Laie Hawaii Temple

Disyembre 5–11

Haggeo; Zacarias 1–3; 7–14

“Pagkabalaan kang Jehova”

Samtang magtuon ka sa Haggeo ug Zacarias, pamalandongi kon sa unsang paagi nga matabangan nimo ang mga sakop sa klase sa pagpangita sa kahulogan niining mga panagna.

Irekord ang Imong mga Impresyon

Dapita ang Pagpaambit

Ang mga sakop sa klase mahimong makapaambit og mga bersikulo gikan sa Haggeo ug Zacarias nga ilang napamalandongan o nahisgotan kon sa unsang paagi nga kining mga bersikulo nakatabang kanila nga mas mapaduol ngadto sa Ginoo.

Itudlo ang Doktrina

Haggeo 1; 2:1–9

“Palandonga ang inyong mga dalan.”

• Ang tambag diha sa Haggeo 1 makatabang sa mga sakop sa klase sa paghunahuna mahitungod sa ilang mga prayoridad. Mahimo nimo sila nga dapiton sa pagbasa sa Haggeo 1:1–7 ug ilhon kon sa unsang paagi ang mga tawo sa Jerusalem napakyas sa pag-una unsa ang gusto sa Ginoo nga gipabuhat kanila. Unsa man ang ubang mga butang nga gusto sa Ginoo nga atong himoan og taas nga prayoridad sa atong kinabuhi? Unsa ang makabalda kanato gikan sa pagtutok sa Langitnong Amahan ug sa Manluluwas ug sa Ilang mga prayoridad? Tingali ang mga sakop sa klase makapaambit og mga kasinatian nga nakatabang kanila sa “pagpalandong sa [ilang] mga dalan” ug sa ilang mga prayoridad.

• Aron matabangan ang mga sakop sa klase mahitungod kon sa unsang paagi nga mas hingpit nilang matutokan ang mga prayoridad sa Ginoo, mahimo nimo silang hangyoon sa pagrebyo sa Haggeo 2:1–9. Unsa nga tambag ang gihatag sa Ginoo nga makatabang kanato sa paghimo sa Iyang buhat? Ang mga sakop sa klase makapaambit kon sa unsang paagi nga sila makahimo sa pagbutang og una sa mga prayoridad sa Ginoo samtang sila magsagubang sa ilang daghang importanting mga responsibilidad. Unsa ang gitudlo sa Haggeo 2:1–9 mahitungod kon sa unsang paagi ang Ginoo mopanalangin kanato kon Siya atong unahon diha sa atong mga kinabuhi? (tan-awa usab sa “Dugang nga mga Kapanguhaan”). Hatagi ang mga sakop sa klase og panahon sa pagsulat kon unsa ang ilang gibati nga buhaton tungod niining hilisgotan.

Zacarias 1–3; 7–8;14

Ang Ginoo makahimo kanato nga balaan.

• Aron masugdan ang panaghisgotan mahitungod sa pagkabalaan, mahimo kamo nga magdungan sa pagbasa sa Zacarias 14:20–21. Ang mga sakop sa klase mahimong mopaambti kon unsa ang gipasabot sa hugpong sa mga pulong nga “Pagkabalaan ngadto kang Jehova” alang kanila. Unsa nga impluwensya kaha ang mabatonan sa mga tawo kon sila nakakita sa hugpong sa mga pulong nga “Pagkabalaan ngadto kang Jehova” nga mapatik diha sa tanang butang? Sa unsang paagi nga kining hugpong sa mga pulong makaapekto kanato kon kita makakita niini diha sa mga templo karon? Ang mga sakop sa klase makabasa dayon sa Zacarias 1:1–6; 3:1–7; 7:8–10; 8:16–17 ug maghisgot kon unsa ang ilang makat-onan mahitungod kon unsa ang mga kahulogan sa pagkahimong balaan. Nganong ang atong personal nga kabalaan importante ngadto sa Ginoo? Sa unsang paagi nga Siya makatabang kanato nga mahimong balaan?

• Ang mga sakop sa klase makarebyo sa Zacarias 2:10–11; 8:1–8; 14:9–11, 20–21 ug ipaambit ang ilang mga hunahuna mahitungod kon unsa kaha ka sama nga magpakabuhi uban sa Manluluwas diha sa kahimtang sa pagkabalaan. Sa unsang paagi ang Ginoo moandam kanato sa pagpakabuhi diha sa mga kahimtang nga gihulagway ni Zacarias? Sa unsang paagi nga kita makagamit sa Iyang gahom sa pagtabang kanato nga mahimong mas balaan?

“Ania karon, ang imong Hari nagaanhi kanimo siya matarung man ug adunay kaluwasan; mapaubsanon, ug nagakabayo sa asno” (Zacarias 9:9). Triumphal Entry [Ang Madaugon nga Pagsulod], ni Harry Anderson

Zacarias 9:9–11; 11:12–13; 12:10; 13:6–7

Si Jesukristo mao ang gisaad nga Mesiyas.

• Aron matabangan ang mga sakop sa klase nga makita ang koneksyon tali sa mga pulong ni Zacarias ug sa kinabuhi sa Maluluwas, sama sa gibuhat sa mga tawo sa panahon ni Jesus, tingali imong bahinon ang klase ngadto sa duha ka mga grupo. Hatagi ang mga sakop sa klase diha sa unang grupo og usa niining mga tudling: Zacarias 9:9–11; 11:12–13; 12:10; 13:6–7. Hatagi ang mga sakop sa klase sa laing grupo og usa niining mga tudling: Matthew 21:1–11; 26:14–16; 26:31; John 19:37. Ang matag sakop sa klase mahimong mosulay sa pagpangita og usa ka tawo gikan sa laing grupo kinsa adunay usa ka tudling sa kasulatan nga mapares sa ilang tudling. Unsay atong makat-onan mahitungod sa Manluluwas gikan niini nga mga bersikulo?

• Aron matabangan ang mga sakop sa klase sa pagpamalandong sa Zacarias 9:9–11, tingali mahimo nimong ipakita ang hulagway sa madaugong pagsulod sa Manluluwas sa Jerusalem (tan-awa sa latid alang niining semanaha sa Dali, Sunod Kanako—Alang sa mga Indibidwal ug mga Pamilya). Ang mga sakop sa klase mahimong maghisgot kon unsa kaha ang bation nga maanaa taliwala sa katawhan nga mihangop ni Jesus sa pagsulod sa siyudad. Sa unsang paagi nga kita mohangop Kaniya diha sa atong mga kinabuhi, sa atong mga panimalay, ug sa atong mga kumunidad?

Dugang nga mga Kapanguhaan

“Palandonga ang inyong mga dalan.”

Human sa pagkutlo sa Haggeo 1:4–7, ni Elder Terence M. Vinson nagtudlo:

Mobati kita og malungtarong kalipay kon ang atong Manluluwas ug ang Iyang ebanghelyo mahimong labing importante nga mga butang diin atong matukod ang atong kinabuhi. Hinoon, sayon ra kaayo alang nianang butanga nga mahimong mga butang niining kalib[o]tana, diin ang ebanghelyo mahimo lamang nga opsyonal o sama ra kayano sa pagtambong sa simbahan og duha ka oras ma-Dominggo. Kon mao kini ang mahitabo, susama ra kini nga gibutang ang atong mga suhol ngadto sa ‘puntil nga may mga buslot.’

“Gisultihan kita ni Haggeo nga magmapasaligon.…

“Walay bahandi, ni bisan unsa nga kalingawan, estado, social media, mga video game, isport, pakig-uban sa usa ka inila, ni bisan unsa dinhi sa yuta nga mas bililhon pa kay sa kinabuhing dayon. Mao nga ang tambag sa Ginoo sa matag tawo mao ang “palandunga ang inyong mga dalan’” (“Tinuod nga mga Disipulo sa Manluluwas,” Liahona, Nob. 2019, 9,11).

Pagpalambo sa Atong Pagtudlo

Paminaw. Ang pagpaminaw usa ka buhat sa gugma. Usa sa paagi sa epektibong pagpaminaw mao ang pagtan-aw sa tawo kinsa namulong. Makatugot kini kaninyo nga makamatikod sa dili berbal nga komunikasyon. (Tan-awa sa Pagtudlo sumala sa Pamaagi sa Manluluwas, 34.)