Ni sa Sucu mai vei Keda e dua na Gone, mai vei Simon Dewey

19–25 ni Tiseba

Siganisucu

“Keimami a Waraki Koya, ka na Vakabulai Keimami ko Koya”

Ena gauna ni nomu vuli kei na vakavakarau taudua mo veivakavulici, vakasamataka na sala mo vukei ira kina na lewe ni kalasi me ra vakila na vakuru ni reki ena sucu ni iVakabula. Sureta na Yalotabu me vakadinadinataka vei ira na loloma veivueti nei Jisu Karisito.

Vola na Veika o Vakauqeti Kina

Sureta na Veiwasei

Na draki ni Siganisucu e rawa me dua na madigi vinaka me ra sureti kina na lewe ni kalasi me ra wasea e sa vaqaqacotaka vakacava na nodra vakabauti Jisu Karisito na nodra sa vulica na Veiyalayalati Makawa.

Vakavulica na iVunau

Eda reki ena noda Dauveivueti.

• E dina ga ni sa kilai tu na Siganisucu me dua na gauna ni reki, e vuqa era dau sotava na ituvaki e dredre me kune kina na reki, ena gauna sara mada ga oqo ni yabaki. E dua na itukutuku bibi ni Siganisucu o ya ni sa rawa vua na iVakabula me vakamamadataka na noda icolacola ka vukei keda me da kunea na vakacegu kei na reki sara mada ga. Me wasei na itukutuku oqo, sa rawa mo vola ena papa ni volavola na idusidusi vakaivolanikalou oqo: Same 35:9; Aisea 25:8–9; 44:21–24; 51:11; Sefanaia 3:14–20; Mosese 5:5–11. O qai rawa ni vola ena papa ni volavola e dua na taro me ra vakasamataka vakatitobu na lewe ni kalasi ni ra wilika na umavoa, me vaka Na cava era solia na vei umavosa ni ivolanikalou oqo me ka rekitaki? Kerei ira me ra wasea na veika era kunea. Sa rawa talega mo solia e dua na gauna vei ira na lewe ni kalasi mera vola baleta na nodra reki vakai ira vua na iVakabula. E rawa ni ra kunea eso tale na ikuri ni raimailoma mai na itukutuku nei Peresitedi RussellM. Nelson ena “iKuri ni iVurevure.”

• Na Siganisucu e vakarautaka na madigi eso me vakatetei kina na reki i Karisito ena noda qaravi ira na tani. Ni se bera na kalasi, sa rawa mo sureta e dua na lewe ni kalasi me railesuva na itukutuku nei Elder Ulisses Soares “E Dua na Mata Agilosi ni Gauna Vou” (Lotu ni Siganisucu ni Mataveiliutaki Taumada, 8 ni Tise., 2019, kakaburaki. ChurchofJesusChrist.org) ka vakavakarau mai ka mai wasea ni dua na cakacaka ni veiqaravi e sa vukei Elder Soares kei na nona matavuvale me ratou vakila na reki ni Siganisucu. E rawa talega ni o wasea eso na tiki ni nona itukutuku ena kalasi. Sa rawa vei ira na lewe ni kalasi mera wasea na veika era sa sotava ena nodra solia se ciqoma na cakacaka ni veiqaravi ena gauna ni Siganisucu. E rawa vakacava ni da cakacakataka na veisureti nei Elder Soares meda muria na “ivakaraitaki uasivi ni loloma ni iVakabula kei na vakanuinui vei ira na tamata”?

Na ivakatakilakila eso e rawa ni vukei keda meda nanumi Jisu Karisito.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale era volai tu kina eso na ivakatakarakara ena veiyalayalati makawa e vakavuvulitaka na veika baleti Jisu Karisito. Sa rawa vei ira na lewe ni kalasi mera wasea na veika era sa vulica me baleta na iVakabula mai na ivakatakilakila oqo kei na so tale era kunea ena nodra vuli. Na cava eda sa vulica baleta na kunei ni iVakabula ena ivolanikalou? Na veika sotavi cava soti e sa vakavulica vei keda ni “sa buli na ka kecega me tukuni [Koya]”? Mosese 6:63

Sa solia vei keda na Kalou na isolisoli ni Luvena.

• Na veisoli iloloma e dua na ivalavala makawa ni Siganisucu ena vuqa na vanua. E rawa ni o liutaka e dua na veivosaki vata kei ira na lewe ni kalasi me baleta na isolisoli sa solia vei keda na Kalou, vakabibi na isolisoli ni Luvena, o Jisu Karisito. Me caka oqo, sa rawa mo wasea na vidio “Sai Koya na iLoloma” (ChurchofJesusChrist.org) ka sureti ira na lewe ni kalasi me ra wasea na kena ibalebale vei ira na isolisoli ni iVakabula. E rawa vakacava ni da vakaraitaka vua na Tamada Vakalomalagi na noda vakavinavinakataka na isolisoli oqo?

Aisea 7:14; 9:6

“Ena vakatokai na Yacana ko Veivakurabuitaki.”

• E vakayagataka o Aisea na parofita e vuqa na yaca kei na icavuti me vakamacalataka na Mesaia, ka na sucu mai Peceliema (raica me ivakaraitaki, Aisea 7:14; 9:6). Era na taleitaka beka na lewe ni kalasi na nodra vulica vakalevu cake me baleta na iVakabula kei na nona ilesilesi ena nodra vulica na icavuti eso oqo. Sa rawa ni ra digia e dua na icavuti ka vakaraica eso tale na umavosa ena ivolanikalou me vukei ira me ra kilamatata na kena ibalebale. Me ivakaraitaki, e rawa ni ra vulica eso tale na ka me baleta na icavuti “Tui ni Sautu” (Aisea 9:6) mai na nodra wilika na Same 85:8; Aisea 52:7; Luke 2:14; se Joni 16:33. Me vukei ira na lewe ni kalasi me ra kunea eso tale na ivolanikalou, vakatura me ra rai ki na iDusidusi ki na iVolanikalou (ivolanikalou. ChurchofJesusChrist.org). Na cava e vakatura na icavuti eso oqo me baleta na iVakabula kei na veika e cakava o Koya me baleti keda?

iKuri ni iVurevure

O Jisu Karisito e solia na vakacegu kei na reki.

E vakavulica o Peresitedi RussellM. Nelson:

“Ni vakanamata noda bula ki na ituvatuva ni veivakabulai ni Kalou … vei Jisu Karisito kei na Nona kosipeli, e rawa ni da vakila na reki veitalia na cava e yaco—se sega ni yaco—ena noda bula. Na reki e yaco mai Vua vakakina ena Vukuna. O Koya na ivurevure ni reki kecega. Eda dau vakila ena gauna ni Siganisucu ni da lagata, ‘Me Da Marau, sa tadu mai’ [Serenilotu, naba.116]. Ka rawa ni da vakila ena yabaki taucoko. Vei keda na Yalododonu Edaidai, e vuni reki o Jisu Karisito!…

“Me vaka ga ni solia na iVakabula na vakacegu e ‘uasivia na ka kecega e kilai rawa’ [Filipai 4:7], e solia talega o Koya e dua na kaukauwa, titobu, kei na rabailevu ni reki e bolea na vakaibalebale vakatamata se na veika e dau sotavi ena bula oqo” (“Reki kei na Bula Vakayalo,” Liaona, Nove. 2016, 82).

Vakatorocaketaki Noda Veivakavulici

Vakavakarau ena nomu nanumi ira tiko na tamata. “Raica me dusimaka na nomu [vakavakarau] na nomu kilai ira vinaka na tamata o vakavulica. … O ira na qasenivuli sa Vakarisito e sega ni dua tikoga na ivakarau se iwalewale era cakava; era sa yalataka mera vukei ira na tamata mera tara cake nodra vakabauti Jisu Karisito” (Veivakavulici ena iVakarau ni iVakabula,7).