fāmili ʻoku nau lau e folofolá ʻi he tēpile

Ngaahi Fakakaukau ki hono Poupouʻi ʻo e Ako Fakatāutahá mo e Fakafāmilí

Ko ha ngaahi fakakaukau ʻeni ke tokoni atu ʻi hoʻo poupouʻi e kau mēmipa ʻo e kalasí ke nau ako e folofola ʻa e ʻOtuá ʻi ʻapi, fakafoʻituitui mo fakafāmili fakatouʻosi. Manatuʻi ʻoku ʻi ai ha niʻihi ʻi he kalasí ʻoku ʻikai ke nau lava ʻo ako e ngaahi folofolá mo honau ngaahi fāmilí (hangē ko ʻení, ʻoku nofo toko taha ha kau mēmipa ʻe niʻihi pe ʻi ha ngaahi fāmili ʻoku ʻikai ke nau kau kotoa ki he Siasí).

• Fakaafeʻi e kau mēmipa ʻo e kalasí ke nau vahevahe ha ngaahi aʻusia ne hoko ʻi heʻenau ako e ngaahi folofolá ʻi ʻapí. Hangē ko ʻení, te ke lava ʻo kole ange ke nau vahevahe ha veesi naʻe mahuʻinga kiate kinautolu pea mo fakamatalaʻi e ʻuhinga naʻe ʻuhingamālie ai ia kiate kinautolú.

• Kole ki he kau mēmipa ʻo e kalasí ke nau ʻomi ha ngaahi sīpinga ʻo e meʻa ʻoku nau fai ke ʻuhingamālie ange ai ʻa e ako folofola fakatāutahá pe fakafāmilí. (ʻE lava ke maʻu ha ngaahi fakakaukau ʻe niʻihi ʻi heNgaahi Fakakaukau ki Hono Fakaleleiʻi ʻo e Ako Folofola Fakatāutahá mo e Fakafāmilí” mo e “Ngaahi Fakakaukau ke Fakatupulaki Hoʻomou Ako Folofola Fakafāmilí” ‘i he Haʻu, ʻo Muimui ʻIate Aú—Maʻá e Fakafoʻituituí mo e Ngaahi Fāmilí.)

• Fakaafeʻi ʻa e kau mēmipa ʻo e kalasí ke nau vahevahe ʻa e meʻa ne nau fai ki he ngaahi ongo naʻa nau maʻu he lolotonga ʻenau ako fakatāutaha pe fakafāmili e folofolá.

• Fakaʻaongaʻi ha kiʻi taimi ke fakaʻaliʻali ai ki he kau mēmipa ʻo e kalasí ha niʻihi ʻo e ngaahi maʻuʻanga tokoni ʻoku ʻomi ʻe he Siasí ke tokoni ki he kāingalotú ke ako e ongoongoleleí. ʻOku kau ʻi he ngaahi maʻuʻanga tokoni ko ʻení ʻa e ngaahi tokoni ki he ako folofolá ʻa ia ʻoku maʻu ʻi he scriptures.ChurchofJesusChrist.org; “Ngaahi Talanoa Mei he Folofolá” ʻoku maʻu ʻi he children.ChurchofJesusChrist.org; ʻū fokotuʻutuʻu fakafaiako mo e ngaahi maʻuʻanga tokoni kehe ʻi he Haʻu, ʻo Muimui ʻIate Au—Maʻá e Palaimelí; fakamatala ʻoku fakatefito ʻi he toʻu tupú ʻi he youth.ChurchofJesusChrist.org; ʻū tohi lēsoni seminelí mo e ʻIinisititiutí; mo e ngaahi vitiō, ngaahi lea kuo hiki, mo e ʻū tā ʻoku maʻu ʻi he MediaLibrary.ChurchofJesusChrist.org. Ko ha konga lahi ʻo e ngaahi meʻá ni ʻoku toe maʻu pē ʻi he polokalama Gospel Library.

• Fakaʻaongaʻi ha ngaahi miniti siʻi ke fakamatalaʻi e founga hono ngāue ʻaki ʻo e polokalama Gospel Library ki hono ako e ngaahi folofolá; kau ai e founga ke fakaʻilongaʻi e ngaahi vēsí mo lekooti e ngaahi ongó.

• Fakaafeʻi ha mēmipa ʻo e kalasí ʻe toko taha pe tokolahi ange ke nau fakamatalaʻi ʻa e founga ne nau akoʻi ai ha tefitoʻi moʻoni pau ʻo e ongoongoleleí ʻi honau ngaahi fāmilí.