“Sa tawa mudu na nona cakacaka” (Apakuki 3:6). Ena iVakatekivu sa Bula ko Koya na Vosa, mai vei Eva Timothy

28 ni Noveba–4 ni Tiseba

Neumi; Apakuki; Sefanaia

“Sa Tawa Mudu na Nona Cakacaka”

Na nomu ivakaraitaki vaka-gonevuli ni kosipeli e rawa ni vakalougatataki ira na lewe ni nomu kalasi. Wasea vata kei ira na sala e vukei iko kina na Yalo Tabu mo kila vakavinaka na ivolanikalou, ka vakaraitaka nomu yalodei ni rawa ni vukei ira talega o Koya.

Vola na Veika o Vakauqeti Kina

Sureta na Veiwasei

Me solia vei ira na lewe ni kalasi na madigi me ra wasea kina na nodra nanuma mai na nodra vuli ivolanikalou, e rawa ni o vola na Neumi, Apakuki, kei na Sefanaia me ulutaga ena papa ni volavola. Sa rawa vei ira na lewe ni kalasi mera vola ena ruku ni ulutaga e dua na vosa se matavosa e kata vei ira kei na wase kei na tikina era a kunea kina. Solia vei ira na gauna me ra tukuna kina na vuna e vakaibalebale kina na vosa se matavosa oqo kei na veika e vakavulica vei ira na Yalo Tabu.

Vakatavulica na iVunau

Neumi1

Sa kaukauwa ka yalololoma na Turaga.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura na vakasaqaqara ena Neumi1 me baleta na veitikina ka vakamacalataka na ivakarau ni Turaga. Sa rawa mo tarogi ira na lewe ni kalasi ena veika era sa vulica baleta na Turaga mai na nodra vuli yadudua. Me ivakaraitaki, na cava eda vulica baleti Koya mai na tikina e 1–9? E rawa ni o dusia ni o Neumi e a parofisaitaka na nona lewa na Turaga me rukaki Ninive, na koroturaga kei Asiria, ka sa i Asiria e dau vakatotogani ira na Isireli ena vuqa na yabaki. Na cava e a bibi kina vei ira na Isireli me ra rogoca na itukutuku nei Neumi me baleta na Kalou? Na cava e bibi kina vei keda edaidai?

  

  “Sa yalovinaka ko Jiova, sa ivakaruru kaukauwa ena siga ni rarawa” (Neumi 1:7).

Apakuki 1:1–4; 2:1–4;3

Eda rawa ni nuitaka na loma ni Turaga kei na Nona gauna.

• Ena veivuke beka vei ira na lewe ni kalasi me ra kila, ni vaka e vuqa vei keda, o Apakuki e a vakaleqai ena veika e raica e vuravura e vakavolivoliti koya. Sa rawa mera wilika na lewe ni kalasi na Apakuki 1:1–4 ka vakalekalekataka na kauwai nei Apakuki. E rawa talega ni ra vakatauvatana na nona taro vei ira eso ena ivolanikalou, me vaka na kena e kunei ena Marika 4:37–38 kei na Vunau kei na Veiyalayalati 121:1–6. Na taro tautauvata cava era taroga tiko na tamata me baleta na Kalou nikua? Na ivakasala cava e solia na Turaga ena Apakuki 2:1–4 ena vukei iko mo nuitaka na Lomana kei na Nona gauna? (raica talega na Marika 4:39–40; Vunau kei na Veiyalayalati 121:7–8). Sa rawa vei ira na lewe ni kalasi mera kunea eso tale na raimailoma e veivuke ena “iKuri ni iVurevure.” E rawa talega ni ra wasea na sala e a vukei ira kina na iVakabula me ra “bulataka na [nodra] vakabauta” ena gauna mada ga e sega ni saumi kina na nodra vakatataro.

• Me tekivu na veivosaki ni Apakuki3, sa rawa mo sureta na lewe ni kalasi mera raica na wase ka wasea na ivakaraitaki ni veivakacaucautaki kei na vakabauta era sa kunea. Me vukei ira me ra taurivaka vakai ira na vosa oqo, sa rawa mo sureti ira yadua na lewe ni kalasi mera vola e dua na lisi ni veivakalougatataki sa solia vei ira na Kalou. Sureti ira me ra vakasamataka vakatitobu na veika ena yaco kevaka era vakayalia eso na nodra veivakalougatataki vakayago. Wilika vata na Apakuki 3:17–19, ka veivosakitaka na vuna e dredre kina me da “marau vua na Turaga” (tikina18) ena gauna ni dredre eso me vaka e tukuni tiko ena tikina17. E rawa vakacava ni da taracake na vakabauta me vaka na nei Apakuki?

Sefanaia 3:14–20

Ena reki na Turaga vata kei ira na Nona tamata e Saioni.

• Me vukei ira na lewe ni kalasi me ra kunea na inuinui ni veisiga ni mataka ena Sefanaia 3:14–20, e rawa ni o vola ena papa ni volavola “mo reki ka marau ena vu ni yalomu” baleta… Sa rawa mera vakasaqara na lewe ni kalasi na veitikina oqo me baleta na veivakalougatataki e yalataki tu ena veisiga ni mataka ka na rawa ni vukei ira mera reki nikua. Ena vukei keda vakacava na yalayala eso oqo ena gauna dredre?

iKuri ni iVurevure

Na vakabauta e kena ibalebale na nuitaka na vuku, loloma veikaroni, kei na gauna ni Kalou.

O Elder JeffreyR. Holland e a kaya:

“Ena vakacava beka na dede ni noda waraka na veivakacegui mai na dredre e tarai keda. Vakacava beka na vosoti tiko ni noda veivakatovolei yadua ni da wawa ka wawa ka vaka me berabera na veivuke? Na cava e bera kina ni vaka me sa qai bibi cake ga na icolacola me da colata?…

“… Ena yaco na gauna ena noda bula ena gauna mada ga eda sasaga kina vakayalo kei na yalodina na masu, ena sega ni kauta mai na qaqa eda sa gadreva tu, se me baleta na veika ni vuravura lelevu se na tamata lalai. O koya gona ni da cakacaka ka waraka tiko na isau na noda masu, au sa solia vei iko na noqu yalayala vakai-apositolo ena rogoci ka na saumi mai, ia e sega beka ena gauna se ena sala eda vinakata kina. Ia era sa dau saumi tu ga mai ena gauna kei na sala e dodonu me ka dau sauma me vaka e sauma edua na itubutubu dauloloma.

“…Na vakabauta e kena ibalebale na vakararavi vua na Kalou ena veigauna vinaka kei na ca, kevaka sara mada ga e oka kina eso na rarawa me yacova ni da raica na ligana sa vakatakilai mai ena vukuda ”(“Waraka tiko na Turaga,” Liaona, Nove. 2020, 115–16).

Vakatorocaketaki ni Noda Veivakavulici

Taroga na taro dolavi. Ni ko tarogi ira tiko na lewe ni kalasi me baleta na veika era sa sotava ena ivolanikalou, “tukuna vei ira ni o sega ni vaqara tiko e dua na isaunitaro digitaki ia ni o kauwai dina tiko ena veika era sa vulica” (Veivakavulici ena iVakarau ni iVakabula, 29). Me baleta eso na ivakaraitaki ni taro dolavi, raica na Veivakavulici ena iVakarau ni iVakabula, 31–32.