nā ta’ata fa’aipoipo i roto i te ’āua o te hiero

7–13 nō Novema

Hosea 1–6 ; 10–14 ; Ioela

« Nā’u e aroha noātu ia rātou »

’A tuatāpapa ai ’e ’a fa’aineine ai ’outou i teie hepetoma, ’a feruri e aha te mau parau poro’i nehenehe ’e te fa’auru nō roto mai i te buka a Hosea ’e a Ioela ’o te tauturu nō te pāhono i te mau hina’aro o te feiā tā ’outou e ha’api’i ra.

Pāpa’i i te mau mana’o e tae mai

ītona fa’a’itera’a

Tītau i te mana’o

Nō te tauturu i te mau pīahi ’ia fa’a’ite mai i te mea tā rātou i ’apo mai i teie hepetoma, e nehenehe ’outou e ani ia rātou ’ia pāpa’i i ni’a i te tāpura ’ere’ere te hō’ē ta’o ’aore rā pereota ’o tei fa’auru ia rātou i roto i tā rātou tuatāpapara’a. I muri iho, e nehenehe rātou e fa’a’ite mai nō te aha te ta’o ’aore rā te pereota i riro ai ’ei mea faufa’a nō rātou. E nehenehe teie mau ta’o ’e teie mau pereota e tauturu i te arata’i i te toē’a o tā ’outou tāu’ara’a parau.

ītona ha’api’ira’a

Ha’api’i i te ha’api’ira’a tumu

Hosea 1–3 ; 14

Tē ani noa mai nei te Fatu ia tātou ’ia ho’i iāna ra.

• E nehenehe ’outou e ha’amata i te hō’ē ’āparaura’a nō te Hosea 1–3 nā roto i te pāpa’ira’a fa’aipoipora’a i ni’a i te tāpura ’ere’ere ’e te anira’a i te mau pīahi ’ia tāpura mai i te mau ta’o tā rātou e tū’ati atu i te fa’aipoipora’a. Nāhea te ravera’a i te hō’ē fafaura’a ’e te Fatu e au ai mai te tomora’a i roto i te hō’ē fa’aipoipora’a ? Nāhea te ’ōfatira’a i taua fafaura’a ra e au ai mai te ha’apa’o-’ore-ra’a i te hō’ē hoa fa’aipoipo ? (hi’o Hosea 2:5–7, 13). I muri iho, e nehenehe te mau pīahi e paraparau nāhea te aura’a i rotopū i te Hosea ’e te Gomera i te fa’ahōho’a i te aura’a i rotopū i te Fatu ’e tōna mau ta’ata. E aha tā te Hosea 2:14–23 ’e Hosea 14 e ha’api’i nei ia tātou nō ni’a i te here ’e te aroha o te Fatu ? Nāhea tātou ’ia fa’a’ite i te Fatu i tō tātou here ’e tō tātou huna ’ore iāna ?

• Tē fa’ata’a nei te Hosea 14 e rave rahi mau parau fafau nehenehe tā te Fatu i rave i te ’utuāfare o ’Īserā’ela mai te mea e ho’i fa’ahou rātou iāna ra. Penei a’e e nehenehe te mau pīahi e ’imi mai i roto i teie pene i teie mau fafaura’a. E aha tā te Fatu i parau e rave ’oia ? E aha te aura’a o te parau « e aroha noa atu ia rātou » ? (’īrava 4). E aha tā te fa’ahōho’ara’a o te rā’au tanu i roto i te mau ’īrava 5–8 e ha’api’i nei ia tātou nō ni’a i te mau ha’amaita’ira’a a te Fatu ia tātou, e tae noa atu i te mau ha’amaita’ira’a nō te tātarahapa ?

  e vahine e pārahi ra i ni’a i te repo ’e te ta’ata e tu’u ra i te rima i ni’a i te upo’o

  Te ta’ata hara ’o Gomera, tei fa’ahōho’ahia ia ’Īserā’ela, ’ua pūpūhia te fa’aorara’a e te Fatu. Fa’ahōho’ara’a nā Deb Minnard, nā roto i te parau fa’ati’a a goodsalt.com

Hosea 6:6 ; Ioela 2:12–13

E mea ti’a i te paieti i te Atua ’ia fa’a’itehia mai roto roa mai i te ’ā’au, ’eiaha noa rā ’ia fa’a’itehia nā rāpae atu.

• Tē fa’a’ite nei te Hosea 6:6 ’e te Ioela 2:12–13 i te tusia ’ānimala ’e te mau ’ahu mutumutu ’ei tāpa’o nō te tātarahapa. Noa atu e mea ta’a ’ē teie mau huru ravera’a i teie mahana, e nehenehe teie mau ’īrava e arata’i i te hō’ē tāu’ara’a parau nō ni’a i te mea faufa’a roa a’e i te Fatu. E nehenehe ’outou e tai’o ’āmui i te Hosea 6:6 ’e e ’āparau e aha te aura’a o teie ’īrava. E ani i te tahi mau pīahi ’ia tai’o i te Mataio 9:10–13 ’e ia vetahi ’ē ’ia tai’o i te Mataio 12:1–8. I muri iho, e nehenehe te mau pīahi e ha’api’i i te tahi ’e te tahi e mea nāhea teie mau ’ohipa ta’a ’ē i roto i te misiōni a te Fa’aora, i te tauturu ia tātou ’ia hāro’aro’a i te parau tumu i ha’api’ihia i roto i te Hosea 6:6. Nāhea tātou e nehenehe ai e ora i teie parau tumu i tō tātou nei ’anotau ?

  E nehenehe ato’a tā ’outou e tai’o ’āmui i te Ioela 2:12–13 ’e e ’āparau e aha te aura’a te hāhaera’a i tō tātou ’ā’au ’eiaha noa i tō tātou ’ahu. E aha tā tātou e ’apo mai i roto i teie mau ’īrava nō ni’a i te aura’a te rirora’a ’ei mau pipi mau nā Iesu Mesia ?

Ioela 2

« E nīni’i atu ai au i tā’u vārua i ni’a i te ta’ata ato’a ».

• Nō te ha’amata i te hō’ē tāu’ara’a parau nō te Ioela 2, e nehenehe ’outou e fa’a’ite i te mau pīahi i te mea tā Moroni i parau nō ni’a i teie tohura’a ’a fārerei ai ’oia ia Iosepha Semita i te matahiti 1823 (hi’o Iosepha Semita—’Ā’amu 1:41). E nehenehe te mau pīahi e fa’a’ite mai e mea nāhea i tō rātou mana’ora’a, ’ua tupu te mau tohura’a i roto i te Ioela 2:28–32 i tō tātou nei ’anotau. E nehenehe ato’a ’outou e ’āparau nāhea te mau parau a Elder David A. Bednar i roto i « Te tahi atu ā mātēria tauturu » e tū’ati ai i te tohu a Ioela. E nehenehe te mau pīahi e ’āparau i te aura’a nō rātou ’ia fāri’i i te hō’ē nīni’ira’a o te Vārua Maita’i i roto i tō rātou orara’a i te mau mahana ato’a. E aha tā tātou e nehenehe e rave mai te mea e mana’o tātou ē, ’aita tātou e fāri’i nei i taua huru nīni’ira’a ra ? Nāhea e ti’a ai ia tātou ’ia tauturu i « [tā tātou] mau tamâroa ’e [tā tātou] mau tamāhine » ’ia fāri’i i te reira ? (’īrava 28).

ītona Te tahi atu ā mātēria tauturu

Te tahi atu ā mātēria tauturu

« E nehenehe tātou e tai’o i ni’a i te Vārua Maita’i nō te arata’i ia tātou ».

’Ua ha’api’i ’o Elder David A. Bednar :

« Pinepine tātou i te ha’afifi ia tātou nō te fāri’i i te heheura’a nō tātou iho. Tā’u rā e hina’aro nei e parau, te fafaura’a i parauhia maori rā, ’ia fa’atura tātou i tā tātou mau fafaura’a, e vai noa mai te Vārua Maita’i i ni’a ia tātou nō te riro ’ei hoa tāmau nō tātou. Terā rā tē paraparau nei i te reira ’e tē fa’ariro nei tātou i te reira mai te huru ē ’ua riro te fa’aro’ora’a i te reo o te Fatu nā roto mai i tōna Vārua ’ei ’ohipa varavara… E ti’a i te [Vārua] ’ia pārahi mai i pīha’i iho ia tātou i te mau taime ato’a. ’Eiaha i te mau tētoni ato’a, terā rā mai te mea e rave te hō’ē ta’ata i tei ti’a iāna—’aita e tītauhia ia ’outou ’ia maita’i roa—’ia rave rā ’outou ’e ’o vau i tei ti’a ia tātou ’e ’ia ’ore tātou ’ia rave i te hara rahi, e nehenehe ïa tātou e ti’aturi i te Vārua Maita’i nō te arata’i ia tātou…

« … E au ra ē tē ti’aturi nei tātou ē e huru ataata ’e te rahi ’e te vitiviti te Vārua Maita’i, ’a vai taimāmū ai tōna huru ’e te ha’iha’i ’e te harahara’ini i roto i te tau. E’ita ’outou e ’ite ē tē fāri’i ra ’outou i te heheura’a i te taime iho e fāri’i ai ’outou i te heheura’a°» («°Elder David A. Te ’āparaura’a a Bednar°»[hō’ē ’āru’i ’e te hō’ē huimana fa’atere rahi, 7 nō Fepuāre 2020], broadcasts. ChurchofJesusChrist.org).

Ha’amaita’i i tā tātou ha’api’ira’a

’Ia fāri’i maita’i ’outou. E ti’a i te mau pīahi ’ia ’ite ē, tē ha’ape’ape’a ra ’outou nō rātou ’e i tō rātou tupura’a pae vārua. Te hō’ē rāve’a maita’i nō te fa’a’ite ia rātou i te reira nā roto ïa i te aroha-poupou-ra’a ia rātou ’ia tae mai rātou i roto i te piha ha’api’ira’a. (Hi’o Ha’api’ira’a mai tā te Fa’aora, 15)