Disyembre 12–18

Malaquias

“Ang Ginoo Miingon sa Iyang Katawhan, Gihigugma Ko Kamo Kanunay”

Pipila sa mga mensahe sa Malaquias mahimong importante kaayo nga makat-onan sa imong klase. Samtang magtuon ka, pag-ampo aron makasabot unsa kaha kini nga mga mensahe. Ang paghimo niini makatabang usab nimo nga mobati sa gugma sa Ginoo alang niadtong imong gitudloan.

Irekord ang Imong mga Impresyon

Dapita ang Pagpaambit

Tingali imong sugdan og usa ka panaghisgotan mahitungod sa basahon ni Malaquias pinaagi sa pagsulat sa pulong Mensahe diha sa pisara. Awhaga ang mga sakop sa klase sa pagpaambit og importanting mga mensahe nga ilang makit-an sa matag kapitulo sa Malaquias. Aron matabangan ang mga sakop sa klase sa paghinumdom ug pagpamalandong sa unsay ilang gipaambit, mahimo nimong isulat kana nga mga mensahe diha sa pisara.

Itudlo ang Doktrina

Malaquias 1:6–14

Ang Ginoo nangayo og “putli nga halad.”

• Aron madasig ang mga sakop sa klase sa pagpaambit unsay ilang nakat-onan mahitungod sa mga halad gikan sa Malaquias 1:6–14, mahimo nimong dapiton sila sa pagrebyo sa hilom niining mga bersikulo ug maghisgot uban sa laing sakop sa klase og butang nga wala masabti sa mga pari nga mga Israelita mahitungod sa mga halad. Nganong ang Ginoo nangayo sa labing maayo gikan kanato? Ang mga sakop sa klase mahimong makahimo og lista sa mga halad, o mga sakripisyo nga atong mahimo ngadto sa Ginoo karon. Alang sa matag usa sa butang diha sa lista, mahimo sila nga maghisgot kon unsa kaha ang nakapahimo niini nga “hugaw” nga halad o “putli” nga halad (Malaquias 1:7,11).

Malaquias 3–4

Ang mga panagna ni Malaquias pagatumanon sa ulahing mga adlaw.

• Mahimo nimong sugdan og usa ka panaghisgotan mahitungod sa Malaquias 3–4 pinaagi sa pagpasabot nga si Moroni mipakigbahin og mga bersikulo gikan niining mga kapitulo sa dihang siya mipakita ngadto ni Joseph Smith (tan-awa sa Joseph Smith—Kasaysayan 1:36–39). Unsa nga mga kamatuoran niining mga kapitulo nga mibati ang mga sakop sa klase nga tingali nahimong importante kaayo nga mahibaloan ni Joseph—ug kanato? Ang mga sakop sa klase mahimong maghimo og ginagmayng grupo ug maglista og mga kamatuoran kutob sa ilang mahimo. Awhaga ang mga grupo sa pagpaambit sa ilang mga lista ug maghisgot kon nganong kining mga kamatuoran importante sa ulahing mga adlaw.

Malaquias 3:8–12

Ang Ginoo mobukas sa mga tamboanan sa langit kon kita mobayad sa atong ikapulo.

• Aron maawhag ang mga sakop sa klase sa pagpaambit sa ilang mga pagpamatuod sa balaod sa ikapulo, mahimo nimo sila nga dapiton sa pagpangita og mga baroganan diha sa Malaquias 3:8–12 ug sa pagpaambit kon giunsa nila sa pagkahibalo niining mga baroganan nga tinuod. Siya mahimong makaistorya mahitungod kon sa unsang paagi ang Ginoo mipanalangin kanila—sa espirituhanon ug sa temporal nga paagi—tungod sa pagbayad og ikapulo. O mahimo sila nga maghisgot og mga leksiyon mahitungod sa ikapulo nga gipaambit ni Elder David A. Bednar sa iyang mensahi “Ang mga Tamboanan sa Langit” (Liahona, Nob. 2013, 17–20) ug ipaambit kon unsa ang ilang nakat-onan samtang sila naningkamot sa pagsunod niining balaod.

• Hangyoa ang mga sakop sa klase sa pagbasa sa hilom sa Malaquias 3:8–12 samtang mamalandong kon sa unsang paagi nga sila mahimong makatudlo sa usa ka tawo kon nganong ang Ginoo misugo kanato sa pagbayad sa ikapulo. Mahimo usab sila nga mobasa sa pamahayag ni Presidente Gordon B. Hinckley diha sa “Dugang nga mga Kapanguhaan.” Unsa ang gusto nato nga masabtan sa uban mahitungod sa ikapulo? Pananglitan, unsa ang gipasabot sa pagbayad sa ikapulo? Nganong gusto man sa Ginoo nga kita mobuhat niini? Sa unsang paagi ang “tamboanan sa langit” sa (bersikulo 10) mobukas kon kita mobayad sa ikapulo? Unsa nga mga kabalaka nga tingali anaa sa usa ka tawo mahitungod sa pagbayad sa ikapulo, ug sa unsang paagi kita motubag niini? Hangyoa ang mga sakop sa klase sa pagpaambit kon sa unsang paagi ang pagtuman niini nga sugo nakapalig-on sa ilang hugot nga pagtuo diha sa Langitnong Amahan ug ni Jesukristo.

Paghulagway ni Elijah nga nagpakita ngadto nila ni Joseph Smith ug Oliver Cowdery didto sa Templo sa Kirtland pinaagi ni Robert T. Barrett

Malaquias 4:5–6

“Ako mopadala ni Elijah ang propeta.”

• Ang mga sakop sa klase lagmit makabaton og mapuslanon nga salabotan mahitungod sa Malaquias 4:5–6 pinaagi sa pagtandi niining mga bersikulo ngadto sa paagi nga si Moroni mikutlo niini ngadto ni Joseph Smith sa Joseph Smith—Kasaysayan 1:38–39. (Tingali makatabang nga adunay usa ka tawo nga mosulat sa matag bersyon sa isig ka habig diha sa pisara.) Unsa ang gikadugang sa mga pulong ni Moroni ngadto sa atong pagsabot sa mga bersikulo diha sa Malaquias? Mahimo usab nimo nga hisgotan ang mga pangutana nga sama niini: Kinsa ang “mga amahan”? (tan-awa sa Deuteronomio 29:13). Sa unsang paagi ang atong mga kasingkasing mobalik ngadto sa atong mga amahan, ug sa unsang paagi ang ilang mga kasingkasing mobalik ngari kanato? Aron matabangan ang imong klase nga makasabot kon sa unsang paagi ang panagna ni Malaquias natuman, mahimo sila nga mobasa mahitungod sa higayon nga si Elijah mihatag sa mga yawe sa pagsilyo ngadto ni Joseph Smith (tan-awa sa Doktrina ug mga Pakigsaad 110:13–16). Ngano ang mga sakop sa klase mapasalamaton nga kining mga yawe napahiuli?

• Ang Malaquias 4:5–6 naghatag og usa ka talagsaong oportunidad sa paghisgot mahitungod sa templo ug sa buhat sa family history. Tingali ang mga sakop sa klase mahimong mopaambit sa ilang mga kasinatian samtang naghimo niining buhat ug kon sa unsang paagi nga kadtong mga kasinatian nakatabang kanila nga mabalik ang ilang mga kasingkasing ngadto sa ilang mga amahan. Unsa ang atong mahimo aron matabangan ang umaabot nga mga henerasyon nga mabalik ang ilang mga kasingkasing ngari kanato?

Dugang nga mga Kapanguhaan

Ang ikapulo usa ka importanting butang sa hugot nga pagtuo.

Si Presidente Gordon B. Hinckley miingon, “Kita makahimo sa pagbayad sa atong ikapulo. “Dili gay[o]d kini mahitungod sa kwarta kon dili mahitungod sa hugot nga pagtuo. Wala pa ako makakita og matinud-anong tigbayad sa ikapulo nga dili makapamatuod nga sa literal kaayo ug talagsaong paagi ang mga tamboanan sa langit naabli ug ang mga panalangin gibubo diha kaniya” (“Let Us Move This Work Forward,” Ensign, Nob. 1985, 85).

Pagpalambo sa Atong Pagtudlo

Ipaambit ang imong panglimbasog ug ang imong hugot nga pagtuo. Usahay ang mga tawo kinsa nakasinati og mga pagsulay mobati nga nag-inusara. Tingali tukma nga sa panagsa nga higayon mopaambit og usa ka personal nga kasinatian mahitungod sa usa ka panahon sa dihang ikaw nanglimbasog ug sa unsang paagi ang Manluluwas mitabang kanimo.