tamaitai ma le alii faaipoipo i laufanua o le malumalu

7–13 Novema

Hosea 1–6; 10–14; Ioelu

“Ou Te Alofa Fua ia te i Latou”

A o e suesue ma saunia i lenei vaiaso, mafaufau po o a sāvali matagofie ma musuia mai tusi a Hosea ma Ioelu e ono fesoasoani i manaoga o i latou e te aoaoina.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia fesoasoani i tagata o le vasega e faasoa mea na latou aoaoina i lenei vaiaso, e mafai ona e valaaulia i latou e tusi i le laupapa se upu po o se fuaitau na uunaia i latou a o latou suesue. Ona mafai lea ona latou faasoa mai pe aisea e tāua ai le upu po o le fuaitau ia i latou. O nei upu ma fuaitau e ono fesoasoani e taiala ai le vaega o totoe o le tou talanoaga.

aikona o le aoao atu

Aoao Atu le Aoaoga Faavae

Hosea 1–3; 14

E valaaulia pea e le Alii i tatou e foi mai ia te Ia.

• E mafai ona e amata se talanoaga o le Hosea 1–3 i le tusia o le faaipoipoga i le laupapa ma fai i tagata o le vasega e lisi ni upu e fesootai ma le faaipoipoga. E faapefea e le osia o se feagaiga ma le Alii ona pei o le ulu atu i se faaipoipoga? E faapefea e le solia o lena feagaiga ona pei o le lē faamaoni i se toalua? (tagai Hosea 2:5–7,13). Ona mafai lea e le vasega ona talanoa i le ala e faatusa ai le sootaga i le va o Hosea ma Komeri ma le va o le Alii ma Lona nuu. O a mea ua aoao mai e le Hosea 2:14–23 ma le Hosea14 ia i tatou e uiga i le alofa ma le alofa mutimutivale o le Alii? E faapefea ona tatou faaalia lo tatou alolofa ma le faamaoni ia te Ia?

• Ua faamatala mai e leHosea 14 le tele o folafolaga matagofie na fai e le Alii i le aiga o Isaraelu pe afai latou te toe foi atu ia te Ia. Atonu e mafai e tagata o le vasega ona suesue i lenei mataupu ma vaai mo nei folafolaga. O le a le mea na fetalai mai le Alii o le a Ia faia? O le a se uiga o le fuaitau “alofa fua ia i latou”? (fuaiupu4). O a mea ua aoao mai e tala faatusa i laau i fuaiupu 5–8 ia i tatou e uiga i faamanuiaga a le Alii ia i tatou, e aofia ai faamanuiaga o le salamo?

  tamaitai o nofo i lalo ma le alii o loo tuu lima i luga o le ulu

  O le tagata agasala o Komeri, e suitulaga ia Isaraelu, na ofo i ai e le Alii le laveaiina. Ata tusi a Deb Minnard, laisene mai goodsalt.com

Hosea 6:6; Ioelu 2:12–13

O le tuutō i le Atua e tatau ona lagona i totonu, ae le na o le faaalia i fafo.

• E faatatau leHosea 6:6 ma le Ioelu 2:12–13 i taulaga i manu ma le saeia o ofu o faatusa o le faanoanoa. E ui o na faiga e le masani ai i aso nei, o nei fuaiupu e mafai ona taitai atu i se talanoaga e uiga i le mea e sili ona tāua i le Alii. E mafai ona outou faitau faatasi le Hosea 6:6 ma talanoaina le uiga o lenei fuaiupu. Valaaulia nisi o tagata o le vasega e faitau le Mataio 9:10–13 ma isi e faitau le Mataio 12:1–8. Ona mafai lea e tagata o le vasega ona aoao le tasi ma le isi i le ala e fesoasoani ai nei mea na tutupu i le galuega a le Faaola ia i tatou e malamalama ai i le mataupu faavae o loo aoaoina i le Hosea 6:6. E mafai faapefea ona tatou ola i lenei mataupu faavae i o tatou aso?

  E mafai foi ona outou faitau faatasi le Ioelu 2:12–13 ma talanoaina le uiga o le saeia o tatou loto ae le na o tatou ofu. O a mea ua tatou aoao mai i nei fuaiupu e uiga i le avea ai ma soo moni o Iesu Keriso?

Ioelu2

“E i’u ina ou liligi ifo ai lo’u agaga i luga i tagata uma.”

• Ina ia amata se talanoaga o le Ioelu2, e mafai ona e faasoa i le vasega le tala a Moronae i lenei valoaga ina ua ia asiasi ia Iosefa Samita i le 1823 (tagai Iosefa Samita—Talafaasolopito 1:41). E mafai e tagata o le vasega ona faasoa mai o latou lagona i valoaga i le Ioelu 2:28–32 ia ua faataunuuina i o tatou aso. E mafai foi ona outou talanoaina le ala e faatatau ai upu a Elder David A. Bednar i “Punaoa Faaopoopo” i le valoaga a Ioelu. E mafai e tagata o le vasega ona talanoaina le uiga ia i latou o le lagonaina o le liligi ifo o le Agaga Paia i o latou olaga i aso taitasi. O a mea e mafai ona tatou faia pe afai tatou te lagonaina tatou te le o mauaina lena liligi ifo? E faapefea ona tatou fesoasoani “[i o tatou] atalii ma [o tatou] afafine” ia mauaina? (fuaiupu28).

aikona o punaoa faaopoopo

Punaoa Faaopoopo

“E mafai ona tatou faalagolago i le Agaga Paia e taialaina i tatou.”

Na faamatala e Elder David A. Bednar:

“E masani ona tatou faafaigatāina ia i tatou lava le mauaina o faaaliga patino. O le uiga o la’u tala o se tautoga folafolaina o le, pe a tatou faamamalu a tatou feagaiga, e mafai ona tatou maua i taimi uma le Agaga Paia e avea ma a tatou soa tumau. Ae tatou te talanoa i ai ma faia e pei o le faalogo i le siufofoga o le Alii e ala i Lona Agaga o se mea e seāseā tupu. … [O le Agaga] e tatau ona faatasi ma i tatou i taimi uma lava. E le faatele i se sekone, ae afai o loo faia e se tagata le mea sili—e le faapea ia e atoatoa—ae afai o loo e faia ma ‘ou faia le mea sili, tatou te le o solia ni agasala matuiā, e mafai ona tatou faalagolago i le Agaga Paia e taiala i tatou.…

“E foliga mai tatou te talitonu o le Agaga Paia e matautia ma telē ma faafuasei, ae e mālū ma itiiti ma auaua’i mālie mai i le āluga o taimi. Ma e le faapea ia tatau ona e iloa o loo e mauaina le faaaliga i le taimi lava o loo e maua ai le faaaliga” (“Elder DavidA. Bednar Discussion” [evening with a General Authority, Feb.7, 2020], broadcasts.ChurchofJesusChrist.org).

Faaleleia o Lo Tatou Aoao Atu

Ia faafeiloai atu ma le fiafia. E mananao tagata aoao ia iloa e te popole ia i latou ma lo latou tuputupu a’e faaleagaga. O le tasi ala lelei e faaalia ai ia i latou lenei mea o le faafeiloai fiafia lea ia i latou a o latou taunuu i le vasega. (Tagai Aoao Atu i le Ala a le Faaola, 15.)