Lēsoni 3: Fanongonongo ki Hono Fakafoki Mai ʻo e Ongoongoleleí

Talateu ki he Tokāteline mo e Ngaahi Fuakavá

Ko e Fanongo ki he Leʻo ʻo Sīsū Kalaisí

Te tau lava ʻo lau ʻi he Tokāteline mo e Ngaahi Fuakavá e folofola tonu ʻa e ʻEikí, ke tokoni ke tau fanongo ki Hono leʻó ʻoku folofola kiate kinautolu ʻi hotau kuongá pea naʻa mo kitautolu fakataautaha. ʻE lava ke tokoniʻi ʻe he lēsoni ko ʻení ʻa e kau akó ke nau teuteu ke ʻiloʻi ʻa e Fakamoʻuí ʻi he kamata ʻenau ako ʻa e Tokāteline mo e Ngaahi Fuakavá.

Ngaahi ʻEkitivitī Ako ʻOku Ala Fakahokó

Feinga ke ʻiloʻi koé

Fakakaukau ke kamata e kalasí ʻaki hano fakaafeʻi e kau akó ke ʻeke ha fehuʻi ki hanau kaungā-ako ʻe tokoni ke nau ʻiloʻi lelei ange ai e tokotaha ko iá. Hangē ko ʻení, te nau lava ʻo fehuʻi ange, “Ko e hā ha meʻa ʻokú ke fiefia ke fakahoko ʻi ho taimi ʻataá?”

Hili hono maʻu ʻe he kau akó ha taimi ke talanoa ai mo ha kaungā ako, te mou lava ʻo aleaʻi e ngaahi meʻá ni:

Fakakaukau ki he tokotaha ʻokú ke ongoʻi ʻokú ke ʻiloʻi lelei tahá.

• Ko e hā kuó ne tokoniʻi koe ke ke ʻiloʻi lelei ai ʻa e tokotahá ni?

Fakaafeʻi ʻa e kau akó ke nau fakalaulauloto fakalongolongo ki he tuʻunga ʻo ʻenau ongoʻi ʻoku nau ʻiloʻi ʻa Sīsū Kalaisí pea mo e meʻa ʻoku nau lolotonga fai ke nau ʻiloʻi lelei ange ai Iá.

Naʻe fakamatalaʻi ʻe Sīsū Kalaisi ʻi he Tokāteline mo e Ngaahi Fuakavá ha niʻihi ʻo e ngaahi founga ʻe lava ke tau ʻiloʻi lelei ange ai Iá mo talaʻofa mai ha tāpuaki te tau lava ʻo maʻu ʻi hono fakahoko iá.

Lau ʻa e Tokāteline mo e Ngaahi Fuakava 19:23–24, ʻo kumi e ngaahi fakaafe ʻa e Fakamoʻuí mo e talaʻofa naʻá Ne fakahokó.

• ʻOkú ke pehē ʻe tokoniʻi fēfē kitautolu ʻe he ngaahi fakaafe ʻa e Fakamoʻuí ʻi he ngaahi veesi ko ʻení ke tau ʻiloʻi lelei ange ai Iá?

• Ko e hā te tau lava ʻo ako fekauʻaki mo e Fakamoʻuí mei Heʻene folofola ʻi he ngaahi veesi ko ʻení?

Fakakaukau ke fakamahinoʻi ange ʻa e talaʻofa ʻa e Fakamoʻuí ʻi he veesi 23 ʻa ia te tau lava ʻo aʻusia ʻEne melinó ʻi heʻetau ako kiate Ia mo fakafanongo ki Heʻene folofolá. Mahalo ʻe tokoni ke fakaafeʻi e kau akó ke nau fakakaukau lahi ange ki he talaʻofa ko ʻení. ʻE lava ke ke kole ange ke vakaiʻi ʻa e tuʻo lahi ʻo ʻenau ongoʻi ʻa e nonga ʻoku maʻu meia Sīsū Kalaisí pea mo e founga ʻe lava ke liliu ai ʻenau moʻuí kapau te nau ongoʻi ha nonga lahi ange.

Ko hono ako ʻo e Tokāteline mo e Ngaahi Fuakavá

Te ke maʻu he taʻú ni ha ngaahi faingamālie ke ako ʻa e Tokāteline mo e Ngaahi Fuakavá ʻi ʻapi, ʻi he lotú, pea ʻi he seminelí. ʻI hoʻo akó, te ke maʻu ai ha ngaahi faingamālie lahi ke ako kia Sīsū Kalaisi mo fakafanongo ki Heʻene folofolá. ʻE lava ke tokoni ʻeni ke ke ʻilo kakato ange ai kiate Ia pea aʻusia ʻa e nonga ʻokú Ne talaʻofa maí.

• Ko e hā kuó ke ʻosi ʻilo fekauʻaki mo e Tokāteline mo e Ngaahi Fuakavá?

Mahalo ʻoku ʻi ai ha kau ako ʻe niʻihi ʻoku nau maʻu ha ngaahi potufolofola mei he Tokāteline mo e Ngaahi Fuakavá ʻoku fuʻu mahuʻinga kiate kinautolu. Te ke lava ʻo kole ki ha kau ako tokosiʻi ʻoku nau loto fiemālie ke vahevahe ʻa e ngaahi potufolofola ko ʻení pea fakamatalaʻi ʻa e ʻuhinga ʻoku nau mahuʻinga aí. Te ke lava foki ʻo vahevahe ha niʻihi ʻo e ngaahi potufolofola ʻokú ke saiʻia taha aí.

Fakaafeʻi leva ʻa e kau akó ke fakaava ʻenau folofolá ki he talateu ʻo e Tokāteline mo e Ngaahi Fuakavá.

ʻI he talateu ʻo e Tokāteline mo e Ngaahi Fuakavá, lau ʻa e palakalafi 1–3 mo e sētesi fakaʻosi ʻo e palakalafi 8. ʻI hoʻo laú, kumi ha ngaahi kupuʻi lea fekauʻaki mo e founga ʻe lava ke tokoniʻi ai koe ʻi hono ako ʻo e Tokāteline mo e Ngaahi Fuakavá ke ke ʻiloʻi kakato ange ai ʻa Sīsū Kalaisí.

• Ko e hā naʻá ke ako fekauʻaki mo e founga ʻoku kehe ai ʻa e Tokāteline mo e Ngaahi Fuakavá mei he ngaahi tohi folofola kehé?

• Ko e hā ʻokú ne ʻai e Tokāteline mo e Ngaahi Fuakavá ke “mahuʻinga lahí”?

Ko e leʻo ʻo e Fakamoʻuí ʻi he Tokāteline mo e Ngaahi Fuakavá

Ko e moʻoni ʻe taha te tau lava ʻo ako mei he ngaahi palakalafi ko ʻení ko e taimi ʻoku tau ako ai ʻa e Tokāteline mo e Ngaahi Fuakavá, te tau lava ʻo fanongo ki he leʻo ʻo e Fakamoʻuí ʻoku folofola mai kiate kitautolu ʻi hotau kuongá ni pea ako lahi ange kiate Ia.

Lau ʻa e Tokāteline mo e Ngaahi Fuakava 18:33–36, ʻo kumi e ngaahi akonaki mei he Fakamoʻuí ʻoku fekauʻaki mo e moʻoni ko ʻení.

Mahalo ʻe tokoni ke ʻoange ha taimi ki he kau akó ke nau kumi ha ngaahi sīpinga kehe ʻe niʻihi ʻo e folofola ʻa Sīsū Kalaisi ʻi he Tokāteline mo e Ngaahi Fuakavá. Te ke lava ʻo fakaafeʻi kinautolu ke fakaava ʻenau folofolá ki ha faʻahinga vahe pē ʻo e Tokāteline mo e Ngaahi Fuakavá pea kumi ha ngaahi sīpinga ʻo e folofola ʻa e ʻEikí.

• ʻOkú ke pehē ʻe tāpuekina fēfē hoʻo moʻuí ʻi hono lau e folofola ʻa e Fakamoʻuí ʻi he Tokāteline mo e Ngaahi Fuakavá?

Kapau ʻe fiemaʻu, fakamahinoʻi ange ʻoku lahi ha meʻa te tau lava ʻo ako fekauʻaki mo e Fakamoʻuí ʻi heʻetau ako ʻEne folofolá. ʻE lava ke mahino lahi ange kiate kitautolu Hono ʻulungāngá, Hono finangaló, mo e meʻa ʻoku mahuʻinga kiate Iá. ʻE tokoni foki ke fakamahinoʻi ange ʻoku faitatau ʻa Sīsū Kalaisi mo e Tamai Hēvaní ʻi Hona tuʻunga haohaoá mo e ʻulungāngá pea taha ʻi Heʻena taumuʻá. Ko ia ai, ʻi he fakaʻau ke ʻilo ʻe he kau akó ʻa Sīsū Kalaisí, ʻoku nau toe ako lahi ange ai ki he Tamai Hēvaní (vakai, Sione 14:9).

ʻE lava ʻe heʻetau ʻiloʻi ʻa e Tamai Hēvaní mo Sīsū Kalaisí ke fakatupulaki ʻetau ʻofa kiate Kinauá mo tokoni ke tau aʻusia ʻa e melino ko Kinaua pē te Na lava ʻo foakí.

ʻI hoʻo ako ʻa e Tokāteline mo e Ngaahi Fuakavá, tokanga taha ki he meʻa ʻokú ke ako fekauʻaki mo e Tamai Hēvaní mo Sīsū Kalaisí. ʻE ala tokoni ke fokotuʻutuʻu ha konga hoʻo tohinoa akó pe faʻu ha kiʻi fakamatala ʻi hoʻo polokalama Gospel Library ki hono lekooti e ngaahi fakakaukau ʻokú ke maʻu fekauʻaki mo Kinauá. Te ke lava ʻo tānaki ki hoʻo lisi ʻo e ngaahi fakakaukaú ʻi he lolotonga ʻo e taʻú. Fakakaukau ki he founga ʻoku tākiekina ai ʻe he meʻa ʻokú ke ako fekauʻaki mo e Tamai Hēvaní mo Sīsū Kalaisí hoʻo ʻofa mo e falala kiate Kinauá.

ʻE lava ke tokoni ʻa e ʻekitivitī ako ko ʻení ke ʻiloʻi ʻe he kau akó ʻa e ngaahi sīpinga ʻo e meʻa te nau lava ʻo ako fekauʻaki mo e Tamai Hēvaní mo Sīsū Kalaisi mei he folofola ʻa e Fakamoʻuí ʻi he Tokāteline mo e Ngaahi Fuakavá. Mahalo ʻe tokoni ke vahevahe ʻa e kau akó ki ha ngaahi kulupu pea vahe ki he kulupu takitaha ha potufolofola ʻe taha pe lahi ange ke nau ako.

Ako e folofola ʻa e Fakamoʻuí ʻi ha niʻihi ʻo e ngaahi potufolofola ko ʻeni mei he Tokāteline mo e Ngaahi Fuakavá. Tokanga ki he meʻa te ke lava ʻo ako fekauʻaki mo e Tamai Hēvaní mo Sīsū Kalaisi mei he ngaahi veesi ʻokú ke akó.

• Tokāteline mo e Ngaahi Fuakava 1:37–38; 10:67–70; 11:2; 14:9; 19:1–2; 25:15–16; 29:1–2; 84:77

Fakakaukau ke hiki ʻi he palakipoé ʻa e ngaahi tali ʻa e kau akó ki he fehuʻi ʻuluaki ʻi he ngaahi fehuʻi ko ʻení. Pe te ke fakaafeʻi ha kau ako kehekehe ke nau omi ki he palakipoé ʻo hiki ʻenau ngaahi fakakaukaú.

• Ko e hā naʻe tokoni e ngaahi potufolofola ko ʻení ke mahino kiate koe fekauʻaki mo e Tamai Hēvaní mo Sīsū Kalaisí? ʻOkú ke pehē ko e hā ʻoku mahuʻinga ai ke ʻiloʻi e ngaahi meʻa ko ʻení fekauʻaki mo Kinauá?

• ʻE tokoniʻi fēfē koe ʻe he meʻa naʻá ke ako fekauʻaki mo e Tamai Hēvaní mo Sīsū Kalaisi ʻi he ngaahi veesi ko ʻení ke ke aʻusia ʻa e melinó?

Fokotuʻu ha taumuʻa ki he ako folofolá

Vahevahe ʻa e meʻa ko ʻení, ʻoange ha taimi ki he kau akó ke nau fokotuʻu ha taumuʻa ʻoku fekauʻaki mo ʻenau ako e Tokāteline mo e Ngaahi Fuakavá ʻi he taʻu ní.

Ki ha ako lahi ange ki he founga ke poupouʻi ai e kau akó ke ako fakaʻaho e ongoongoleleí, vakai ki he ako ʻoku ui ko e “Tokoniʻi e Kau Akó ʻi hono Fokotuʻu ha Taumuʻa Ako Folofola Fakaʻaho,” ʻa ia ʻoku maʻu ʻi he ako Fakatupulaki ʻa e Ngaahi Taukei ʻa e Faiakó: Fakaafeʻi ʻa e Ako Fakamātoató.

Ko e taha ʻo e ngaahi taumuʻa ʻo e seminelí ke tokoniʻi koe ke ke ofi ange ki he Tamai Hēvaní mo Sīsū Kalaisi ʻi hono ako fakaʻaho ʻo e folofolá. Fekumi ki ha ueʻi fakalaumālie ʻo fakafou ʻi he Laumālie Māʻoniʻoní ke fokotuʻu ha taumuʻa ʻoku fekauʻaki mo hoʻo ako e Tokāteline mo e Ngaahi Fuakavá. ʻE lava ke ke fakakaukau ki he ngaahi fehuʻi ko ʻení ʻi hoʻo fokotuʻu ha taumuʻá:

• Ko e fē ʻa e taimi mo e feituʻu te u lava ʻo ako fakaʻaho ai ʻeku folofolá?

• Ko e hā e lahi ʻo e taimi ʻi he ʻaho takitaha te u ako aí?

• Ko e hā te u lava ʻo fakahoko ke fakaafeʻi kakato ange ai e Laumālie Māʻoniʻoní ki heʻeku aʻusiá?

Lekooti hoʻo taumuʻá ʻi hoʻo tohinoa akó.

Mahalo te ke fiemaʻu ke vahevahe ʻe he kau akó ʻenau tali ki ha niʻihi pe kotoa ʻo e ngaahi fehuʻi kimuʻá hili ʻenau tohí.

Poupouʻi e kau akó ke nau ngāue ke aʻusia ʻenau taumuʻá. Palōmesi ange ʻe tokoniʻi kinautolu ʻi heʻenau fai iá ke nau fanongo ki he leʻo ʻo e Fakamoʻuí mo maʻu ha fakahinohino meiate Ia. Tuku ha taimi lolotonga e taʻú ke fakamanatu ki he kau akó ʻenau taumuʻá, ʻoange ha ngaahi faingamālie ke nau fakafuofuaʻi ai ʻenau fakalakalaká.

Ngaahi Maʻuʻanga Tokoni Lahi Ange

Ko e hā e fekauʻaki ʻa e Tohi ʻa Molomoná mo e Tokāteline mo e Ngaahi Fuakavá?

Naʻe akonaki ʻa Palesiteni ʻEselā Tafu Penisoni (1899–1994) ʻo pehē:

ʻOku hoko ʻa e Tokāteline mo e Ngaahi Fuakavá ko e fetuʻutakiʻanga mālohi ʻi he Tohi ʻa Molomoná mo e ngāue ʻoku hokohoko ʻi hono Fakafoki Mai ʻo e Ongoongoleleí ʻi he Palōfita ko Siosefa Sāmitá mo kinautolu ʻoku nau fetongi iá. …

Ko e Tohi ʻa Molomoná ko e “maka-tuʻu-loto” ia ʻo ʻetau tui fakalotú, pea ko e Tokāteline mo e Ngaahi Fuakavá ko e maka tumuʻakí ia, fakataha mo e hokohoko mai ʻo e fakahaá. Kuo ʻosi fakahaaʻi ʻe he ʻEikí ʻa ʻEne tali ʻo e maka-tuʻu-lotó mo e maka-tumuʻakí fakatouʻosi. (Ezra Taft Benson, “The Book of Mormon and the Doctrine and Covenants,” Ensign, May 1987, 83)

Ko e hā ʻokú ne ʻai ʻa e Tokāteline mo e Ngaahi Fuakavá ke hoko ko ha tohi mahuʻinga ke akó?

Naʻe fakamatala ʻa ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo pehē:

Kapau ʻe ʻeke pe ko e fē ʻa e tohi folofola ʻoku maʻu ai ʻa e faingamālie lahi taha ke “fanongo” ki he folofola ʻa e ʻEikí, ʻe ʻuluaki fakakaukau ha niʻihi fakafoʻituitui tokolahi ki he Fuakava Foʻoú. Ko e Fuakava Foʻoú ko ha fakatahatahaʻi fakaofo ia ʻo e ngaahi ngāue mo ha ngaahi tokāteline lahi ʻa e Mīsaiá. Ka ʻi he Tokāteline mo e Ngaahi Fuakavá ʻoku tau maʻu ʻa e leʻó pea pehē foki ki he folofola ʻa e ʻEikí. ʻOku tau meimei lava pē ai ʻo “fanongo” ki Heʻene folofolá. (Neal A. Maxwell, “The Doctrine and Covenants: The Voice of the Lord,” Ensign, Dec. 1978, 4)

Naʻe akonaki ʻa ʻEletā Sione A. Uitisou (1872–1952) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e tokāteline kotoa pē ʻoku akoʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku maʻu ia ʻi hano fokotuʻutuʻu pe fakamatalaʻi, ʻi he Tohi Tokāteline mo e Ngaahi Fuakavá. Fakatatau mo ʻeku ʻiló, ʻoku ʻikai ha tokāteline ia ʻe akoʻi ʻe he Siasí ʻe taʻe maʻu ʻi ha faʻahinga founga pe tūkunga ʻi he tohi ko ʻení. … He ʻikai lava ʻe ha toe tohi ʻi heʻetau ngaahi tohi toputapú ʻo fakahoko ha fakamatala tatau ki hano fakaikiiki kakato ʻo e ngaahi tokāteline kotoa ʻo e Siasí. (John A. Widtsoe, The Message of the Doctrine and Covenants [1969], 117)

Ko e fē te u lava ʻo ako lahi ange ai fekauʻaki mo e Tokāteline mo e Ngaahi Fuakavá?

ʻE lava ke tokoni ʻa e ngaahi maʻuʻanga tokoni ko ʻení ke mahino lelei ange ki he kau akó ʻa e meʻa ʻoku ʻi he Tokāteline mo e Ngaahi Fuakavá:

• Annelise Gardiner, “Ko e Tokāteline mo e Ngaahi Fuakava: Ko Ha Vakai Fakalūkufua,” Ki Hono Fakamālohia ʻo e Toʻu Tupú, Sānuali 2021, 14–15

• Ngaahi Tefitó mo e Ngaahi Fehuʻí, “Tokāteline mo e Ngaahi Fuakava,” topics.ChurchofJesusChrist.org

Ngaahi ʻEkitivitī Fakalahi ki he Akó

Ngaahi fakahā toputapu naʻe maʻu ʻi he taimi ʻo e faingataʻá

Ko e lahi taha ʻo e ngaahi fakahā ʻi he Tokāteline mo e Ngaahi Fuakavá naʻe maʻu ia ʻi he taimi ʻo e faingataʻá pe ko ha tali ki ha ngaahi fehuʻi. Ke tokoni ke mahino ʻeni ki he kau akó, fakaafeʻi kinautolu ke nau lau ʻa e palakalafi 6 ʻo e talateu ki he Tokāteline mo e Ngaahi Fuakavá, ʻo kumi e ngaahi tūkunga ʻoku faʻa fakaiku lahi taha ki hono ʻomi ʻo e ngaahi fakahā ko ʻení. ʻE lava ke vahevahe ʻe he kau akó ʻa e meʻa ʻoku nau ako fekauʻaki mo e ʻEikí ʻo makatuʻunga ʻi he meʻa ne nau ʻilo ʻi he palakalafi ko ʻení.

ʻE lava foki ke fakakaukau e kau akó ki ha ngaahi taimi ʻi heʻenau moʻuí ne nau fiemaʻu ai ha fakahinohino mei he Tamai Hēvaní. Poupouʻi kinautolu ke nau fekumi ki Heʻene fakahinohinó ʻi he ngaahi taimi ʻo ʻenau faingataʻaʻiá ʻi he lolotongá ni mo e kahaʻú.

Ngaahi akonaki mahuʻinga ʻi he Tokāteline mo e Ngaahi Fuakavá

Ke tokoni ke maʻu ʻe he kau akó ha vakai fakalūkufua ki he ngaahi tefito fakatokāteline mahuʻinga te nau ako ʻi he Tokāteline mo e Ngaahi Fuakavá, fakakaukau ke fakaafeʻi kinautolu ke lau ʻa e palakalafi 8 ʻo e talateu ki he Tokāteline mo e Ngaahi Fuakavá.

ʻE lava ke fili ʻe he kau akó ha taha ʻo e ngaahi tefito ʻoku lisi ʻi he palakalafi ko ʻení te nau fie ako lahi ange ki ai. Ke maʻu ha ngaahi veesi fekauʻaki ʻi he Tokāteline mo e Ngaahi Fuakavá, te nau lava ʻo fakaʻaongaʻi ʻa e ngaahi meʻangāue ki he akó ʻo hangē ko e fakahokohoko fakamotuʻalea ki he ngaahi folofola ʻe tolu kuo fakatahaʻí, mo e Fakahinohino ki he Ngaahi Folofolá.

Ko e hokohoko atu hono Fakafoki Mai ʻo e ongoongolelei ʻa e Fakamoʻuí

Neongo ʻoku maʻu ʻi he Tokāteline mo e Ngaahi Fuakavá ha ngaahi akonaki mahuʻinga mei he ʻEikí ko ha konga ʻo hono Fakafoki Mai ʻo ʻEne ongoongoleleí ki he māmaní, ka naʻe ʻikai ngata hono Fakafoki Mai ʻo e Ongoongoleleí ʻi hono pulusi ʻo e Tokāteline mo e Ngaahi Fuakavá. ʻOku hokohoko atu hono fakahā ʻe he ʻEikí ʻa e moʻoní ki Heʻene kau palōfitá mo e kau ʻaposetoló ko ha konga ʻo e hokohoko atu hono Fakafoki Mai ʻo e Ongoongoleleí.

Ke tokoni ke mahino ki he kau akó ʻa e fakakaukaú ni, ʻe lava ke ke vahevahe ʻa e lea ko eni ʻa Palesiteni Lāsolo M. Nalesoní:

Ko e Fakafoki mai ʻo e ongoongoleleí ko ha founga ngāue, ʻoku ʻikai ko ha meʻa pē ʻoku hoko, pea ʻe kei pehē ai pē kae ʻoua kuo toe hāʻele mai e ʻEikí.

… ʻOku fiemaʻu ʻi he Fakafoki mai ʻoku hokó ha fakahā ʻoku hokohoko. (Russell M. Nelson, “Ko e Temipalé mo Ho Fakavaʻe Fakalaumālié,” Liahona, Nōvema 2021, 94-95)

Fakakaukau ke fakaafeʻi e kau akó ke vahevahe ha niʻihi ʻo e ngaahi moʻoni pe akonaki mahuʻinga kuo fakahā ʻe he ʻEikí ki Heʻene kau palōfitá mo e kau ʻaposetoló ʻi he ngaahi kuonga kimuí ni maí.