12–18 ni Tiseba

Malakai

“Au a lomani kemudou, Sa Kaya ko Jiova”

Eso na itukutuku ena Malakai ena rairai bibi sara ki na nomu kalasi mera vulica. Ni o vuli tiko, masulaka mo kila na cava na itukutuku oqori. Na nomu cakava oqo ena vukei iko talega mo vakila na loloma sa solia na Turaga vei ira o vakavulica.

Vola na Veika o Vakauqeti Kina

Sureta na Veiwasei

E rawa ni o tekivuna e dua na veivosaki me baleta na iVola i Malakai ena nomu vola na vosa iTukutuku ena papa ni volavola. Vakayaloqaqataki ira na lewe ni kalasi mera wasea na itukutuku bibi era sa kunea ena wase yadua ni Malakai. Me vukei ira na lewe ni kalasi me ra nanuma ka tugana na veika e wasei, mo vola na itukutuku oqori ena papa ni volavola.

Vakavulica na iVunau

Malakai 1:6–14

E kerea na Turaga “e dua na isolisoli savasava.”

• Me vakayaloqaqataki ira na lewe ni kalasi mera wasea na veika era sa vulica baleta na isolisoli mai na Malakai 1:6–14, sa rawa mo sureti ira mera railesuva lo na veitikina oqo ka veivosakitaka vata kei na dua tale na lewe ni kalasi e dua na ka era sega ni kila na bete ni Isireli me baleta na isolisoli. Na cava na vuna e kerea kina vei keda na Turaga na ka vinaka duadua? Sa rawa vei ira na lewe ni kalasi mera cakava e dua na lisi ni isolisoli, se solibula, eda cakava vua na Turaga nikua. Me baleta na veika yadua ena lisi, e rawa ni ra veivosakitaka na veika e rawa ni cakava me isolisoli “duka” se isolisoli “savasava” (Malakai 1:7, 11).

Malakai 3 – 4

Sa yaco tiko na parofisai nei Malakai ena gauna oqo.

• E rawa ni o tekivuna e dua na veivosaki ni Malakai 3–4 ena nomu dusia ni a wasea o Moronai na tikina eso mai na iwase oqo ena nona rairai vei Josefa Simici (raica na Josefa Simici—Ai Tukutuku 1:36–39). Na dina cava ena veiwase oqo era na vakila beka na lewe ni kalasi ni ka bibi vei Josefa—kei keda—meda kila? Era na rawa ni wasei nai lawalawa lalai lewe ni kalasi ka vola na levu ga ni ka dina era rawata. Vakayaloqaqataki ira na ilawalawa mera wasea na nodra ituvatuva ka veivosakitaka na vuna e bibi kina na dina oqo ena veisiga e muri.

Malakai 3:8–12

E dolava na Turaga na katuba ni lomalagi ni da sauma na noda ikatini.

• Mera vakayaloqaqataki na lewe ni kalasi mera wasea na nodra ivakadinadina ni lawa ni ikatini, sa rawa mo sureti ira mera raica na ivakavuvuli ena Malakai 3:8–12 ka wasea na sala era sa mai kila kina ni dina na ivakavuvuli oqo. E rawa ni ra veitalanoa ena sala sa vakalougatataki ira kina na Turaga—vakayalo ka vakayago—ena saumi ni ikatini. Se e rawa ni ra veivosakitaka na lesoni me baleta na ikatini e a wasea o Elder DavidA. Bednar ena nona itukutuku “Na Katuba ni Lomalagi” (Liaona, Nove. 2013, 17–20) ka wasea na veika era sa vulica ena nodra sasagataka me ra bulataka na lawa oqo.

• Kerei ira na lewe ni kalasi mera wilika na Malakai 3:8–12 ni ra vakasamataka lo tiko na sala era na rawa ni vakavulica kina vua e dua na vuna e kerei keda kina na Turaga meda sauma na noda ikatini. E rawa talega ni ra wilika na itukutuku mai vei Peresitedi GordonB. Hinckley ena “iKuri ni iVurevure.” Na cava eda na vinakata me ra kilamatata na tani me baleta na ikatini? Me ivakaraitaki, na cava na kena ibalebale me saumi na ikatini? Na cava e vinakata kina na Turaga meda kitaka? E dolavi vakacava na “katuba ni lomalagi” (tikina10) ena gauna eda saumi ikatini kina? Na kauwai cava soti e rawa ni tu vua e dua me baleta na saumi ikatini, kei na sala cava eda rawa ni sauma kina? Kerei ira na lewe ni kalasi me ra wasea na kena sa vaqaqacotaka na nodra vakabauta na Tamada Vakalomalagi kei Jisu Karisito ni ra sa muria na ivakaro oqo.

iYaloyalo kei Ilaija ni rairai vei rau o Josefa Simici kei Oliva Kaudari ena Valetabu e Kirtland, mai vei vei RobertT. Barrett

Malakai 4:5–6

“Au na talai Ilaijia na parofita vei kemudou.”

• Era na rawata na lewe ni kalasi na vakasama veivuke eso me baleta na Malakai 4:5–6 ena vakatauvatani ni veitikina oqo ki na sala e a cavuta kina o Moronai vei Josefa Simici ena Josefa Simici—Ai Tukutuku 1:38–39. (Ena rawa ni veivuke me dua e vola na kena ilavelave yadua ena papa ni volavola.) Na cava e vakuria na vakasala nei Moronai ki na noda kilamatata na veitikina ena Malakai? Sa rawa talega mo veivosakitaka na taro vakaoqo: o cei o ira “na qase”? (raica Na iVakarua 29:13). Ena vuki vakacava na yaloda vei ira na noda qase, ka na vagolei vakacava na yalodra vei keda? Me vukei ira na kalasi me ra kila deivaki na kena a vakayacori na parofisai nei Malakai, e rawa ni ra wilika me baleta na nona solia o Ilaija na idola ni veivauci vei Josefa Simici (raica na Vunau kei na Veiyalayalati 110:13–16). Na cava era vakavinavinaka kina na lewe ni kalasi ni sa vakalesui mai na idola oqo?

• Malakai 4:5–6 e vakarautaka e dua na madigi cecere me veivosakitaki kina na cakacaka ni valetabu kei na tuva kawa. Sa rawa beka vei ira na lewe ni kalasi mera wasea na veika era sa sotava oti ena gauna era cakava tiko kina na cakacaka oqo kei na sala e a vukei ira kina na veika oqori me ra vagolea na yalodra vei ira na nodra qase. Na cava e rawa ni da cakava me da vukei ira kina na itabatamata mai muri me ra vagolea na yalodra vei keda?

iKuri ni iVurevure

Na ikatini e ka ni vakabauta.

O Peresitedi GordonB. Hinckley e a kaya, “Eda rawa ni sauma na noda ikatini. Oqo e sega ni ka bibi kina na ilavo na ka ga e bibi na vakabauta. Au se bera ni raica e dua na dausoli ikatini yalodina e sega ni rawa ni vakadinadinataka ni ena dua na sala dina ka totoka e sa tadola kina na katuba kei lomalagi ka sa sovaraki yani vua” (“Meda Tosoya ki Liu na Cakacaka Oqo,” Ensign, Nove. 1985, 85).

Vakatorocaketaki ni Noda Veivakavulici

Wasea na nomu dredre kei na nomu vakabauta. Ena so na gauna era dau vakila na tuduadua na tamata era sotava tiko na veivakatovolei. Ena rairai matau mo wasea vagauna e dua na ka o a sotava me baleta e dua na gauna o dau oca kina kei na sala a vukei iko kina na iVakabula.