« ’E te mau haere’a tahito nōna ra, ’ua ta’ata’ahihia ïa » (Habakuka 3:6). I vai na te Logo i te mātāmua ra, nā Eva Timothy

28 nō Novema–4 nō Tītema

Nahuma ; Habakuka ; Zephania

« ’E te mau haere’a tahito nōna ra, ’ua ta’ata’ahihia ïa »

E nehenehe tō ’outou hi’ora’a maita’i ’ei tuatāpapa ’evanelia e ha’amaita’i i tā ’outou mau pīahi. ’A fa’a’ite ia rātou e nāhea te Vārua maita’i e tauturu ai ia ’outou ’ia hāro’aro’a i te mau pāpa’ira’a mo’a, ’e ’a fa’a’ite i tō ’outou ti’aturira’a ē e nehenehe ato’a ’oia e tauturu ia rātou.

Pāpa’i i te mau mana’o e tae mai

Tītau i te mana’o

Nō tē hōro’a i te mau pīahi te hō’ē tumu nō tē fa’a’ite i te mau ’itera’a nō roto mai i tā rātou tuatāpapara’a pāpa’ira’a mo’a, e nehenehe ’outou e pāpa’i Nahuma, Habakuka, ’e Zephania ’ei upo’o parau i ni’a i te tāpura. I muri iho e nehenehe te mau pīahi e pāpa’i i raro a’e i te upo’o parau te hō’ē ta’o ’aore rā te hō’ē pereota ta’a ē ia rātou ’e i te pene ’e te ’īrava nō reira mai tē ’itera’ahia mai e rātou. ’A hōro’a ia rātou i te taime nō tē fa’ata’a mai nō te aha teie mau ta’o ’e te mau pereota i riro ai ’ei mea faufa’a rahi ’e te mea tā te Vārua maita’i i ha’api’i mai ia rātou.

Ha’api’i i te ha’api’ira’a tumu

Nahuma 1

E mana hope e te aroha tō Iehova.

• Tē fa’a’ite neiTe arata’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare ’ia ’imi i te Nahuma 1 nō te mau ’īrava o tē fa’ata’a i te mau huru o te Fatu. E nehenehe ’outou e ani i te mau pīahi i te mea tā rātou i ha’api’i mai nō ni’a i te Fatu nā roto i tā rātou iho tuatāpapara’a. ’Ei hi’ora’a, e aha tā tātou e ha’api’i mai nō ni’a iāna i roto i te mau ’īrava 1–9 ? E nehenehe ’outou e fa’a’ite ē ’ua tohu o Nahuma i te mau ha’avāra’a a te Fatu nō ni’a ia Nineve, te ’oire pū o Asiria, ’e ’ua ha’avī o Asiria i te ’ati ’Īserā’ela i te mau matahiti e rave rahi. Nō te aha e mea faufa’a rahi nō te ’ati ’Īserā’ela ’ia fa’aro’o i te parau poro’i a Nahuma nō ni’a i te Atua ? Nō te aha e mea faufa’a rahi te reira nō tātou i teie mahana ?

  

  « E maita’i tō Iehova, e ha’apūra’a ’eta’eta i te mahana ahoaho » (Nahuma 1:7).

Habakuka 1:1–4 ; 2:1–4 ;3

E nehenehe tātou e ti’aturi i te hina’aro o te Fatu ’e i tāna tārena.

• E mea maita’i paha nō te mau pīahi ’ia ’ite ē, mai ia tātou e rave rahi, ’ua pe’ape’a roa o Habakuka i te mea tāna i ’ite i roto i te ao ’ati a’e iāna. Penei a’e e nehenehe te mau pīahi e tai’o i te Habakuka 1:1–4 ’e ’ia ha’apoto i te mau māna’ona’ora’a a Habakuka. E nehenehe ato’a rātou e fa’aau i tāna mau uira’a e te tahi atu mau ta’ata i roto i te mau pāpa’ira’a mo’a, mai te feiā e ’itehia i roto i te Mareko 4:37–38 ’e Te Parau Ha’api’ira’a ’e te mau Parau Fafau 121:1–6. E aha te mau uira’a mai teie te huru tā te mau ta’ata e ui mai nei nō ni’a i te Atua i teie mahana ? E aha te a’o tā te Fatu i hōro’a i roto i te Habakuka 2:1–4 ’o tē tauturu ia ’outou ’ia ti’aturi i tōna hina’aro ’e i tāna tārena ? (hi’o ato’a Mareko 4:39–40 ; Te Parau Ha’api’ira’a ’e te mau Parau Fafau 121:7–8). E nehenehe te mau pīahi e ’ite mai i te tahi atu mau ha’amāramaramara’a tauturu i roto i « Te tahi atu ā mātēria ». E nehenehe ato’a rātou e fa’a’ite mai nāhea te Fa’aora i tē tauturura’a ia rātou ’ia « ora nā roto i tō [rātou] fa’aro’o » noa atu ē ’aita tā rātou mau uira’a i pāhonohia.

• Nō tē ha’amata i te hō’ē tāu’ara’a parau o te Habakuka 3, e nehenehe ’outou e ani i te mau pīahi ’ia tai’o fa’ahou i te pene ’e ’ia fa’a’ite mai i te mau fa’ahitira’a nō te ’āruera’a ’e te fa’aro’o tei ’itehia e rātou. Nō tē tauturu ia rātou ’ia fa’a’ohipa i teie mau parau nō rātou iho, e nehenehe ’outou e ani i te pīahi tāta’itahi ’ia titi’a i te hō’ē tāpura nō te mau ha’amaita’ira’a tā te Atua i hōro’a mai nōna. ’A ani ia rātou ’ia feruri e aha tē tupu mai te mea ē e ’ere rātou i te tahi o tō rātou mau ha’amaita’ira’a pae tino. ’A tai’o ’āmui i te Habakuka 3:17–19, ’e ’a ’āparau nō te aha e mea fifi ’ia « ’oa’oa vau ia Iehova » (’īrava 18) i roto i te mau fifi mai te mau ta’ata tei fa’a’itehia i roto i te ’īrava 17. Nāhea tātou ’ia fa’atupu i te fa’aro’o mai tō Habakuka ra ?

Zephania 3:14–20

E ’oa’oa Iehova e tōna mau ta’ata i Ziona.

• Nō tē tauturu i te mau pīahi ’ia ’imi i te ti’aturira’a nō ’a muri atu i roto i te Zephania 3:14–20, e nehenehe ’outou e pāpa’i i ni’a i te tāpura « ’ia rearea ’oe ’e ia’oa’oa ma tō ’ā’au ato’a » nō te mea… I muri iho e nehenehe i te mau pīahi e ’imi i teie mau ’īrava nō te mau ha’amaita’ira’a i fafauhia nō ’a muri atu o tē nehenehe e tauturu ia rātou ’ia ’oa’oa i teie mahana. Nāhea teie mau fafaura’a i te tauturu ia tātou i roto i te mau taime fifi ?

Te tahi atu mau rāve’a tauturu

Te aura’a o te fa’aro’o, o tē ti’aturira’a ïa i te pa’ari, te aroha ’e te tārena ’a te Atua.

’Ua nā ’o mai o Elder JeffreyR. Holland ē :

« E aha te maorora’a tātou e tīa’i ai ’ia tātara i te mau fifi e tae mai nei i ni’a ia tātou ? ’E nō ni’a i te fa’a’oroma’ira’a i tō tātou iho mau tamatara’a ’a tīa’i ’e ’a tīa’i noa ai tātou, e au rā ē tē taere ra te tauturu ? Nō te aha pa’i terā taere, e mea teimaha ho’i te hōpoi’a, hau atu i tā tātou e nehenehe e amo ?…

« …Tē vai ra te mau taime i roto i tō tātou orara’a, noa atu ’aita tā tātou tauto’ora’a pae vārua maita’i roa a’e ’e tā tātou mau pure tu’utu’u ’ore ’e te tāparu e hōro’a mai i te mau rē o tā tātou i hia’ai, nō ni’a anei i te mau mea rarahi o te ao nei ’e ’aore rā i tā tātou iho mau ’ohipa. Nō reira, ’a ’ohipa ’e ’a tīa’i ’āmui ai tātou i te mau pāhonora’a i te tahi o tā tātou mau pure, tē pūpū nei au i tā’u parau fafau ’āpōsetolo ē, tē fa’aro’ohia nei te reira ’e tē pāhonohia nei, noa atu pa’i e ’ere paha i te taime ’e i te huru tā tātou i hina’aro. Tera rā, i te mau taime ato’a e pāhonohia te reira i te taime ’e i te huru te hō’ē metua ’ite hope ’e te aumihi mure ’ore e pāhono ai i te reira.…

« …Te fa’aro’o o tē ti’aturira’a ïa i te Atua i roto i te mau taime maita’i ’e te ’ino, noa atu ē te vai ra te tahi māuiui e tae roa i te taime ’a ’ite ai tātou i tōna na rima i heheuhia mai nā roto i tō tātou i’oa » (« Ti’aturi i te Fatu », Liahona, Novema 2020, 115–16).

Ha’amaita’i i tā tātou ha’api’ira’a

’A ui i te mau uira’a matara. ’Ia ani ana’e ’outou i te mau pīahi nō ni’a i tō rātou mau ’itera’a rau i te mau pāpa’ira’a mo’a, « ’a fa’a’ite ia rātou ē ’aita ’outou e tītau ra i te hō’ē pāhonora’a ta’a ē, te ’ana’anatae nei rā ’outou i te mea ’o tā rātou e ha’api’i ra » (Ha’api’ira’a mai tā te Fa’aora, 29). Nō te tahi mau hi’ora’a nō te mau uira’a matara, ’a hi’o i te Ha’api’ira’a mai tā te Fa’aora, 31–32.