Doktrina ug mga Pakigsaad 1

Doktrina ug mga Pakigsaad 1

Kinatibuk-ang Pagpasabot

Ang Ginoo mipadayag og pasiuna alang sa Basahon sa mga Sugo, nga sa kaulahian nahimong Doktrina ug mga Pakigsaad. Siya mihatag og tingog sa pasidaan ngadto sa kalibotan, mipamatuod sa tinuod ug buhi nga Simbahan, ug mitudlo nga bisan pinaagi sa Iyang mga sulugoon o pinaagi sa Iyang kaugalingon nga tingog, kini managsama ra.

Tabangi ang mga tigkat-on nga mobati nga ang ilang mga kontribusyon gihatagan og bili.Ang pagpaminaw nagkinahanglan nga ang mga magtutudlo mas magpakabana sa unsay anaa sa kasingkasing sa laing tawo kay sa unsay gilatid sa sunod nga leksiyon. Pagmahimong andam nga ipadaplin ang unsay imong giplano, kon giaghat sa Espiritu, ug paminaw sa mga kabalaka sa mga estudyante. Pahibaloa sila pinaagi sa imong mga pulong ug mga buhat nga matinguhaon ka sa pagpaminaw kanila. Alang sa dugang pa kon sa unsang paagi kini gibuhat sa Manluluwas, tan-awa sa “Gipaniguro sa Manluluwas Nga ang Tanan Mibati nga Gitahod ug Gihatagan og Bili,” sa Pagtudlo Sumala sa Pamaagi sa Manluluwas.

Usa ka ehemplo kon unsaon nimo kini pagbansay gilakip diha sa leksiyon sa Doktrina ug mga Pakigsaad 1.

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 1

Katuyoan sa leksiyon: Kini nga leksiyon makatabang sa mga estudyante nga makasabot sa mga rason nga ang Ginoo naghatag og mga pasidaan ngadto sa kalibotan.

• Pagpangandam sa estudyante: Ikonsiderar ang pagdapit sa mga estudyante sa pagpangandam sa pagpakigbahin kon kumusta ang ilang tumong sa pagtuon sa kasulatan. Dasiga sila sa pagpakigbahin sa mga kalamposan ug mga hagit nga ilang nasinati. Mahimo nimong dasigon sila sa pagpadayon sa ilang mga paningkamot o sa paghimo og tumong nga molambo.

• Materyal: Papel ug kagamitan sa pagdrowing alang sa mga estudyante sa paghimo og meme, poster, o uban pang proyekto (Ang kalihokan mahimo usab nga himoon gamit lamang ang mga journal sa pagtuon ug mga lapis.)

Doktrina ug mga Pakigsaad 1:30–33

Katuyoan sa leksiyon: Kini nga leksiyon gituyo aron matabangan ang mga estudyante nga mobati sa kamahinungdanon sa Ang Simbahan ni Jesukristo sa mga Santos sa Ulahing mga Adlaw isip mao lamang ang tinuod nga simbahan.

• Pagpangandam sa estudyante: Ikonsiderar ang pagdapit sa mga estudyante sa pagbasa sa tudling sa doktrinal nga kahanas sa Doktrina ug mga Pakigsaad 1:30 ug sa pagpamalandong kon unsay gipasabot sa gisulti sa Ginoo nga “mao lamang ang tinuod ug buhi nga simbahan”.

• Butang nga andamon: Ang handout nga “Ang Tinuod ug Buhi nga Simbahan” alang sa mga estudyante

Doktrina ug mga Pakigsaad 1:37–38

Katuyoan sa leksiyon: Kini nga leksiyon makatabang sa mga estudyante sa pagtuon sa mga pulong sa Ginoo pinaagi sa mga kasulatan ug sa mga pulong sa mga propeta sa modernong panahon.

• Pagpangandam sa estudyante: Dapita ang mga estudyante sa pagtuon sa Doktrina ug mga Pakigsaad 1:37–38 ug sa pagpamalandong kon unsay gipasabot niini. Mahimong sag-ulohon pa gani nila ang bahin o ang tanan niini.

• Mga Bidyo: “#PaminawKaniya: Si Presidente Nelson Nagdapit Kanato sa Pagpaminaw sa Tingog sa Ginoo” (2:13; tan-awa gikan sa time code 0:00 hangtod sa 1:14); “Giunsa Nako #PagpaminawKaniya: Elder David A. Bednar” (1:15)