“Okitobwa 31–Nobembwa6. Taniera 1–6: ‘Akea te Anti Temanna ae E Kona ni Kamaua te Aba,’” Nakomai, Iriirai—Ibukin te Reirei n Tabati: O Tetemanti 2022 (2021)
“Okitobwa 31–Nobembwa6. Taniera 1–6,” Nakomai, Iriirai—Ibukin te Reirei n Tabati: 2022
Daniel Interprets Nebuchadnezzar’s Dream, [Taniera e Kabwara Nanoni Miin Nebukaneta], iroun Grant Romney Clawson
Okitobwa 31–Nobembwa6
Taniera 1–6
“Akea te Anti Temanna ae E Kona ni Kamaua te Aba”
E mwaiti kaain te kiraati ae e na atai tabeua karaki n ana boki Taniera. Ngkai ko kamatebwai ao ko katauraoi nakon te anga reirei, ukora ana kairi te Tamnei bwa ko na kanga ni buokiia kaain te kiraati ni kauaei reirei man mwakoro aikai.
Korei Am Namakin
Kaunga te Tibwatibwa
E kona ni ibuobuoki kaoakiia kaain te kiraati bwa a na tibwaia bwa e uara aia kamatebwai ni koroboki aika a tabu ibon irouia ao n aia utu. Ngkana iai n te kiraati ae e tibwa te bwai ae E reirei te Tamnei nakoia n te wiki aei, ko kona n tuangia bwa tera ae a karaoia are e a kairiia nakon nonori akanne.
Reirei te Reirei
Ti kona n onimakina te Uea ngkana e kataaki ara onimaki.
-
Moanan te maroro n rongorongon aron Taniera, Tiatereka, Metiaka, ao Abetenoko ni kaota aia onimaki iroun te Uea, ko kona n tuangia kaain te kiraati bwa a na kakimototoi kakaewenako ake a kaitarai mmwaane aikai, ni kabwarabwarana n Taniera1, 3, ao6. Bukin tera e matoatoa aron te teimatoa n onimaki n aron taai aikai? Tera baika ti kaitarai ae kataa ara onimaki? A kona kaain te kiraati ni wareka Taniera 1:10–13; 3:15–18; 6:10, ao n tarai aroia mwaane aika aman aikai ni kaitarai kaewenakoaia. E kanga bannaia ni buoka ara waaki n riki bwa ana reirei Iesu Kristo aika kakaonimaki?
-
E mwaiti iroura, n aron Taniera ao raoraona, ae a tia n namakina te kataaki bwa ti na riaon kateira. Tera tabeua oin te kakatai aei i nanon maiura? Buokaia kaain te kiraati n reirei man bannan Taniera ma raoraona, ko kona ni bwenaua te kiraati nakon teniua kurubu ao katabeia kurubu akanne bwa a na wareki mwakoro aikai: Taniera1, 3, ke6. Tera aron te Uea ni kakabwaia Taniera, Tiatereka, Metiaka, ao Abeteneko ngke a rineia bwa a teimatoa n aia onimaki i nanon kataakiia? A kona kurubu aikai n tibwai baike a kunei nakoia kaain te kiraati. Kaain te kiraati a kona n marooro imarenaia bwa a na kanga n teimatoa n aia onimaki i nanon te kataaki n te aro n reitaki ao kakatai riki tabeua. A kona naba ni maroroakina kakaawakin karekean raoraoia aika tamaroa ake a na boutokaia nakon kateira.
Ana Ekaretia Iesu Kristo ibukiia Aika Itiaki ni Boong Aika Kaitira bon abanuean te Atua iaon te aba.
-
Maroroakinan Taniera2 e kona ni buokiia kaain te kiraati ni mataata bwa e kanga Ana Ekaretia Iesu Kristo ibukiia Aika Itiaki ni Boong Aika Kaitira n roko n tokina bwa te atibu are“tataki man te maunga” (kibu45). Moanakin aei, kam kona ni wareka ana kabwarabwara Taniera iaon miin Nebukaneta, are kuneaki i nanon Taniera 2:31–45. Ngkana ko kona ni kaota tamnein te atibu ( ke korea tamneina iaon te burakibooti). Kaoiia kaain te kiraati bwa a na tibwai baike a reiakin n abanuean te Atua man kabotauana ma kabwarabwaran te atibu n Taniera 2:34–35, 44–45. Tao iai kaain te kiraati ae ataa teutana rongorongon te Ekaretia n ami tabo are a kona n tibwaia. Ti kanga n nori ana taetae ni burabeti Taniera bwa a koro bukiia i nanon maiura?
Karekean te kaotioti e kainnanoa te katauraoi n te maiu n tamnei.
-
Tao a na buokaki kaain te kiraati man reiakinan aron Taniera ni katauraoia ni karekei kaotioti ake a kainnanoaki ibukin kabwaraan miin Nebukaneta. Ko kona ni waakina aei man tuangakiia kaain te kiraati bwa a na wareka Taniera 2:1–15 ao imwina a tibwa aia namakin ngke arona bwa a kaitara ma are e mena i nanona Taniera. Kaoiia bwa a na wareka Taniera 2:16–18 n nora are e karaoia Taniera. Tera ae ti reiakinna man Taniera 1:17 n aron te Atua ni katauraoa Taniera? Tera ae ti kona n reiakinna mairoun Taniera ae kona ni buokiira n ukoran te kaotioti iroura? Tera ae ti reiakinna man ana taeka ao ana mwakuri Taniera imwin karekean ana ibuobuoki te Uea? (tara Taniera 2:20–30).
Korobonna iaon Taniera ao raoraona ngke a totokoa ana amwarake te uea, iroun Brian Call
Ngkana e aki ataaki te toki, ti kona n teimatoa n rinea te onimaki.
-
Rongorongoia Tiateraka, Metiaka, ao Abetenoko are kuneaki i nanon Taniera3 e kona ni buokiia kaain te kiraati ni karababaa ootaia bwa tera nanon te onimaki iroun Iesu Kristo. Ko kona ni kaoia kaain te kiraati ni kakimototoa te kakaewenako are a kaitaraa Tiateraka, Metiaka, ao Abetenoko (tara Taniera 3:1–12) ao ngkanne maroroakina aroia ni kaitaraa (tara Taniera 3:13–18). Tera ae ti reikinna n te onimaki man aroia mmwaane aikai? Ko kona ni korei taeka aikai iaon te burakibooti Atuara e kona n… ao Ma ngkana e aki… man kibu 17–18. A kona kaain te kiraati n anga aia iango ni kabwanina te kibuntaeka ni baike a kona ni kaitarai. N aron te katooto, a kona n anga “Atuara e kona ni kaekai au titiraki ni kabane” ao “Ma ngkana e aki, N na teimatoa n onimakinna.” Inanon aia tibwatibwa kaain te kiraati, kaungaia bwa a na maroroakina aron te Tia Kamaiu ni boutokaira ao ni kakorakoraira e ngae ngke ti aki ataa te toki.
Kanakoraoan Ara Anga reirei
Kabongana buokan te reirei ae kona n noraki. “Korobanna, n raonaki ma tamnei, witeo, ao kaotioti, e kona n katika nanoia taan ongora—riki naake a nano ni baike a kona n nori—ao n aei are a aki kona iai ni mwaninga rongorongo aika tabu” (Teaching in the Savior’s Way, 22).