Ko Ha Sīpinga ki hono Akoʻí

ʻOku muimui ʻa e lēsoni kotoa pē ʻi he maʻuʻanga tokoni ko ʻení ʻi ha sīpinga ʻo hono fakaafeʻi ʻa e feʻinasiʻakí mo hono akoʻi ʻa e tokāteliné.

Fakaafeʻi e Feʻinasiʻakí

Fakaafeʻi e kau mēmipa ʻo e kalasí ke nau vahevahe ha ngaahi ʻilo mo ha ngaahi aʻusia ne nau maʻu ʻi he uike kimuʻá, ʻi heʻenau ako fakafoʻituitui mo fakafāmili e ngaahi folofolá pea mo fakahoko e meʻa ne nau akó, ko ha konga ʻo e kalasi kotoa pē. Tokoni ke ʻilo ʻe he kau mēmipa ʻo e kalasí ʻoku mahuʻinga ʻenau ako fakataautaha ʻi tuʻa mei he kalasí. ʻOku ʻikai ko e ako pē ʻi he Sāpaté te nau maʻu ai e ului fakafoʻituitui ki he Tamai Hēvaní mo Sīsū Kalaisí, ka ʻi heʻenau ngaahi aʻusia fakaʻahó foki. Ko e taimi ʻoku fefanongoʻaki ai e kau mēmipa ʻo e kalasí ki he ngaahi aʻusia mo e ngaahi fakamoʻoni kia Sīsū Kalaisi mo ʻEne ongoongoleleí, ʻoku ngalingali te nau feinga ki ha ngaahi aʻusia tatau ʻanautolu pē.

He ʻikai ke lau ʻe he taha kotoa ʻa e ngaahi vahé ki he lēsoni takitaha, pea naʻa mo kinautolu naʻa nau laú mahalo he ʻikai ke nau ongoʻi fiemālie ke vahevahe. Fakapapauʻi ʻoku ongoʻi ʻe he kau mēmipa kotoa ʻo e kalasí ko ha konga mahuʻinga kinautolu ʻo e kalasí, ʻo tatau ai pē pe ʻoku ʻi ai haʻanau meʻa ke vahevahe pe ʻikai.

Akoʻi ʻa e Tokāteliné

ʻOku totonu ke ke nofotaha mo e kau mēmipa hoʻo kalasí ʻia Sīsū Kalaisi mo ʻEne tokāteliné—ʻa e ngaahi moʻoni taʻengata ʻo e ongoongoleleí—ʻoku maʻu ʻi he ngaahi potufolofola naʻe vahe atú. ʻI hoʻomou aleaʻi e tokāteline mei he ngaahi folofolá, ko e hā ha ngaahi veesi, ngaahi foʻi lea, ngaahi aʻusia, ngaahi fehuʻi mo ha ngaahi maʻuʻanga tokoni lahi ange te ke ala vahevahe? Te ke fakaʻaongaʻi fēfē nai e ngaahi maʻuʻanga tokoni ko ʻení ke tokoniʻi e kau mēmipa ʻo e kalasí ke nau ʻilo mo mahino kiate kinautolu e ngaahi tefitoʻi moʻoni ʻo e ongoongoleleí? Te ke tokoni fēfē ke langaki ʻenau tui ki he Tamai Hēvaní mo Sīsū Kalaisí?