Ako nabug-atan sa pag-amuma sa akong gihigugma. Sa unsa nga paagi ako makapadayon sa akong mga responsibilidad sa simbahan?

Woman praying with children

Ang inadlaw-adlaw nga mga kabug-aton sa paghatag og amuma makadala og pisikal ug emosyonal nga kakapoy, nga makaapekto sa kaayohan sa mga sakop sa pamilya. Kini importante nga ikaw mangita og mga paagi sa pag-amuma sa imong kaugalingon sa pisikal, emosyonal ug espiritwal nga paagi. Ang atong Manluluwas mahigugmaong nagdapit kanato:

“Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo.

“Isangon ang akong yugo ug sunda ninyo ako kay malumo ako ug mapaubsanon sa espiritu ug makapahulay kamo.

“Sayon ang yugo nga akong isangon kaninyo ug gaan ang ipapas-an ko kaninyo” (Mateo 11:28–30).

Kon ikaw mainampuon nga nagtinguha sa tabang sa Ginoo, imong makaplagan ang kalig-on sa pagbalanse sa mga panginahanglan sa kinabuhi. Ania ang pipila ka mga sugyot nga hunahunaon samtang ikaw nangita og mga paagi sa pag-amuma sa imong kaugalingon:

• Inadlaw nga pag-ampo ug pagtuon sa ebanghelyo. “Pagpakigtambag uban sa Ginoo sa tanan nimo nga buhaton, ug siya moagak kanimo alang sa kaayohan” (Alma 37:37). Himoa ang pagtuon sa kasulatan nga usa ka personal nga tinguha. Gamita ang Dali, Sunod Kanako––alang sa mga Indibidwal ug mga Pamilya nga manwal samtang ikaw magtuon sa mga kasulatan. Kini motabang kanimo ug sa imong pamilya sa “pagkat-on sa doktrina, paglig-on sa pagtuo, ug pag-ugmad og mas maayo nga personal nga pagsimba” (Russell M. Nelson, “Pasiuna nga Pakigpulong,” Liahona, Nob. 2018, 8).

• Pagbaton og Mahangturon nga Panglantaw. Kon imong eksaminon ang imong kinabuhi pinasikad sa mahangturong panglantaw, ikaw makabaton og kalig-on sa kasayuran nga ang mga hagit niini nga kinabuhi mga temporaryo. Ingon nga ang Ginoo misulti ni Propeta Joseph Smith kabahin sa iyang mga hagit, “ang imong kalisdanan ug ang imong kasakit sulod lamang sa mubo nga higayon” (Doktrina ug mga Pakigsaad 121:7).

• Pagpuyo sa ebanghelyo. Pinaagi sa pagpuyo sa ebanghelyo matag adlaw, ikaw makabaton sa Espiritu Santo sa paglig-on ug sa paghupay kanimo.

• Pangayo og tabang. Kini importante ang pagpakigbahin sa palas-anon nga usahay moabut gumikan sa pagkamagbalantay. Ang pagpangayo og tabang mahimong malisud, apan kini usa ka mahinungdanong bahin sa pag-amuma sa imong kaugalingon. Ayaw kahadlok sa pagpangayo og tabang ngadto sa imong tigpangalagad nga mga kaigsoonan ug sa lokal nga mga lider. Ikaw wala paabuta nga mobuhat sa tanan nga mag-inusara.