Bread of Life [Ang Tinapay sa Kinabuhi], ni Chris Young

Nobyembre 14–20

Amos; Abdias

“Pangitaa Ninyo si Jehova, ug Mangabuhi”

Samtang imong tun-an ang Amos ug ang Abdias, pangandam sa mga impresyon mahitungod sa unsay imong itudlo sa imong mga sakop sa klase. Irekord kini nga mga hunahuna, ug pangitaa ang mga oportunidad sa pagpaambit niini diha sa imong klase sa Dominggo.

Irekord ang Imong mga Impresyon

Dapita ang Pagpaambit

Sama ni Amos ug Abdias nga mihatag og mga pasidaan ngadto sa katawhan sa ilang panahon, ang ilang mga pulong nakahatag usab og pasidaan kanato sa atong panahon. Tingali imong dapiton ang mga sakop sa klase sa mga pagtulon-an gikan sa Amos ug Abdias nga alang kanato.

Itudlo ang Doktrina

Amos 3:7–8; 7:10–15

Ang Ginoo mopadayag sa mga kamatuoran pinaagi sa Iyang mga propeta.

• Dapita ang mga sakop sa klase sa pagpaambit og mga kamatuoran mahitungod sa mga propeta nga ilang makit-an diha sa ilang personal ug pamilya nga pagtuon sa Amos 3 ug Amos 7. Makahimo ka og lista sa ilang mga tubag diha sa pisara. Unsa nga laing kamatuoran ang mahitungod sa mga propeta nga atong nahibaloan? Awhaga ang pipila ka sakop sa klase kon sa unsang paagi nga sila nakabaton sa ilang mga pagpamatuod sa importanting papel sa mga propeta diha sa plano sa Dios.

• Sa unsa kaha nga paagi nga kita makapaambit sa usa ka higala kon nganong importante nga makabaton og usa ka propeta sa atong panahon? Mahimo ka nga maglista diha sa pisara og mga pangutana nga tingali ipangutana sa usa ka tawo nga dili sakop sa Simbahan mahitungod sa mga propeta. Unsaon nato sa pagtubag sa pipila niining mga pangutana gamit ang Amos 3:7–8 ug 7:10–15?

• Sa unsang paagi ang mga propeta sa ulahing mga adlaw nakatabang nato nga mapaduol ngadto ni Jesukristo?

Amos 5; 8:11–12

Ang apostasiya sama sa usa ka kagutom sa pagdungog sa mga pulong sa Ginoo.

• Aron makasugod og usa ka kulokabildo mahitungod sa kagutom nga gihulagway diha sa Amos 8:11–12, lagmit inyong mabatyagan nga makatabang ang pagrebyo og kadali sa espirituhanong kahimtang sa mga tawo nga iyang gisangyawan. Sa unsang paagi ang mga Israelita mipalayo gikan sa Ginoo? (tan-awa, alang sa mga ehemplo, Amos 2:6–8; 5:11–12). Nganong mahinungdanon nga mahibalo mahitungod niining pagkapukan? Dayon ang mga sakop sa klase makabasa sa Amos 8:11–12 ug maghisgot mahitungod kon ngano nga ang “kagutom” ug “kauhaw” mao ang maayong mga pulong sa paghulagway sa kahimtang niadtong kinsa mipalayo gikan sa Ginoo. Ang mga sakop sa klase mahimo usab nga makapangita sa Amos 5 alang sa mga bersikulo nga makatabang kanato nga makalikay sa apostasiya sa atong mga kinabuhi (tan-awa sa, alang sa ehemplo mga bersikulo 4, 11–12, 14–15, 25–26).

• Ang pagsabot sa espirituwal nga kagutom nga inubanan sa apostasiya makatabang kanato sa pagsabot sa espirituwal nga pagbusog nga atong natagamtaman tungod sa Pagpahiuli. Tingali mahimo ka nga mosulat og pipila ka mga pangutana mahitungod sa Apostasiya ug Pagpahiuli diha sa pisara, sama sa Ngano man nga adunay usa ka Apostasiya? Unsa ang epekto sa Apostasiya diha sa mga anak sa Dios? Unsa ang epekto sa Pagpahiuli? Awhaga ang mga sakop sa klase sa pagpangita og mga tubag niini nga mga pangutana ug sa ubang mga pangutana gamit ang mga kapanguhaan sama sa mosunod: “Ang Mensahe sa Pagphiuli sa Ebanghelyo ni Jesukristo” sa kapitulo 3 sa Isangyaw ang Akong Ebanghelyo ([2019], 36–39); the Gospel Topics article “Apostasy” (topics.ChurchofJesusChrist.org); ug sa kinutlo diha sa “Dugang nga mga Kapanguhaan.” Dapita ang mga sakop sa klase sa paghisgot mahitungod sa mga kamatuoran nga gipahiuli sa atong panahon nga makahuluganon ngadto kanila.

Kita mamahimong manluluwas sa Bukid sa Sion pinaagi sa pag-apil sa buhat sa templo ug sa family history.

Abdias 1:21

“Ang mga manluluwas motungas sa Bukid sa Sion.”

• Nganong ang hugpong sa mga pulong nga “manluluwas … sa bukid sa Sion” (Abdias 1:21) usa ka maayong paghulagway alang kanato kon kita mohimo sa buhat sa templo ug family history? Sa unsang paagi ang buhat nga atong gihimo alang sa atong mga katigulangan diha sa templo makatabang kanato nga mobati nga mas maduol ngadto sa Manluluwas nga si Jesukristo? Ang mga sakop sa klase mahimong makapaambit og bag-ohay nga mga kasinatian nga ilang naangkon sa paghimo sa buhat sa templo ug family history.

Dugang nga mga Kapanguhaan

Mga Leksiyon sa nangagi.

Si Presidente M. Russell Ballard nagtudlo:

“Sa mubong panahon nga naglangkob sa Bag-ong Tugon, … ang mga tawo misalikway kang Kristo ug sa Iyang mga Apostoles. Ang pagkatumpag hilabihan nga kini atong giila nga Dako nga Apostasiya, nga midala ngadto sa gatusan ka mga tuig sa espirituhanong paghunong ug pagkaignorante nga gitawag og Mangi[o]b nga mga Katuigan.

“…Ang atong Langitnong Amahan naghigugma sa tanan Niyang mga anak, ug Siya buot nga silang tanan makaangkon sa mga panalangin sa ebanghelyo sa ilang mga kinabuhi. Ang espirituhanong kahayag wala mawala tungod ang Dios mitalikod sa Iyang mga anak. Hinoon, ang espirituhanong kangitngit miresulta sa dihang ang Iyang mga anak naghiusang mitalikod Kaniya. Kini natural nga sangputanan sa sayop nga mga pagpili nga gihimo sa mga indibidwal, mga komunidad, mga nas[o]d, ug sa tanang mga sibilisasyon. Kini napamatud-an na og makadaghan sa tibuok dagan sa panahon. Usa sa labing dako nga leksyon niining makasaysayanong sumbanan mao nga ang atong mga pagpili, ma-indibidwal ug matanan man, moresulta ngadto sa espirituhanong mga sangputanan alang sa atong mga kaugalingon ug sa atong kaliwatan” (“Pagkat-on sa mga Leksyon sa Nangagi,” Liahona, Mayo 2009, 32).

Pagpalambo sa Atong Pagtudlo

Tabangi ang mga tigkat-on nga makaila sa Espiritu Santo. “Sumala sa pag-aghat sa Espiritu Santo, pangutan-a ang mga nagkat-on kon unsay ilang gibati ug unsay giaghat kanila nga buhaton. Tabangi sila nga makonektar sa ilang espirituhanong mga pagbati uban sa impluwens[i]ya sa Espiritu Santo” (Pagtudlo sumala sa Pamaagi sa Manluluwas, 11).