« 24–30 nō ’Ātopa. Ezekiela 1–3 ; 33–34 ; 36–37 ; 47 : ‘ E nā’u e tu’u te vārua ’āpī i roto ia rātou », Mai, pe’e mai—nō te Ha’api’ira’a Sābati : Faufa’a Tahito 2022 (2021)
« 24–30 nō ’Ātopa. Ezekiela 1–3 ; 33–34 ; 36–37 ; 47 », Mai, pe’e mai—nō te Haʼapiʼiraʼa Sābati : 2022
Mai, pee mai, nā Scott Sumner
24–30 nō ’Ātopa.
Ezekiela 1–3 ; 33–34 ; 36–37 ; 47
« E nā’u e tu’u te vārua ’āpī i roto ia rātou »
’Ua fa’ahereherehia te mau parau a Ezekiela e te Fatu nō te hō’ē ’ōpuara’a pa’ari ’e e nehenehe te reira e ha’amaita’i i tā ’outou mau pīahi. ’A feruri i te reira ’a tuatāpapa ai ’outou i te mau pāpa’ira’a a Ezekiela i teie hepetoma.
Pāpa’i i te mau mana’o e tae mai
Tītau i te mana’o
’Ua mana’o te mau ta’ata i fa’aro’o ia Ezekiela ē, e mau parau « hina’aro-rahi-hia » ’e te « maita’i ra » tāna, « e ’ore rā rātou [i] rave » (hi’o Ezekiela 33:30–33). E nehenehe te mau pīahi e fa’a’ite mai i te hō’ē ’īrava tā rātou i ’ite i roto i te mau pāpa’ira’a a Ezekiela tei fa’auru ia rātou ’ia rave i te hō’ē ’ohipa.
Ha’api’i i te ha’api’ira’a tumu
Tē ani nei te Fatu ia tātou ’ia fa’a’amu i tāna mau māmoe.
Nō te tauturu i te mau pīahi iho ’ia ’ite i te aura’a i roto i te Ezekiela 34, e nehenehe ’outou e pāpa’i i ni’a i te tāpura ’ere’ere te mau huru orara’a o tā rātou e nehenehe e fa’aruru, mai te fa’aineinera’a nō te tāvini i te hō’ē misiōni, te aupurura’a i te mau tamari’i, ’aore rā te fāri’ira’a i te hō’ē ’ohipa aupurura’a. E nehenehe te mau pīahi e mā’iti i te hō’ē nō te feruri ’a tai’o māmū ai rātou i te Ezekiela 34:1–10. E ani ia rātou ’ia fa’a’ite mai e aha te parau a’o i roto i teie mau ’īrava, tā rātou e hōro’a i te hō’ē ta’ata i roto i te huru tupura’a o tā rātou i mā’iti. E aha te aura’a ’ia fa’a’amu ia tātou iho ’eiaha rā i te nana a te Fatu ? Nāhea e nehenehe ai ia tātou ’ia riro ’ei mau tīa’i māmoe mai te Fa’aora te huru ? (hi’o mau ’īrava 11–16).
E nehenehe ’outou e fāri’i i te fa’aurura’a nō te ui i te mau uira’a ’o te tauturu i te mau pīahi ’ia feruri hōhonu i te tāpa’o e vaira i roto i te Ezekiela 34:11–31. ’Ei hi’ora’a, e aha te fa’ahōho’ara’a o te « ’amura’a maita’i » ’e te « ’āua maita’i » i roto i te ’īrava 14? E aha te ta’a-’ē-ra’a i rotopū i te hō’ē māmoe « tei mo’e » ’e te hō’ē ’o tei « purara ’ē » ? (’īrava 16). Nāhea te Fa’aora ’ia aupuru i tera na huru māmoe e piti ? E nehenehe te mau pīahi e fa’a’ite mai i te tahi atu mau tāpa’o tā rātou i ’ite i roto i teie mau ’īrava ’e e ’āparau e ’eaha tā teie mau tāpa’o e ha’api’i mai nei ia rātou nō ni’a ia Iesu Mesia.
Tē ha’aputuputu nei te Fatu i tōna nūna’a ’e tē hōro’a nei ’oia ia rātou te ora ’āpī.
-
E nehenehe te tai’ora’a i te Ezekiela 37 ’e te ferurira’a nō ni’a i te fafaura’a a te Fatu ’ia ha’aputuputu ia ’Īserā’ela, e hōro’a mai i te mau mana’o ia tātou nō ni’a i te aura’a o te ha’aputuputura’a ’e e nāhea tātou ’ia ’āmui atu i roto i te reira. Nō te tauturu i te mau pīahi ’ia ’ite i teie mau mana’o, e nehenehe ’outou e pāpa’i i te mau uira’a i ni’a i te tāpura ’ere’ere mai teie E aha tā te Fatu e tāmata nei i te rave fa’aoti nā roto i te ha’aputuputura’a o ’Īserā’ela ? Nāhea ’oia i te ravera’a i te reira ? I muri iho e nehenehe ’outou e ani i te ’āfara’a o te piha ha’api’ira’a ’ia tai’o i te Ezekiela 37:1–14 ’e i te tahi ’āfara’a ’ia tai’o i te Ezekiela 37:15–28, ’a ’imi ai rātou i te mau mana’o ’o tā teie nā pāpa’ira’a e piti e hōro’a mai nō te mau uira’a i ni’a i te tāpura ’ere’ere. E nehenehe te reira e tauturu ’ia fa’ata’a ē, nā rā’au a Iosepha ’e a Iuda i fa’ahitihia i roto i mau ’īrava 16–19 e fa’ahōho’a ïa i te Buka a Moromona ’e te Bibilia. ’A fa’a’ite ai te mau pīahi i tā rātou mau pāhonora’a, ’a fa’aitoito ia rātou ’ia paraparau i tō rātou ti’ara’a i roto i te ha’aputuputura’a o ’Īserā’ela nō te mau mahana hope’a nei.
’Ua ’ite ’o Ezekiela i roto i te ’ōrama i te hō’ē ’ānāvai i tahe mai roto mai i te hiero ’e o te fa’aora i te miti pohe.
E hōpoi mai te hiero i te fa’aorara’a pae vārua.
-
E nehenehe te mau hōho’a e tauturu i te mau pīahi ’ia māramarama i te ’ōrama i fa’a’itehia i roto i te Ezekiela 47:1–12. ’Ei hi’ora’a, e nehenehe ’outou e fa’a’ite i te hō’ē hōho’a nō te hō’ē hiero, te hō’ē ’ānāvai, te hō’ē mēdēbara, ’e te miti pohe (hi’o te mau hōho’a i roto i te fa’anahora’a nō teie hepetoma i roto Mai, pe’e mai—nō te ta’ata hō’ē ’e te mau ’utuāfare ’e te mau hōho’a o te Bibilia, nūmera 3, « Te Mēdēbara i Iudea »). E nehenehe te reira e tauturu ’ia fa’ata’a ē, nō te ’ava’ava rahi o te miti pohe e’ita te i’a ’e te mau rā’au tanu e ora i reira. E nehenehe te mau pīahi e tai’o te mau ’īrava 1–12 ’e ’ia fa’a’ite mai e aha tei ha’afa’ahiahia ia rātou nō ni’a i te mau pape i fa’a’itehia i roto i te ’ōrama (hi’o ato’a Apokalupo 22:1 ’e te fa’ahitira’a parau i roto i « Te tahi atu ā mātēria tauturu »). E nehenehe ato’a rātou e pāpa’i i te tahi mau hōho’a nō te ’ōrama ’o Ezekiela. ’Ua fa’ahōho’ahia te mau pape i te aha ? E aha te fa’ahōho’ara’a nō te mau tumu rā’au i fa’a’itehia i roto i te ’īrava 14 ? Penei a’e e nehenehe te mau pīahi e fa’a’ite mai, nāhea te hiero ’e tāna mau ha’amaita’ira’a i te hōpoi mai ia rātou i te ora pae vārua ’e te fa’aorara’a.
Te tahi atu ā mātēria tauturu
E nehenehe te mau ha’amaita’ira’a o te hiero e fa’aora ia tātou.
Ma te fa’ahiti i te pape i tahe mai roto mai i te hiero i roto i te ’ōrama ’o Ezekiela (hi’o Ezekiela 47:1–12), ’ua fa’a’ite Elder Dale G. Renlund ē :
« E piti huru fa’ahiahia o terā pape. ’A tahi, noa atu ā ’aita e pape e mani’i rahi ra i roto i teie tahera’a iti, ’ua rahi roa mai rā te reira ’ei ’ānāvai rahi ’e te ’ā’ano ’e te hōhonu roa atu ā ’a tahe noa ai te reira. Tē tupu ra te tahi ’ohipa mai te reira nō te mau ha’amaita’ira’a e tahe mai roto mai i te hiero, ’ia tā’ati-ana’e-hia te mau ta’ata ’ei ’utuāfare. E tupura’a rahi te tupu i te roara’a o te mau u’i, ’a ru’uru’u tāhō’ē ai te mau ’ōro’a tā’atira’a i te mau ’utuāfare.
« Te piti, ’ua fa’a’āpī te ’ānāvai pape i te mau mea ato’a tāna i fa’arari. E pūai māere mau tō te mau ha’amaita’ira’a o te hiero nō te fa’aora i te māuiui. E nehenehe te mau ha’amaita’ira’a o te hiero e fa’aora i te ’ā’au ’e te orara’a ’e te mau ’utuāfare » (« Te ’ā’amu ’utuāfare ’e te ’ohipa hiero : Te tā’atira’a ’e te fa’aorara’a », Ensign ’aore rā Liahona, Mē 2018, 47–48 ; hi’o ato’a te video « And the River Will Grow [’E e tupu te ’ānāvai i te rahi] », ChurchofJesusChrist.org).
Ha’amaita’i i tā tātou ha’api’ira’a
Tauturu ia vetahi ’ē ’ia fāri’i i te Vārua. « E fa’ahemahia paha te mau ’orometua ha’api’i i te tahi taime ’ia feruri ē nā tō rātou ’ite ’aore rā tā rātou mau rāve’a ’aore rā tō rātou huru e fa’auru i te feiā tā rātou e ha’api’i ra… Tā ’outou fā ’ei ’orometua ha’api’i e ’ere i te hōro’ara’a i te hō’ē ha’api’ira’a fa’ahiahia, ’o te tauturura’a rā ia vetahi ’ē ’ia fāri’i i te fa’aurura’a o te Vārua Maita’i » (Ha’api’ira’a mai tā te Fa’aora, 10).