« 12–18 nō Tītema. Malaki : ‘Te parau maira Iehova, i aroha na vau ia ’outou.’ », Mai, pe’e mai—nō te Ha’api’ira’a Sābati : Faufa’a Tahito 2022 (2021)
« 12–18 nō Tītema. Malaki », Mai, pe’e mai—nō te Ha’api’ira’a Sābati : 2022
12–18 nō Tītema
Malaki
« Te parau maira Iehova, i aroha na vau ia ’outou. »
E nehenehe te tahi mau parau poro’i i roto i te Malaki ’ia riro ’ei mea faufa’a ta’a ’ē nō tā ’outou piha ha’api’ira’a ’ia ’ite. ’A tuatāpapa ai ’outou, a pure nō te ’ite e aha teie mau poro’i. Nā roto i te ravera’a i te reira e tauturu ato’a ’oia ia ’outou ’ia fāri’i i te here o te Fatu nō te feiā o tā ’outou e ha’api’i ra.
Pāpa’i i te mau mana’o e tae mai
Tītau i te mana’o
E nehenehe ’outou e ha’amata i te hō’ē ’āparaura’a nō ni’a i te Buka a Malaki nā roto i te pāpa’ira’a i te ta’o poro’i i ni’a i te tāpura. ’A fa’aitoito i te mau pīahi ’ia fa’a’ite mai i te mau parau poro’i faufa’a rahi tā rātou i ’ite i roto i te pene tāta’itahi o te Malaki. Nō te tauturu i te mau pīahi ’ia ha’amana’o ’e ’ia feruri hōhonu i te mea i fa’a’itehia, e nehenehe ’outou e pāpa’i i te reira mau parau poro’i i ni’a i te tāpura.
Ha’api’i i te ha’api’ira’a tumu
Te parau maira Iehova ’ia « hōpoihia mai te mea no’ano’a ».
-
Nō te fa’aitoito i te mau pīahi ’ia fa’a’ite mai i te mea tā rātou i ha’api’i mai nō ni’a i te mau ō i roto i te Malaki 1:6–14, e nehenehe ’outou e ani ia rātou ’ia hi’o fa’ahou i teie mau ’īrava ma te māmū ’e ’ia paraparau i te tahi atu mau pīahi i te hō’ē mea ’aita te mau tahu’a nō ’Īserā’ela i māramarama nō ni’a i te mau ō. Nō te aha te Fatu e ani ai i te mea maita’i a’e i roto ia tātou ? E nehenehe te mau pīahi e hāmani i te hō’ē tāpura nō te mau o, ’e ’aore rā te mau tusia tā tātou e rave nei nō te Fatu i teie mahana. Nō te mau ’ohipa tāta’itahi i ni’a i te tāpura, e nehenehe rātou e ’āparau i te mea e nehenehe ai e riro ’ei ō « vi’ivi’i » ’e ’aore rā ’ei ō « no’ano’a » (Malaki 1:7,11).
Te tupu nei te mau parau tohu a Malaki i te mau mahana hope’a nei.
-
E nehenehe ’outou e ha’amata i te hō’ē ’āparaura’a nō ni’a i te Malaki 3–4 nā roto i te fa’a’itera’a ē ’ua fa’ahiti o Moroni i te mau ’īrava nō roto mai i teie mau pene i tōna fāra’a ia Iosepha Semita (a hi’o i te Iosepha Semita—’Ā’amu 1:36–39). E aha te mau parau mau i roto i teie mau pene o tā te mau pīahi e fa’auru e mea faufa’a rahi roa nō Iosepha—’e nō tātou—’ia ’ite ? E nehenehe te mau pīahi e ha’apupu na’ina’i ia rātou ’e ’ia titi’a i te mau parau mau ato’a e ti’a ia rātou. E fa’aitoito i te mau pupu ’ia fa’a’ite mai i tā rātou mau tābula ’e ’ia ’āparau nō te aha e mea faufa’a teie mau parau mau i te mau mahana hope’a nei.
E ’īriti te Fatu i te mau ha’amāramarama o te ra’i ’ia ’aufau tātou i tā tātou tuha’a ’ahuru.
-
Nō te fa’aitoito i te mau pīahi ’ia fa’a’ite mai i tō rātou ’itera’a pāpū nō ni’a i te ture nō te tuha’a ’ahuru, e nehenehe ’outou e ani ia rātou ’ia ’imi i te mau parau tumu i roto i te Malaki 3:8–12 ’e ’ia fa’a’ite mai nāhea rātou i te ’itera’a ē e parau mau teie mau parau tumu. E nehenehe rātou e ’āparau e mea nāhea te Fatu i te ha’amaita’ira’a ia rātou—i te pae vārua ’e i te pae tino—nō te ’aufaura’a i te tuha’a ’ahuru. ’E ’aore rā e nehenehe rātou e ’āparau i te mau ha’api’ira’a nō ni’a i te tuha’a ’ahuru o tā Elder David A. Bednar i fa’a’ite i roto i tāna a’ora’a « Te mau ha’amāramarama o te ra’i » (Ensign ’aore rā Liahona, Novema 2013, 17–20) ’e ’ia fa’a’ite mai i te mea tā rātou i ha’api’i mai a fa’aitoito ai rātou i te ora i teie ture.
-
’A ani i te mau pīahi ’ia tai’o i te Malaki 3:8–12 ma te māmū ’e ’ia feruri māite nāhea rātou ’ia ha’api’i i te hō’ē ta’ata i te tumu te Fatu e ani ai ia tātou ’ia ’aufau i te tuha’a ’ahuru. E nehenehe ato’a rātou e tai’o i te fa’ahitira’a parau a te peresideni Gordon B. Hinckley i roto i « Te tahi atu ā mātēria ». E aha tā tātou e hina’aro ia vetahi ’ē ’ia ’ite nō ni’a i te tuha’a ’ahuru ? ’Ei hi’ora’a, e aha te aura’a o te parau e ’aufau i te tuha’a ’ahuru ? Nō te aha te Fatu e hina’aro ai ia tātou ’ia rave i te reira ? E mea nāhea te « mau ha’amāramarama o te ra’i » (’īrava 10) i te ’īritihia ’ia ’aufau tātou i te tuha’a ’ahuru ? E aha te mau māna’ona’ora’a o te hō’ē ta’ata nō ni’a i te ’aufaura’a i te tuha’a ’ahuru, ’e nāhea tātou i te pāhono ? ’A ani i te mau pīahi ’ia fa’a’ite mai e mea nāhea te ha’apa’ora’a i teie fa’auera’a i te ha’apūai i tō rātou fa’aro’o i te Metua i te Ao ra ’e ia Iesu Mesia.
Fa’ahōho’ara’a nō te fāra’a mai o Elia ia Iosepha Semita ’e ia Oliver Cowdery i roto i te hiero nō Kirtland, nā Robert T. Barrett
« Inaha, e tono nā vau i te peropheta ra ia Elia ia ’outou na ».
-
E nehenehe te mau pīahi e fāri’i i te tahi mau mana’o tauturu nō ni’a i te Malaki 4:5–6 nā roto i te fa’aaura’a i teie mau ’īrava i te huru o tā Moroni fa’ahitira’a i teie mau mea ia Iosepha Semita i roto i te Iosepha Semita—’Ā’amu 1:38–39. (E nehenehe te reira e tauturu i te hō’ē ta’ata ’ia pāpa’i i na ’īrava te tahi i pīha’i i te tahi o te tāpura). E aha tā te fa’ahitira’a parau a Moroni i hōro’a mai ’ia māramarama tātou i te mau ’īrava i roto i te Malaki ? E nehenehe ato’a ’outou e ’āparau i te mau uira’a mai teie: o vai « te mau metua » ? (a hi’o i te Deuteronomi 29:13). Nāhea tō tātou mau ’ā’au i te fāriu i tō tātou mau metua, ’e nāhea tō rātou mau ’ā’au i te fāriu mai i ni’a ia tātou ? Nō te tauturu i tā ’outou mau pīahi ’ia māramarama e mea nāhea te mau parau tohu a Malaki i te tupura’a, e nehenehe rātou e tai’o i te taime a hōro’a ai o Elia i te mau tāviri nō te tā’atira’a ia Iosepha Semita ra(hi’o Te Parau Ha’api’ira’a ’e te mau Parau Fafau 110:13–16). Nō te aha te mau pīahi i māuruuru ai nō teie mau tāviri i fa’aho’i-fa’ahou-hia mai ?
-
Malaki 4:5–6 tei roto te fāna’ora’a rahi nō te paraparau nō ni’a i te hiero ’e te ’ohipa ’ā’amu ’utuāfare. Penei a’e e nehenehe te mau pīahi e fa’a’ite mai i te mau ’itera’a tā rātou i fāri’i a rave ai rātou i teie ’ohipa ’e nāhea teie mau ’itera’a i te tauturura’a ia rātou ’ia fāriu i tō rātou ’ā’au i tō rātou mau metua. E aha tā tātou e nehenehe e rave nō te tauturu i te mau u’i nō a muri atu ’ia fāriu i tō rātou ’ā’au ia tātou ?
Te tahi atu mau rāve’a tauturu
E ’ohipa te tuha’a ’ahuru nō te fa’aro’o.
’Ua parau te Peresideni Gordon B. Hinckley e, « e nehenehe tā tātou e ’aufau i tā tātou tuha’a ’ahuru. E ’ere te reira i te hō’ē ’ohipa nō te moni e ’ohipa rā nō te fa’aro’o. ’Aitā vau i ’ite atura i te hō’ē ta’ata ’aufau tuha’a ’ahuru ha’apa’o o te ’ore e e nehenehe e ha’apāpū ē i roto i te hō’ē huru hi’ora’a ’e te ’oa’oa ’ua ’īritihia te mau ha’amāramarama o te ra’i ’e ’ua nīni’ihia mai te mau ha’amaita’ira’a i ni’a iāna » (« E fa’ahaere tātou i teie ’ohipa i mua », Ensign, Novema 1985, 85).
Ha’amaita’i i tā tātou ha’api’ira’a
’A fa’a’ite i tā ’outou mau ’arora’a ’e tō ’outou fa’aro’o. I te tahi mau taime te vai ’ōtahi nei te mau ta’ata e fa’aruru nei i te mau tāmatara’a. E mea tano paha ’ia fa’a’ite i te hō’ē ’ohipa i tupu nō ni’a i te hō’ē taime a tāfifi ai ’outou ’e ’ua nāhea te Fa’aora i te tauturura’a ia ’outou.