong oli save konektem ol filing blong olgeta long saed blong spirit wetem wanem we Tabu Spirit i talem long olgeta” (Teaching in the Savior’s Way, 11).