Leksyon 6: Doktrina ug mga Pakigsaad 1

Doktrina ug mga Pakigsaad 1:37–38

“Bisan pinaagi sa Akong Kaugalingon nga Tingog o pinaagi sa Tingog sa Akong mga Sulugoon, Kini Managsama ra”

Sa pagtapos sa Iyang dinasig nga pasiuna sa Basahon sa mga Sugo (karon ang Doktrina ug mga Pakigsaad), ang Ginoo mipamatuod nga Siya nakigsulti kanato pinaagi sa Iyang mga propeta. Kini nga leksiyon makatabang sa mga estudyante sa pagtuon sa mga pulong sa Ginoo pinaagi sa mga kasulatan ug pinaagi sa mga pulong sa mga propeta sa modernong panahon.

Mga Posibleng Kalihokan sa Pagkat-on

Nganong gusto man natong maminaw sa Ginoo?

Mahimong epektibo ang pagsugod pinaagi sa pagtan-aw sa “#PaminawKaniya: Si Presidente Nelson Nagdapit Kanato sa Pagpaminaw sa Tingog sa Ginoo,” anaa sa ChurchofJesusChrist.org, gikan sa time code 0:00 hangtod sa 1:14.

Ikonsiderar ang pagdapit sa mga estudyante sa pagpakigbahin kon unsay ilang naganahan o nakat-onan gikan sa bidyo. Dayon hangyoa sila sa pagpiyong sa ilang mga mata ug paghanduraw sa mosunod nga senaryo samtang namalandong sa mga pangutana sa ubos. Dapita ang mga estudyante sa pagpakigbahin sa ilang mga tubag kon kini dili kaayo personal.

Handurawa nga naa kay kahigayonan nga makauban sa usa ka lawak ang Manluluwas, si Jesukristo.

• Ngano kaha nga gusto nimong makigsulti ug maminaw Kaniya?

• Unsa nga mga hilisgotan ang gusto nimong hisgotan sa Manluluwas diha kanimo o hatagan og direksiyon? Ngano man?

• Sa unsang paagi kaha sa imong hunahuna ang kasinatian mahimong makaapekto diha kanimo?

Samtang magtuon ka niini nga leksiyon, pagtinguha og giya gikan sa Espiritu Santo aron sa pagtabang kanimo nga makahibalo kon sa unsang paagi nimo madungog ang mga pulong sa Manluluwas ug sa unsang paagi kini personal nga makapanalangin kanimo.

Unsaon nato sa pagpaminaw sa Manluluwas sa atong mga kinabuhi

Ang Manluluwas nahigugma kanato ug gusto nga kita padayong maningkamot sa pagpaminaw sa Iyang tingog. Sa kataposan sa pasiuna sa Doktrina ug mga Pakigsaad, ang Manluluwas mihatag og gibug-aton sa pipila ka mga paagi nga Siya nakigsulti kanato.

Basaha ang Doktrina ug mga Pakigsaad 1:37–38, mangita niadtong mga paagi nga Siya nakigsulti kanato. Mahimong makatabang ang paghinumdom nga ang pulong nga “mga sugo” nagpasabot sa Basahon sa mga Sugo (o Doktrina ug mga Pakigsaad).

Ang Doktrina ug mga Pakigsaad 1:37–38 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali nila kining makit-an.

• Unsay imong nakat-onan gikan niini nga mga bersikulo?

  Mahimo nimong hangyoon ang mga estudyante sa pagpakigbahin sa ilang mga panabot. Mahimong hisgotan nila nga ang Ginoo nakigsulti kanato pinaagi sa mga kasulatan ug sa Iyang mga propeta. Kon dili, ikonsiderar ang paggunit og kopya sa Doktrina ug mga Pakigsaad, usa ka hulagway sa mga propeta sa modernong panahon, ug usa ka hulagway sa Manluluwas ug pangutana kon unsay anaa nila nga managsama sumala sa Doktrina ug mga Pakigsaad 1:38. Ikonsiderar ang pagdapit sa mga estudyante sa pagmarka og hugpong sa mga pulong nga nagtudlo sa mosunod nga kamatuoran: bisan pinaagi sa Iyang kaugalingon nga tingog o pinaagi sa tingog sa Iyang mga sulugoon, kini managsama ra.

  Kon kini mapuslanon, isulat diha sa pisara ang mosunod nga mga bersikulo ug dapita ang mga estudyante sa pagbasa sa usa o duha niini, mangita kon unsay ilang gitudlo nga nagpamatuod sa kamatuoran sa ibabaw: Deuteronomio 18:18; Doktrina ug mga Pakigsaad 18:33–36; 21:4–6. Mahimong gustohon sa mga estudyante nga irekord kini nga mga bersikulo isip mga cross-reference sa Doktrina ug mga Pakigsaad 1:38.

• Ngano kaha nga usahay lisod nga gustohon ang magtuon sa mga pulong sa Ginoo?

• Sa unsang paagi nga ang kamatuoran nga atong nahibaloan, o ubang mga hugpong sa mga pulong sa Doktrina ug mga Pakigsaad 1:37–38, makadasig kanimo sa pagtuon sa mga pulong sa Ginoo?

Ngano nga gusto natong tun-an ang Iyang mga pulong

Tan-awa ang mosunod nga bidyo ug basaha ang mosunod nga pamahayag, mangita sa mga rason nga mahimong gustohon nimo nga tun-an ang mga pulong sa Ginoo pinaagi sa mga kasulatan ug pinaagi sa mga pulong sa mga propeta sa modernong panahon:

• “Giunsa Nako #PagpaminawKaniya: Elder David A. Bednar” (1:15)

Si Sister Carol F. McConkie, kanhi magtatambag sa Kinatibuk-ang Kapangulohan sa Young Women, mitudlo:

[Ang mga propeta sa ulahing mga adlaw] mamulong diha sa ngalan ni Kristo. Sila managna diha sa ngalan ni Kristo. Sila mobuhat sa tanang butang sa ngalan ni Jesukristo. Sa ilang mga pulong atong madungog ang tingog sa Ginoo ug atong mabati ang gugma sa Manluluwas. (Carol F. McConkie, “Pagpuyo sumala sa mga Pulong sa mga Propeta,” Liahona, Nob. 2014, 78)

• Unsa ang imong nagustohan o nakat-onan gikan niini nga bidyo ug pamahayag?

  Hatagi ang mga estudyante og panahon sa pagpamalandong sa mosunod nga pangutana sa dili pa mohangyo og mga boluntaryo nga mopakigbahin. Samtang namalandong ang mga estudyante, ikonsiderar ang pagpakigbahin og personal nga ehemplo nga mahimo silang makakonektar. Ang pagbuhat sa ingon mahimong makatabang kanila sa paghunahuna sa ubang mga ehemplo.

• Kanus-a ka (o usa ka tawo nga imong kaila) mibati nga nakadawat og mensahe gikan sa Ginoo pinaagi sa mga kasulatan o pinaagi sa mga pulong sa mga propeta sa modernong panahon?

Pagbansay

Ang mosunod nga kalihokan gituyo aron sa pagtabang sa mga estudyante nga mas maduol ngadto sa Manluluwas samtang nagtuon sa mga pulong sa Iyang mga sulugoon. Siguroa nga hatagan ang mga estudyante og dakong panahon sa pagkompleto niini ug ipakigbahin ang ilang mga hunahuna pagkahuman.

1. Paggahin og pipila ka minuto sa pagpangita sa pipila sa mosunod nga mga bersikulo ug sa mga pulong sa mga propeta sa modernong panahon. Samtang magtuon ka, handurawa nga ang Ginoo nagsulti niini nga mga pulong nganha kanimo. (Kini usa ka makatabang nga kahanas sa pagtuon nga imong magamit sa matag higayon nga magtuon ka sa mga kasulatan.) Ikonsiderar ang pagmarka kon unsa ang makahuloganon alang kanimo.

   Doktrina ug mga Pakigsaad 6:34–37; 10:5; 19:23; 27:15–18; 58:26–28; 68:5–6; 78:18–19; 82:10; 98:1–3; 112:10. (O pagpili og laing mga bersikulo diha sa Doktrina ug mga Pakigsaad.)

   Kon imong gibati nga mas mohaom kini sa mga panginahanglan sa imong mga estudyante, imbes sa mosunod, ikonsiderar ang paghugpong og pipila ka bag-ohay lang nga mga kinutlo gikan sa mga propeta nga hilabihang magamit sa imong mga estudyante. Siguroa nga aduna kay pipila ka mga kopya sa labing bag-o nga isyu sa kinatibuk-ang komperensiya sa Liahona nga magasin.

2. Tun-i ang pipila o ang tanan sa bag-o lang nga pakigpulong sa kinatibuk-ang komperensiya nga imong gibati nga personal nga makatabang kanimo.

   Dapita ang mga estudyante sa pagpakigbahin sa ilang mga kasinatian. Ang mosunod nga mga pangutana mahimong mapuslanon:

3. Unsay imong nakat-onan?

4. Sa unsang paagi kini nakaapekto sa imong pagtuon ang paghanduraw sa Manluluwas nga namulong niadtong mga pulong diha kanimo?

5. Sa unsang paagi nga ang pagbuhat niini kanunay diha sa imong personal nga pagtuon makaimpluwensiya sa imong relasyon sa Manluluwas?

Samtang mopakigbahin ang mga estudyante, pangita og mga paagi sa paghatag og gibug-aton nga ang Ginoo nakigsulti gihapon kanato pinaagi sa mga kasulatan ug sa buhi nga mga propeta.

Sa pagtapos, isulat diha sa imong journal sa pagtuon kon unsay gusto nimong buhaton aron mas maduol ngadto sa Manluluwas pinaagi sa mga pulong sa Iyang mga sulugoon. Ang pipila ka mga ideya mahimong:

• Tun-i kanunay ang Doktrina ug mga Pakigsaad sama nga ang Ginoo namulong kanimo.

• Paminawa ang mga pulong sa mga propeta samtang nangandam ka alang sa eskwelahan sa buntag o sa pagkatulog sa gabii o sa laing panahon nga mas mapuslanon diha kanimo.

Isag-ulo

Mahimo nimong tabangan ang mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa Doktrina ug mga Pakigsaad 1:37–38 ug i-rebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Nganong kinahanglan nga maminaw man ko sa mga propeta nga daw namulong sila alang sa Ginoo?

Si Presidente M. Russell Ballard sa Korum sa Napulog Duha ka Apostoles mitudlo:

Dili kini basta-basta lamang nga butang, akong mga kaigsoonan, ang pagkaadunay propeta sa Dios sa atong taliwala. Katalagsaon ug katingalahan sa mga panalangin nga moabot sa atong mga kinabuhi samtang maminaw kita sa mga pulong sa Ginoo nga gihatag ngari kanato pinaagi kaniya. … Kon makadungog kita og tambag sa Ginoo nga gipahayag pinaagi sa mga pulong sa Presidente sa Simbahan, kinahanglan nga positibo ang atong pagsanong ug diha-diha dayon. Ang kasaysayan nagpakita nga adunay kasiguroan, kalinaw, kauswagan ug kalipay sa pagsanong sa propetikanhong tambag. (M. Russell Ballard, “His Word Ye Shall Receive,” Ensign, Mayo 2001, 65)

Unsa ang akong buhaton kon ako naglisod o wala makasabot sa gisulti sa mga propeta?

Si Presidente Russell M. Nelson mitudlo:

Ang Ginoo misaad kanato nga Siya dili gayod motugot sa propeta nga mopahisalaag kanato. Si Presidente Harold B. Lee [1899–1973] mideklarar: “Mahimo nga kamo dili makauyon unsa ang moabut gikan sa awtoridad sa Simbahan. Mahimo nga kini mosupak sa inyong politikanhong mga panglantaw. Mahimo nga kini supak sa inyong sosyal nga mga panglantaw. Mahimo kining mosamok sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa baba sa Ginoo Mismo, uban ang pagpailob ug hugot nga pagtuo, ang saad mao ‘ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahom sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan’ (D&P 21:6)” [Mga Pagtulun-an sa mga Presidente sa Simbahan: Harold B. Lee (2000), 101].

Kamo dili kanunay makasabot sa matag pahayag sa buhi nga propeta. Apan kon kamo nasayod nga ang propeta usa ka propeta, kamo makaduol sa Ginoo sa kamapainubsanon ug hugot nga pagtuo ug mangayo alang sa inyong kaugalingong saksi kabahin sa bisan unsa nga giproklamar sa Iyang propeta. (Russell M. Nelson, “Pagkahimo nga Tinuod nga mga Milenyal” [tibuok kalibotan nga debosyonal alang sa mga young adult, Ene. 10, 2016], broadcasts.ChurchofJesusChrist.org)

Dugang nga mga Kalihokan sa Pagkat-on

Ang kasinatian sa usa ka batan-ong babaye

Human mipakigbahin ang mga estudyante sa mga rason nganong ganahan silang magtuon sa mga pulong sa Ginoo, ikonsiderar ang pagpakigbahin sa mosunod nga kasinatian sa usa ka batan-ong babaye sa unang mga adlaw sa Simbahan kinsa mitratar sa mga kasulatan isip pulong sa Ginoo:

Si Mary Elizabeth Rollins 12 anyos sa dihang iyang gikombinsi ang iyang silingan sa pagpahulam kaniya sa iyang Basahon ni Mormon, ang bugtong kopya sa maong dapit. Iyaha kining gitun-an hangtod sa lawom nga kagabhion ug sa ulahi natapos ang tibuok basahon. Sa dihang si Propeta Joseph Smith mibisita ug nakadungog mahitungod sa iyang pagtuon, siya misulti kaniya sa pagtipig sa libro ug misaad nga siya mokuha og laing kopya alang sa iyang silingan.

Usa o duha ka tuig ang milabay, nakita ni Mary ang pipila sa bag-ong giimprinta nga mga pahina sa mga pagpadayag gikan sa Ginoo nga ilakip sa Basahon sa mga Sugo (karon ang Doktrina ug mga Pakigsaad) ug naminaw sa mga lider sa Simbahan nga nagbasa ug naghisgot niini. Mibati siya og kusog nga impresyon gikan sa Espiritu Santo ug lawom nga balaang pagtahod sa mga pagpadayag. (Tan-awa sa Mga Santos, 1:204.)

Sa dihang si Mary nag-edad og 15, giguba sa nasuko nga panon sa mga manggugubot ang printahanan sa Simbahan sa wala pa mamantala ang basahon ug gisabwag ang mga pahina niadto nga mga pagpadayag. Si Mary ug ang iyang manghod nga babaye naghulat hangtod nga ang panon sa mga manggugubot mitalikod, dayon mirisgo sa ilang mga kinabuhi aron sa pagluwas sa mga pahina. Sa dihang ang pipila sa mga manggugubot nakakita kanila ug migukod, ang duha ka mga babaye nilusot agi sa usa ka lungag sa koral ug mitago sa usa ka maisan samtang ang mga sakop sa manggugubot wala nagmalamposon sa pagpangita kanila. Sa kadugayan si Mary gihatagan og usa ka basahon niadto nga mga pagpadayag, nga iyang “gipakabililhon pag-ayo.” (Tan-awa sa “Autobiography of Mary E. Lightner,” Utah Genealogical and Historical Magazine, vol. 17 (1926), 193–96.)

• Sa unsang mga paagi gitratar ni Mary Elizabeth Rollins ang mga kasulatan sama sa mga pulong sa Manluluwas?

• Unsa ang pipila ka mga paagi nga atong matratar ang mga kasulatan nga sama sa mga pulong sa Manluluwas karon?

Aduna usab mga mas kasamtangan nga mga ehemplo sa mga indibidwal nga nakakat-on sa pagmahal sa Doktrina ug mga Pakigsaad isip pulong sa Dios (tan-awa sa Jennifer Ricks, “Learning to Love the Doctrine and Covenants,” New Era, Abr. 2012, 26).

Gamita ang mga pulong sa mga propeta sa mga debosyonal

Dapita ang mga estudyante sa pagpadayon sa pagtuon sa mga bersikulo sa kasulatan ug sa mga pulong sa mga propeta sa ulahing mga adlaw. Dapita sila nga magpuli-puli sa pagpakigbahin sa unsay ilang nangakat-onan sa umaabot nga mga klase sa debosyonal. Dasiga sila sa pagpakigbahin sa unsay ilang gibati nga gusto sa Ginoo nga ilang mahibaloan o sa unsang paagi ang mga kamatuoran sa ebanghelyo makapanalangin kanato karon.

Aron makadungog sa tingog sa Ginoo

Bisan tuod aduna kitay paagi sa pagkahibalo sa mga pulong sa Ginoo, dili kita kanunay maminaw ug makaila niini. Ikonsiderar ang pagdapit sa mga estudyante sa pagbasa sa 3 Nephi 11:1–5, hatagan og pagtagad unsa ang gibuhat sa mga tawo aron maminaw sa tingog sa Dios. Hisgoti kon unsay atong mahimo aron mas makapaminaw sa tingog sa Ginoo diha sa atong mga kinabuhi. Ikonsiderar ang pagtan-aw og usa o daghan pa sa #PaminawKaniya nga mga bidyo, diin ang mga lider sa Simbahan mihatag og mga ehemplo kon giunsa nila pagpaminaw ang Ginoo. Ang mga bidyo anaa sa ChurchofJesusChrist.org.