Te Berena Ni Kamaiu, iroun Chris Young

Nobembwa 14–20

Amota; Obaria

“Kam na Ukoukora Iehova, ao Kam na Maiu”

Ngkai ko kamatebwaia Amota ao Obaria, tauraoi nakon taian namakin bwa tera ae ko riai n reirei iaona nakoia kaain am kiraati. Korei namakin aikai, ao karekea te tai are ko na tibwai n tain am kiraati n te Tabaati.

Korei Am Namakin

Kaunga te Tibwatibwa

N aron are Amota ao Obaria a anga kauring nakoia aomata n aia bong, aia taeka a kauringiira naba n taai aikai. Ko na bae ni kaoia kaain te kiraati bwa e na tibwaua te reirei man Amota ao Obaria are e kaineti nakoira.

Reirei te Reirei

Amota 3:7–8; 7:10–15

Te Uea e kaotii koaua rinanoia Ana burabeti.

• Kaoiia kaain te kiraati bwa a na tibwa te koaua iaoia burabeti are a kunea n tain aia kamatebwai ibon irouia ke n aia utu n Amota3 ao Amota7. Ko kona ni karinanii aia kaeka iaon te burakibooti. Tera riki koaua ibukiia burabeti ae ti ataia? (Ibukin tabeua iango, taraa Atuun Rongorongo n te Euangkerio “Burabeti”[topics.ChurchofJesusChrist.org].) N am tai n anga reirei, kaoiia kaain te kooram ke te kiraati n tibwauai aia koaua iaon kakaawakin te utu n ana babaire te Atua.

• Ti na kanga n tibwaia ma raraora bwa e aera e kakawaki bwa a na iai te burabeti n ara bong? Ko kona ni koreia iaon te burakibooti titiraki are e tabekiarake temanna ae tiaki kaain te Ekaretia iaoia burabeti. Ti na kanga ni kaekai titiraki aikai man kabonganaan Amota 3:7–8 ao 7:10–15?

• N riki bwa mwakoron te marooro iaoia burabeti, ko kona ni kaota teuana man witeo aikai: “We Need Living Prophets” ke “Word of the Prophets” (ChurchofJesusChrist.org). A kanga burabeti ni boong aika kaitira n tia ni buokiira ni kaaniira nakon Iesu Kristo?

Amota5; 8:11–12

Kitanan te koaua kanga ai aron te rongo ni kan ongo ana taeka te Uea.

• Ni moana te marooro iaon te bwaka man te koaua are e kabwarabwara Amota n Amota 8:11–12, ko na kunea bwa e na ibuobuoki rinanoan aroia n te maiu n tamnei aomata are e kabwarabwara nakoia. A kanga kaain Iteraera n tanako mai iroun te Uea? (taraa, ibukin te katooto, Amota 2:6–8; 5:11––12). Bukin tera e ibuobuoki ataakin aron bwakaia? A kona kaain te kiraati ngkanne ni wareka Amota 8:11–12 ao ni marooro bwa bukin tera “te rongo” ao “te taka” bon taeka aika a tamaroa ni kabwarabwaraan aroia naake a tanako mai iroun te Uea. A kona naba kaain te kiraati ni kakaea n Amota5 kiibu ake a na buokiira n totokoa kitanan te koaua inanon maiura (taraa, ibukin te katooto, kiibu 4, 11–12, 14–15, 25–26).

• Te mataata iaon te baki n te tamnei are e raonaki ma kitanan te koaua e buokiira n oota n te baka n amwarake n te tamnei are ti kukurei ni katoonga man Kaokakin Bwai. Ko kona ni korei tabeua titiraki iaon Kitanan te Koaua ao Kaokan Bwai iaon te burakibooti, n aron Bukin tera e reke Kitanan te Koaua? Tera ae e riki nakoia natin te Atua man rikin Kitanan te Koaua? Tera ae e riki mai imwiin Kaokan Bwai? Kaungaia kaain te kiraati bwa a na kakaea rekena ao reken titiraki ake tabeua man kabonganaan bwai ni ibuobuoki n aron: “The Message of the Restoration of the Gospel of Jesus Christ” inanon mwakoro 3 n Preach My Gospel ([2019], 36–39); the Gospel Topic article “Apostasy” (topics.ChurchofJesusChrist.org); te witeo “The Great Apostasy” (ChurchofJesusChrist.org); ao te taeka ae kaotaki inanon “Bwaai ni Ibuobuoki riki Tabeua.” Kaoia kaain te kiraati bwa a na marooro iaon te koaua are e kaokaki inanon ara bong ake a rangi ni uaana nakoia.

Ti kona n riki bwa taan kamaiu iaon Maungan Tion man karaoan mwakuri n te tembora ao mwakuri n rongorongon te utu.

Obaria 1:21

“A na aerake taani kamaiu i aon te Maunga are Tion.”

• Bukin tera te kibu n taeka ae “tani kamaiu … i aon maungan Tion” (Obaria 1:21) bon te kabwarabwara ae tamaroa ibukira ngkana ti karaoa te mwakuri n te tembora ao rongorongon te utu? E na kanga te mwakuri are ti karaoia ibukiia ara bakatibu n te tembora e buokiira ni kaan riki nakon te Tia Kamaiu ao Iesu Kristo? Ti kona n riki bwa taan kamaiu iaon Maungan Tion man karaoan mwakuri n te tembora ao mwakuri n rongorongon te utu.

Bwaai n Ibuobuoki Riki Tabeua

Reirei man taai ake rimoa.

E reirei Beretitenti M. Russell Ballard:

“Ni kabotauaki ma uarereken te ririki are e rinanona te Nu Tetemanti, … aomata a katinanikua Kristo ao Ana Abotoro. E bon rangi ni korakora te bwaka ngaia are tia ataia iai bwa Kitanan te Koaua ae Korakora, are e a kairi nakon te tienture are e aaki rikirake ao n tabeakinaki te maiu n tamnei ae aranaki bwa Te Ririki n Akea te Oota.

“…Tamara ae i Karawa e tangiriia Natina ni kabane, ao E tangiria bwa a na bane ni karekea te kakabwaia n te euangkerio inanon mauia. Te oota n te maiu n tamnei e aki bua ibukina bwa te Atua e tanako mai irouia Natina. Ma ibukina bwa, te roo n te maiu n tamnei e reke ngke a bane n tanako Natina ni kabane mai Irouna. Bon anne te bwai ae e riki mai imwiin te rinerine ae kairua ae karaoia temana, te komiunite, te kaawa, ao te botanaomata ae bwanin. Aio e kakoauaaki bwa e a tia n riki rinanon nako waakin te tai. Teuana te reirei ae kakawaki man te baeten aei n rongorongon te aonaaba bwa ara rinerine, ibon iroura ao ngaira ni kabane, e karekea mwiina ni maiun tamneira ibon ibukira ao ibukiia kanoara” (“Learning the Lessons of the Past,” Riaona, Meei 2009.32).

Kanakoraoan Ara Anga reirei

Buokiia taan reiakinaki ni Kinaa te Tamnei ae Raoiroi. “Man ana kairi te Tamnei ae Raoiroi, titirakiniia tann reiakinaki bwa tera aia namakin ao tera te bwai ae a namakinna bwa a na karaoia. Buokiia bwa a na kairekerekea aia namakin n te tamnei ma ana kairoro te Tamnei ae Raoiroi” (Teaching in the Savior’s Way, 11).