tokotaha ʻoku lea ʻi ha loki ako ʻa e siasí

Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Lautohi Faka–Sāpaté

Ko e Teuteu ke Faiako ʻi he Lautohi Faka-Sāpaté

ʻOku totonu ke hoko ʻa e ako fakafoʻituitui mo fakafāmili ʻi ʻapí ko e uho ia ʻo hono ako ʻo e ongoongoleleí. ʻOku hoko moʻoni ʻeni ʻiate koe mo e kakai ʻokú ke akoʻí. ʻI hoʻo teuteu ke faiakó, kamata ʻaki hano vahevahe hoʻo ngaahi aʻusia ʻi he folofolá. ʻE hoko hoʻo teuteu mahuʻinga tahá ʻi he taimi ʻokú ke fekumi ai ʻi he folofolá mo fekumi ki he ueʻi ʻa e Laumālie Māʻoniʻoní.

Ko eHaʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ko ha konga mahuʻinga ia ʻo hoʻo ako fakatāutahá pea mo hoʻo teuteu ke faiakó. ʻE tokoni atu ia ke ke maʻu ai ha mahino lahi ange ki he ngaahi tefitoʻi moʻoni fakatokāteline ʻi he ngaahi folofolá. Te ne toe ʻai foki ke ke lava ʻo ueʻi mo fakaafeʻi ʻa e kau mēmipa ʻo e kalasí ke nau fakaʻaongaʻi e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, ke fakaleleiʻi ʻenau ako folofola fakataautaha mo fakafāmilí (ki ha tokoni ki hono fai ʻení, vakai, “Ngaahi Fakakaukau ki hono Poupouʻi ʻo e Ako Fakatāutahá mo e Fakafāmilí” ʻi he maʻuʻanga tokoni ko ʻení). ʻI hoʻo fai ʻení, manatuʻi ke ke ongoʻingofua e ngaahi tūkunga ʻoku ʻi ai e kau mēmipa ʻo e kalasí ʻoku ʻikai faipoupoua ʻe honau ngaahi fāmilí ʻa e ako folofola fakafāmili maʻu peé mo e efiafi fakafāmili ʻi ʻapí.

Lolotonga hoʻo teuteú, te ke maʻu ha ngaahi fakakaukau mo ha ngaahi ongo fekauʻaki mo e kakai ʻokú ke akoʻí, founga ʻe tāpuekina ai kinautolu ʻe he ngaahi tefitoʻi moʻoni ʻi he folofolá, mo e founga te ke lava ai ke ueʻi kinautolu ke nau ʻilo e ngaahi tefitoʻi moʻoní ʻi heʻenau ako e folofolá ʻiate kinautolu peé.

Ngaahi Fakakaukau ki hono Akoʻí

ʻI hoʻo teuteu ke akoʻí, ʻe malava ke ke maʻu ha ueʻi fakalaumālie makehe ʻaki haʻo fekumi ʻi he ngaahi fokotuʻutuʻu ki hono akoʻí ʻi he maʻuʻanga tokoni ko ʻení. ʻOua ʻe fakakaukau ki he ngaahi fakakaukau ko ʻení ko ha ngaahi fakahinohino fakahokohoko, ka ko ha ngaahi fokotuʻu ke tokoni ke ke maʻu ha ueʻi fakalaumālie ʻiate koe pē. ʻOkú ke ʻiloʻi ʻa e kau mēmipa ʻo hoʻo kalasí, pea te ke maheni lelei ange mo kinautolu ʻi hoʻomou ako fakataha ʻi he kalasí. ʻOku ʻafioʻi foki kinautolu ʻe he ʻEikí, pea te Ne fakahā kiate koe ʻa e ngaahi founga lelei taha ke tokoniʻi ai e kau mēmipa ʻo e kalasí ke nau fakatupulaki ʻi he ako ʻo e ongoongoleleí ʻoku nau fakahoko ʻi ʻapí.

ʻOku lahi ha ngaahi maʻuʻanga tokoni lahi ange ʻoku ʻatā maʻau ke ke fakaʻaongaʻi ʻi hoʻo teuteú, kau ai e ngaahi fakakaukau ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pea mo e ʻū makasini ʻa e Siasí. Ke maʻu ha fakamatala lahi ange fekauʻaki mo e ngaahi meʻá ni pea mo ha ngaahi maʻuʻanga tokoni kehe, vakai ki he konga ʻoku ui ko e “Ngaahi Maʻuʻanga Tokoni Lahi Angé” ’i he maʻuʻanga tokoni ko ʻení.

Ko Ha Ngaahi Meʻa ke Manatuʻi

• ʻOku lelei taha ʻa hono ako ʻo e ongoongoleleí ʻi he taimi ʻoku fakatefito ai ia ʻi ʻapí. ʻOku kau ʻi ho fatongia mahuʻinga ko e faiakó ʻa hono poupouʻi, fakalotolahiʻi mo fakatupulaki ʻa hono ako ʻe he kau mēmipa ʻo e kalasí ʻa e ongoongoleleí ʻi ʻapí.

• ʻE fakaloloto e ului ʻa e kau mēmipa ʻo e kalasí kia Sīsū Kalaisi mo ʻEne ongoongoleleí ʻi he mahino kiate kinautolu ʻa e tokāteline moʻoní mo moʻui ʻaki iá. Poupouʻi ke nau hiki mo ngāueʻi e ngaahi ongo ʻoku nau maʻu mei he Laumālie Māʻoniʻoní.

• ʻOku mahulu atu ʻa e faiakó ʻi he fakamatala ʻataʻatā peé, ka ʻoku toe mahulu lahi hake ia ʻi he tataki pē ha fealēleaʻakí. Ko e konga ho fatongiá ko hono poupouʻi e kau maí, ʻa ia ʻokú ne fakalahi pea fakatefito ʻi he ngaahi folofolá. ʻOku totonu ke ke toe vahevahe foki e ngaahi ʻilo fakalaumālie naʻá ke maʻu ʻi hoʻo ako e ngaahi folofolá.

• Manatuʻi ʻoku tokolahi e kau mēmipa ʻo e kalasí ʻoku nau maʻu ha ngaahi aʻusia ʻoku ʻuhingamālié ʻi heʻenau ako ʻi ʻapi ʻa e ngaahi folofola tatau te mou aleaʻi ʻi he kalasí. Te ke lava ʻo poupouʻi ʻenau ako e folofolá ʻaki haʻo toutou ʻoange ha ngaahi faingamālie ke nau vahevahe ai e meʻa ʻoku nau ako ʻi ʻapí.

• ʻOku finangalo e Tamai Hēvaní ke ke lavameʻa ʻi hoʻo hoko ko ha faiakó. Kuó Ne ʻomi ha ngaahi maʻuʻanga tokoni lahi ke tokoniʻi koe, kau ai e ngaahi fakataha alēlea fakafaiakó. ʻI he ngaahi fakataha ko ʻení, ʻoku lava ke ke fealeaʻaki mo e kau faiako kehé fekauʻaki mo ha faʻahinga faingataʻa ʻokú ke fehangahangai mo ia. Te mou lava foki ke aleaʻi mo akoako fakahoko e ngaahi tefitoʻi moʻoni ʻo e faiako faka-Kalaisí.

• ʻOku ako lelei taha e kakaí ʻi he taimi ʻoku nau maʻu ai ha ngaahi faingamālie ke faiakó. ʻI ha taimi ʻe niʻihi, fakakaukau ke tuku ki he kau mēmipa ʻo e kalasí, kau ai ʻa e toʻu tupú, ke nau akoʻi ha konga ʻo e lēsoní. Fakatefito e tuʻutuʻuni ko ʻení ʻi he ngaahi fiemaʻu mo e ngaahi meʻa ʻoku malava ʻe he kau mēmipa ʻo e kalasí. Kapau te ke fakaafeʻi ha mēmipa ʻo e kalasí ke faiako, ʻai haʻo taimi ke ke tokoni ai kiate ia ke ne teuteu kei taimi ʻaki hano fakaʻaongaʻi ʻo e ngaahi fakakaukau ʻoku maʻu ʻi he maʻuʻanga tokoni ko ʻení pea mo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Manatuʻi ko koe ʻokú ke fatongia ʻaki ʻa e meʻa ʻoku akoʻi ʻi he kalasí ʻi hoʻo hoko ko e faiako kuo uiuiʻí.

ʻOku kau ʻi he maʻuʻanga tokoni ko ʻení ʻa e ngaahi fokotuʻutuʻu fakafaiako ki he uike kotoa pē ʻo e taʻú. ʻI he ngaahi Sāpate ʻoku ʻikai fai ai ha Lautohi Faka-Sāpaté, ʻe kei hokohoko atu pē ʻa e kau mēmipa ʻo e kalasí ke lau ʻa e Fuakava Motuʻá ʻi ʻapi ʻo fakatatau mo e taimi-tēpile kuo fokotuʻutuʻu atu ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. ʻI he taimi ʻoku fakahoko ai e Lautohi Faka-Sāpaté, te ke lava ʻo fili ke hiki fakalaka pe fakatahaʻi e ngaahi lēsoní.