Valetabu e Laie Awai

5–11 ni Tiseba

Akeai; Sakaraia 1–3; 7–14

“Vakatabui me nei Jiova”

Ni o vulica na Akeai kei na Sakaraia vakasamataka mo na vukei ira beka vakacava me vakaibalebale vei ira na wase eso oqo.

Vola na Veika o Vakauqeti Kina

Sureta na Veiwasei

Sa rawa vei ira na lewe ni kalasi mera wasea na veitikina mai na Akeai kei Sakaraia era vakasamataka vakatitobu se veivosakitaka vata kei ira eso ena macawa oqo ka veivosakitaka na sala a vukei ira kina na veitikina oqo mera toro voleka cake vua na Turaga.

Vakavulica na iVunau

Akeai1; 2:1–9

“Dou vakananuma mada ki na nomudou ivalavala.”

• Na ivakasala ena Akeai1 e rawa ni vukei ira na lewe ni kalasi me ra vakasamataka na veika era vakaliuca. E rawa ni o sureti ira me ra wilika na Akeai 1:1–7 ka raica na nodra sega ni vakaliuca rawa na tamata e Jerusalemi na veika e vinakata na Turaga me ra cakava. Na cava eso na ka e kerei keda na Turaga meda vakaliuca ena noda bula? Na cava e rawa ni vakawelei keda mai na noda vakanamata vua na Tamada Vakalomalagi kei na iVakabula kei na Nodrau vakaliuci? E rawa ni ra wasea na lewe ni kalasi na veika era sotava ka vukei ira me ra “vakananuma ki na [nodra] ivalavala” kei na veika era vakaliuca.

• Me vukei ira na lewe ni kalasi mera vakasamataka na sala era rawa ni raimatua kina ki na vakaliuci ni veika ni Turaga, sa rawa mo kerei ira mera raicalesu na Akeai 2:1–9. Na ivakasala cava e solia na Turaga ka rawa ni vukei keda me da cakava na nona cakacaka? Sa rawa mera wasea na lewe ni kalasi na sala era sa rawa ni vakaliuca taumada kina na veika ni Turaga ena nodra bula ena nodra walia tiko na levu nodra dui itavi bibi tale eso. Na cava e vakavulica na Akeai 2:1–9 me baleta na sala e vakalougatataki keda kina na Turaga ni da vakaliuci Koya taumada ena noda bula? (raica talega na “iKuri ni iVurevure”). Solia na gauna vei ira na lewe ni kalasi me ra vola na cava era vakauqeti me ra cakava ena vuku ni veivosaki oqo.

Sakaraia 1–3; 7–8;14

Na Turaga e rawa ni cakava meda ka tabu.

• Me tekivu na veivosakitaki ni veika tabu, sa rawa mo ni wilika vata na Sakaraia 14:20–21. Sa rawa vei ira na lewe ni kalasi mera wasea na ibalebale ni matavosa “Vakatabui me nei Jiova” vei ira. Na veivakauqeti cava soti ena yaco ke ra raica na tamata na matavosa “Vakatabui me Nei Jiova” me ceuti tu ena iyaya ni veisiga? E tarai keda vakacava na matavosa oqo ni da raica ena valetabu kece nikua? Sa rawa ni ra qai wilika na lewe ni kalasi na Sakaraia 1:1–6; 3:1–7; 7:8–10; 8:16–17 ka veivosakitaka na veika era sa vulica me baleta na ibalebale ni tabu. Na cava na vuna e bibi kina vua na Turaga na noda bula savasava yadua? E vukei keda vakacava oKoya meda savai?

• Sa rawa mera raicalesu na kalasi na Sakaraia 2:10–11; 8:1–8; 14:9–11, 20–21 ka wasea na nodrau nanuma baleta na cava ena yaco ni da laki bula vata kei na iVakabula ena dua na ituvaki ni bula vakalou. E dau vukei keda vakacava na Turaga meda bula ena ituvaki e a vakamacalataka o Sakaraia? E rawa vakacava ni da rawata na Nona kaukauwa me vukei keda me da savai vakalevu cake?

“Raica, ena lako mai vei iko na nomu Tui: sa yalododonu, a sa ia na veivakabulai ko koya, sa yalomalua, ka sa vodo lako ena asa”(Sakaraia 9:9). Curu Vakatui, mai vei Harry Anderson

Sakaraia 9:9–11; 11:12–13; 12:10; 13:6–7

O Jisu Karisito na Mesaia sa parofisaitaki.

• Me vukei ira na lewe ni kalasi mera raica na isema ni vosa nei Sakaraia kei na bula ni iVakabula, me vaka era a cakava na tamata ena gauna i Jisu, sa rawa mo wasea na kalasi ki na rua na ilawalawa. Solia vei ira na lewe ni kalasi ena imatai ni iwasewase e dua na umavosa oqo: Sakaraia 9:9–11; 11:12–13; 12:10; 13:6–7. Solia vei ira na lewe ni kalasi ena ilawalawa kadua e dua vei ira na umavosa oqo: Maciu 21:1–11; 26:14–16; 26:31; Joni 19:37. Mera tovolea na lewe ni kalasi yadua me ra raica e dua mai na ilawalawa kadua ka taura tiko na umavosa ni ivolanikalou ka tautauvata kei na nodra. Na cava eda sa vulica baleta na iVakabula mai na veitikina oqo?

• Me vukei ira na lewe ni kalasi me ra vakasamataka na Sakaraia 9:9–11, e rawa ni o vakaraitaka e dua na iyaloyalo ni nona curu vakatui na iVakabula ki Jerusalemi (raica na na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Se vakaraitaka na vidio “Na Curu Vakatui ni Turaga ki Jerusalemi” (ChurchofJesusChrist.org). Sa rawa mera veivosakitaka na lewe ni kalasi na cava beka era vakila ni vaka vei ira na tamata era a kidavaki Jisu ki na korolevu. Eda na kidavaki Koya vakacava ki na noda bula, noda veivale, kei na noda itikotiko?

iKuri ni iVurevure

“Dou vakananuma mada ki na nomudou ivalavala.”

Ni oti na nona cavuqaqa ena Akeai 1:4–7, e a vakatavulica o Elder TerenceM. Vinson:

“E rawa ni da vakila na reki gugumatua ni sa yaco na iVakabula kei na Nona kosipeli me suitu ka tara wavoki kina na noda bula. Ia, e rawarawa sara me yaco na suitu oya me, vakaisosomitaka, ena veika ni vuravura, ka dabe kina na kosipeli me vaka e dua na ka wale rawa ni biu, se vaka na lotu wale me rua na auwa ena vei Sigatabu. Ni sa yaco oqo, esa tautauvata kei na kena biu na keda isau ni cakacaka ki na ‘dua na taga cicila.’

“E tukuna tiko vei keda o Akeai meda yalodina.…

E sega ni dua na iyau, se ka taleitaki, se dua na itutu, se vakauitukutuku raraba, se qito vidio, se dua ga na qito, se dua na veimaliwai kei na dua na tamata rogo, se dua na ka e vuravura me uasivia na talei ni bula tawamudu. Sa nona ivakasala na Turaga ki na tamata yadua ‘dou vakananuma mada ki na nomudou ivalavala’“(”Tisaipeli Dina ni iVakabula,“ Liaona, Nove. 2019, 9, 11).

Vakatorocaketaki ni Noda Veivakavulici

Vakarorogo. Na vakarorogo sa dua na cakacaka ni loloma. E dua na sala me da vakarorogo vakavinaka kina o ya me da raica na tamata e vosa tiko. Oqo e vakatara mo raica na itukutuku sega ni vosataki. (Raica na Veivakavulici ena iVakarau ni iVakabula, 34.