Lēsoni 1: Fanongonongo ki Hono Fakafoki Mai ʻo e Ongoongoleleí

Ko e Hē Fakaʻaufuli Mei he Moʻoní

Ko e Fiemaʻu ke Fakafoki Mai ʻa e Siasi ʻo e Fakamoʻuí

Naʻe fokotuʻu ʻe Sīsū Kalaisi Hono Siasí lolotonga ʻEne ngāue fakafaifekau ʻi he māmaní. Hili ʻEne pekiá mo e Toetuʻú, naʻe fekauʻi ʻe he Fakamoʻuí ʻEne kau ʻAposetoló ke tataki ʻa e Siasí ʻaki Hono mafai mo e ngaahi kī ʻo e lakanga fakataulaʻeikí. Koeʻuhí ko e tōtuʻa ʻa e fakatangá mo e pekia ʻa e kau ʻAposetoló, naʻe ʻikai toe maʻu ʻe he kakaí ha fakahinohino fakalangi mei he kau palōfita moʻuí. Naʻe liliu ʻa e ngaahi akonaki mo e tokāteline ʻa Sīsū Kalaisí, ʻo iku ai ki ha vahaʻataimi naʻe ui ko e Hē Fakaʻaufuli mei he Moʻoní. ʻE lava ke tokoni e lēsoni ko ʻení ke mahino ki he kau akó ʻa e fiemaʻu ke fakafoki mai ʻa e Siasi moʻoni ʻo Sīsū Kalaisí ʻi he ngaahi ʻaho kimui ní.

Ngaahi ʻEkitivitī Ako ʻOku Ala Fakahokó

Ko e moʻui kimuʻa pea Fakafoki Mai ʻa e Ongoongoleleí

Fakakaukau ke fakaafeʻi ʻa e kau akó ke nau aleaʻi ʻa e fehuʻi ko ʻení mo ha hoa pe ʻi ha kulupu tokosiʻi. Te ke lava foki ʻo kole ki he kau akó ke nau aleaʻi ha ngaahi fehuʻi fakaikiiki ange, hangē ko e meʻa naʻa nau mei fakahoko ko ha ngāue pe fakafiefiaʻanga, feituʻu ne nau mei nofo aí, naʻe mei fēfē honau falé, mo e faʻahinga meʻakai ne nau mei kai aí.

Te ke lava foki ʻo fakaʻaongaʻi ʻa e ʻekitivitī fakalahi ki he akó “Fakakaukauloto ki he puputuʻu fakalotu lolotonga ʻa e Hē Fakaʻaufuli mei he Moʻoní” ʻi he konga ko ʻeni ʻo e lēsoní.

Fakakaukauloto naʻá ke moʻui ʻi he taʻu 1800 kae ʻikai ko e ʻahó ni.

• Naʻe mei kehe fēfē nai hoʻo moʻuí?

  Fakamatalaʻi ange ko e faikehekehe ʻe tahako e moʻui ʻo ʻikai maʻu e ongoongolelei ʻo Sīsū Kalaisí ʻi he māmaní. Ke tokoniʻi e kau akó ke fakakaukau pe naʻe mei fēfē ʻení, fakakaukau ke ʻeke ange ha ongo fehuʻi hangē ko ʻení:

• Naʻe mei fēfē nai hoʻo vā fetuʻutaki mo e Tamai Hēvaní mo Sīsū Kalaisí?

• Ko e hā ha ngaahi fehuʻi pe hohaʻa naʻá ke mei maʻu?

Ko e Hē Fakaʻaufuli Mei he Moʻoní

Ke tokoni ke mahino ki he kau akó ha niʻihi ʻo e ngaahi meʻa ne hoko naʻe iku ki he Hē Fakaʻaufuli mei he Moʻoní, te ke lava ʻo fakaafeʻi kinautolu ke vahevahe ʻa e meʻa ʻoku nau ʻilo fekauʻaki mo e ngaahi meʻa ko ʻeni naʻe hokó pe fakaʻaongaʻi ha niʻihi ʻo e ngaahi fakamatala fakanounou ko ʻení. ChurchofJesusChrist.org

ʻOku hoko ʻa e hē mei he moʻoní ʻi he taimi ʻoku tafoki ai ʻa e kakaí mei he tokāteline moʻoni ʻo e ongoongoleleí pea fakafisingaʻi ʻa e kau tamaioʻeiki ʻa e ʻEikí kuo fakamafaiʻí. Naʻe hoko ha vahaʻataimi ʻe taha ʻo e hē mei he moʻoní hili e vahaʻataimi ʻo e Fuakava Foʻoú, hili hono fokotuʻu ʻe he Fakamoʻuí Hono Siasí pea fekauʻi ʻEne Kau ʻAposetoló ke tataki iá.

“Hili e pekia ʻa e Fakamoʻuí pea mo ʻEne kau ʻAposetoló, naʻe hanga ʻe he tangatá ʻo fakakeheʻi ʻa e ngaahi tefitoʻi moʻoni ʻo e ongoongoleleí pea nau fai ha ngaahi liliu taʻe fakamafaiʻi ki he ngaahi fokotuʻutuʻu ʻo e Siasí pea mo e ngaahi ouau ʻo e lakanga fakataulaʻeikí. Koeʻuhí ko e mafola lahi ko ʻeni ʻa e hē mei he moʻoní, naʻe ʻave ai ʻe he ʻEikí ʻa e mafai ʻo e lakanga fakataulaʻeikí mei he māmaní” (Ngaahi Tefitó mo e Ngaahi Fehuʻí, “Hē mei he Moʻoní,” topics.ChurchofJesusChrist.org).

Lau e ngaahi potufolofola ko ʻení, ʻo kumi e ngaahi tuʻunga naʻe ʻi ai ʻa e māmaní lolotonga ʻa e Hē Fakaʻaufuli mei he Moʻoní.

• ʻĀmosi 8:11–12

• 2 Nīfai 26:20

• Tokāteline mo e Ngaahi Fuakava 1:15–16

• Tokāteline mo e Ngaahi Fuakava 112:23

ʻE lava ke ako fakafoʻituitui pe fakakulupu ʻe he kau akó ʻa e ngaahi veesi ko ʻení. Te ke lava foki ʻo vahe ki he kulupu takitaha ke nau ako ha seti veesi ʻe taha pea vahevahe mo e kalasí ʻa e meʻa ne nau maʻú.

Fakaʻaongaʻi ha ngaahi fehuʻi hangē ko ʻení ke aleaʻi ʻa e meʻa naʻe ako ʻe he kau akó mei he ngaahi veesi ko ʻení. Mahalo ʻe mahuʻinga ke fakamatalaʻi ko ha konga ʻo e fealēleaʻaki ko ʻení, neongo naʻe ʻikai ke ʻi he māmaní ʻa e Siasi mo e mafai ʻo e Fakamoʻuí lolotonga ʻa e Hē Fakaʻaufuli mei he Moʻoní, ka naʻe tokolahi ha niʻihi fakafoʻituitui naʻe moʻui lolotonga ʻa e taimi ko iá, naʻa nau ʻofa ki he ʻOtuá mo feinga ke muimui faivelenga kiate Ia ʻo fakatatau mo e mahino naʻa nau maʻú.

• Ko e hā ha ngaahi foʻi lea pe kupuʻi lea naʻá ke maʻu ʻokú ne fakamatalaʻi ʻa e tuʻunga ʻo e māmaní lolotonga ʻa e Hē Fakaʻaufuli mei he Moʻoní?

• ʻE fakafehoanaki fēfē ʻa e ʻikai ke lava ʻo maʻu ʻa e ongoongolelei moʻoni ʻa Sīsū Kalaisí ki ha honge? Ko e hā ʻoku ʻomi ʻe Sīsū Kalaisi mo ʻEne ongoongoleleí ʻokú ne ʻomi ʻa e moʻui mo ha ivi ki he māmaní?

• ʻOkú ke pehē ko e hā ʻoku mahuʻinga ai ke maʻu ha mahino kau ki he Hē Fakaʻaufuli Mei he Moʻoní mo hono ngaahi nunuʻá?

ʻI he tali ki he fehuʻi kimuʻá, mahalo ʻe lea ʻaki ʻe he kau akó ha meʻa tatau mo e moʻoni ko ʻení: Naʻe pau ke fakafoki mai ʻa e tokāteline mo e mafai ʻo Sīsū Kalaisí ke ikunaʻi ʻaki ʻa e ngaahi nunuʻa ʻo e Hē Fakaʻaufuli mei he Moʻoní. Fakakaukau ke hiki ʻa e moʻoni ko ení ʻi he palakipoé.

Ko e Fakafoki Mai ʻo e ongoongolelei ʻa e Fakamoʻuí

ʻOku lahi ha ngaahi taimi ʻi he hisitōlia ʻo e māmaní, kuo tokoniʻi ai ʻe he Tamai Hēvaní ʻa ʻEne fānau kuo hē mei he moʻoní ʻaki hono ui ha kau palōfita ke nau fokotuʻu ʻa e moʻoní mo talaki ʻa e ongoongoleleí. ʻI hotau kuongá ni, naʻá Ne kamata ʻa e Fakafoki Mai ʻo e ongoongoleleí ʻo fakafou ʻi he Palōfita ko Siosefa Sāmitá (vakai, Siosefa Sāmita—Hisitōlia 1:15–20; Tokāteline mo e Ngaahi Fuakava 1:17).

ʻE maʻu ʻe he kau akó ʻi he lēsoni hoko ʻo e, “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko Ha Fanongonongo ki Māmani ʻo e Taʻu Uangeaú,” ha faingamālie ke nau ako lahi ange ai fekauʻaki mo e Fakafoki Mai ʻo e ongoongolelei ʻa e Fakamoʻuí ʻi he ngaahi ʻaho kimui ní.

ChurchofJesusChrist.org&$160 &$160

• Ko e hā ʻokú ke ako fekauʻaki mo e Tamai Hēvaní mo Sīsū Kalaisi ʻi Heʻena finangalo lelei ke fakafoki mai e ongoongoleleí ki he māmaní lolotonga e ngaahi vahaʻataimi ʻo e hē mei he moʻoní?

• Ko e hā ʻoku ʻomi ʻe he ongoongolelei ʻo Sīsū Kalaisi kuo fakafoki maí ʻoku tokoni ke ke tupulaki fakalaumālie aí?

Fakamatalaʻi ʻa e Hē Fakaʻaufuli Mei he Moʻoní pea mo e fiemaʻu ke Fakafoki Mai ʻa e Ongoongoleleí

Ke tokoni ke fakahaaʻi ʻe he kau akó ʻenau mahino ki he meʻa kuo nau akó, fakakaukau ke vahevahe ʻa e tūkunga ko ʻení pea ʻoange ki he kau akó ha faingamālie ke fakahoko haʻanau tali ki ai.

Fakakaukauloto ʻoku ʻi ai haʻo kaungāmeʻa ʻoku ʻikai ko ha mēmipa ʻo e Siasí ka ʻokú ne fie ʻilo ki hoʻo tuí. Hili haʻamo talanoa, ʻoku pehē ʻe hoʻo kaungāmeʻá, “Kuó ke fifili nai pe ko e hā hono ʻuhinga ʻoku fuʻu lahi ai e ngaahi siasi faka-Kalisitiane ʻi he māmaní? ʻOku ʻikai mahino kiate au ʻa e founga ʻoku lava ai ʻa e kakaí ʻo fili pe ko e siasi fē te nau kau ki aí ʻi he fuʻu lahi ʻa e ngaahi siasí.”

Faʻu ha kiʻi fokotuʻutuʻu nounou ʻi hoʻo tohinoa akó ʻoku ʻi ai ha ngaahi potufolofola mo ha ngaahi fakakaukau te ke lava ʻo vahevahe, ʻa ia ʻe ala tokoni ki ho kaungāmeʻá. Fakapapauʻi ke fakakau ʻa e meʻa kuó ke ako he ʻahó ni fekauʻaki mo e Hē Fakaʻaufuli mei he Moʻoní pea mo e fiemaʻu ke Fakafoki Mai ʻa e Ongoongoleleí. Feinga ke fakaʻaongaʻi ha ngaahi lea pē ʻaʻau ke fakahaaʻi ʻa e ʻuhinga naʻe fiemaʻu ai ke fakafoki mai ʻa e tokāteline, mafai, mo e Siasi ʻo e Fakamoʻuí ke ikunaʻi ʻaki ʻa e ngaahi nunuʻa ʻo e Hē Fakaʻaufuli mei he Moʻoní.

Fakakaukau ke vahevahe hoʻo fakamoʻoni ki he ngaahi moʻoni kuo mou aleaʻi ʻi he lēsoni ko ʻení. Te ke lava ʻo fakaafeʻi e kau akó ke nau lotua ha faingamālie ke vahevahe ai mo ha taha kehe ʻa e meʻa naʻa nau ako he ʻaho ní pea mo e mahuʻinga ʻo hono Fakafoki Mai ʻo e Ongoongoleleí.

Ngaahi Maʻuʻanga Tokoni Lahi Ange

Ko e hā naʻe mole lolotonga ʻa e Hē Fakaʻaufuli mei he Moʻoní?

Naʻe akoʻi ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Hili e Toetuʻu ʻa e Fakamoʻuí, naʻá Ne fekauʻi ʻEne kau ʻAposetoló ke tataki ʻa e Siasí mo fakahoko e ngaahi ouau ʻo e ongoongoleleí. ʻI he faivelenga ʻa e kau ʻaposetoló ki he fekau ko ʻení, naʻe fakatangaʻi kinautolu pea naʻe iku ʻo fakapoongi ha niʻihi. Ko hono olá, naʻe ʻikai ke toe ʻi māmani ʻa e mafai ʻo e lakanga fakataulaʻeiki ʻo e ʻEikí, pea naʻe tō ʻa e māmaní ki ha fakapoʻuli fakalaumālie. ʻI he ngaahi senituli ne hoko atu aí, naʻe maʻu ʻe he fānau ʻa e ʻOtuá ʻa e Maama ʻo Kalaisí, lava ke lotu, pea lava ke nau ongoʻi ʻa e ivi tākiekina ʻo e Laumālie Māʻoniʻoní. Ka kuo mole ʻa e kakato ʻo e ongoongoleleí. Naʻe ʻikai ha taha ʻe toe ʻi māmani mo e mālohi mo e mafai ke tataki ʻa e Siasí pe fakahoko ʻa e ngaahi ouau toputapu hangē ko e papitaisó, foaki ʻo e meʻafoaki ʻo e Laumālie Māʻoniʻoní, pea mo e ngaahi ouau fakamoʻui ʻo e temipalé. (Robert D. Hales, “Preparations for the Restoration and the Second Coming: ‘My Hand Shall Be over Thee,’” Liahona, Nov. 2005, 89)

Naʻe teuteu fēfē ʻa e ʻEikí ki hono Fakafoki Mai ʻo e Ongoongoleleí lolotonga ʻa e Hē Fakaʻaufuli mei he Moʻoní?

Naʻe akoʻi ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga naʻe teuteu ai ʻa e ʻEikí ki he Fakafoki Mai ʻo e ongoongoleleí:

ʻI heʻetau fakakaukau ki he founga naʻe teuteuʻi ai ʻe he ʻEikí ʻa e māmaní ki hono Fakafoki Mai ʻo e Ongoongoleleí, ʻoku totonu ke tau manatuʻi maʻu pē ko e konga lahi ʻo e meʻa naʻá Ne ikunaʻí naʻe fakafou ia ʻi he moʻui ʻa e kakaí—ko ha kakai tangata mo fefine angamaheni ne nau ikunaʻi ha ngaahi meʻa kāfakafa. (M. Russell Ballard, “Ko e Founga Naʻe Teuteuʻi ai ʻe he ʻEikí ʻa e Māmaní ki hono Toe Fakafoki Mai ʻo e Ongoongoleleí,” Liahona, Sānuali 2020, 19)

Ke ʻilo lahi ange fekauʻaki mo e teuteu ko ʻení, fakakaukau ke lau kotoa e lea ʻa Palesiteni Pālatí.

Naʻe ʻilo nai ʻe he kakai ʻi he taimi ʻo Siosefa Sāmitá naʻe ʻi ai ha fiemaʻu ke fakafoki mai ʻa e ongoongoleleí?

ʻOku fakamatala ʻe he vitiō “Ko ha Fekumi ki he Moʻoní” (15:43) ʻa e talanoa ʻo e fekumi ʻa Uilifooti Utalafi ki he Siasi ʻo e Fakamoʻuí.

Ngaahi ʻEkitivitī Fakalahi ki he Akó

Ngaahi konga mahuʻingá

Ke tokoni ke mahino ki he kau akó ʻa e ngaahi konga mahuʻinga ʻo e Siasi ʻo e Fakamoʻuí pea mo e meʻa naʻe mole lolotonga ʻa e Hē Fakaʻaufuli mei he Moʻoní, fakakaukau ke ʻomi ki he kalasí ha konga fakamīsini ʻoku fiemaʻu ki ha mīsini pe meʻangāue ke toki ngāué (hangē ko ha uaea ʻuhila mei ha meʻangāue pe komipiuta, ko ha seini pe foʻi vaʻe mei ha pasikala, pe ko ha foʻi sipaaki mei ha kā). Fakaʻaliʻali ʻa e konga ʻo e meʻangāué ki he kau akó pea ʻeke ange pe ko e konga ʻeni ʻo e hā pea ko e hā ʻene ngāue ʻoku faí. (Kapau ʻoku ʻikai ke ke maʻu ha konga fakamīsini, tā ia ʻi he palakipoé.) ʻE lava ke ke ʻeke ange ha ngaahi fehuʻi hangē ko ʻení:

• Ko e hā ʻoku hoko ʻi he mole ʻa e konga ko ʻení mei he meʻangāue ʻoku fakaʻaongaʻi aí?

• Ko e hā ha ngaahi konga mahuʻinga ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní? Ko e hā ʻe hoko ki he Siasí ka ne taʻeʻoua ʻa e ngaahi konga ko ʻení?

Tohiʻi ʻi he palakipoé ʻa e ʻuluʻi tohi Ngaahi Konga Mahuʻinga ʻo e Siasi ʻo Sīsū Kalaisí. Tokoni ki he kau akó ke nau ʻiloʻi ʻa e ngaahi konga mahuʻinga mei he folofolá, hangē ko ʻení:

• ʻOku faʻu ʻe he kau ʻaposetoló mo e kau palōfitá ʻa e fakavaʻe ʻo e Siasi ʻo Sīsū Kalaisí (vakai, ʻEfesō 2:19–22).

• ʻOku foaki ʻe Sīsū Kalaisi ʻa e mafai ʻo e lakanga fakataulaʻeikí (vakai, Maʻake 3:13–14).

• Te tau lava ʻo maʻu ʻi he Siasi ʻo Sīsū Kalaisí, ʻa e ngaahi ouau ʻoku fiemaʻu ki hotau fakamoʻuí (vakai, Sione 3:5; Ngāue 2:37–39).

• ʻOku tataki mo fakahinohino ʻe Sīsū Kalaisi Hono Siasí ʻo fakafou ʻi he fakahā ki Heʻene kau palōfitá mo e kau ʻaposetoló (vakai, Mātiu 16:15–19; ʻEfesō 4:11–13).

Fakakaukauloto ki he puputuʻu fakalotu lolotonga ʻa e Hē Fakaʻaufuli mei he Moʻoní

ʻI he fakalaulauloto ʻa e kau akó pe naʻe mei fēfē ke moʻui lolotonga ʻa e Hē Fakaʻaufuli mei he Moʻoní, mahalo ʻe tokoni kiate kinautolu haʻanau fanongo ki he aʻusia ko ʻení:

ʻI he teuteu atu ki he konifelenisi lahi ʻa e Siasí ʻi ʻEpeleli 2020, naʻe fakakaukauloto ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá mo hono uaifi ko Sisitā Petulisa Hōlaní, naʻá na moʻui ʻi he konga kimuʻa ʻo e 1800 tupú. Naʻá na fakalaulauloto ki he puputuʻu naʻá na mei ongoʻí mo e ngaahi meʻa naʻá na mei ʻamanaki fakalaumālie ki aí (vakai, Jeffrey R. Holland, “Ko ha ʻAmanaki ʻoku Mālohi Haohaoa,” Liahona, Mē 2020, 81–84).

Kapau ʻe lava, fakakaukau ke mamata ʻi he “Ko ha ʻAmanaki ʻoku Mālohi Haohaoa” mei he taimi 0:00 ki he 7:16.

Fakaivia fakalaumālie meia Sīsū Kalaisi mo ʻEne ongoongoleleí

Kimuʻa pea ako e ngaahi veesi fekauʻaki mo e Hē mei he Moʻoní, fakakaukau ke fakaʻaliʻali ha ngaahi fakatātā ʻo ha fuʻu ʻakau mate mo ha fuʻu ʻakau moʻui. Te ke lava foki ʻo ʻomi ʻeni ki he kalasí kapau ʻokú ke maʻu ia. Fakaafeʻi e kau akó ke aleaʻi ʻa e meʻa naʻe iku ai ki he ʻasi kehekehe ʻa e ongo fuʻu ʻakaú pea mo e ngaahi talanoa fakatātā fakalaumālie te tau lava ʻo maʻu mei he ongo fuʻu ʻakau ko ʻení. Aleaʻi foki ʻa e founga ʻoku tokoniʻi ai kitautolu ʻe heʻetau fehokotaki mo Sīsū Kalaisí ke fakaivia mo tau kei moʻui lelei fakalaumālié. ʻE lava ke lau ʻe he kau akó ʻa e Sione 15:4–6 pea fakakaukau ki he founga ʻoku kaunga ai e ngaahi akonaki ʻa e Fakamoʻuí ki he Kāingalotu he kuonga muʻá lolotonga ʻa e Hē Fakaʻaufuli mei he Moʻoní.