For unto Us a Child Is Born [Kay alang Kanato ang usa ka Bata Natawo], ni Simon Dewey

Disyembre 19–25

Pasko

“Kita Nagahulat Kaniya, ug Siya Magaluwas Kanato”

Atol sa inyong personal nga pagtuon ug pagpangandan sa pagtudlo, ikonsiderar kon sa unsang paagi nga ikaw makatabang sa mga sakop sa klase nga mobati og dayag nga kalipay kabahin sa pagkatawo sa Manluluwas. Dapita ang Espiritu sa pagpamatuod ngadto kanila kabahin sa matubsanong gugma ni Jesukristo.

Irekord ang Imong mga Impresyon

Dapita ang Pagpaambit

Ang panahon sa pasko tingali mahimong usa ka maayong oportunidad sa pagdapit sa mga sakop sa klase sa pagpaambit kon sa unsang paagi ang pagtuon sa ang Daang Tugon nakapalig-on sa ilang hugot nga pagtuo diha ni Jesukristo.

Itudlo ang Doktrina

Kita magmalipayon diha sa atong Manunubos.

• Bisan tuod og ang Pasko mao ang naila isip usa ka panahon sa kalipay, adunay daghan kansang mga kahimtang nakapahimong lisod sa pagpangita og kalipay, bisan atol niining panahon sa tuig. Usa ka importanting mensahe sa Pasko mao nga ang Manluluwas makapagaan sa atong palas-anon ug motabang kanato sa pagpangita og kalinaw ug gani kalipay. Sa pagpaambit niining mensahe, mahimo nimong isulat diha sa pisara ang mosunod nga pakisayran sa kasulatan: Salmo 35:9; Isaias 25:8–9; 44:21–24; 51:11; Sofonias 3:14–20; Moises 5:5–11. Dayon mahimo nimong isulat diha sa pisara ang usa ka pangutana alang sa mga sakop sa klase aron mapamalandongan samtang sila mobasa sa mga tudling, sama sa Unsa nga mga rason nga kining tudling sa kasulatan makahatag og pagkamalipayon? Hangyoa sila sa pagpaambit unsay ilang nakit-an. Tingali mahimo usab ka nga mohatag sa mga sakop sa klase og panahon aron sa pagsulat mahitungod sa ilang kaugalingong kalipay diha sa Manluluwas. Tingali ilang makit-an ang dugang nga mga salabotan gikan sa mensahe ni Presidente Russell M. Nelson diha sa “Dugang nga mga Kapanguhaan.”

• Ang Pasko nakahatag og mga oportunidad sa pagsabwag sa kalipay ni Kristo pinaagi sa pagserbisyo sa uban. Sa dili pa ang klase, mahimo nimong dapiton ang usa ka sakop sa klase sa pagrebyo sa mensahe ni Elder Ulisses Soares “Modernong Langitnong Panon” (Debosyonal sa Pasko sa Unang Kapangulohan, Dis.8, 2019, broadcasts.ChurchofJesusChrist.org) ug moanhi nga andam sa pagpaambit kon sa unasang paagi ang buhat sa pagserbisyo nakatabang ni Elder Soares ug sa iyang pamilya nga mobati og kalipay sa Pasko. Mahimo usab nimong ipaambit ang mga tipik sa iyang mensahe diha sa klase. Ang mga sakop sa klase makapaambit sa ilang kaugalingong mga kasinatian sa paghatag o pagdawat sa mga buhat sa pagserbisyo sa panahon sa Pasko. Sa unsang paagi nga kita makabuhat sa imbitasyon ni Elder Soares sa pagsunod sa “hingpit nga panig-ingnan sa gugma ug kaayo ngadto sa katawhan” sa Manluluwas”?

Ang mga simbolo makatabang kanato sa paghinumdom ni Jesukristo.

• Ang latid niini nga semana diha sa Dali, Sunod Kanako—Alang sa mga Indibidwal ug mga Pamilya naglakip sa usa ka lista sa mga simbolo diha sa Daang Tugon nga nagtudlo mahitungod ni Jesukristo. Ang matag sakop sa klase makapaambit kon unsa ang ilang nakat-onan mahitungod sa Manluluwas gikan niini ug sa uban nga mga simbolo nga makita diha sa ilang pagtuon. Unsay atong makat-onan mahitungod sa pagpangita sa Manluluwas diha sa mga kasulatan? Unsa nga mga kasinatian ang nagtudlo kanato nga “ang tanan nga butang gimugna ug gibuhat aron magpamatuod [Kaniya]”? (Moises 6:63).

Ang Dios mihatag kanato sa gasa sa Iyang Anak.

• Ang pagpanghatag og gasa sa Pasko usa ka tradisyon sa kadaghanan sa mga kultura. Mahimo nimong giyahan ang usa ka panaghisgotan uban sa mga sakop sa klase mahitungod sa mga gasa nga nahatag sa Dios kanato, ilabi na sa gasa sa Iyang Anak, si Jesukristo. Dapita ang mga sakop sa klase sa pagpaambit kon unsa ang kahulogan sa gasa sa Manluluwas ngadto kanila. Unsaon nato sa pagpakita sa Langitnong Amahan sa atong pasalamat alang niini nga gasa?

Isaias 7:14; 9:6

“Ang Iyang ngalan pagatawgon og Kahibulongan.”

• Si propeta Isaias migamit og daghang ngalan ug mga ulohan sa paghulagway sa Mesiyas, kinsa matawo didto sa Bethlehem (tan-awa pananglit sa, Isaias 7:14; 9:6). Tingali ang mga sakop sa klase malingaw sa pagkat-on pa og dugang mahitungod sa mga ulohan sa Manluluwas ug sa Iyang misyon pinaagi sa pagkat-on mahitungod niining mga titulo. Mahimo sila nga mopili og usa ka titulo ug mangita og laing mga tudling sa kasulatan nga makatabang kanila nga masabtan unsa ang kahulogan niini. Pananglitan, sila tingali makat-on og dugang mahitungod sa ulohan nga “Prinsipe sa Kalinaw” (Isaias 9:6) pinaagi sa pagbasa sa Salmo 85:8; Isaias 52:7; Lucas 2:14; o Juan 16:33. Aron matabangan ang mga sakop sa klase nga makit-an ang ubang mga kasulatan, isugyot nga sila motan-aw diha sa Ang Giya ngadto sa Kasulatan (scriptures.ChurchofJesusChrist.org). Unsa ang gisugyot niining mga ulohan mahitungod sa Manluluwas ug unsa ang Iyang gihimo alang kanato?

Dugang nga mga Kapanguhaan

Si Jesukristo nagtanyag kanato og kalinaw ug kalipay.

Presidente Russell M. Nelson nagtudlo:

“Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong mga kinabuhi. Ang kalipay moab[o]t gikan ug tungod Kaniya. Siya ang tinubdan sa tanang kalipay. Mobati kita niini panahon sa Pasko sa dihang manganta kita og, ‘Kalipay sa kalib[o]tan, ang Ginoo miabot na.’ [Mga Himno, nu. 120]. Ug ato kining mabati sa tibuok tuig. Alang sa mga Santos sa Ulahing mga Adlaw, si Jesukristo mao ang hingpit nga kalipay!…

“Sama nga ang Manluluwas mitanyag og kalinaw nga ‘lapaw sa tanang pagpanab[o]t’ [Mga Taga-Filipos 4:7], Siya usab mitanyag usab og gikusgon, giladmon, ug gilapdon sa kalipay nga lapas sa tawhanong pangatarungan o mortal nga panab[o]t” (“Hingpit nga Kalipay ug Espirituhanon nga Pagsugakod,” Liahona, Nob. 2016, 82).

Pagpalambo sa Atong Pagtudlo

Pangandam nga maghunahuna og mga tawo. “Himoa ang imong pagsab[o]t sa mga tawo nga imong gitudloan nga maoy mogiya sa imong [pagpangandam]. … Ang Kristohanon nga mga magtutudlo dili mapasaligon sa usa ka partikular nga estilo o pamaagi; sila mapasaligon sa pagtabang sa mga tawo nga mopalambo og hugot nga pagtuo kang Jesukristo.” (Pagtudlo sumala sa Pamaagi sa Manluluwas, 7).