Daniel Interprets Nebuchadnezzar’s Dream [Gihubad ni Daniel ang Damgo ni Nabucodonosor], ni Grant Romney Clawson

Oktubre 31–Nobyembre 6

Daniel 1–6

“Walay Laing Dios nga Makaluwas”

Daghang sakop sa klase ang mahimong pamilyar sa pipila ka mga istorya diha sa basahon ni Daniel. Samtang ikaw magtuon ug mangandam sa pagtudlo, tinguhaa ang giya gikan sa Espiritu kabahin kon sa unsang paagi nga ikaw makatabang sa mga sakop sa klase nga makakaplag og personal nga kahulogan niining mga kapitulo.

Irekord ang Imong mga Impresyon

Dapita ang Pagpaambit

Mahimong makatabang ang pagdapit sa mga sakop sa klase sa pagpaambit kon kumusta na ang ilang personal o pamilya nga pagtuon sa kasulatan. Kon ang mga sakop sa klase mopaambit og usa ka panabot mahitungod sa usa ka butang nga gitudlo sa Espiritu diha kanila niining semanaha, mahimo nimo silang pangutan-on kon unsay ilang gibuhat sa ilang pagtuon nga misangpot niadto nga mga panabot.

Itudlo ang Doktrina

Daniel 1; 3; 6

Kita makasalig sa Ginoo kon ang atong hugot nga pagtuo pagasulayan.

• Aron makasugod og usa ka panaghisgotan mahitungod kon sa unsang paagi si Daniel, Shadrach, Meshach, ug Abed-nego nga mipakita og hugot nga pagtuo diha sa Ginoo, mahimo nimong hangyoon ang pipila ka mga sakop sa klase nga i-summarize ang mga hagit nga giatubang niining upat ka mga lalaki diha sa Daniel 1, 3, ug 6. Nganong lisod man ang magmasulundon niining mga sitwasyona? Unsa nga mga sitwasyon nga atong giatubang nga mohagit sa atong hugot nga pagtuo? Ang mga sakop sa klase mahimong mosiksik sa Daniel 1:10–13; 3:15–18; 6:10, nga mangita kon sa unsang paagi kining upat ka mga lalaki miatubang sa ilang mga hagit. Sa unsa nga paagi nga ang ilang mga ehemplo makatabang sa atong mga paningkamot nga magmatinud-anon nga mga disipulo ni Jesukristo?

• Daghan kanato, sama ni Daniel ug sa iyang mga higala, mibati nga gipugos aron maapiki ang atong mga sumbanan. Unsa ang pipila ka mga tinubdan niining mga pagpamugos sa atong mga kinabuhi? Aron matabangan ang mga sakop sa klase nga makat-on gikan sa ehemplo ni Daniel ug sa iyang mga higala, mahimo nimong bahinon ang klase ngadto sa tulo ka grupo ug tahasan ang matag grupo sa pagrebyo sa usa sa mosunod nga mga kapitulo: Daniel 1, 3, o 6. Sa unsang paagi ang Ginoo mipanalangin nilang Daniel, Shadrack, Meshach, ug Abed-nego sa dihang sila mipili nga magmatinud-anon bisan pa man sa pagpamugos nga ilang giatubang? Ang matag grupo makapaambit sa klase unsa ang ilang nadiskobrihan. Ang mga sakop sa klase makahimo na dayon nga magtinambagay mahitungod kon unsaon sa pagpabilin nga matinud-anon bisan pa man sa katilingbanon nga pagpamugos o laing matang sa pagpamugos. Mahimo usab silang makahisgot sa importansiya sa pagpangita og maayong mga higala kinsa mosuporta kanato sa atong mga sumbanan.

Daniel 2

Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa yuta.

• Ang paghisgot sa Daniel 2 makatabang sa imong klase nga masabtan kon sa unsang paagi ang Simbahan ni Jesukristo sa mga Santos sa Ulahing mga Adlaw nakatuman sama sa gipanagnang padulngan nga “bato nga naligid gikan sa bukid” (bersikulo 45). Sa pagsugod, mahimo kamong morebyo isip usa ka klase sa paghulagway ug paghubad ni Daniel sa damgo ni Nabucodonosor, nga makita diha sa Daniel 2:31–45. Dayon mahimo nimong ipakita ang usa ka hulagway sa usa ka bato (o pagdrowing diha sa pisara). Dapita ang mga sakop sa klase sa pagpaambit unsa ang ilang nakat-onan mahitungod sa gingharian sa Dios pinaagi sa pagtandi niini ngadto sa mga paghulagway sa bato diha sa Daniel 2:34–35, 44–45. Tingali nakahibalo ang mga sakop sa klase og pipila sa mga kasaysayan sa Simbahan diha sa inyong dapit nga mahimo nilang ikapaambit. Sa unsang paagi nga atong nakita ang mga panagna ni Daniel nga natuman diha sa atong indibidwal nga mga kinabuhi?

Daniel 2:1–30

Ang pagdawat og pagpadayag nagkinahanglan og espirituhanong pagpangandam.

• Tingali ang mga sakop sa klase makabenepisyo gikan sa pagkat-on mahitungod kon giunsa ni Daniel sa pag-andam ang iyang kaugalingon sa pagdawat sa gikinahanglan nga pagpadayag ug paghubad sa damgo ni Nabucodonosor. Mahimo nimong sugdan pinaagi sa paghangyo sa klase sa pagrebyo sa Daniel 2:1–15 ug dayon mopaambit kon unsa ang ilang bation kon sila pa ang anaa sa kahimtang ni Daniel. Dapita sila sa pagsiksik sa Daniel 2:16–18 aron makat-on unsa ang gibuhat ni Daniel. Unsa ang atong makat-onan gikan sa Daniel 1:17 mahitungod kon giunsa sa Dios sa pag-andam si Daniel? Unsa ang atong makat-onan gikan ni Daniel nga makatabang kanato kon kita magtinguha og personal nga pagpadayag? Unsa ang atong makat-onan gikan sa mga pulong ug mga buhat ni Daniel human siya nakadawat og tabang sa Ginoo? (tan-awa sa Daniel 2:20–30).

Paghulagway ni Daniel ug sa iyang mga higala nga nagbalibad sa pagkaon sa hari, ni Brian Call

Daniel 3

Kon ang sangpotanan walay klaro, makapili gihapon kita sa hugot nga pagtuo.

• Ang kasinatian nilang Shadrach, Meshach, ug Abed-nego nga makita sa Daniel 3 makatabang sa imong mga sakop sa klase nga mas hingpit nga masabtan unsa ang gipasabot sa pagbaton og hugot nga pagtuo diha ni Jesukristo. Mahimo nimong dapiton ang mga sakop sa klase i-summarize ang hagit nga giatubang nilang Shadrach, Meshach, ug Abed-nego (tan-awa sa Daniel 3:1–12) ug dayon hisgoti kon sa unsang paagi sila mitubag (tan-awa sa Daniel 3:13–18). Unsay atong makat-onan bahin sa hugot nga pagtuo gikan sa tubag niining batan-ong mga lalaki? Mahimo nimong isulat diha sa pisara ang mga pulong Ang Atong Dios Makahimo sa… ug Apan kon dili… gikan sa mga bersikulo 17–18. Mahimong mosugyot ang mga sakop sa klase kon unsaon nila sa pagtubag ang mga blangko sa mga sitwasyon nga ilang giatubang. Pananglitan, sila mahimong mosugyot nga “Ang atong Dios makahimo sa pagtubag sa tanan nakong pangutana” ug “Apan kon dili mapailubon ko nga mosalig Kaniya.” Samtang ang mga sakop sa klase mopaambit og mga ehemplo, awhaga sila sa paghisgot mahitungod kon sa unsang paagi ang Manluluwas mosuporta ug molig-on kanato bisan kon wala kita masayod kon unsay sangpotan sa mga butang.

Pagpalambo sa Atong Pagtudlo

Paggamit og mga biswal nga tabang. “Ang art, lakip ang mga litrato, mga video, ug mga drama-drama, makatabang nga mainteresado ang mga tigkat-on—ilabi na sa biswal nga mga tigkat-on—ug makahimo sa mga istorya sa kasulatan nga mas halandumon” (Pagtudlo sumala sa Pamaagi sa Manluluwas, 22).