“Ang Iyang mga Paagi Mao sa Gihapon” (Habacuc 3:6). In the Beginning Was the Word [Sa Sinugdanan Mao ang Pulong], ni Eva Timothy

Nobyembre 28–Disyembre 4

Nahum: Habacuc; Sofonias

“Ang Iyang mga Paagi Mao sa Gihapon”

Ang imong ehemplo isip usa ka tigkat-on sa ebanghelyo mopanalangin sa mga sakop sa imong klase. Ipaambit kanila kon sa unsang paagi ang Espiritu Santo nagtabang kaninyo nga makasabot sa mga kasulatan, ug ipadayag ang imong kamasaligon nga Siya makatabang usab kanila.

Irekord ang Imong mga Impresyon

Dapita ang Pagpaambit

Aron mahatagan ang mga sakop sa klase og usa ka oportunidad sa pagpaambit og mga salabotan gikan sa ilang pagtuon sa kasulatan, mahimo kang magsulat sa Nahum, Habacuc, ug Sofonias sama sa ulohan diha sa pisara. Dayon ang mga sakop sa klase makasulat ubos sa mga ulohan og usa ka pulong o hugpong sa mga pulong nga ganahan nila ug ang kapitulo ug bersikulo diin nila kini nakit-an. Hatagi sila og panahon sa pagpasabot kon nganong ang mga pulong makahuluganon ug unsa ang gitudlo sa Espiritu Santo kanila.

Itudlo ang Doktrina

Nahum 1

Ang Ginoo gamhanan ug maloloy-on.

• Ang latid karong semanaha sa Dali, Sunod Kanako—Alang sa mga Indibidwal ug mga Pamilya nagsugyot sa pagsiksik diha sa Nahum 1 alang sa mga bersikulo nga naghulagway sa mga hiyas sa Ginoo. Tingali mahimo nimong ipangutana sa mga sakop sa klase unsa ang ilang nakat-onan mahitungod sa Ginoo gikan sa ilang personal nga pagtuon. Pananglitan, unsay atong makat-onan mahitungod Kaniya gikan sa mga bersikulo 1–9? Mahimo nimong ipasabot nga si Nahum nanagna sa mga paghukom sa Ginoo batok sa Ninibe, ang ulohan sa Asiria, ug nga ang Asiria midaog-daog sa mga Israelita sulod sa daghang mga katuigan. Nganong importante sa mga Israelita nga makadungog sa mensahe ni Nahum mahitungod sa Dios? Nganong importante kini kanato karon?

  

  “Ang Ginoo maayo, dalangpanan siya panahon sa kalisdanan” (Nahum 1:7).

Habacuc 1:1–4; 2:1–4;3

Makasalig kita sa kabubut-on sa Ginoo ug sa Iyang tukmang panahon.

• Tingali makatabang alang sa mga sakop sa klase aron masayod nga, sama sa kadaghanan nato, si Habacuc nalibog sa unsay iyang nakita diha sa kalibotan sa iyang palibot. Tingali ang mga sakop sa klase mahimong mobasa sa Habacuc 1:1-4 ug i-sumarize ang mga kabalaka ni Habacuc. Mahimo usab nilang itandi ang iyang mga pangutana sa uban diha sa mga kasulatan, sama sa makit-an diha sa Marcos 4:37–38 ug Doktrina ug mga Pakigsaad 121:1–6. Unsa ang susama sa mga pangutana nga gipangutana sa mga tawo mahitungod sa Dios karon? Unsa nga tambag ang gihatag sa Ginoo diha sa Habacuc 2:1–4 nga makatabang nimo nga mosalig sa Iyang kabubut-on ug tukmang panahon? (tan-awa usab sa Marcos 4:39–40; Doktrina ug mga Pakigsaad 121:7–8). Ang mga sakop sa klase makapangita og ubang mapuslanon nga mga salabotan diha sa “Dugang nga mga Kapanguhaan.” Mahimo usab nilang ikapaambit kon sa unsang paagi ang Manluluwas nakatabang kanila sa “pagsunod sa [ilang] hugot nga pagtuo” bisan kon sila adunay mga pangutana nga wala natubag.

• Aron makasugod og usa ka hilisgotan sa Habacuc 3, mahimo nimong dapiton ang mga sakop sa klase sa pagrebyo sa kapitulo ug ipaambit ang mga pagpahayag og pagdayeg ug pagtuo nga ilang makit-an. Aron matabangan sila nga makagamit niining mga pulong ngadto sa ilang kaugalingon, mahimo nimong dapiton ang matag usa ka sakop sa klase sa pagsulat og lista sa mga panalangin nga gihatag sa Dios ngadto kaniya. Dapita sila sa pagpamalandong unsa ang mahitabo kon sila mawad-an sa ilang temporal nga mga panalangin. Magdungan sa pagbasa sa Habacuc 3:17–19, ug maghisgot kon ngano kaha nga lisod ang “magmalipayon diha sa Dios” (bersikulo 18) atol sa mga kalisdanan sama niadtong gihulagway diha sa bersikulo 17. Sa unsang paagi nga kita makaugmad og hugot nga pagtuo sama kang Habacuc?

Sofonias 3:14–20

Ang Ginoo magmalipayon uban sa iyang katawhan sa Sion.

• Aron matabangan ang mga sakop sa klase nga makakaplag og paglaom alang sa umaabot diha sa Sofonias 3:14–20, mahimo nimong isulat diha sa pisara “Pagmalipayon ug pagmaya uban ang tibuok nga kasingkasing” tungod kay… Dayon ang mga sakop sa klase makasiksik niining mga bersikulo alang sa mga panalangin nga gisaad alang sa umaabot nga makatabang kanila nga magmaya karon. Sa unsang paagi kini nga mga saad makatabang kanato atol sa malisod nga mga panahon?

Dugang nga mga Kapanguhaan

Ang hugot nga pagtuo nagpasabot og pagsalig sa kaalam sa Dios, kalooy, ug tukmang panahon.

Si Elder Jeffrey R. Holland miingon:

“Unsa kadugay kitang maghulat og kahupayan gikan sa mga kalis[o]d nga miab[o]t kanato? Unsa kahay atong mahimo aron makalahutay sa personal nga mga pagsulay samtang magsige kita og hulat ug ang tabang daw dugay kaayong moab[o]t? Nganong malangay man kon ang mga palas-anon sobra sa atong makaya?…

“…Dunay mga panahon sa atong kinabuhi nga gani ang atong pinaka-espirituhanong paningkamot, ug matinguhaong mga pag-ampo dili moani sa kadaugan nga atong gipangandoy, kabahin man sa dagko nga mga isyu sa kalib[o]tan o sa ginagmay nga personal nga mga isyu. Busa samtang magtrabaho kita ug magpaab[o]t sa mga tubag sa pipila sa atong mga pag-ampo, akong ihalad kaninyo ang akong apostolikanhong saad nga kini gidungog ug gitubag, apan tingali dili sa panahon o sa paagi nga atong gusto. Apan kanunay kini nga gitubag sa panahon ug sa paagi nga kini tubagon sa usa nga nasay[o]d sa tanan ug walay paglurang nga maloloy-ong ginikanan.…

“…Ang hugot nga pagtuo nagpasab[o]t nga mosalig sa Dios sa maayo ug sa dautang mga panahon, bisan og naglakip kini sa mga pag-ant[o]s hangt[o]d atong makita ang Iyang mga bukton nga ipadayag tungod ug alang kanato” (“Naghulat sa Ginoo,” Liahona, Nob. 2020, 115–16).

Pagpalambo sa Atong Pagtudlo

Pangutana og mga pangutana nga dili limitado ang tubag. Kon mangutana sa mga sakop sa klase mahitungod sa ilang mga kasinatian sa mga kasulatan, “pahibaloa sila nga wala ka mangita og usa ka piho nga tubag apan nga ikaw interesadto kaayo sa unsa ang ilang makat-onan” (Pagtudlo sumala sa Pamaagi sa Manluluwas, 29). Alang sa mga pananglitan sa mga pangutana nga dili limitado ang tubag, tan-awa sa Pagtudlo sumala sa Pamaagi sa Manluluwas, 31–32.