Te Mesia i fa’aheihia i te rā’au taratara ’e i fa’a’īpaupauhia e te fa’ehau

Te fa’a’īpaupaura’ahia te Mesia nā Carl Heinrich Bloch

26 nō Tetepa–2 nō ’Ātopa

Isaia 50–57

« ’Ua rave mau rā ’oia i tō tātou paruparu, ’e ’ua hōpoi ’ē ’oia i tō tātou ’oto ».

Tē rāve’a faufa’a roa a’e nō te fa’aineine ’ia ha’api’i ’o te tai’ora’a ïa ’e te feruri-hōhonu-ra’a i te mau pāpa’ira’a mo’a. E aha tā ’outou i mana’o ’e i ha’api’i mai ’a tai’o ai ’outou i te Isaia 50–57 ?

Pāpa’i i te mau mana’o e tae mai

ītona fa’a’itera’a

Tītau i te mana’o

Nō te ani i te mau pīahi ’ia fa’a’ite mai i te mau ’itera’a o tā rātou i fāri’i ’a tai’o ai rātou i te Isaia 50–57, e nehenehe ’outou e pāpa’i i ni’a i te tāpura ’ere’ere i te hō’ē ’īrava mai teie Tō’u fa’aro’o ia Iesu Mesia ’ua tupu ïa i te rahi i te taime ’a tai’o ai au… E ani i te mau pīahi ’ia fa’a’ite mai ē nāhea rātou ’ia fa’aoti i te ’īrava.

ītona ha’api’ira’a

Ha’api’i i te ha’api’ira’a tumu

Isaia 50–52

E mea māramarama maita’i te ’ananahi nō te mau ta’ata o te Fatu.

• E fāri’i tātou pauroa i te hō’ē taime paruparu mau Nō te tauturu i te mau pīahi ’ia turu’i i ni’a i te pūai o te Fatu, e nehenehe ’outou e hōro’a ia rātou tāta’itahi i te tahi mau ’īrava nō te tai’o i roto i te Isaia 51–52 ’e ’ia fa’a’ite mai i te hō’ē mea o tā rātou i ’ite ’o te ha’apūai i te ta’ata tei paruparu ’aore rā tei ’oto. E nehenehe ato’a ’outou e fa’a’ite ē, tē parau fa’ahou ra te Fa’aora tei ti’afa’ahou i te tahi o te mau parau a Isaia i te mau ta’ata i Amerika (hi’o 3 Nephi 20:32–45). E aha tā te mau parau a te Fa’aora i roto i te 3 Nephi 20:30–34 e tu’u nei i roto i tō tātou hāro’aro’ara’a i te taime e tupu ai teie mau tohura’a ?

• Tē parau nei te arata’ira’a nō teie hepetoma i roto i te Mai, pe’e mai—nō te ta’ata hō’ē ’e tē ’utuāfare ’ia tābulahia te mau mea ato’a i roto i te Isaia 50–52 ’o tā te Fatu e ani manihini nei i tōna mau ta’ata ’ia rave. Penei a’e e nehenehe te mau pīahi e fa’a’ite mai i te mea tā rātou i ’ite ’e tā rātou e paraparau nō ni’a i te aura’a o teie mau anira’a nō rātou. E hina’aro paha ’outou e fa’atumu i ni’a i te mau anira’a i roto i te Isaia 51:1–2, 6–8 ; 52:1–3, 9–11. Nāhea e ti’a ai ia tātou ’ia ’ohipa i ni’a i teie mau anira’a ? E nehenehe ’outou e fa’a’ite ē tē hōro’a mai nei Te Parau Ha’api’ira’a ’e te mau Parau Fafau 113:7–10 i te hō’ē tātarara’a fa’auruhia o te Isaia 52:1–2. E aha te mea tā teie mau parau e tu’u mai nei i roto i tō tātou hāro’aro’ara’a ?

hōho’a tarai nō te Mesia e amo ra i te sātauro

Nō te here, nā te ta’ata tarai Angela Johnson

Isaia 52:13–15 ; 53

ʼUa rave Iesu Mesia i niʼa iho iāna tā tātou mau hara ʼe tō tātou mau māuiui.

• Nō te tauturu i te mau pīahi ’ia hi’o i te mau parau a Isaia i roto i te Isaia 53, e nehenehe ’outou e pia i te tahi mau hōho’a nō te mau ’ohipa i tupu ’ati a’e te Tāra’ehara a Iesu Mesia (hi’o Buka hōho’a nō te ’evanelia, mau nūmera 56–60). I muri iho e nehenehe ’outou e ani i te mau pīahi ’ia ’imi i te mau pereota i roto i te Isaia 53 ’o tē fa’a’ite nei i te mau ’ohipa i tupu i roto i te mau hōho’a. E aha tā te mau parau a Isaia e ha’api’i nei nō ni’a i te mamae o te Fa’aora nō tātou ? E aha tā rātou e parau nō ni’a nō te aha ’oia i mamae ai nō tātou ? E aha tā teie mau ha’api’ira’a e fa’auru nei ia tātou ’ia rave ?

• Nō te ani i te Vārua Maita’i ’ia fa’a’ite pāpū mai i te mau parau mau i ha’api’ihia i roto i te Isaia 52:13–15 ; 53, e nehenehe ’outou e ani i te mau pīahi ’ia tai’o māmū noa i teie mau ’īrava ’a fa’ata’i ai ’outou i te hō’ē hīmene i fa’aharuharuhia nō ni’a i te Tāra’ehara a Iesu Mesia. E ani i te mau pīahi ’ia ’imi i te mau ta’o ’aore rā i te mau pereota i roto i te mau pāpa’ira’a mo’a o tā rātou e mana’o rā e mea faufa’a ta’a ’ē. I muri iho ’a vaiiho ia rātou ’ia fa’a’ite mai i te mea tā rātou i ’ite ’e tō rātou mana’o nō ni’a i te Fa’aora. ’A feruri ato’a i te ani i te mau pīahi ’ia tai’o i te Mosia 15:10–12, i reira Abinadi i te fa’ata’ara’a i te aura’a o te parau « tōna hua’ai ». Nāhea teie ravera’a i te tauturu ia tātou ’ia ta’a maita’i i te Isaia 53:10 ?

Isaia 54

Tē hina’aro nei Iesu Mesia ’ia ho’i tātou iāna ra.

• E nehenehe te tuatāpapara’a i te Isaia 54 e fa’auru i te mau pīahi e ’oto ra nō tā rātou mau hara ’aore rā mau paruparu. E nehenehe ’outou e ani i te mau pīahi ’ia ’imi i te pene 54 nō te mau pereota ’aore rā te mau ’īrava e fa’a’ite ra ē, e aha te mana’o o te Fa’aora nō ni’a ia tātou. Nāhea ’oia e hina’aro ai e ’ia ’ite tātou i tā tātou mau hara ’e mau paruparu tahito ? Nāhea ’oia e hina’aro ai e ’ia ’ite tātou iho nō ni’a iāna ? ’A fa’aitoito i te mau pīahi ’ia fa’a’ite mai i te tahi mea tā rātou i ha’api’i mai nō ni’a ia Iesu Mesia i roto i teie pene. E nehenehe te fa’ahitira’a parau a te peresideni Dieter F. Uchtdorf i roto i « Te tahi atu ā mātēria tauturu » e ha’amaita’i atu ā i tā ’outou ’āparaura’a.

ītona te tahi atu ā mātēria tauturu

Te tahi atu ā mātēria tauturu

Nā roto ia Iesu Mesia e nehenehe tātou e fāri’i i te ti’aturira’a.

’Ua ha’api’i te peresideni Dieter F. Uchtdorf :

« Noa atu te fāito e au ra ē ’ua ’ino roa tō tātou orara’a. Noa atu te ’ana’ana o tā tātou mau hara, te hōhonu o tō tātou ’ino’ino, te vai-’ōtahi-ra’a o tō tātou ’ā’au, ’ua fa’aru’ehia mai ’aore rā ’ua pēpē te māfatu. Noa atu te feiā ’aita e tīa’ira’a, te feiā e ora nei i roto i te mana’o paruparu, te feiā tei ha’avarehia i roto i tō rātou ti’aturira’a, tei fa’aru’e i tō rātou parauti’a, ’e ’aore rā, tei huritua i te Atua, e nehenehe rātou e patu-fa’ahou-hia…

« Teie te parau ’āpī ’oa’oa o te ’evanelia : Nā roto i te rāve’a rahi ’oa’oa mure ’ore tei hōro’ahia mai e tō tātou Metua here i te ao ra, ’e nā roto i te Tāra’ehara hope ’ore a Iesu Mesia, e fa’aorahia tātou ’eiaha i tō tātou noa huru hi’a, ’e ’ia fa’aho’ihia i roto i te vi’ivi’i ’ore, e nehenehe ato’a rā tātou e haere i mua i ’ō atu i tā te ta’ata tāhuti nei e nehenehe e feruri, ’e ’ia riro mai ’ei feiā ’āi’a i te ora mure ’ore ’e ’ia fāri’i i te hanahana fāito ’ore o te Atua » (« E tu’u ’oia ia ’oe i ni’a i tōna tapono ’e e fa’aho’i ’oia ia ’oe i te fare », Liahona, Mē 2016,102).

Ha’amaita’ira’a i tā tātou ha’api’ira’a

’A ora mā te ti’amā i te arata’ira’a a te Vārua. ’Ia ora ana’e ’outou i te ’evanelia mā te ti’amā, ’ua ti’amā ïa ’outou i te auhoara’a a te Vārua, ’o te ’orometua ha’api’i maita’i roa a’e ïa. ’A ’imi ai ’outou i te arata’ira’a a te Vārua Maita’i, e tu’u mai ’oia i roto ia ’outou te mau mana’o, te mau fa’a’itera’a ’e te mau mana’o hāmani nō ni’a e nāhea ’ia pāhono atu i te mau hina’aro o te feiā tā ’outou e ha’api’i ra. (Hi’o Ha’api’ira’a mai tā te Fa’aora, 5.)