“31 Oktoba–6Novemba. Daniel 1– 6: ‘I No gat wan Narafala God Nating we I save Sevem Man Olsem God Ya,’” Kam Folem Mi—Blong Sandei Skul: OlTesteman 2022 (2021)
“31 Oktoba–6Novemba. Daniel 1–6,” Kam Folem Mi—Blong Sandei Skul: OlTesteman 2022
Daniel i talemaot mining blong Drim blong Nebukadnesa, i kam long Grant Romney Clawson
31 Oktoba–6Novemba
Daniel 1–6
“I No gat wan Narafala God Nating we I save Sevem Man Olsem God Ya”
Plante memba blong klas oli save sam long ol stori insaed long buk blong Daniel. Taem yu stadi mo stap rere blong tij, lukaotem blong Spirit i helpem yu blong save olsem wanem yu save helpem ol memba blong klas blong faenem mining blong olgeta wan long ol japta ia.
Raetemdaon Ol Filing mo Tingting blong Yu
Invaetem Ol Memba blong Klas blong Serem Wanem Oli Gat
Maet bae i save help blong invaetem ol memba blong klas blong oli save serem olsem wanem skripja stadi blong olgetawan o blong famli i stap gogohed. Taem ol memba blong klas oli serem abaot wan samting we oli lanem long wik ia, yu save askem olgeta wanem oli bin mekem we i lidim olgeta i go kasem ol save ia.
Stap Tijim Doktrin
Yumi save trastem Lod taem fet blong yumi i fesem jalenj.
-
Blong statem wan tok storian abaot olsem wanem Daniel, Sedrak, Mesek, mo Abednego oli soem fet blong olgeta long Lod, yu save askem sam memba blong klas blong talem long wan sot toktok ol jalenj we ol fofala man ia oli bin fesem, we oli tokbaot long Daniel1, 3, mo6. ?From wanem bae i had blong save stap fetful long ol situesen ia? ?Wanem situesen yumi fesem we i jalenjem fet blong yumi? Ol klas memba oli save lukaotem long Daniel 1:10–13; 3:15–18; 6:10, blong faenem olsem wanem ol fofala man ia oli fesem ol jalenj blong olgeta. ?Olsem wanem nao ol eksampol blong olgeta i save helpem yumi long ol traehad blong yumi blong save stap ol fetful disaepol blong Jisas Kraes?
-
Plante long yumi olsem, Daniel mo ol fren blong hem, yumi filim paoa blong fos we i mekem yumi wantem benem standet blong yumi. ?Wanem i stap mekem ol presa ia i stap kam long laef blong yumi? Blong helpem ol memba blong klas blong lanem samting aot long eksampol blong Daniel mo ol fren blong hem, yu save divaedem klas long tri grup mo givim wok long wanwan grup blong lukluk bak long ol japta we i stap ia: Daniel1, 3, o6. ?Olsem wanem Lod i bin blesem Daniel, Sedrak, Mesek, mo Abednego taem oli jusum blong stap fetful nomata long presa we oli fesem? Wanwan grup i save serem wetem klas wanem we oli bin faenem. Ol memba blong klas oli save toktok tugeta long olsem wanem oli save stap fetful nomata long presa we i kam long ol famli mo fren o ol nara kaen presa. Oli tokbaot tu olsem wanem i impoten blong lukaotem ol gud fren. Olgeta we oli save sapotem yumi long ol standet blong yumi.
Jos Ia blong Jisas Kraes blong Ol Lata-dei Sent i kingdom blong God long wol ia.
-
Toktok raon long Daniel2 i save helpem klas blong yu blong andastanem olsem wanem Jos Ia blong Jisas Kraes blong Ol Lata Dei Sent i stap tekem ples blong hem olsem we profesi i bin talem se oli “katem ston aot long maonten” (ves45). Blong stat, yu save askem klas blong lukluk bak long drim blong Nebukadnesa we Daniel i bin intepretem we i stap long Daniel 2:31–45. Afta yu save soem wan pikja blong wan ston (o droem wan long bod). Invaetem ol memba blong klas blong serem wanem oli lanem abaot kingdom blong God taem oli komperem long ston ia we oli stap tokbaot long Daniel 2:34–35, 44–45. Ating ol memba blong klas oli save sam histri blong Jos long eria blong yu we oli save serem. ?Olsem wanem yumi lukim ol profesi blong Daniel i fulfil long laef blong yumi wanwan?
Blong kasem revelesen i nidim blong rere from long saed blong spirit.
-
Maet ol memba blong klas oli save kasem wan save taem oli stap lanem olsem wanem Daniel i bin rere gud long hemwan blong kasem revelesen we hem i nidim blong talemaot mo givimaot mining blong drim blong Nebukadnesa. Blong statem, askem ol memba blong klas blong lukluk bak long Daniel 2:1–15 mo afta serem olsem wanem bae oli filim sapos oli stap long posisen we Daniel i stap long hem. Invaetem olgeta blong lukaotem insaed long Daniel 2:16–18 blong lanem wanem Daniel i bin mekem. ?Wanem yumi bin lanem long Daniel 1:17 abaot olsem wanem God i bin mekem rere Daniel? ?Wanem yumi save lanem long Daniel we i save helpem yumi taem yumi stap lukaotem blong kasem revelesen blong yumiwan? ?Wanem yumi save lanem long ol toktok mo ol aksen blong Daniel afta we hem i kasem help blong Lod? (luk long Daniel 2:20–30).
Droing blong Daniel mo ol fren blong hem oli stap talem no long ol kaekae blong king, i kam long Brian Call
Taem yumi no sua long wanem bae i kam, oltaem yumi save jusum fet.
-
Eksperiens blong Sedrak, Mesek, mo Abednego we i stap long Daniel3 oli save helpem ol memba blong klas blong yu blong andastanem fulwan wanem i minim blong gat fet long Jisas Kraes. Yu save talem long wan sot toktok jalenj we Sedrak, Mesek, mo Abednego oli fesem (luk long Daniel 3:1–12) mo afta tokabaot olsem wanem oli fesem jalenj ia (luk long Daniel 3:13–18). ?Wanem yumi lanem abaot fet blong ol man ia long wanem we oli bin fesem? Yu save raetem long bod sentens ia God blong yumi i gat paoa… mo Be sapos no… luk long ol ves 17–18. Ol memba blong klas oli save givim tingting long olsem wanem oli save fulumap ol spes we i stap ia wetem ol situesen we oli save fesem long laef. Olsem eksampol, oli save givim tingting “God blong yumi i save ansarem evri kwestin blong mi” mo “Sapos no, mi bae mi save wet longtaem mo putum tras blong mi long Hem.” Taem ol memba blong klas oli stap serem ol eksampol, leftemap tingting blong olgeta blong tokbaot olsem wanem Sevya i sapotem mo mekem yumi kam strong nomata sapos yumi no save olsem wanem ol samting bae i hapen long ol taem we i stap kam.
Kam Antap long Fasin blong Yumi blong Stap Tij
Yusum samting we ol memba blong klas oli save luk “Ol samting olsem, pikja, vidio, mo drama i save helpem olgeta we oli stap lan—speseli olgeta we oli lanem samting tru long wanem oli luk nomo—mo hemia i mekem ol storian blong skripja i save stap oltaem long maen blong olgeta” (Teaching in the Savior’s Way, 22).