Դաս 1. Վերականգնման հռչակագիրը

Մեծ ուրացություն

Փրկչի Եկեղեցու վերականգնման անհրաժեշտությունը

Հիսուս Քրիստոսը հիմնեց Իր Եկեղեցին Իր մահկանացու ծառայության ընթացքում: Իր մահից և Հարությունից հետո Փրկիչը պատվիրեց Իր Առաքյալներին առաջնորդել Եկեղեցին Իր քահանայության իշխանությամբ և բանալիներով: Լայնածավալ հալածանքների և առաքյալների մահվան պատճառով մարդիկ մնացին առանց ապրող մարգարեների աստվածային ուղղորդման: Հիսուս Քրիստոսի ուսմունքներն ու վարդապետությունը փոփոխվեցին, ինչը հանգեցրեց մի ժամանակաշրջանի, որը կոչվում է Մեծ ուրացություն: Այս դասը կօգնի ուսանողներին հասկանալ Հիսուս Քրիստոսի ճշմարիտ Եկեղեցու վերականգնման անհրաժեշտությունը վերջին օրերում:

Հնարավոր ուսումնական վարժություններ

Կյանքը մինչև Վերականգնումը

Կարող եք առաջարկել ուսանողներին քննարկել ստորև ներկայացվող սցենարը դասընկերոջ կամ փոքր խմբի հետ: Կարող եք նաև առաջարկել ուսանողներին քննարկել ավելի մանրամասնող հարցեր, օրինակ՝ ինչպե՞ս կարող էին նրանք աշխատել և հանգստանալ, որտե՞ղ կարող էին ապրել, ինչպիսին կարող էր լինել նրանց տունը, ի՞նչ սննունդ կարող էին ուտել:

Դասի այս հատվածում կարող եք նաև օգտագործել «Պատկերացրեք կրոնական խառնաշփոթը Մեծ ուրացության ժամանակ» օժանդակ ուսումնական վարժությունը:

Պատկերացրեք, որ դուք ապրում եք 1800 թվականին, ոչ թե այսօր:

• Ինչո՞վ կտարբերվեր ձեր կյանքը:

  Բացատրեք, որ տարբերություններից մեկը կլիներ այն, որ մենք կապրեինք առանց Հիսուս Քրիստոսի ավետարանի երկրի վրա: Որպեսզի օգնեք ուսանողներին պատկերացնել, թե ինչպես դա կլիներ, կարող եք տալ հետևյալ հարցերը․

• Ինչպիսի՞ն կարող էին լինել ձեր հարաբերությունները Երկնային Հոր և Հիսուս Քրիստոսի հետ:

• Ի՞նչ հարցեր կամ մտահոգություններ կարող էիք ունենալ:

Մեծ ուրացություն

Որպեսզի օգնեք ուսանողներին հասկանալ որոշ իրադարձություններ, որոնք հանգեցրին Մեծ ուրացությանը, կարող եք առաջարկել նրանց կիսվել, թե ինչ գիտեն այդ իրադարձությունների մասին կամ կարող եք օգտագործել ստորև բերված ամփոփումը: Կարող եք նաև օգտագործել « Ի՞նչ է Վերականգնումը » տեսանյութի 0:32-2:08 հատվածը։ Այս տեսանյութը հասանելի է ChurchofJesusChrist.org կայքում։

Ուրացությունը տեղի է ունենում, երբ մարդիկ մերժում են ավետարանի ճշմարիտ վարդապետությունը և Տիրոջ լիազորված ծառաներին։ Ուրացության մի ժամանակաշրջան տեղի ունեցավ Նոր Կտակարանի շրջանից հետո՝ այն բանից հետո, երբ Փրկիչը հիմնեց Իր Եկեղեցին և պատվիրեց Իր Առաքյալներին առաջնորդել այն:

Փրկչի և Իր առաքյալների մահից հետո մարդիկ ապականեցին ավետարանի սկզբունքները և չարտոնված փոփոխություններ կատարեցին Եկեղեցու կազմակերպության և քահանայության արարողություններում։ Այս համատարած ուրացության պատճառով Տերը երկրից հեռացրեց քահանայության իշխանությունը» (Թեմաներ և հարցեր, «Ուրացություն», topics.ChurchofJesusChrist.org):

Կարդացեք ստորև բերված սուրբ գրությունները՝ փնտրելով այն վիճակի նկարագրությունը, որը տիրում էր երկրի վրա Մեծ ուրացության ժամանակ:

• Ամովս 8.11–12

• 2 Նեփի 26.20

• Վարդապետություն և Ուխտեր 1.15–16

• Վարդապետություն և Ուխտեր 112.23

Ուսանողները կարող են ուսումնասիրել այս հատվածները անհատապես կամ խմբով: Կարող եք նաև ուսանողների յուրաքանչյուր խմբին հանձնարարել ուսումնասիրել հատվածների մի խումբ, այնուհետև կիսվել դասարանի հետ իրենց գտածով։

Օգտագործեք հետևյալ հարցերը՝ քննարկելու համար, թե ուսանողներն ինչ սովորեցին այս հատվածներից: Այս քննարկման ընթացքում կարևոր է բացատրել, որ թեև Մեծ ուրացության ժամանակ Փրկչի Եկեղեցին և իշխանությունը գոյություն չունեին երկրի վրա, սակայն գոյություն ունեին այդ ժամանակաշրջանում ապրող շատ մարդիկ, որոնք սիրում էին Աստծուն և ձգտում էին հավատարմորեն հետևել Նրան՝ ըստ իրենց ունեցած հասկացողության:

• Ի՞նչ բառեր կամ արտահայտություններ գտաք, որոնք նկարագրում են աշխարհի վիճակը Մեծ ուրացության ժամանակ:

• Ինչպե՞ս կարող եք Հիսուս Քրիստոսի ճշմարիտ ավետարանի անհասանելիությունը համեմատել սովի հետ: Ի՞նչ են առաջարկում Հիսուս Քրիստոսը և Նրա ավետարանը, որը կյանք է տալիս աշխարհին և սնուցում է այն:

• Ձեր կարծիքով, ինչո՞ւ է կարևոր հասկանալ Մեծ ուրացությունը և դրա հետևանքները։

Նախորդ հարցին ուսանողները կարող են հետևյալ ճշմարտության նման մի պատասխան տալ. Հիսուս Քրիստոսի վարդապետությունը և իշխանությունը պետք է վերականգնվեին՝ Մեծ ուրացության հետևանքները հաղթահարելու համար: Կարող եք հետևյալ ճշմարտությունը գրել գրատախտակին:

Փրկչի ավետարանի Վերականգնումը

Աշխարհի պատմության ընթացքում Երկնային Հայրը բազում անգամ օգնել է ուրացության մեջ ընկած Իր զավակներին՝ կանչելով մարգարեներին հաստատելու ճշմարտությունը և հռչակելու ավետարանը: Մեր տնտեսության մեջ Նա նախաձեռնեց ավետարանի Վերականգնումը մարգարե Ջոզեֆ Սմիթի միջոցով (տես Ջոզեֆ Սմիթ—Պատմություն 1․15–20, Վարդապետություն և Ուխտեր 1․17)։

Հաջորդ դասը՝ «Հիսուս Քրիստոսի ավետարանի լրիվության վերականգնումը. Երկուհարյուրամյա հռչակագիր աշխարհին», ուսանողներին հնարավորություն կտա ավելի շատ բան սովորել վերջին օրերում Փրկչի ավետարանի վերականգնման մասին:

Որպեսզի օգնեք ուսանողներին հասկանալ, թե ինչպես է Աստված ուրացության ժամանակաշրջաններից հետո օրհնում Իր զավակներին ավետարանով, կարող եք ցուցադրել « Dispensations: The Pattern of Apostasy and Restoration » տեսանյութը (6:52), որը հասանելի է ChurchofJesusChrist.org կայքում։ Առաջարկեք ուսանողներին մտածել այն մասին, թե տեսանյութը դիտելիս ինչ սովորեցին կամ զգացին Երկնային Հոր և Հիսուս Քրիստոսի մասին։

• Ի՞նչ եք սովորում Երկնային Հոր և Հիսուս Քրիստոսի մասին՝ տեսնելով Նրանց պատրաստակամությունը՝ ուրացության ժամանակաշրջաններում վերականգնելու ավետարանը երկրի վրա։

• Ի՞նչ է տալիս Հիսուս Քրիստոսի վերականգնված ավետարանը, որն օգնում է ձեզ աճել հոգևորապես:

Բացատրեք Մեծ ուրացությունը և Վերականգնման անհրաժեշտությունը

Որպեսզի օգնեք ուսանողներին ցույց տալ սովորածի վերաբերյալ իրենց հասկացողությունը, կարող եք կիսվել հետևյալ սցենարով և ուսանողներին հնարավորություն տալ արձագանքելու դրան:

Պատկերացրեք, որ ունեք ընկեր, որը Եկեղեցու անդամ չէ, բայց հետաքրքրված է ձեր համոզմունքներով: Որոշակի քննարկումներից հետո ձեր ընկերն ասում է. «Երբևէ մտածե՞լ ես, թե ինչու այդքան շատ քրիստոնեական եկեղեցիներ կան երկրի վրա: Չեմ հասկանում, թե մարդիկ ինչպես են որոշում, թե որ եկեղեցուն պատկանեն, երբ դրանք այդքան շատ են»։

Ձեր օրագրում կազմեք մի համառոտ ծրագիր, որը կներառի սուրբ գրություններ և գաղափարներ, որոնցով կարող եք կիսվել ձեր ընկերոջ հետ և որոնք կարող են օգնել նրան: Համոզվեք, որ ներառել եք այն, ինչ այսօր սովորեցիք Մեծ ուրացության և Վերականգնման անհրաժեշտության մասին: Փորձեք ձեր խոսքերով արտահայտել, թե ինչու էր Փրկչի վարդապետության, իշխանության և Եկեղեցու վերականգնումն անհրաժեշտ Մեծ ուրացության հետևանքները հաղթահարելու համար:

Կարող եք կիսվել ձեր վկայությամբ այս դասի ընթացքում ձեր քննարկած ճշմարտությունների մասին: Առաջարկեք ուսանողներին աղոթել՝ իրենց սովորածով և Վերականգնման կարևորությամբ մեկ ուրիշի հետ կիսվելու հնարավորության համար:

Օժանդակ նյութեր

Ի՞նչը կորսվեց Մեծ ուրացության ժամանակ:

Տասներկու Առաքյալների Քվորումից երեց Ռոբերտ Դ. Հեյլսը ուսուցանել է.

Փրկչի Հարությունից հետո Նա Իր Առաքյալներին պատվիրեց առաջնորդել Եկեղեցին և սպասավորել ավետարանի արարողությունները: Հավատարմորեն կատարելով այս հանձնարարությունը՝ նրանք հալածվեցին, իսկ ոմանք ի վերջո նահատակվեցին: Արդյունքում, Տիրոջ քահանայության իշխանությունն այլևս գոյություն չուներ երկրի վրա, և աշխարհն ընկավ հոգևոր խավարի մեջ: Հաջորդ դարերի ընթացքում Աստծո զավակներն ունեին Քրիստոսի Լույսը, կարող էին աղոթել և զգալ Սուրբ Հոգու ազդեցությունը: Բայց ավետարանի լրիվությունը կորսվել էր: Երկրի վրա ոչ ոք չմնաց՝ օժտված զորությամբ և իշխանությամբ, որպեսզի առաջնորդի Եկեղեցին կամ կատարի սրբազան արարողությունները, օրինակ՝ մկրտությունը, Սուրբ Հոգու պարգևի շնորհումը և տաճարի փրկարար արարողությունները: (Ռոբերտ Դ. Հեյլս, «Նախապատրաստություններ Վերականգնման և Երկրորդ Գալուստի համար. «Իմ ձեռքը պիտի լինի քո վրա»» Լիահոնա, նոյեմբեր 2005, 89)

Ինչպե՞ս էր Տերը նախապատրաստում աշխարհը Վերականգնման համար Մեծ ուրացության ընթացքում:

Տասներկու Առաքյալների Քվորումից նախագահ Մ. Ռասսել Բալլարդն ուսուցանել է, թե ինչպես էր Տերը նախապատրաստում աշխարհն ավետարանի Վերականգնման համար։

Երբ մենք մտածում ենք, թե ինչպես էր Տերը նախապատրաստում աշխարհը Վերականգնման համար, պետք է միշտ հիշենք, որ Նրա գործերի մեծ մասը իրականացվել է մարդկանց կյանքով՝ սովորական տղամարդկանց և կանանց, որոնք որոշ դեպքերում կատարել են արտառոց գործեր: (Մ․ Ռասսել Բալլարդ, «Ինչպես էր Տերը նախապատրաստում աշխարհը Վերականգնման համար», Ensign, հունվար 2020, 19)

Այս նախապատրաստության մասին ավելին իմանալու համար կարող եք կարդալ նախագահ Բալլարդի հոդվածն ամբողջությամբ։

Արդյո՞ք Ջոզեֆ Սմիթի ժամանակներում մարդիկ գիտեին, որ վերականգնման անհրաժեշտություն կա:

« Ճշմարտության որոնումը » (15:43) տեսանյութում պատմվում է, թե ինչպես է Վիլֆորդ Վուդրուֆը որոնում Փրկիչի Եկեղեցին։

Օժանդակ ուսումնական վարժություններ

Կարևոր բաղադրիչները

Որպեսզի օգնեք ուսանողներին հասկանալ Փրկչի Եկեղեցու կարևոր բաղադրիչները և այն, թե ինչ կորսվեց Մեծ ուրացության ժամանակ, կարող եք դասարան բերել որևէ մեխանիկական մաս, որն անհրաժեշտ է մեքենայի կամ սարքավորման աշխատանքի համար (օրինակ՝ կենցաղային սարքի կամ համակարգչի հոսանքի լարը, հեծանիվի շղթան կամ անիվը, ավտոմեքենայի կայծային մոմերը): Ուսանողներին ցույց տվեք այդ մասը և հարցրեք, թե ինչ է դա և ինչի համար է նախատեսված։ (Եթե ձեռքի տակ չունեք այդպիսի մեխանիկական մաս, նկարեք այն գրատախտակին։) Կարող եք տալ նմանատիպ հարցեր.

• Ի՞նչ է տեղի ունենում, երբ այդ մասը բացակայում է սարքավորման վրայից, որին այն պատկանում է։

• Որո՞նք են Հիսուս Քրիստոսի Վերջին Օրերի Սրբերի Եկեղեցու կարևոր բաղադրիչները: Ի՞նչ կլիներ Եկեղեցու հետ, եթե այդ բաղադրիչները չլինեին:

Գրատախտակին գրեք Հիսուս Քրիստոսի Եկեղեցու կարևոր բաղադրիչները վերնագիրը։ Օգնեք ուսանողներին սուրբ գրություններից բացահայտել կարևոր տարրեր, օրինակ՝

• Առաքյալներն ու մարգարեները ստեղծեցին Հիսուս Քրիստոսի Եկեղեցու հիմքը (տես Եփեսացիս 2․19–22)։

• Քահանայության իշխանությունը տրվում է Հիսուս Քրիստոսի կողմից (տես Մարկոս 3․13–14)։

• Հիսուս Քրիստոսի Եկեղեցում մենք կարող ենք ստանալ արարողություններ, որոնք անհրաժեշտ են մեր փրկության համար (տես Հովհաննես 3․5, Գործք 2․37–39)։

• Հիսուս Քրիստոսը ղեկավարում և առաջնորդում է Իր Եկեղեցին՝ Իր մարգարեներին և առաքյալներին հայտնություն տալու միջոցով (տես Մատթեոս 16․15–19, Եփեսացիս 4․11–13)։

Պատկերացրեք կրոնական խառնաշփոթը Մեծ ուրացության ժամանակ

Երբ ուսանողները սկսեն խորհել, թե ինչպիսին է եղել կյանքը Մեծ ուրացության ժամանակ, նրանց համար օգտակար կլինի լսել հետևյալ պատմությունը.

Նախապատրաստվելով 2020 թվականի ապրիլի Եկեղեցու գերագույն համաժողովին՝ Տասներկու Առաքյալների Քվորումից երեց Ջեֆրի Ռ. Հոլանդը և նրա կինը՝ քույր Պատրիսիա Հոլլանդը պատկերացրին, որ ապրում են 1800-ականների սկզբին: Նրանք մտածեցին այն խառնաշփոթի մասին, որը կարող էին զգալ, և այն բաների մասին, որոնց համար կարող էին հույս ունենալ հոգևորապես (տես Ջեֆրի Ռ. Հոլլանդ, «Հույսի կատարյալ պայծառություն», Լիահոնա, մայիս 2020, 81–84)։

Հնարավորության դեպքում կարող եք դիտել «Հույսի կատարյալ պայծառություն» տեսանյութը, 0:00-7:16։

Հոգևոր սնուցում Հիսուս Քրիստոսից և Նրա ավետարանից

Նախքան Ուրացության մասին հատվածներ ուսումնասիրելը, կարող եք ցույց տալ մեռած և կենդանի բույսի պատկերներ: Կարող եք նաև դասարան բերել այդ առարկաները, եթե դրանք առկա են ձեռքի տակ: Առաջարկեք ուսանողներին քննարկել, թե ինչն է հանգեցրել նրան, որ բույսերն այսքան տարբեր տեսք ունեն, և ինչ հոգևոր համանմանություններ կարող ենք պատկերացնել այս բույսերի հետ կապված: Քննարկեք նաև, թե ինչպես է Հիսուս Քրիստոսի հետ կապված լինելը օգնում մեզ հոգևորապես սնվել և առողջ մնալ: Ուսանողները կարող են կարդալ Հովհաննես 15․4–6 հատվածները և մտածել, թե Փրկչի ուսմունքներն ինչպես են առնչվում վաղ Սրբերին՝ Մեծ ուրացության ժամանակ: