Nō tātou ’ua fānauhia mai te hō’ē tamari’i, nā Simon Dewey

19–25 nō Tītema

Noela

« ’Ua tīa’i tātou iāna, ’e ’ua fa’aora ’oia ia tātou »

I roto i tā ’outou iho tuatāpapara’a ’e tā ’outou fa’aineinera’a nō te ha’api’i, ’a feruri e nāhea ’outou e nehenehe ai e tauturu i te mau pīahi ’ia ’ite i te ’oa’oa pāpū o te fānaura’a o te Fa’aora. ’A ani i te Vārua ’ia fa’a’ite pāpū mai ia rātou nō te here fa’aora o Iesu Mesia.

Pāpa’i i te mau mana’o e tae mai

Tītau i te mana’o

E riro paha te tau noela ’ei taime maita’i nō te ani i te mau pīahi ’ia fa’a’ite mai e mea nāhea te tuatāpapara’a i te Faufa’a Tahito i te ha’apūaira’a i tō rātou fa’aro’o ia Iesu Mesia.

Ha’api’i i te ha’api’ira’a tumu

Tē ’oa’oa nei tātou nō tō tātou Tāra’ehara.

• Noa atu ē ’ua ’mātauhia te Noela ’ei tau nō te ’oa’oa, e rave rahi o rātou nā roto i te tahi mau mea e tupu nei, e mea fifi ’ia roa’a te ’oa’oa ’oia ato’a i te roara’a o te matahiti. Te hō’ē poro’i faufa’a rahi nō te Noela, ’oia ho’i, e nehenehe te Fa’aora e ha’amāmā i tā tātou mau hōpoi’a ’e e tauturu ia tātou ’ia ’ite i te hau ’e tae noa atu i te ’oa’oa. Nō te fa’a’ite i teie parau poro’i, e nehenehe ’outou e pāpa’i i ni’a i te tāpura ’ere’ere i te mau fa’ahorora’a o te pāpa’ira’a mo’a i muri nei : Salamo 35:9 ; Isaia 25:8–9 ; 44:21–24 ; 51:11 ; Zephania 3:14–20 ; Mose 5:5–11. I muri iho e nehenehe ’outou e pāpa’i i ni’a i te tāpura ’ere’ere te hō’ē uira’a nō te ani i te mau pīahi ’ia feruri ’a tai’o ai rātou i te mau ’īrava, mai teie E aha te mau tumu tā teie mau ’īrava pāpa’ira’a mo’a e hōro’a nei nō te fāri’i i te ’oa’oa ? E ani atu ia rātou ’ia fa’a’ite mai i te mea tā rātou i ’ite mai. Penei a’e e nehenehe ’outou e hōro’a i te taime i te mau pīahi ’ia pāpa’i nō ni’a i tō rātou iho ’oa’oa i te Fa’aora. E ’ite mai paha rātou i te tahi atu mau mana’o nā roto mai i te peresideni Russell M. Te parau poro’i a Nelson i roto i « Te tahi atu ā mātēria ».

• Tē hōro’a nei te Noela i te mau rāve’a nō te ha’aparare i te ’oa’oa o te Mesia nā roto i te tāvinira’a ia vetahi ’ē. I mua i te piha ha’api’ira’a, e nehenehe ’outou e ani i te hō’ē pīahi ’ia hi’o fa’ahou i te parau poro’i a Elder Ulisses Soares « Te hō’ē melahi manihini ’āpī » (Purera’a Noela a te Peresidenira’a Mātāmua, 8 nō Titema 2019, broadcasts.ChurchofJesusChrist.org) ’e ’ia haere mai ma te ’ineine nō te fa’a’ite mai e mea nāhea te ’ohipa tāvinira’a i te tauturura’a ia Elder Soares ’e tōna ’utuāfare ’ia fāri’i i te ’oa’oa o Noela. E nehenehe ato’a ’outou e fa’a’ite i te tahi tuha’a o tāna parau poro’i i te piha ha’api’ira’a. E nehenehe te mau pīahi e fa’a’ite mai i tō rātou iho mau ’itera’a nō ni’a i te hōro’ara’a ’aore rā te fāri’ira’a i te mau ’ohipa tāvinira’a i te tau Noela. Nāhea e ti’a ai ia tātou ’ia ’ohipa i te anira’a a Elder Soares ’ia pe’e i « te hi’ora’a maita’i roa a’e o te here ’e te maita’i i ni’a i te ta’ata » ?

E nehenehe te mau taipe e tauturu ia tātou ’ia ha’amana’o ia Iesu Mesia.

• Arata’ira’a nō teie hepetoma i roto Mai, pe’e mai—nō te ta’ata hō’ē ’e te ’utuāfare e tāpura i te tahi mau taipe i roto i te Faufa’a Tahito ’o tē ha’api’i nei nō ni’a ia Iesu Mesia. E nehenehe te mau pīahi e fa’a’ite mai i te mea tā rātou i ha’api’i mai nō ni’a i te Fa’aora nā roto mai i teie ’e te tahi atu mau taipe o tā rātou i ’ite i roto i tā rātou tuatāpapara’a. E aha tā tātou i ha’api’i mai nō ni’a i te ’itera’a i te Fa’aora i roto i te mau pāpa’ira’a mo’a ? E aha te mau ’itera’a tei ha’api’i ia tātou ē « ’ua hāmanihia te mau mea ato’a nō te fa’a’ite i te parau [nōna] » ? (Mose 6:63).

’Ua hōro’a mai te Atua ia tātou i te ō o tāna tamaiti.

• Te hōro’ara’a i te ō ’o te hō’ē ïa peu i te Noela i roto i te rahira’a o te mau ta’ere. E nehenehe ’outou e arata’i i te hō’ē ’āparaura’a ’e te mau pīahi nō ni’a i te mau ō tā te Atua i hōro’a mai ia tātou, i te ō iho ā rā o tāna Tamaiti, ’o Iesu Mesia. Nō te rave i te reira, e nehenehe ’outou e fa’a’ite i te video « He Is the Gift [’O ’oia te hōro’a] » (ChurchofJesusChrist.org) ’e e ani i te mau pīahi ’ia fa’a’ite mai e aha te aura’a te hōro’a o te Fa’aora nō rātou. Nāhea e ti’a ai ia tātou ’ia fa’a’ite i te Metua i te ao ra i tō tātou māuruuru nō teie hōro’a ?

Isaia 7:14 ; 9:6

« E ma’irihia tōna i’oa ’ia Hau ’ē ».

• ’Ua fa’a’ohipa te peropheta Isaia e rave rahi i’oa ’e te ti’ara’a nō te fa’a’ite i te Mesia, ’o tei fānauhia i Betelehema (hi’o ’ei hi’ora’a, Isaia 7:14 ; 9:6). Penei a’e e ’oa’oa te mau pīahi i te ha’api’i rahi mai nō ni’a i te Fa’aora ’e i tāna misiōni nā roto i te ’apora’a mai i teie mau ti’ara’a. E nehenehe rātou e mā’iti i te hō’ē ti’ara’a ’e e ’ite mai i te tahi atu mau ’īrava o te pāpa’ira’a mo’a ’o te tauturu ia rātou ’ia ta’a maita’i i te aura’a o te reira. ’Ei hi’ora’a, e nehenehe rātou e ha’api’i rahi mai atu ā nō ni’a i te ti’ara’a « te Ari’i nō te hau » (Isaia 9:6) nā roto i te tai’ora’a i te Salamo 85:8 ; Isaia 52:7 ; Luka 2:14 ; ’e ’aore rā Ioane 16:33. Nō te tauturu i te mau pīahi ’ia ’ite mai i te tahi atu mau pāpa’ira’a mo’a, ’a parau ia rātou ’ia hi’o i roto i te Buka arata’i nō te mau pāpa’ira’a mo’a (scriptures.ChurchofJesusChrist.org). E aha te mea tā teie mau ti’ara’a e fa’a’ite nei nō ni’a i te Fa’aora ’e i te mea tāna i rave nō tātou ?

Te tahi atu ā mātēria tauturu

’Ua pūpū mai Iesu Mesia i te hau ’e te ’oa’oa.

’Ua ha’api’i te peresideni Russell M. Nelson :

« Mai te mea te fa’atumura’a o tō tātou orara’a tei ni’a i te fa’anahora’a nō te fa’aorara’a a te Atua… ’e ia Iesu Mesia ’e i tāna ’evanelia, e nehenehe tātou e fāri’i i te ’oa’oa, noa atu te mea e tupu ra—’aore rā ’aita e tupu ra—i roto i tō tātou orara’a. Nō ’ō mai iāna ’e nōna e tae mai ai te ’oa’oa. ’O ’oia te tumu nō te mau ’oa’oa ato’a. E putapū tātou i te reira i te tau Noela ’a hīmene ai tātou ‘’Ua tae mai te Mesia’ [Te mau hīmene, n°118]. E nehenehe ato’a tātou e putapū i te reira i te roara’a o te matahiti. Nō te feiā mo’a i te mau mahana hope’a nei, te ’oa’oa, ’o Iesu Mesia ïa ! […]

« Mai tā te Fa’aora e hōro’a mai i te hō’ē hau ‘’aita ē fa’aaura’a’ [Philipi 4:7], ’ua hōro’a ato’a mai ’oia i te hō’ē ’oa’oa pūai, te hōhonu ’e te ’ā’ano o tei hau atu i te mana’o ’e ’aore rā i te hāro’aro’a o te ta’ata tino nei ». (« Te ’oa’oa nō te oraora pae vārua », Liahona, Novema 2016, 82).

Ha’amaita’ira’a i tā tātou ha’api’ira’a

Fa’aineine ma te mana’ona’o i te mau ta’ata. « Vaiiho i tō ’outou hāro’aro’ara’a nō te ta’ata ’o tā ’outou e ha’api’i nei ’ia arata’i i tā ’outou mau fa’aineinera’a… ’Aita te mau ’orometua mai te huru Mesia i fafau i te hō’ē huru ta’a ’ē ’aore rā i te hō’ē rāve’a ; ’ua fafau rātou e tauturu i te mau ta’ata ’ia patu i tō rātou fa’aro’o ia Iesu Mesia » (Haʼapi’ira’a mai tā te Fa’aora,7).