Te pāne ora, nā Chris Young

14–20 nō Novema

Amosa ; Obadia

« E ’imi ’outou ia Iehova, e ora ïa ’outou »

’A tuatāpapa ai ’outou i te Amosa ’e te Obadia, ’a ’īriti i te mau mana’o nō ni’a i te mea tā ’outou e ti’a ’ia ha’api’i i te mau pīahi. ’A pāpa’i i teie mau mana’o, ’e ’a ’imi i te mau rāve’a nō te fa’a’ite i te reira i roto i tā ’outou piha ha’api’ira’a i te sābati.

Pāpa’i i te mau mana’o e tae mai

Tītau i te mana’o

Mai ia Amosa ’e Obadia ’o tei hōro’a i te mau fa’aarara’a i te mau ta’ata i tō rāua ’anotau, e hōro’a ato’a mai tā rāua mau parau i te mau fa’aarara’a ia tātou i teie mahana. E nehenehe ’outou e ani i te mau pīahi ’ia fa’a’ite mai i te mau ha’api’ira’a nō roto mai i te Amosa ’e te Obadia e tano nō tātou.

Ha’api’i i te ha’api’ira’a tumu

Amosa 3:7–8 ; 7:10–15

Tē heheu mai nei te Fatu i te parau mau nā roto mai i tāna mau peropheta.

• E ani i te mau pīahi ’ia fa’a’ite mai i te mau parau mau nō ni’a i te mau peropheta tā rātou i ’ite i roto i tā rātou iho tuatāpapara’a ’aore rā i tā tō rātou ’utuāfare tuatāpapara’a i te Amosa 3 ’e te Amosa 7. E nehenehe ’outou e tīti’a i tā rātou mau pāhonora’a i ni’a i te tāpura ’ere’ere. E aha te tahi atu mau parau mau nō ni’a i te mau peropheta tā tātou i ’ite ? (Nō te tahi mau mana’o, ’a hi’o i te parau ve’a o te mau Parau tumu o te ’Evanelia « Te mau peropheta » [topics.ChurchofJesusChrist.org]). ’A fa’aitoito i te mau pīahi e rave rahi ’ia fa’a’ite mai e mea nāhea tō rātou ’itera’a pāpū i te noa’ara’a nō ni’a i te ti’ara’a faufa’a rahi o te mau peropheta i roto i te fa’anahora’a a te Atua.

• Nāhea e ti’a ai ia tātou ’ia fa’a’ite i te hō’ē hoa i te faufa’a o te hō’ē peropheta i tō tātou nei ’anotau ? E nehenehe ’outou e tīti’a i ni’a i te tāpura ’ere’ere te mau uira’a o tā te hō’ē ta’ata e ’ere i te melo nō te ’Ēkālesia, e nehenehe e ui mai nō ni’a i te mau peropheta. Nāhea e ti’a ai ia tātou ’ia pāhono i te tahi o teie mau uira’a ma te fa’a’ohipa i te Amosa 3:7–8 ’e te 7:10–15 ?

• ’Ei tuha’a nō tā ’outou tāu’ara’a parau nō ni’a i te mau peropheta, e nehenehe ’outou e fa’a’ite i te hō’ē o te mau video i muri nei : « We Need Living Prophets [E hina’aro tātou i te mau peropheta ora] » ’aore rā, « Words of the Prophets [Te mau parau a te mau peropheta] » (ChurchofJesusChrist.org). Nāhea te mau peropheta nō te mau mahana hope’a nei e tauturu ai ia tātou ’ia ha’afātata atu ia Iesu Mesia ?

Amosa 5 ; 8:11–12

E au te tāivara’a mai te hō’ē o’e i te fa’aro’ora’a i te mau parau a te Fatu.

• Nō te ha’amata i te hō’ē ’āparaura’a nō ni’a i te o’e i fa’ata’ahia mai e Amosa i roto i te Amosa 8:11–12, e nehenehe ’outou e ’ite mai i te tauturu nā roto i te hi’o-poto-ra’a i te huru vārua o te mau ta’ata tāna i poro. E mea nāhea tō ’Īserā’ela fāriu-’ē-ra’a i te Fatu ? (hi’o, ’ei hi’ora’a, Amosa 2:6–8 ; 5:11–12). Nō te aha e mea faufa’a ’ia ’ite nō ni’a i tō rātou topara’a ? I muri iho, e nehenehe te mau pīahi e tai’o i te Amosa 8:11–12 ’e ’ia paraparau nō te aha te « o’e » ’e te « poihā » e riro ai ’ei mau parau maita’i nō te fa’a’ite i te huru o te feiā e fāriu ’ē atu i te Fatu. E nehenehe ato’a te mau pīahi e ’imi i te Amosa 5 nō te mau ’īrava ’o te nehenehe e tauturu ia tātou ’ia ’ape i te tāivara’a i roto i tō tātou orara’a (hi’o, ’ei hi’ora’a, mau ’īrava 4, 11–12, 14–15, 25–26).

• Te māramaramara’a i te po’ia pae vārua ’o tē ’āpe’e nei i te tāivara’a, e tauturu te reira ia tātou ’ia māramarama i te pōpou pae vārua tā tātou e ’oa’oa nei nō te fa’aho’i-fa’ahou-ra’a mai. E nehenehe ’outou e pāpa’i i te tahi mau uira’a nō ni’a i te Tāivara’a ’e te Fa’aho’i-fa’ahou-ra’a mai i ni’a i te tāpura ’ere’ere, mai teie Nō te aha i tupu ai te tāivara’a ? E aha tā te tāivara’a i fa’atupu i ni’a i te mau tamari’i a te Atua ? E aha tā te fa’aho’i-fa’ahou-ra’a mai i fa’atupu ? E fa’aitoito i te mau pīahi ’ia ’imi i te mau pāhonora’a nō teie ’e te tahi atu mau uira’a ma te fa’a’ohipa i te mau mātēria tauturu mai teie i muri nei : « Te parau poro’i o te fa’aho’i-fa’ahou-ra’a mai o te ’evanelia a Iesu Mesia » i te pene 3 o te ’Ia poro haere i tā’u nei ’evanelia ([2019], 36–39) ; te parau ve’a nō te mau Parau tumu o te ’Evanelia « Tāivara’a » (topics.ChurchofJesusChrist.org) ; te video « The Great Apostasy [Te tāivara’a rahi] » (ChurchofJesusChrist.org) ; ’e te fa’ahitira’a parau i roto i « Te tahi atu ā mātēria tauturu ». E ani i te mau pīahi ’ia paraparau mai nō ni’a i te mau parau mau i fa’aho’i-fa’ahou-hia mai i tō tātou nei ’anotau, tei riro ’ei faufa’a ta’a ’ē nō rātou.

E nehenehe tātou e riro mai ’ei mau fa’aora i ni’a i te mou’a nō Ziona, nā roto i te ravera’a i te ’ohipa hiero ’e te ’ā’amu ’utuāfare.

Obadia 1:21

« E tae ho’i te feiā fa’aora i ni’a i te mou’a ra i Ziona ».

• Nō te aha te parau « te feiā fa’aora i ni’a i te mou’a ra i Ziona »(Obadia 1:21) e riro ai ’ei tātarara’a maita’i nō tātou ’ia rave ana’e tātou i te ’ohipa hiero ’e te ’ā’amu ’utuāfare ? Nāhea te ’ohipa tā tātou e rave nei nō tō tātou mau tupuna i roto i te hiero e tauturu ai ia tātou ’ia ha’afātata atu i te Fa’aora ia Iesu Mesia ? E nehenehe te mau pīahi e fa’a’ite mai i te mau mea i orahia mai e rātou ’aita i maoro a’e nei, i te ravera’a i te ’ohipa hiero ’e te ’ā’amu ’utuāfare.

Te tahi atu ā mātēria tauturu

Te mau ha’api’ira’a nō roto mai i te mau tau i ma’iri.

’Ua ha’api’i te peresideni M. Russell Ballard :

« I roto i te hō’ē pu’e tau poto noa i pū’ohuhia e te Faufa’a ’Āpī… ’ua huri tua te ta’ata i te Mesia ’e i tāna mau ’Āpōsetolo. Nō te rahi o te topara’a ’ua ’ite tātou i te reira ’ei Tāivara’a Rahi, ’o tei arata’i i te mau tenetere nō te taimāmūra’a pae vārua ’e te matapō pi’ihia te mau matahiti pōiri.

« … ’Ua here tō tātou Metua i te ao ra i tāna mau tamari’i pā’āto’a, ’e tē hina’aro nei ’oia ia rātou pā’āto’a ’ia fāri’i i te mau ha’amaita’ira’a o te ’evanelia i roto i tō rātou orara’a. ’Aita te māramarama pae vārua i mo’e nō te mea e huri tua te Atua i tāna mau tamari’i. Terā rā, e tupu te pōiri pae vārua mai te mea e huri ’āmui tāna mau tamari’i i tō rātou tua iāna. ’Ua riro te reira ’ei hope’ara’a nō te mau mā’itira’a ’ino i ravehia e te mau ta’ata, te mau ’oire, te mau fenua, ’e te mau nūna’a ato’a. ’Ua ha’apāpūhia te reira e rave rahi taime i te roara’a o te tau. Te hō’ē o te mau ha’api’ira’a rahi nō teie hōho’a ’ā’amu, ’oia ho’i nā tā tātou mau mā’itira’a, tāta’itahi ’aore rā ’āmui e fa’atupu i te hope’ara’a pae vārua nō tātou iho ’e nō tō tātou hua’ai (« ’Apora’a mai i te mau ha’api’ira’a nō te mau tau i ma’iri », Liahona, Mē 2009, 32).

Ha’amaita’i i tā tātou ha’api’ira’a

Ha’api’i nāhea ’ia ’ite i te Vārua Maita’i. « Mai tei fa’auruhia e te Vārua Maita’i, ’a ani i te mau pīahi e aha tā rātou e mana’o ra ’e e aha tei fa’auruhia ia rātou ’ia rave. ’A tauturu ia rātou ’ia ’āmui atu i tō rātou mau mana’o pae vārua i te fa’aurura’a a te Vārua Maita’i » (Ha’api’ira’a mai tā te Fa’aora, 11).