Leksyon 5: Doktrina ug mga Pakigsaad 1

Doktrina ug mga Pakigsaad 1:30–33

“Mao Lamang ang Tinuod ug Buhi nga Simbahan”

Sa Iyang pasiuna sa Doktrina ug mga Pakigsaad, ang Ginoo mipahayag sa kamahinungdanon sa bag-ong gipahiuli nga Simbahan ni Jesukristo. Iyang gipahayag nga ang Simbahan “mao lamang ang tinuod ug buhi nga simbahan diha sa ibabaw sa tibuok yuta” (Doktrina ug mga Pakigsaad 1:30). Kini nga leksiyon gituyo aron matabangan ang mga estudyante nga mobati sa kamahinungdanon sa Ang Simbahan ni Jesukristo sa mga Santos sa Ulahing mga Adlaw isip mao lamang ang tinuod nga simbahan.

Mga Posibleng Kalihokan sa Pagkat-on

Ang Simbahan sa Ginoo

Sa pagsugod sa leksiyon, mahimo nimong ipakigbahin ang mosunod nga pangutana ug ang kauban nga mga pamahayag niini ug dapita ang pipila ka mga estudyante sa pagpakigbahin sa ilang mga tubag.

Ngano kaha nga ang ubang mga tawo mouyon o dili mouyon sa mosunod nga mga pamahayag?

1. Sa akong hunahuna wala ako magkinahanglan og simbahan.

2. Ang tanang mga simbahan managsama nga tinuod.

3. Ang Simbahan ni Jesukristo sa mga Santos sa Ulahing mga Adlaw mao lamang ang tinuod nga simbahan.

Mahimo nimong hangyoon ang mga estudyante sa hilom nga pagsusi sa ilang kaugalingong mga panglantaw niini nga mga pamahayag.

Uban sa daghan kaayong nagkalainlaing mga relihiyon ug mga opinyon, mahimong lisod ang pagkahibalo kon unsa ang tinuod. Ang Ginoo mihatag kanato og direksiyon pinaagi sa mga kasulatan aron sa pagtabang kanato nga makabaton og pagsalig kon unsa ang tinuod ug sa pagkahibalo unsay Iyang gusto alang kanato.

Isip pasiuna sa Doktrina ug mga Pakigsaad, ang Ginoo mipadayag og pasidaan “ngadto sa tanan nga katawhan” (Doktrina ug mga Pakigsaad 1:4). Isip kabahin sa Iyang mensahe, Siya mihimo og klaro nga pamahayag mahitungod sa Ang Simbahan ni Jesukristo sa mga Santos sa Ulahing mga Adlaw.

Basaha ang Doktrina ug mga Pakigsaad 1:30, ug pangitaa kon giunsa paghulagway sa Ginoo ang Ang Simbahan ni Jesukristo sa mga Santos sa Ulahing mga Adlaw.

Ang Doktrina ug mga Pakigsaad 1:30 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali nila kining makit-an.

• Unsa man ang imong napalgan?

“Mao lamang ang tinuod ug buhi nga simbahan diha sa ibabaw sa tibuok yuta”

Ikonsiderar ang pagdapit sa mga estudyante nga markahan diha sa ilang mga kasulatan ang hugpong sa mga pulong nga anaa sa ulohan sa ibabaw. Paggahin og panahon sa pagtabang sa mga estudyante nga makasabot unsay buot ipasabot nga ang Simbahan tinuod ug buhi. Ang mosunod maoy usa ka paagi nga mahimo nimo kini:

Paghimo og duha ka kolum diha sa pisara. Dapita ang mga estudyante sa pagtuon sa handout ug pagmarka sa hugpong sa mga pulong nga makatyavbang kanila sa pagsabot kon sa unsang paagi nga ang Simbahan parehong “tinuod” ug “buhi.”

Ang Tinuod ug Buhi nga Simbahan

Si Elder David A. Bednar sa Korum sa Napulog Duha ka Apostoles mitudlo:

Ang Ginoo mipahayag nga ang Ang Simbahan ni Jesukristo sa mga Santos sa Ulahing mga Adlaw mao lamang “ang matuod ug buhi nga simbahan diha sa ibabaw sa tibuok yuta” (D&P 1:30). Kini nga gipahiuli nga Simbahan tinuod tungod kay Simbahan man kini sa Manluluwas; Siya ang “dalan, ang kamatuoran, ug ang kinabuhi” (Juan 14:6). Ug buhi kini nga simbahan tungod sa mga buhat ug mga gasa sa Espiritu Santo. (David A. Bednar, “Dawata ang Espiritu Santo,” Liahona, Nob. 2010, 97)

Si Presidente Dallin H. Oaks sa Unang Kapangulohan mitudlo:

Tulo ka feature—(1) kahingpitan sa doktrina, (2) gahom sa pagkapari, ug (3) pagpamatuod ni Jesukristo—mopasabot ngano ang Dios mideklarar … nga kini lamang ang tinuod ug buhi nga Simbahan sa ibabaw sa tibuok yuta. …

Ang gipahiuli nga ebanghelyo ni Jesukristo masabtan, alang sa tanan, may gahom, ug tinuod. …

[Sa] pagbaton sa gahom sa pagkapari, ang mga lider ug ang tinutugotan nga mga miyembro sa Ang Simbahan ni Jesukristo sa mga Santos sa Ulahing mga Adlaw gihatagan og gahom sa pagbuhat sa gikinahanglang mga ordinansa sa pagkapari, sama sa bunyag, ang gasa sa Espiritu Santo, ug ang pagpahigayon sa sakramento.

Ang mga yawe sa priesthood, nga gihuptan sa atong pinalanggang propeta … ug sa tanang ubang mga propeta ug Presidente sa Simbahan, naghatag kaniya og katungod sa pagpadayag alang sa tibuok Simbahan. Kini nga Simbahan “buhi” tungod kay kita adunay mga propeta kinsa nagpadayon sa paghatag kanato og pulong sa Ginoo nga gikinahanglan sa atong panahon.

Ang ikatulo nga rason nganong kita lamang ang tinuod nga Simbahan mao nga anaa kanato ang gipadayag nga kamatuoran kabahin sa kinaiya sa Dios ug sa atong relasyon Kaniya, ug busa kita adunay talagsaon nga pagpamatuod ni Jesukristo. (Dallin H. Oaks, “Mao Lamang Ang Tinuod ug Buhi nga Simbahan,” Liahona, Ago. 2011, 49–51)

Dapita ang mga estudyante sa pagpakigbahin unsay ilang gimarkahan. Mahimo nilang isulat ang ilang nakaplagan diha sa duha ka kolum sa pisara. Ikonsiderar ang pagpangutana sa mga estudyante kon sa unsang paagi kita gipanalanginan sa Ginoo pinaagi sa matag aspeto sa Iyang Simbahan nga ilang gimarkahan. Aron matabangan ang mga estudyante nga makasabot sa gitudlo ni Presidente Oaks mahitungod sa atong talagsaon nga pagpamatuod ni Kristo, ikonsiderar ang paghangyo kanila sa pagbinayloay og ideya [brainstorm] sa mga kamatuoran mahitungod sa Langitnong Amahan ug ni Jesukristo nga ilang nakat-onan pinaagi ni Propeta Joseph Smith, sa Basahon ni Mormon, o sa mga propeta sa modernong panahon. Mahimo nilang idugang ang ilang mga hunahuna sa kolum nga “Tinuod”.

Kon gikinahanglan, tabangi ang mga estudyante nga makasabot nga ang pagpamatuod sa Ginoo nga nagpahayag nga Ang Simbahan ni Jesukristo sa mga Santos sa Ulahing mga Adlaw “mao lamang ang tinuod ug buhi nga simbahan” wala magpasabot nga ang ubang mga simbahan wala maghupot og bisan unsa nga kamatuoran.

Mga Panalangin sa Simbahan ni Jesukristo

Human sa pagsulti nga ang Simbahan “mao lamang ang tinuod ug buhi nga simbahan,” ang Manluluwas milakip sa pipila ka mga rason nganong Iyang gipahiuli ang Iyang Simbahan. Basaha ang Doktrina ug mga Pakigsaad 1:31–33, mangita sa unsay Iyang gitudlo.

Mahimong modangop ang mga estudyante ngadto sa usa ka pares ug ipamubo unsay ilang nakat-onan gikan niini nga mga bersikulo. Mahimo usab nilang hisgotan ang mosunod nga pangutana nga magkauban.

• Sa unsang paagi nga ang tinuod ug buhi nga Simbahan ni Jesukristo makatabang nimo sa pagdangop ngadto Kaniya alang sa kapasayloan?

Hatagi ang mga estudyante og kahigayonan sa pagpahayag unsay ilang nakat-onan atol niini nga leksiyon. Usa ka paagi sa pagbuhat niini mao ang pagpasulat sa mga estudyante og tubag sa mosunod nga senaryo diha sa ilang mga journal sa pagtuon. Kon mahuman na, ikonsiderar ang pagdapit og pipila ka mga estudyante sa pagpakigbahin sa unsay ilang gisulat.

Handurawa nga adunay nangutana kanimo kon unsay nakapalahi sa imong simbahan kaysa sa uban. Unsaon nimo pagtubag niini nga tawo sa paagi nga makatabang niya nga gustohon pa nga makahibalo og dugang mahitungod sa Simbahan? Mahimo nimong iapil ang mosunod diha sa imong tubag:

1. Unsa ang imong nakat-onan karon gikan sa pagpamatuod sa Ginoo mahitungod sa Iyang Simbahan ug unsay imong gibati mahitungod niana nga pagpamatuod

2. Mga paagi nga imong gibati o nakita nga ang Simbahan tinuod o buhi

3. Mga panalangin nga imong nasinati isip miyembro sa Simbahan ni Kristo

Mahimo nimong taposon pinaagi sa pagpakigbahin sa imong kaugalingong pagpamatuod sa mga panalangin sa tinuod ug buhi nga Simbahan ni Jesukristo ug sa unsang paagi ang pagkasakop niini nakatabang nimo nga mas maduol ngadto sa Manluluwas.

Isag-ulo

Mahimo nimong tabangan ang mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan atol niini nga leksiyon ug i-rebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Mao lamang ang tinuod ug buhi nga simbahan.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Ang Simbahan ni Jesukristo sa mga Santos sa Ulahing mga Adlaw mao lamang ba ang simbahan nga adunay kamatuoran?

Si Presidente Dallin H. Oaks sa Unang Kapangulohan mitudlo:

Tungod niining deklarasyon sa Ginoo, kita mipasabot niini, ang Simbahan Niya—atong Simbahan—mao “lamang ang tinuod nga Simbahan.” Usahay ato kining gibuhat sa paagi nga naghatag og dakong kasilo sa mga tawo nga anaa sa ubang mga simbahan o kinsa midawat sa ubang mga pilosopiya. Apan ang Dios wala magtudlo kanato og bisan unsang butang nga makapabati kanato nga labaw kaysa ubang mga tawo. Sigurado nga ang tanang mga simbahan ug mga pilosopiya adunay mga elemento sa kamatuoran, ang pipila mas labaw kay sa uban. Sigurado ang Ginoo nahigugma sa tanan Niyang mga anak. Ug sigurado nga ang Iyang plano sa ebanghelyo alang sa tanan Niyang mga anak, nag-agad ang tanan sumala sa Iyang kaugalingon nga panahon. (Dallin H. Oaks, “Mao Lamang Ang Tinuod ug Buhi nga Simbahan,” Liahona, Ago. 2011, 49)

Nganong gikinahanglan nato ang Simbahan?

Si Elder D. Todd Christofferson sa Korum sa Napulog Duha ka Apostoles mitudlo:

Importante nga masabtan nga ang labing mahinungdanong katuyoan sa Dios mao ang atong pag-uswag. Ang Iyang tinguha mao nga kita makaangkon og “grasya ug dugang pa nga grasya, hangtud nga [kita makadawat] sa kahingpitan” [Doktrina ug mga Pakigsaad 93:13] sa tanan Niya nga mahatag. Nagkinahanglan kana og labaw pa kay sa pagminaayo lang o mobati og pagkaespirituhanon. Nagkinahanglan kana og hugot nga pagtuo diha ni Jesukristo, paghinulsol, pagbunyag sa tubig ug sa Espiritu, ug sa paglahutay inubanan sa hugot nga pagtuo hangtod sa kataposan. Dili kini hingpit nga makab-ot kon mag-inusara, mao nga usa ka dakong rason nga ang Ginoo adunay usa ka simbahan mao ang pagmugna og usa ka komunidad sa mga Santos nga mosuporta sa usag usa diha sa “higpit ug pig-ot nga dalan nga padulong sa kinabuhing dayon” [2 Nephi 31:18]. (D. Todd Christofferson, “Nganong Anaa ang Simbahan,” Liahona, Nob. 2015, 108)

Dugang nga mga Kalihokan sa Pagkat-on

Usa ka tinuod nga simbahan nga gipangulohan sa dili hingpit nga mga tawo

Kini nga kalihokan mahimong makatabang kon ang imong mga estudyante adunay mga pangutana kon sa unsang paagi adunay dili hingpit nga mga lider o administrasyon sa Simbahan diha sa tinuod nga Simbahan ni Jesukristo. Si Elder Dale G. Renlund sa Korum sa Napulog Duha ka Apostoles ug ang iyang asawa, si Ruth, mipakigbahin og analohiya kon sa unsang paagi ang Dios molihok pinaagi sa dili hingpit nga mga tawo aron sa pagpahinabo sa kaluwasan. Ikonsiderar ang pagpakita sa mosunod nga bidyo gikan sa time code 1:03 hangtod sa 5:48. Mahimo nimong hunongon ang bidyo sa time code 4:16 aron tugotan ang mga estudyante nga hisgotan kon unsa ang kahulogan nga ilang nakit-an diha sa analohiya. Human sa inyong diskusyon, mahimo nimong i-play ang nahabilin nga bidyo.

Ang ikasiyam nga artikulo sa hugot nga pagtuo

Aron mapasabot pa kon unsa ang gipasabot nga ang Simbahan ni Jesukristo “buhi,” ikonsiderar ang pagdapit sa mga estudyante sa pagbasa sa ikasiyam nga artikulo sa hugot nga pagtuo, mangita kon sa unsang paagi kini nagpakita sa “buhi” nga kinaiya sa Simbahan. Mahimo usab nga maghimo og cross-reference ang mga estudyante tali niini nga artikulo sa hugot nga pagtuo ug sa Doktrina ug mga Pakigsaad 1:30. Mahimo nimong pangutan-on ang mga estudyante kon giunsa nila pagsaksi ang Langitnong Amahan nga nagpadayon sa pagpadayag sa kamatuoran pinaagi sa buhing mga propeta.

Pagpakigbahin og pagpamatuod mahitungod sa Simbahan

Ikonsiderar ang pagdapit sa mga estudyante nga pormal nga mopakigbahin og pagpamatuod bahin sa Simbahan. Mahimo nimong ipakigbahin una ang mosunod nga pagpamatuod gikan ni Presidente Henry B. Eyring sa Unang Kapangulohan:

“Akong ihatag kaninyo ang akong balaanong pagpamatuod nga kini mao ang tinuod ug buhi nga Simbahan ni Jesukristo. Ang Langitnong Amahan motubag sa inyong kinasingkasing nga mga pag-ampo aron makahibalo niana alang sa inyong mga kaugalingon. … Dugang pa, kamo makahibalo nga dinhi niini nga Simbahan, ang mga ordinansa gipahigayon nga makalimpyo sa mga kalag ug makabugkos dinhi sa yuta ug sa langit, sama sa mga adlaw ni Pedro, Santiago, ug Juan. Kadtong mga yawe ug mga ordinansa gipahiuli na karon sa kahingpitan niini pinaagi ni Propeta Joseph Smith ug gipasa ngadto sa mga nagsunod kaniya. Si Jesus mao ang Kristo. Siya buhi. Ako nasayod niana” (Henry B. Eyring, “Ang Tinuod ug Buhi nga Simbahan,” Liahona, Mayo 2008, 24).

Mahimo dayon kang mangutana kon aduna bay mga estudyante nga gustong mopakigbahin sa ilang pagpamatuod sa tinuod ug buhi nga Simbahan. Ikonsiderar usab ang pagpakigbahin sa imong kaugalingong pagpamatuod.