Hiero nō Laie Vaihi

5–11 nō Tītema

Hagai; Zekaria 1–3; 7–14

« Ei maitai nō Iehova »

’A tuatāpapa ai ’outou i te Hagai ’e te Zekaria, a feruri nāhea ’outou e nehenehe ai e tauturu i te mau pīahi ’ia ’ite i te aura’a o teie mau parau tohu.

Pāpa’i i te mau mana’o e tae mai

Tītau i te mana’o

E nehenehe te mau pīahi e hōro’a mai i te mau ’īrava nō roto mai i te Hagai ’e te Zekaria o tā rātou i feruri ’e ’aore rā i paraparau i te tahi atu mau ta’ata i teie hepetoma ’e ’ia ’āparau e nāhea teie mau ’īrava i te tauturu ia rātou ’ia ha’afātata i te Fatu.

Ha’api’i i te ha’api’ira’a tumu

Haggai1; 2:1–9

« E ha’amana’o māite na i tō ’outou na mau haere’a ».

• E nehenehe te a’ora’a i roto i te Haggai1 e tauturu i te mau pīahi ’ia feruri i te mau ’ohipa nā mua roa e ti’a ia rātou ’ia rave. E nehenehe ’outou e ani ia rātou ’ia tai’o i te Hagai 1:1–7 ’e ’ia ’ite nāhea te mau ta’ata i Ierusalema i ’ore ai i rave nā mua roa i te mau mea tā te Fatu i hina’aro ’ia rave rātou. E aha te tahi mau mea tā te Fatu i ani mai ia tātou ’ia rave nā mua roa i roto i tō tātou orara’a? E aha te mea e nehenehe e fa’anevaneva ia tātou ’ia fa’atumu i ni’a i te Metua i te Ao ra ’e i te Fa’aora ’e i tā rātou mau tauto’ora’a nā mua roa ? Penei a’e e nehenehe te mau pīahi e fa’a’ite mai i te mau ’itera’a tei tauturu ia rātou ’ia « ha’amana’o māite… i tō [rātou] mau haere’a » ’e i te mau ’ohipa tā rātou e rave nā mua roa.

• Nō te tauturu i te mau pīahi ’ia feruri e nāhea rātou e nehenehe ai e fa’atumu hope roa a’e i ni’a i te mau ’ohipa nā mua roa a te Fatu, e nehenehe ’outou e ani ia rātou ’ia hi’o fa’ahou i te Hagai 2:1–9. E aha te a’o tā te Fatu i hōro’a o tē nehenehe e tauturu ia tātou ’ia rave i tāna ’ohipa? E nehenehe te mau pīahi e fa’a’ite mai nāhea rātou ’ia tu’u nā mua roa i te mau ’ohipa a te Fatu i roto i tō rātou orara’a a rave ai rātou i te tahi atu ā o tā rātou mau hōpoi’a faufa’a e rave rahi. E aha tā te Hagai 2:1–9 e ha’api’i mai nei ’e nāhea te Fatu ’ia ha’amaita’i ia tātou ’ia tu’u ana’e tātou iāna nā mua roa i roto i tō tātou orara’a ? (a hi’o ato’a « Te tahi atu ā mātēria »). ’A hōro’a i te taime i te mau pīahi ’ia pāpa’i i te mea i fa’auruhia ia rātou ’ia rave maoti teie ’āparaura’a.

Zekaria 1–3; 7–8;14

E nehenehe te Fatu e ha’amo’a ia tātou.

• Nō te ha’amata i te hō’ē tāu’ara’a parau nō ni’a i te huru mo’a, e nehenehe ’outou e tai’o ’āmui i te Zekaria 14:20–21. E nehenehe te mau pīahi e fa’a’ite mai i te aura’a o te parau « Ei maitai nō Iehova » nō rātou. E aha te fa’aurura’a e roa’a i te mau ta’ata mai te mea e hi’o rātou i te parau « Ei maitai nō Iehova » i nana’ohia i ni’a i te mau tao’a o te mau mahana ato’a? Nāhea teie parau ’ia taui ia tātou ’ia ’ite i te reira i ni’a i te mau hiero i teie mahana? I muri iho e nehenehe te mau pīahi e tai’o i te Zekaria 1:1–6; 3:1–7; 7:8–10; 8:16–17 ’e e ’āparau i te mea tā rātou i ha’api’i mai nō ni’a i te aura’a o te rirora’a ’ei mea mo’a. Nō te aha e mea faufa’a tō tātou iho huru mo’a nō te Fatu? Nāhea ’oia i te tauturu ia tātou ’ia riro mai ’ei mea mo’a?

• E nehenehe te mau pīahi e tai’o fa’ahou i te Zekaria 2:10–11; 8:1–8; 14:9–11, 20–21 ’e ’ia fa’a’ite i tō rātou mau mana’o nō ni’a i te huru orara’a i pīha’i iho i te Fa’aora i roto i te hō’ē huru orara’a mo’a. Nāhea te Fatu i te fa’aineine ia tātou ’ia ora i roto i te mau huru o tā Zekaria i fa’ata’a mai ? Nāhea e ti’a ai ia tātou ’ia fāri’i i tōna mana nō te tauturu ia tātou ’ia riro rahi atu ā ’ei mea mo’a?

« ’Inaha, te haere maira tō Ari’i ia ’oe ra: e parau-ti’a tāna, ’e o te ora ho’i ’oia, ha’eha’a tōna, i te pārahira’a i ni’a i te ’asini »(Zekaria 9:9). Tomora’a hanahana, nā Harry Anderson

Zekaria 9:9–11; 11:12–13; 12:10; 13:6–7

O Iesu Mesia te Mesia i tohuhia.

• Nō te tauturu i te mau pīahi ’ia hi’o i te mau tū’atira’a i rotopū i te mau parau a Zekaria ’e te orara’a o te Fa’aora, mai tā te mau ta’ata i rave i te tau o Iesu, e nehenehe ’outou e vāhi i te piha ha’api’ira’a i roto e piti pupu. Hōro’a i te mau pīahi i roto i te pupu mātāmua hō’ē o teie mau ’īrava: Zekaria 9:9–11; 11:12–13; 12:10; 13:6–7. Hōro’a i te mau pīahi i roto i te tahi pupu hō’ē o teie mau ’īrava: Mataio 21:1–11; 26:14–16; 26:31; Ioane 19:37. E nehenehe te pīahi tāta’itahi e tāmata i te ’imi i te hō’ē ta’ata nō roto i te tahi pupu e vai ra te hō’ē ’īrava o te pāpa’ira’a mo’a e tū’ati i tā rātou. E aha tā tātou i ha’api’i mai nō ni’a i te Fa’aora nā roto mai i teie mau ’īrava?

• No te tauturu i te mau pīahi ’ia feruri i te Zekaria 9:9–11, e nehenehe ’outou e fa’a’ite i te hō’ē hōho’a nō te tomora’a hanahana o te Fa’aora i roto ia Ierusalema (hi’o i te arata’ira’a nō teie hepetoma i roto Mai, pee mai—nō te ta’ata hō’ē ’e te ’utuāfare). ’E ’aore rā e fa’a’ite i te video « Te tomora’a hanahana o te Fatu i roto ia Ierusalema » (ChurchofJesusChrist.org). E nehenehe te mau pīahi e ’āparau i te mana’o i tupu ’āhiri tei rotopū rātou i te mau ta’ata e fāri’i ra ia Iesu i roto i te ’oire. Nāhea tātou i te fāri’i iāna i roto i tō tātou orara’a, tō tātou mau ’utuāfare, ’e i tō tātou mau oire?

Te tahi atu mau rāve’a tauturu

« E ha’amana’o māite na i tō ’outou na mau haere’a ».

I muri a’e i te fa’ahitira’a i te Hagai 1:4–7, ’ua ha’api’i Elder TerenceM. Vinson ē:

E nehenehe tātou e fāri’i i te ’oa’oa vai maoro ’ia riro ana’e tō tātou Fa’aora ’e tāna ’evanelia ’ei ’aua hā’ati e patu ai tātou i tō tātou orara’a. Terā rā, e mea ’ōhie roa nō te reira ’āua hā’ati ’ia riro maori ’ei mau mea nō te ao nei, i reira te ’evanelia e riro ai ’ei ’oehā, ’aore rā, ’ei haerera’a noa i te purera’a e piti hora te maoro i te mau sābati. Mai te mea ē mai te reira te huru, e au ïa ē tē tu’u ra tātou i tā tātou faufa’a i roto i ‘te hō’ē pūtē ’āpo’opo’o’.

« Te parau nei Hagai ia tātou ’ia rave i te fafaura’a…

« ’Aore e tao’a, ’aore e fa’a’ana’anataera’a, ’aore e ti’ara’a, ’aore e ha’apararera’a tōtiare, ’aore e ha’uti ’āfata teata, ’aore e tū’aro, ’aore e tā’atira’a ’e te hō’ē ta’ata tu’iro’o, ’aore hō’ē mea i ni’a i te fenua nei i hau atu i te faufa’a o te ora mure ’ore. Nō reira te a’o a te Fatu i te mau ta’ata ato’a ‘ha’amana’o māite na i tō ’outou na mau haere’a’ » (« Te mau pipi mau a te Fa’aora », Liahona, Novema 2019, 9,11).

Ha’amaita’ira’a i tā tātou ha’api’ira’a

’A fa’aro’o. Te fa’aro’ora’a ’o te hō’ē ïa ’ohipa nō te here. Te hō’ē rāve’a nō te fa’aro’o maita’i-ra’a o te hi’ora’a ïa i te ta’ata o te paraparau mai ra. Nā reira ’outou e ’ite ai i te hō’ē ’āparaura’a parau-’ore. (Hi’o Ha’api’ira’a mai tā te Fa’aora, 32.)