“Ritembwa 12–18. Maraki: ‘I Tangiri Ngkami, E Taku te Uea,’” Nakomai, Iriirai—Ibukin te Reirei n Tabati: O Tetemanti 2022 (2021)
“Ritembwa 12–18. Maraki,” Nakomai, Iriirai—Ibukin te Reirei n Tabati: 2022
Ritembwa 12–18
Maraki
“I Tangiri Ngkami, E Taku te Uea”
Tabeua rongorongo inanon Maraki a na bon bae ni kakawaki ibukin am kiraati bwa a na reiakinna. Ngkai ko kamatebwai, tataro bwa ko na ataia bwa teraa rongorongo akanne. Karaoan aei e na bon buokiko n namakina ana tangira te Uea nakoia naake ko reireiniia.
Korei Am Namakin
Kaunga te Tibwatibwa
Ko na bae ni moana te marooro iaon ana boki Maraki man korean te taeka ae Rongorongo iaon te burakibooti. Kaungaia kaain te kiraati bwa ana tibwauai rongorongo aika a kakawaki ake a kunei inanon mwakoro nako n ana boki Maraki. Ni buokiia kaain te kiraati n uringii ao ni iangoi baike a tibwaaki, ko kona ni korei rongorongo akanne iaon te burakibooti.
Reirei te Reirei
Te Uea e tangira “te angabwai ae e itiaki.”
-
Ni kaungaia kaain te kiraati n tibwaua te bwai are a reiakinna iaon te angabwai man Maraki 1:6–14, ko kona n tuangiia bwa a na rinanon taian mwakoro aikai ao ni maroroakina ma temanna kaain te kiraati te bwai are aaki ota iai ibonga ake Iteraera iaon te angabwai. Bukin tera te Uea e tangira te kabanea n tamaroa mai iroura? Kaain te kiraati a kona ni karinanii taian angabwai, ke anga karea, ake ti karaoi nakon te Uea n te bong aei. Man baike a karinanaki, a kona ni maroroakinna bwa tera mai iai aika angabwai aika “kamwaraeaki” ke a “itiaki” (Maraki 1:7, 11).
A na taetae ni burabeti Maraki a kakoroaki bukiia ni boong aika kaitira.
-
Ko kona ni moana te marooro iaon Maraki 3–4 man kaotakina ae Moronaai e tibwai kiibu man mwakoro aikai ngke e kaoti nakon Iotebwa Timiti (taraa Iotebwa Timiti—Rongorongo 1: 36–39). Tera koaua man mwakoro aikai ae a na namakina kaain te kiraati bwa e bon rangi ni kakawaki ibukin Iotebwa —ao ngaira—bwa ti na atai? A kona kaain te kiraati ni bootaki n te kurubu ae uarereke ao ni karinanii koaua ake a kona ni karekei. Kaungaia kurubu bwa a na tibwaa are a korei ao ni marooro bwa a kangaa koaua aikai ni kakawaki ni boong aika kaitira.
Te Uea e kauki wintoon karawa ngkana ti kabwakai ara kabwianibwai.
-
Ni kaungaia kaain te kirati bwa a na tibwai aia koaua iaon tuan te kabwianibwai, ko kona ni kaoiia bwa a na kakaei reirei aika a kakawaki inanon Maraki 3: 8–12 ao n tibwaia bwa a kangaa n ataia bwa a koaua reirei aikai. A kona ni marooro bwa e kanga te Uea n tia ni kakabwaiaia—n te maiu n tamnei ao n te maiu n rabwata—man kabwakaan te kabwianibwai. Ke a kona ni maroroakin reirei iaon te kabwianibwai are e tibwaia Unimwaane David A. Bednar n ana rongorongo “Mataroan Karawa” (Riaona, Nobembwa 2013, 17–20) ao n tibwaia bwa teraa ae atia n reiakina ngkai a kekeiaki ni maiuakina te tua aei.
-
Tuangiia kaain te kiraati bwa a na wareka Maraki 3:8–12 ni karaurau ngkai a iangoaia bwa a na kanga n reiakina temanna bwa e aera te Uea e tuangiira bwa ti na kabwaka te kabwianibwai. A kona naba ni wareka ana taeka Beretitenti Gordon B. Hinckley inanon “Bwaai n Ibuobuoki Riki Tabeua.” Tera ae ti na tangira bwa a na ataia tabeman iaon te kabwianibwai? Te katooto, tera nanon ae ko na kabwakaa te kabwianibwai? Bukin tera e tangiria te Uea bwa ti na karaoia? E kanga “wintoon karawa” (kibu10) ni kaukaki ngkana ti kabwakaa te kabwianibwai? Tera te raraoma ae e na reke iroun temanna iaon kabwakaan te kabwianibwai, ao ti na kanga ni kaeka nako iai? Titirakiniia kaain te kiraati bwa a na tibwaia bwa e kanga kawakinan te tua aei ni kakorakorai aia onimaki iroun Tamara are i Karawa ao Iesu Kristo.
Te kamataata n te korotamnei ni kaotin Eria nakon Iotebwa Timiti ao Oliver Cowdery n te Kirtland Tembora, iroun Robert T. Barrett
“N na kanakoa Eria are te burabeti nakoimi.”
-
E na reke riki buokaia kaain te kiraati man nonori iaon Maraki 4: 5–6 man katitabooan kiibu aikai ma are e taekinna Moronaai nakon Iotebwa Timiti n Iotebwa Timiti—Rongorongo 1: 36–39. (Tao e na ibuobuoki ngkana iai temanna ae korei taekan kiibu aikai ni kakatitebooi teuana nakon teuana iaon te burakibooti.) Tera taeka are e karin Moronaai ae e kamataata riki otara nakon are e koreaki ni Maraki? Ko kona naba ni maroroakin titiraki n aron aikai: Antai “bakatibu”? (taraa Te Tua Kaua 29:13). E na kangaa nanora n rairaki nakoia tamara, ao nanoia tamara nakoira? Ni buokiia kaain am kiraati ni mataata bwa e kanga ana taetae ni burabeti Maraki ni koro nanona, a kona ni wareka rongorongon Eria ngke e anga te kiing ni kabaebae nakon Iotebwa Timiti (taraa Reirei ao Berita aika Tabu 110:13–16.). Bukin tera a kakaitau kaain te kiraati ngkai a kaokaki kiing aikai?
-
Maraki 4:5–6 e karekea te tai ae tamaroa ni marooro iaon te tembora ao te mwakuri n rongorongon te utu. Tao a kona kaain te kiraati n tibwa te taneiai are a atia n rinanona ngke a karaoa te mwakuri aei ao e kanga te taneiai anne ni buokiia n rairaki nanoia nakoia tamaia. Tera ae ti kona ni karaoia ni buokiia te roro ae rikirake bwa a na rairii nanoia nakoira?
Bwaai n Ibuobuoki Riki Tabeua
Te kabwianibwai bon nakon te onimaki.
Beretitenti Gordon B. Hinckley e taku, “Ti kona ni kabwakai ara kabwianibwai. Aio bon tiaki ibukin te mwane ma bon nakon te onimaki. I bon tuai kunea temanna ae kakaonimaki ni kabwakaa ana kabwianibwai are e naaki taekina bwa ni bon koauana ao n te kawai ae kamiimii wintoon karawa a bon tia n uki ao te kakabwaia atia ni bwaro iaoia” (“Let Us Move This Work Forward,” Ensign, Nobembwa 1985,85).
Kanakoraoan Ara Anga reirei
Tibwauaa korakaimi ao am onimaki. N tabetai aomata ake a rinanon te kataaki a namakina ae bon tii ngaiia. E na bon raoiroi n taai tabetai tibwauaan te taneiai are ko rinanona n aron te tai ngke ko korakai n rawawata ao e kanga te Tia Kamaiu ni buokiko.