“Lēsoni 2—Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko Ha Fanongonongo ki Māmani ʻo e Taʻu Uangeaú,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 2: Fanongonongo ki Hono Fakafoki Mai ʻo e Ongoongoleleí
“Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko Ha Fanongonongo ki Māmani ʻo e Taʻu Uangeaú”
ʻI he ʻaho 5 ʻo ʻEpeleli 2020, naʻe lau ai ʻe Palesiteni Lāsolo M. Nalesoni ʻa e “ngaahi lea ʻo e fanongonongo molumalu mo toputapu” (“Fanongo Kiate Ia,” Liahona, Mē 2020, 90) ke fakamanatua ʻa e taʻu 200 ʻo e ʻUluaki Mata Meʻa-Hā-Maí. Naʻe lekooti ʻa e leá ni ʻi he “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko Ha Fanongonongo ki Māmani ʻo e Taʻu Uangeaú” (ChurchofJesusChrist.org). ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e moʻoni mo e mahuʻinga ʻo e hokohoko atu hono Fakafoki Mai ʻo e ongoongolelei ʻo Sīsū Kalaisí.
Ngaahi ʻEkitivitī Ako ʻOku Ala Fakahokó
Fakamanatua ʻo ha kakai maʻongoʻonga pe ngaahi meʻa naʻe hoko
Ke fakamanatua ha taha pe ko ha meʻa naʻe hoko, ʻoku ʻuhinga ia ke fakahaaʻi ha loto houngaʻia, fakalangilangiʻi, mo fakaʻapaʻapaʻi. ʻOku faʻa fakahoko ʻeni ʻi hono faʻu ha meʻa ke tokoni ke tau manatuʻi ʻa e tokotahá pe meʻa naʻe hokó.
Fakakaukau ke aleaʻi ʻa e ngaahi meʻa naʻe hoko mo e kakai kuo fakamanatuá. Te ke lava ʻo fakaʻaliʻali ha fakatātā ʻo ha ngaahi maka fakamanatu ʻi homou feituʻú ʻoku nau fakamanatua ha ngaahi meʻa naʻe hoko pe ko ha kakai ʻe ala maheni mo hoʻo kau akó. Te ke lava ʻo fakaafeʻi e kau akó ke vahevahe pe ko e fē ʻoku nau ʻilo pe ʻaʻahi ki aí.
Ke tokoniʻi e kau akó ke nau fetuʻutaki ʻi ha tuʻunga fakataautaha, te ke lava foki ʻo fakaafeʻi kinautolu ke fakakaukau ki ha ngaahi meʻa lalahi kuo hoko ʻi honau fāmili tonú pe kāingá. Kole ange ke nau vahevahe ha ngaahi fakakaukau fekauʻaki mo e meʻa te nau ala fakahoko kapau ʻe kole ange ke nau faʻu ha meʻa ke fakamanatu ʻaki ha taha ʻo e ngaahi meʻa ko ʻeni naʻe hokó.
Manatuʻi, ʻi he hili e pekia ʻa e Kau ʻAposetolo ʻa Sīsū Kalaisí, naʻe ʻi ai ha vahaʻataimi naʻe ʻiloa ko e Hē Fakaʻaufuli mei he Moʻoní. Ko ha taimi ʻeni naʻe ʻikai maʻu ai ʻi he māmaní ʻa e ongoongolelei ʻo Sīsū Kalaisí mo e mafai ʻo e lakanga fakataulaʻeikí. ʻI he faʻahitaʻu failau ʻo e 1820, naʻe kamata hono Fakafoki Mai ʻe he Tamai Hēvaní mo Sīsū Kalaisi ʻa e ongoongoleleí ki he māmaní ʻi Heʻena hā kia Siosefa Sāmitá.
Naʻe tohi ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ha fanongonongo ʻi he 2020, ke fakamanatua ʻa e taʻu 200 ʻo e ʻUluaki Mata Meʻa-Hā-Mai ʻa Siosefa Sāmitá. ʻOku ui ia “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko Ha Fanongonongo ki Māmani ʻo e Taʻu Uangeaú.” Naʻe pehē ʻe Palesiteni Lāsolo M. Nalesoni fekauʻaki mo ia:
Ne mau fifili pe ʻoku totonu ke toe fokotuʻu ha maka fakamanatu. Ka ʻi heʻemau fakakaukau ki he meʻa fakahisitōlia makehé ni mo [e ola] fakavahaʻa-puleʻanga ʻo e ʻUluaki Mata Meʻa-Hā-Maí, ne mau ongoʻi ke fokotuʻu ha maka fakamanatu kalānite pe maka mo ha fakalea—fakalea molumalu mo toputapu—ʻe hiki, kae ʻikai tongitongi ʻi ha “maka lafalafa” ka ʻi he “kakano” ʻo e lotó. (Russell M. Nelson, “Fanongo Kiate Ia,” Liahona, Mē 2020, 90)
ʻE lava ke ke fakaafeʻi e kau akó ke nau fakakaukau ki he meʻa ʻoku nau ʻilo fekauʻaki mo e ʻUluaki Mata Meʻa-Hā-Mai ʻa Siosefa Sāmitá pea mo e ʻuhinga ʻe ala mahuʻinga ai ke nau fakamanatua fakatāutahá. ʻE lava ke vahevahe ʻe ha kau ako loto fiemālie ʻe niʻihi ʻenau ngaahi talí mo e kalasí.
Ako ʻa e fanongonongo ki he Fakafoki Mai ʻo e Ongoongoleleí
Fakaʻaliʻali ki he kau akó ʻa e feituʻu te nau lava ʻo maʻu ai ʻa e fanongonongo ʻo e Fakafoki Mai ʻo e Ongoongoleleí ʻi heʻenau tohinoa akó pe ʻi he Gospel Library app. Te ke lava foki ʻo ʻoange ha tatau pepa ʻo e fanongonongó. ʻI he kalasí kotoa, fakaafeʻi e kau akó ke nau fakaʻilongaʻi ha ngaahi konga ʻo e Fakafoki Mai ʻo e Ongoongoleleí ʻoku nau ongoʻi ʻoku mahuʻinga hono fakamanatuá.
Ko e founga ʻe taha ke fakatokangaʻi ai e ngaahi tāpuaki kuo fakafaingamālieʻi ʻe he ʻOtuá maʻaú ko hono ʻai ha lisi. Te ke lava ʻo hiki ha ngaahi foʻi lea pe kupuʻi lea ʻoku nau fakamatalaʻi ʻa e meʻa naʻe fakafoki maí. Fakakaukau leva ki he ngaahi tāpuaki ʻokú ke fiefia ai he taimí ni, pe te ke fiefia ai ʻi he kahaʻú, koeʻuhí ko e meʻa naʻe fakafoki mai ʻe he ʻOtuá.
Tuku ki he kau akó ke nau ako ʻa e fanongonongó ʻi ha ngaahi miniti siʻi. Kole ange ke nau hiki ha lisi ʻi he palakipoé ʻo e ngaahi foʻi lea pe kupuʻi lea ʻoku nau pehē ʻoku mahuʻingá. Fili hanau niʻihi pea kole ki he kau akó ke fakamatalaʻi ʻa e ʻuhinga naʻa nau pehē ʻoku mahuʻinga ai e ngaahi foʻi lea ko iá.
-
Ko e hā ha ngaahi foʻi lea pe kupuʻi lea ʻoku tokoni atu ke ke ʻiloʻi ʻa e meʻa naʻe fakafoki mai ʻe he ʻOtuá?
-
Ko e fē ʻi he ngaahi tāpuaki kuo fakafoki mai ko ʻení ʻoku mahuʻinga taha kiate koé? Ko e hā hono ʻuhingá?
Fakaʻaongaʻi ha kiʻi taimi ke fakalaulauloto ki he meʻa ʻoku tokoni ai e ngaahi tāpuaki ko ʻeni kuo fakafoki maí ke mahino kiate koe fekauʻaki mo e Tamai Hēvaní mo Sīsū Kalaisí.
-
Ko e hā ha ngaahi moʻoni ʻe niʻihi ʻoku tokoni atu ai e fanongonongo ko ʻení ke ke ʻilo fekauʻaki mo Kinauá?
Fakatauange pē ʻe ʻiloʻi ʻe he kau akó ha ngaahi moʻoni kehekehe. Fakaʻatā kinautolu ke vahevahe. Ko ha foʻi moʻoni ʻeni ʻe ua te ke lava ʻo fakamamafaʻi: Naʻe kamata hono fakafoki mai ʻe he Tamai Hēvaní mo Sīsū Kalaisi ʻa e kakato ʻo e ongoongoleleí ʻo fakafou ʻi he Palōfita ko Siosefa Sāmitá, pea ʻoku kei hokohoko atu pē ʻi hotau kuongá ni ʻa hono Fakafoki Mai ʻo e ongoongolelei ʻo Sīsū Kalaisí.
Fakamanatua e ngaahi tāpuaki ʻo e Fakafoki Mai ʻo e Ongoongoleleí
Fili ha konga ʻe taha ʻo e Fakafoki Mai ʻo e Ongoongoleleí ʻokú ke houngaʻia lahi ai. Fakakaukau ki he meʻa te ke lava ʻo fai ke fakamanatua ʻaki ʻa e tāpuaki ko ʻeni mei he ʻOtuá pe vahevahe ia mo e niʻihi kehé. Manatuʻi ʻoku ʻuhinga ʻa e fakamanatuá ke fakahaaʻi ʻa e loto houngaʻia, lāngilangi, mo e fakaʻapaʻapa.
ʻOange ha taimi maʻá e kau akó ʻi he kalasí ke nau fili mo ngāueʻi ha founga ʻe taha ke fakamanatu ai ha tāpuaki ʻo hono Fakafoki Mai ʻo e Ongoongoleleí. Ke tokoni ki he kau akó, te ke lava ʻo hiki ʻi he palakipoé ha ngaahi meʻa ke fili mei ai ʻo hangē ko ʻení. ʻE lava foki ke fakakaukau ʻa e kau akó ki ha founga pē ʻanautolu.
-
Kamata ako maʻuloto ha konga ʻo e fanongonongo ʻo e Fakafoki Mai ʻo e Ongoongoleleí.
-
Hiki ha kiʻi fakakaukau fakalaumālie nounou fekauʻaki mo ha tafaʻaki ʻe taha ʻo e Fakafoki Mai ʻo e Ongoongoleleí ke vahevahe mo ho fāmilí.
-
Faʻu ha tohi ʻi he mītia fakasōsialé ke vahevahe ai hoʻo houngaʻia ʻi ha tāpuaki ʻo hono Fakafoki Mai ʻo e Ongoongoleleí.
-
Hiki hifo hoʻo fakamoʻoni ki hono Fakafoki Mai ʻo e ongoongolelei ʻo Sīsū Kalaisí. Te ke lava ʻo vahevahe hoʻo fakamoʻoní ʻi ha fakatahaʻanga ʻa e Siasí he kahaʻú.
Fakakaukau ke tuku ha taimi feʻunga ʻi he fakaʻosinga ʻo e kalasí ke lava e kau akó ʻo vahevahe mo hanau hoa ʻa e meʻa naʻa nau fai pe ngāue ki aí. Te ke lava foki ʻo fakaafeʻi ha niʻihi ʻo e kau akó ke vahevahe mo e kalasí kotoa.