Tē tātara ra Daniela i te moemoeā ’o Nebukānesa, nā Grant Romney Clawson

31 nō ’Ātopa–6 nō Novema

Daniela 1–6

« ’Aita atu e Atua e ti’a ai ’ia fa’aora mai »

E rave rahi pīahi tei mātau i te tahi mau ’ā’amu i roto i te buka a Daniela. ’A tuatāpapa ’e ’a fa’aineine ai ’outou nō te ha’api’i, ’a ’imi i te arata’ira’a a te Vārua nō ni’a i te huru e ti’a ai ia ’outou ’ia tauturu i te mau pīahi ’ia ’ite i te aura’a o te ta’ata iho i roto i teie mau pene.

Pāpa’i i te mau mana’o e tae mai

Tītau i te mana’o

E nehenehe te reira e tauturu i te anira’a i te mau pīahi ’ia fa’a’ite mai e aha te huru o tā rātou iho tuatāpapara’a pāpa’ira’a mo’a ’aore rā tā te ’utuāfare. ’Ia fa’a’ite ana’e te mau pīahi i te hō’ē ’itera’a nō ni’a i te hō’ē mea tā te Vārua i ha’api’i ia rātou i teie hepetoma, e nehenehe ’outou e ui ia rātou e aha tā rātou e rave ra tei arata’i atu i taua mau mana’o ra.

Ha’api’i i te ha’api’ira’a tumu

Daniela 1 ; 3 ; 6

E nehenehe tātou e ti’aturi i te Fatu ’ia tāmata-ana’e-hia tō tātou fa’aro’o.

• Nō te ha’amata i te hō’ē ’āparaura’a nō ni’a i te huru ’a fa’a’ite ai Daniela, Sadaraka, Meseka, ’e Abede-nego i te fa’aro’o i te Fatu, e nehenehe ’outou e ani i te tahi mau pīahi ’ia fa’ata’a poto mai i te mau tāmatara’a ’o tā teie mau ta’ata e maha i fa’aruru, mai tei fa’a’itehia i roto i te Daniela 1, 3, ’e te6. Nō te aha e mea fifi ’ia vai ha’apa’o maita’i noa i roto i teie mau huru tupura’a ? E aha te mau mea tā tātou e fa’aruru nei ’o tē tāmata nei i tō tātou fa’aro’o ? E nehenehe te mau pīahi e ’imi i roto i te Daniela 1:10–13 ; 3:15–18 ; 6:10, ma te ’imi e mea nāhea teie mau ta’ata e maha i te pāhonora’a i tō rātou mau tāmatara’a. Nāhea tō rātou mau hi’ora’a i te tauturu ia tātou i roto i tā tātou mau tauto’ora’a ’ia riro ’ei mau pipi ha’apa’o maita’i nā Iesu Mesia ?

• E rave rahi o tātou, mai ia Daniela ’e tōna mau hoa ’o tei fa’atinahia ’ia ’āriri parau [compromettre] i tā tātou mau fa’aturera’a. E aha te tahi o te mau tumu nō teie fa’atinara’a i roto i tō tātou orara’a ? Nō te tauturu i te mau pīahi ’ia ha’api’i mai roto mai i te hi’ora’a o Daniela ’e tōna mau hoa, e nehenehe ’outou e vāhi i te piha ha’api’ira’a nā roto e toru pupu ’e e hōro’a i te pupu tāta’itahi ’ia tai’o i te hō’ē o te mau pene i muri nei : Daniela 1, 3, ’aore rā6. Nāhea tō te Fatu ha’amaita’ira’a ia Daniela, Sadaraka, Meseka, ’e Abede-nego i te taime ’a mā’iti ai rātou ’ia ha’apa’o maita’i, noa atu te fa’ahepora’a i fāri’ihia e rātou ? E nehenehe te pupu tāta’itahi e fa’a’ite i tō te piha i tā rātou i ’ite mai. I reira te mau pīahi e nehenehe ai e paraparau ’āmui nō ni’a e nāhea ’ia vai ha’apa’o noa, noa atu te huru o te fa’ahepora’a ’aore rā te tahi atu mau huru ha’afifira’a. E nehenehe ato’a rātou e ’āparau i te faufa’a rahi ’ia ’imi i te mau hoa maita’i ’o te pāturu ia tātou i roto i tā tātou mau fa’aturera’a.

Daniela 2

Te ’Ēkālesia a Iesu Mesia i te Feiā Mo’a i te mau Mahana Hope’a nei ’o te bāsileia ia o te Atua i ni’a i te fenua nei.

• E nehenehe te ’āparaura’a i te Daniela 2 e tauturu i tā ’outou mau pīahi ’ia ’ite e mea nāhea Te ’Ēkālesia a Iesu Mesia i te Feiā Mo’a i te mau Mahana Hope’a nei i te fa’atupura’a i tōna hope’ara’a mai te ’ōfa’i i tohuhia ra ē, « e ’ō’oti-noa-hia mai taua ’ōfa’i ra nō roto i te mou’a » (’īrava 45). Nō te ha’amata, e nehenehe ’outou e hi’o ’e te piha i te fa’a’itera’a a Daniela ’e te tātarara’a i te moemoeā ’o Nebukanesa, e ’itehia i roto i te Daniela 2:31–45. I muri iho, e nehenehe ’outou e fa’a’ite i te hō’ē hōho’a nō te hō’ē ’ōfa’i (’aore rā, e pāpa’i hōho’a i ni’a i te tāpura ’ere’ere). E ani i te mau pīahi ’ia fa’a’ite mai e aha tā rātou i ha’api’i mai nō ni’a i te bāsileia o te Atua nā roto i te fa’aaura’a i te reira i ni’a i te fa’a’itera’a o te ’ōfa’i i roto i te Daniela 2:34–35, 44–45. Penei a’e ’ua ’ite te mau pīahi i te tahi ’ā’amu o te ’Ēkālesia i roto i tō ’outou fenua, ’o tā rātou e nehenehe e fa’a’ite mai. Nāhea tātou i te ’itera’a ē, ’ua tupu te mau parau tohu a Daniela i roto i tō tātou orara’a tāta’itahi ?

Daniela 2:1–30

E tītau te fāri’ira’a i te heheura’a i te fa’aineinera’a pae vārua.

• Penei a’e e fāna’o te mau pīahi i te ha’api’ira’a mai nō ni’a e mea nāhea tō Daniela fa’aineinera’a iāna iho nō te fāri’i i te heheura’a e tītauhia nō te fa’a’ite ’e nō te tātara i te moemoeā ’o Nebukanesa. E nehenehe ’outou e ha’amata nā roto i te anira’a i te mau pīahi ’ia tai’o fa’ahou i te Daniela 2:1–15 ’e i muri iho ’ia fa’a’ite mai i tō rātou mana’o, mai te peu ’ua ’ite rātou i tō rātou huru i roto i te ti’ara’a ’o Daniela. E ani ia rātou ’ia ’imi i roto i te Daniela 2:16–18 nō te ha’api’i mai i te mea tā Daniela i rave. E aha tā tātou i ha’api’i mai nā roto mai i te Daniela 1:17 nō ni’a e mea nāhea tā te Atua fa’aineinera’a ia Daniela ? E aha tā tātou e nehenehe e ha’api’i mai nā roto mai ia Daniela ’o te nehenehe e tauturu ia tātou, ’a ’imi ai tātou i tā tātou iho heheura’a ? E aha tā tātou e nehenehe e ha’api’i mai nā roto mai i te mau parau ’e te mau ’ohipa a Daniela i muri a’e i tōna fāri’ira’a i te tauturu a te Fatu ? (hi’o Daniela 2:20–30).

Fa’ahōho’ara’a nō Daniela ’e tōna mau hoa i te pāto’ira’a i te mā’a a te ari’i, nā Brian Call

Daniela 3

Mai te mea e ’ere te hope’ara’a i te mea pāpū, e nehenehe noa ā tātou e mā’iti i te fa’aro’o.

• E nehenehe te ’itera’a ’o Sadaraka, Meseka, ’e ’o Abede-nego e ’itehia i roto i te Daniela 3 e tauturu i tā ’outou mau pīahi ’ia māramarama hope roa i te aura’a ’ia fāri’i i te fa’aro’o ia Iesu Mesia. E nehenehe ’outou e ani i te mau pīahi ’ia fa’ata’a poto mai i te fifi tā Sadaraka, Meseka, ’e Abede-nego i fāri’i (hi’o Daniela 3:1–12) ’e i muri iho e ’āparau nāhea rātou i te pāhonora’a (hi’o Daniela 3:13–18). E aha tā tātou e ha’api’i mai nō ni’a i te fa’aro’o mai roto mai i te pāhonora’a a teie mau ta’ata ? E nehenehe ’outou e pāpa’i i ni’a i te tāpura ’ere’ere te mau pereota E nehenehe tō tātou Atua e… ’e Mai te mea rā ē ’aita… mai te au i te mau ’īrava 17–18. E nehenehe te mau pīahi e fa’a’ite mai e nāhea rātou i te fa’a’ī i te mau vāhi vata, i te mau tupura’a ’o tā rātou e fa’aruru nei. ’Ei hi’ora’a, e nehenehe tā rātou e parau e, « E nehenehe tō tātou Atua e pāhono i te tā’āto’ara’a o tā’u mau uira’a » ’e « Mai te mea rā ē ’aita, e fa’a’oroma’i noa ā vau i te ti’aturi iāna. » ’A fa’a’ite mai ai te mau pīahi i te mau hi’ora’a, ’a fa’aitoito ia rātou ’ia ’āparau mai e mea nāhea te Fa’aora i te turu ’e i te ha’apūai ia tātou, noa atu ’aita tātou i ’ite e nāhea te mau mea ’ia tupu mai.

Ha’amaita’i i tā tātou ha’api’ira’a

Fa’a’ohipa i te mau tauturu fa’ahi’ora’a. « Te ano’ihi, mai te mau hōho’a, te mau video ’e te mau ha’utira’a ta’ata ora, e nehenehe te reira e tauturu i te mau pīahi ’ia tāu’a mai—te mau pīahi iho ā rā ’o te ha’api’i mai ma te hi’o mata—’e ’ia fa’ariro i te mau ’ā’amu o te mau pāpa’ira’a mo’a ’ei ha’amana’ora’a mau » (Ha’api’ira’a mai tā te Fa’aora, 22).