“Lēsoni 4—Tokāteline mo e Ngaahi Fuakava 1: ‘Ko e Leʻo ʻo e ʻEikí ʻOku Fai Ia ki he Ngaahi Ngataʻanga ʻo e Māmaní,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 1,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 4: Tokāteline mo e Ngaahi Fuakava 1
Tokāteline mo e Ngaahi Fuakava 1
“Ko e Leʻo ʻo e ʻEikí ʻOku Fai Ia ki he Ngaahi Ngataʻanga ʻo e Māmaní”
Kimuʻa pea paaki e Tohi ʻo e Ngaahi Fekaú, ʻa ia ne hoko kimui ko ha konga ʻo e Tokāteline mo e Ngaahi Fuakavá, naʻe kole ʻa e Palōfita ko Siosefa Sāmitá ki he ʻEikí ke ʻomi ha talamuʻaki ki he tohí. Ko e talí, naʻe fakahā ai ʻe he ʻEikí ʻa e meʻa ʻoku hoko he taimí ni ko e vahe 1 ʻo e Tokāteline mo e Ngaahi Fuakavá ko ha talateu ʻo e ngaahi fakahā ki he māmaní. ʻE lava ke tokoni e lēsoni ko ʻení ke mahino ki he kau akó ʻa e ʻuhinga ʻoku ʻomi ai ʻe he ʻEikí ha ngaahi fakatokanga ki he māmaní.
Ngaahi ʻEkitivitī Ako ʻOku Ala Fakahokó
“Ko e leʻo ʻo e fakatokangá”
Fakakaukau ke fakaʻaongaʻi e tūkunga ko ʻení pe ko ha meʻa ʻoku feʻunga taha mo e ngaahi fiemaʻu hoʻo kau akó ke tokoni ke teuteuʻi kinautolu ke fakalaulauloto ki he ʻuhinga ʻe fakatokanga ai ha taha ki ha taha kehe.
Fakakaukauloto ʻoku fai ʻe ha kaungāmeʻa ha fili ʻe fakaiku ki ha ngaahi nunuʻa kovi.
Fakaafeʻi e kau akó ke vahevahe ha ngaahi sīpinga moʻoni ʻo e fili ko ʻení. ʻE lava ke kau ʻi he ngaahi sīpingá ʻa e loi ki he mātuʻá, maumauʻi e Lea ʻo e Potó, kākā ʻi he akó, pe mavahe mei he Siasí.
-
Ko e hā ka ke fie fakatokanga ai ki ho kaungāmeʻá fekauʻaki mo e fili ko ʻení?
ʻOku ʻomi foki ʻe he Fakamoʻuí ha “leʻo ʻo e fakatokangá” (Tokāteline mo e Ngaahi Fuakava 1:4). Fakalaulauloto ki he ngaahi fehuʻi ko ʻení:
-
Ko e hā ka fakatokanga mai ai ʻa e Fakamoʻuí kiate kitautolú? Ko e hā ka Ne fakatokanga fakataautaha atu ai kiate koé? ʻO fēfē?
-
Ko e hā ‘oku akoʻi atu ʻe he meʻá ni fekauʻaki mo Iá?
ʻI hoʻo ako ʻa e lēsoni ko ʻení, kumi ha tali ki he ngaahi fehuʻi ko ʻení.
Ko e leʻo fakatokanga ʻo e ʻEikí ʻoku maʻá e kakai kotoa pē
ʻE lava ke tokoni ʻa e fakamatala ko ʻení ke mahino ki he kau akó ʻa e hisitōlia ʻo e founga naʻe maʻu ai ʻa e talamuʻaki ki he Tokāteline mo e Ngaahi Fuakavá.
ʻI he aʻu ki Nōvema ʻo e 1831, kuo hiki ʻe he Palōfita ko Siosefa Sāmitá ha ngaahi fakahā mei he ʻEikí naʻe laka hake ʻi he 60. Ka neongo ia, ko ha tokosiʻi pē ʻo e kāingalotu ʻo e Siasí ne nau maʻu ha tatau ʻo e ngaahi fakahaá. Fakatatau mo e fakahinohino ʻa e Palōfitá, naʻe fakatahatahaʻi ʻa e ngaahi fakahaá ʻi ha tohi folofola foʻou naʻe ui ko e Tohi ʻo e Ngaahi Fekaú, ʻa ia naʻe hoko kimui ange ko ha konga ʻo e Tokāteline mo e Ngaahi Fuakavá. ʻI he ʻamanaki ke paaki ʻa e tohí, naʻe kole ʻe Siosefa ki he ʻEikí ʻi ha lotu ki ha talateu ʻo e tohí. Ko e talí, naʻá ne maʻu ʻi he fakahā ʻa e vahe 1, ʻa ia naʻe ui ʻe he ʻEikí ko “ʻeku talamuʻaki” (Tokāteline mo e Ngaahi Fuakava 1:6) ki he tohi folofola foʻou ko ʻení.
Fakakaukau ke hiki e ongo fehuʻi mo e ngaahi potufolofola ko ʻení ʻi he palakipoé. ʻE lava ke kumi fakafoʻituitui pe fakakulupu iiki ʻe he kau akó ʻa e ngaahi talí. Kapau te nau ngāue ʻi ha fanga kiʻi kulupu iiki, mahalo ʻe fie fakamatalaʻi fakanounou ʻe he kau akó ʻa e meʻa ne nau maʻu ʻi heʻenau ngaahi kulupú kimuʻa pea nau toki vahevahe mo e kalasí.
Fakaʻaongaʻi hoʻo folofolá ke tali ʻaki e ongo fehuʻi ko ‘ení:
-
Ko hai ʻoku fakatokanga ki ai ʻa e Fakamoʻuí he ʻaho ní? (vakai, Tokāteline mo e Ngaahi Fuakava 1:1–4, 34–36; mahalo ʻe tokoni ke ʻiloʻi ko e “filifilimānako ki he kakaí” [veesi 35] ko ha taha ia ʻokú ne ʻofeina ha taha ʻo lahi ange ʻi ha taha kehe).
-
ʻOku fakahoko fēfē ʻe he ʻEikí ʻEne pōpoakí? (vakai, Tokāteline mo e Ngaahi Fuakava 1:4–6).
ʻI he fakakaukau ʻa e kau akó ki heʻenau ngaahi talí, mahalo ʻe tokoni ke hiki ʻa e fakamatala ko ʻení ʻi he palakipoé: Ko e leʻo fakatokanga ʻo e Fakamoʻuí ʻoku maʻá e kakai kotoa pē.
Ko e leʻo fakatokanga ʻo e ʻEikí ko ha fakamoʻoni ia ʻo ʻEne ʻofá
ʻI he Tokāteline mo e Ngaahi Fuakava 1, ʻoku fakahā ai ʻe he Fakamoʻuí ha ngaahi ʻuhinga lahi ʻokú Ne fai ai ha ngaahi fakatokanga ki he māmaní. ʻI hoʻo akó, fakalaulauloto ki he founga ʻe lava ke hoko ai e ngaahi ʻuhinga ko ʻení ko ha fakamoʻoni ʻo hono tāpuakiʻi kitautolu ʻe he Fakamoʻuí.
Lau ʻa e Tokāteline mo e Ngaahi Fuakava 1:11–17, 21–28, pea kumi e ngaahi ʻuhinga ʻoku ʻomi ai ʻe he ʻEikí ha ngaahi fakatokangá.
Fakakaukau ke vaeua ʻa e kalasí. Vahe ki he vaeua ʻe taha ke nau lau ʻa e veesi 11–17 pea lau ʻe he vaeua ʻe tahá ʻa e veesi 21–28. Ka fiemaʻu ʻe he kau akó ha fakahinohino lahi ange, te ke lava ʻo faʻu ha saati kōlomu ʻe ua. Fakakau ʻa e ngaahi veesi ʻi he kōlomu ʻuluakí, pea tuku ke hiki ʻe he kau akó ʻa e ʻuhinga ʻo e fakatokangá ʻi he kōlomu hono uá. ʻE lava ke maʻu ʻe he kau akó ha ngaahi tali ʻo hangē ko ʻení:
-
1:12 ke teuteuʻi kitautolu ki he meʻa ʻe hoko maí
-
1:15–17 ke fakatokanga mai fekauʻaki mo e ngaahi faingataʻa mo e angahala ʻi hotau kuongá ni
-
1:21 ke fakatupulaki ʻetau tuí
-
1:22 ke fokotuʻu ʻa e fuakava taʻengata ʻa e ʻEikí
-
1:26 ke fakahinohinoʻi kitautolu
-
1:27 ke tauteaʻi mo fakatonutonu kitautolu ʻi he taimi ʻoku tau faiangahala aí
-
1:27 ke tokoniʻi kitautolu ke tau fakatomala
-
1:28 ke ʻomi kiate kitautolu ʻa e ʻiló
Fakakaukau ke fakaafeʻi ha kau ako ʻe niʻihi ke vahevahe ʻa e meʻa ne nau akó ʻaki hono fakaʻaongaʻi ʻa e ueʻi ko ʻení.
Fili ha taha ʻo e ngaahi ʻuhinga naʻá ke ʻilo ai ʻoku folofola mai ʻa e ʻEikí kiate kitautolú, pea tali ha fehuʻi ʻe taha pe ua mei heni:
-
ʻOku hoko fēfē ʻa e ʻuhinga ko ʻení ko ha fakamoʻoni ʻo e ʻofa ʻa e Fakamoʻuí? ʻE hoko fēfē nai ʻa e ʻuhinga ko ʻení ko ha tāpuakí?
-
Ko e fē ha taimi kuó ke aʻusia ai ʻa e tāpuaki ko ʻení, pe ko e hā te ke fiemaʻu ai ʻa e tāpuaki ko ʻení ʻi hoʻo moʻuí?
-
Ko e hā ʻoku fiemaʻu ai ʻe he māmaní kotoa ʻa e tāpuaki ko ʻení?
ʻOku founga fēfē nai e fakatokanga mai ʻa e Fakamoʻuí ʻi hotau kuongá ni?
ʻE lava ke tokoni ʻeni ki he kau akó ke vahevahe ʻa e meʻa kuo nau akó. Mahalo te ke fie ʻoange ha pepa pe fakaafeʻi e kau akó ke fakaʻaongaʻi ʻenau tohinoa akó. Poupouʻi e kau akó ke nau mohu founga ʻi he founga ʻoku nau vahevahe ai ʻenau pōpoakí. Te ke lava ʻo ʻoange naunau tā fakatātā kapau ʻoku maʻu.
Fakakaukauloto ki hoʻo lēsoni ʻi he Sāpate ko ʻení, ʻoku fakaafeʻi koe ʻe hoʻo faiakó ke ke fakaʻaongaʻi ha ngaahi miniti siʻi ke vahevahe ʻa e ʻuhinga ʻoku fakatokanga mai ai ʻa e ʻEikí kiate kitautolu he ʻaho ní. Fakakaukau ki he founga te ke vahevahe ai ʻa e pōpoaki ko ʻení mo hoʻo kalasí ʻi ha founga mahuʻingamālie. Teuteu ha laʻipepa tufa, meme, pousitā, pe ha toe founga makehe ki hono vahevahe ʻo e pōpoaki ko ʻení mo hoʻo kalasí. Kātaki ʻo fakakau ʻa e ngaahi meʻá ni:
-
Ko ha veesi mei he Tokāteline mo e Ngaahi Fuakava 1 ʻoku vahevahe ai ha ʻuhinga ʻe taha ʻoku fakatokanga ai ʻa e ʻEikí ki he kakai kotoa pē
-
Ko ha sīpinga ʻo e fakatokanga ʻa e ʻEikí kiate kitautolu ʻi hotau kuongá ni (Kapau te ke fili ʻoku fakatokanga mai ʻa e ʻEikí kiate kitautolu fekauʻaki mo e ngaahi faingataʻa fakamāmaní mo e ngaahi angahalá [vakai, Tokāteline mo e Ngaahi Fuakava 1:15–17], te ke lava ʻo vahevahe ha veesi mei he folofolá pe ngaahi lea ʻa ha palōfita ʻi onopooni ʻokú ne fakatokanga mai ai fekauʻaki mo e ngaahi ʻahiʻahi ʻi onopōní.)
-
Ko hoʻo ngaahi fakakaukau mo e ongo fekauʻaki mo hono vahevahe mai ʻe he ʻEikí ha ngaahi pōpoaki fakatokanga he ʻaho ní. Te ke lava foki ʻo fakakau ai haʻo aʻusia.
ʻI he vahevahe ʻa e kau akó, kumi ha ngaahi founga ke fakahikihikiʻi mo fakamālō ai kiate kinautolu ʻi heʻenau ngāue fakamātoató pea mo fakamamafaʻi ʻa e ʻofa ʻa e Fakamoʻuí ʻo fakafou ʻi he ngaahi pōpoaki ʻokú Ne ʻomi he ʻaho ní.
Ki ha ako lahi ange ki he founga ke tokoniʻi ʻa e kau akó ke nau ʻiloʻi ʻokú ke mahuʻingaʻia ʻi heʻenau ngaahi fakamatalá, vakai ki he “ʻAi ke ʻilo ʻokú ke mahuʻingaʻia he fānau akó kimuʻa pea nau fakamatala pe hiki honau nimá ke fakamatalá.” ʻOku maʻu e ako ko ʻení ʻi he Fakatupulaki ʻa e Ngaahi Taukei ʻa e Faiakó: ʻOfa ʻi he Niʻihi ʻOkú Ke Akoʻí.