“5–11 Disemba. Hagae; Sekaraea 1–3; 7–14: ‘I Tabu, I blong Hae God,’” Kam Folem Mi—Blong Sandei Skul: OlTesteman 2022 (2021)
“5–11 Disemba. Hagae; Sekaraea 1–3; 7–14,” Kam Folem Mi—Blong Sandei Skul: 2022
Lae Hawae Tempol
5–11 Disemba.
Hagae; Sekaraea 1–3; 7–14
“I Tabu, I blong Hae God”
Taem yu stadi long Hagae mo Sekaraea, tingting hevi long olsem wanem blong ol memba blong klas oli fanem mining long ol profesi ia.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Ol memba blong klas oli save serem ol ves blong Hagae mo Sakaraea we oli bin tingting hevi long hem o maet toktok raon long hem wetem ol narawan long wik ia, mo tokbaot olsem wanem ol ves ia oli helpem olgeta oli kam moa kolosap long Lod.
Stap Tijim Doktrin
“Tingting long ol rod blong yu.”
-
Kaonsel we i stap long Hagae1 i save helpem ol memba blong klas tingbaot ol impoten wok blong olgeta. Yu save invaetem olgeta blong rid long Hagae 1:1–7 mo faenemaot olsem wanem ol man long Jerusalem oli no folem toktok blong Lod blong mekem wanem Hem i askem olgeta blong mekem. ?Wanem nao samfala samting we Lod i askem yumi blong mekem oli kam ol impoten wok long laef blong yumi? Wanem i save katemaot tingting blong yumi blong lukluk nomo long Papa long Heven mo long Sevya mo ol impoten wok blong Tufala. Maet ol memba blong klas oli save serem ol eksperiens we i bin helpem olgeta oli “tingting long ol rod blong olgeta” mo ol impoten wok blong olgeta.
-
Blong helpem ol memba blong klas tingbaot olsem wanem oli save fokas fulwan long ol impoten wok blong Lod, yu save askem olgeta blong lukluk bak long Hagae 2:1–9. Wanem kaonsel nao i givim we i save helpem yumi mekem wok blong Hem? Ol memba blong klas oli save serem olsem wanem oli save putum ol impoten wok blong Lod faswan long laef blong olgeta taem oli stap wokem ol nara impoten wok blong olgeta. Wanem nao Hagae 2:1–9 i tijim yumi long hem abaot olsem wanem Lod i blesem yumi taem yumi putum hem faswan long laef blong yumi? (luk tu long “Sam Moa Risos”). Givim taem long ol memba blong klas blong raetem daon wanem oli filim gud blong mekem from yumi stap toktok raon long topik ia.
Lod i save mekem yumi i tabu.
-
Blong statem wan tok storian abaot fasin blong kam tabu, yufala i save rid tugeta long Sekaraea 14:20–21. Ol memba blong klas oli save serem wanem toktok ia “I Tabu, I blong Hae God” i minim long olgeta. Olsem wanem nao ol pipol bae oli muv sapos oli luk toktok ia “I Tabu, I blong Hae God” oli raetem long ol samting we yumi stap yusum evri dei? ?Wanem tingting blong yu taem yu luk toktok ia i stap long ol tempol tedei? Ol memba blong klas oli save rid nao long Sekaraea 1:1–6; 3:1–7; 7:8–10; 8:16–17 mo tokbaot wanem oli lanem abaot wanem nao i minim blong stap tabu. ?From wanem fasin blong yumiwan blong stap tabu i impoten long Lod? ?Olsem wanem nao Hem i helpem yumi i kam tabu?
-
Ol memba blong klas oli save lukluk bak long Sekaraea 2:10–11; 8:1–8; 14:9–11, 20–21 mo serem filing blong olgeta abaot laef bae i olsem wanem sapos yumi laef wetem Sevya long wan ples we i tabu. ?Olsem wanem nao Lod i rere long yumi blong laef long fasin we Sekaraea i bin tokbaot? ?Olsem wanem yumi save kasem paoa blong Hem blong helpem yumi i kam moa tabu?
“Yufala i luk, King blong yufala i stap kam long yufala. Hem i win finis,mo i glad tumas from we hem i winim ol enemi blong hem. Be tingting blong hem i stap daon, nao i stap ron antap long wan dongki” (Sekaraea 9:9). Viktri Wokbaot, i kam long Harry Anderson
Sekaraea 9:9–11; 11:12–13; 12:10; 13:6–7
Jisas Kraes i Mesaea ia we oli talem se bae i kam.
-
Blong helpem ol memba blong klas oli luk koneksen we i stap bitwin ol toktok blong Sekaraea mo laef blong Sevya, olsem ol pipol long taem blong Jisas oli bin mekem, yu divaedem klas long tu (2) grup. Givim long fas grup blong ol memba blong klas ol ves ia: Sekaraea 9:9–11; 11:12–13; 12:10; 13:6–7. Givim long ol memba blong klas blong nara grup wan long ol ves ia: Matiu 21:1–11; 26:14–16; 26:31; Jon 19:37. Wanwan klas memba bae i traem blong faenem wan blong nara grup ol toktok blong skripja we i semmak olsem blong hem. ?Wanem nao yu lanem abaot Sevya aot long ol ves ia?
-
Blong helpem ol memba blong klas oli tingting hevi long Sekaraea 9:9–11, yu maet wantem blong soem wan pikja blong viktri wokbaot blong Sevya i go long Jerusalem (luk long aotlaen blong wik ia long Kam Folem Mi—blong Wanwan Man mo Famli). O soem vidio ia “The Lord’s Triumphal Entry into Jerusalem” (ChurchofJesusChrist.org). Ol memba blong klas oli save toktok raon long sapos oli stap long taem ia we pipol i welkamem Jisas i kam insaed long taon bae oli filim olsem wanem. Olsem wanem nao yumi welkamem hem long laef blong yumi, long hom blong yumi, mo long komuniti blong yumi?
Sam Moa Risos
“Tingting long ol rod blong yu.”
Afta we hem i kwotem Hagae 1:4–7, Elda TerenceM. Vinson i bin tijim:
Yumi save filim glad we i gogohed taem Sevya mo gospel blong Hem oli kam olsem stamba pos we yumi save bildim laef blong yumi raon long hem. Be, i isi tumas blong stamba pos ia i kam olsem, ol samting blong wol, ples we gospel i stap olsem joes nomo, o i stap olsem blong go nomo long jos blong tu aoa long Sandei. Taem i olsem, hem i semmak nomo olsem yumi stap putum mane i go insaed long “poket we i brok.”
“Hagae i stap talem long yumi blong yumi mas komitim yumi.…
I no gat rij samting, o eni samting, o eni toktok, no eni sosol media, o eni vidio gem, o eni spot, o eni asosiesen wetem wan sta, o i no gat eni samting long wol we i moa spesel bitim laef we i no save finis. Mekem se Lod i talem long evriwan blong ‘tingting long ol rod blong yu’” (“Tru disaepol blong Sevya,” Liahona, Nov. 2019, 9,11).
Stap Kam Antap long Fasin blong Yumi blong Stap Tij
Lisin. Blong stap lisin, hem i wan aksen blong lav. Wan wei blong stap lisin gud hem i lukluk man we i stap toktok. Hemia i helpem yu blong luksave ol bodi lanwis. (Luk long Teaching in the Savior’s Way, 34.)