Lesona 5: Mataupu Faavae ma Feagaiga 1

Mataupu Faavae ma Feagaiga 1:30–33

“O Le Ekalesia Moni ma Ola e Tasi”

I Lana faatomuaga i le Mataupu Faavae ma Feagaiga, na folafola mai ai e le Alii le taua o le Ekalesia toefuataiina fou a Iesu Keriso. Sa ia tautino mai o le Ekalesia “o le ekalesia moni ma ola e tasi i luga o le fogaeleele atoa” (Mataupu Faavae ma Feagaiga 1:30). O lenei lesona ua faamoemoe e fesoasoani i tagata aooga ia lagonaina le taua O Le Ekalesia a Iesu Keriso o le Au Paia o Aso e Gata Ai o le ekalesia moni e tasi.

Gaoioiga E Ono Mafai Ona Aoao Ai

O le Ekalesia a le Alii

Ina ia amata le lesona, e mafai ona e faasoa atu le fesili lenei ma ana faamatalaga o loo avatu faatasi ai ma valaaulia ni nai tagata aooga e faasoa mai a latou tali.

Aisea e ala ai ona malilie pe lē malilie nisi tagata i faamatalaga nei?

1. Ou te manatu ou te le manaomia se lotu.

2. E tutusa lava le moni o lotu uma.

3. O Le Ekalesia a Iesu Keriso o le Au Paia o Aso e Gata ua na’o le pau lea o le ekalesia moni.

E mafai ona e fai atu i tagata aooga e iloilo le leoa o latou lava manatu i nei faamatalaga.

Faatasi ai ma le anoanoai o lotu ma manatu eseese, e faafaigata ai ona iloa le mea moni. Ua tuuina mai e le Alii ia i tatou le taitaiga e ala i tusitusiga paia e fesoasoani ai ia i tatou ia maua le mautinoa i le mea ua moni ma ia iloa mea e finagalo ai o Ia mo i tatou.

I le avea ai o se faatomuaga i le Mataupu Faavae ma Feagaiga, sa faaali mai ai e le Alii se lapataiga “i tagata uma” (Mataupu Faavae ma Feagaiga 1:4). O se vaega o Lana savali, sa Ia fetalai ai i se fetalaiga manino e uiga i Le Ekalesia a Iesu Keriso o le Au Paia o Aso e Gata Ai.

Faitau le Mataupu Faavae ma Feagaiga 1:30, ma vaavaai pe na faapefea ona faamatalaina e le Alii Le Ekalesia a Iesu Keriso o le Au Paia o Aso e Gata Ai.

O leMataupu Faavae ma Feagaiga 1:30 o se fuaitau o le atamai i aoaoga faavae. Mafaufau e valaaulia tagata aooga e faailoga ia fuaitau o le atamai i aoaoga faavae i se auala iloga ina ia mafai ona maua gofie.

• O le a se mea sa e mauaina?

“O le ekalesia moni ma ola e tasi i luga o le fogaeleele atoa”

Mafaufau e valaaulia tagata aooga e maka ia latou tusitusiga paia le fasifuaitau i le ulutala o i luga. Faaalu sina taimi e fesoasoani ai i tagata aooga ia malamalama i le uiga o le, e moni ma ola le Ekalesia. O se tasi nei o auala e mafai ona e faatinoina ai:

Tusi ni koluma se lua i luga o le laupapa. Valaaulia tagata aooga e suesue le tufaaga ma maka ia fasifuaitau e fesoasoani latou te malamalama ai pe faapefea ona “moni” ma “ola” le Ekalesia.

O le Ekalesia Moni ma Ola

Na aoao mai Elder David A. Bednar o le Korama a Aposetolo e Toasefululua:

Na tautino mai e le Alii e faapea, O Le Ekalesia a Iesu Keriso o le Au Paia o Aso e Gata Ai o “le ekalesia moni ma ola e tasi i luga o le fogaeleele” (MF&F 1:30). O lenei Ekalesia toefuataiina e moni aua o le Ekalesia a le Faaola; o Ia “o le ala, o le upumoni, ma le ola” (Ioane 14:6). Ma o se Ekalesia ola ona o galuega ma meaalofa a le Agaga Paia. (David A. Bednar, “Ia Maua le Agaga Paia,” Liahona, Nov. 2010, 97)

Sa aoao mai Peresitene Dallin H. Oaks o le Au Peresitene Sili:

E tolu matapule taua—(1) atoatoaga o aoaoga faavae, (2) mana o le perisitua, ma le (3) molimau ia Iesu Keriso—o loo faamatala mai ai le mafuaaga na tautino mai ai e le Atua … e na o le pau lenei o le Ekalesia moni ma ola i luga o lenei fogaeleele atoa. …

O le talalelei toefuataiina a Iesu Keriso e atoatoa, lautele, alofa, ma e moni. …

O le mauaina o le mana o le perisitua, o ta’ita’i ma tagata faatagaina o Le Ekalesia a Iesu Keriso o le Au Paia o Aso e Gata Ai ua i ai le pule e faatino ai sauniga manaomia o le perisitua, e pei o le papatisoga, le meaalofa o le Agaga Paia, ma le faatautaia o le faamanatuga.

O ki o le perisitua, o loo umia e lo tatou perofeta pele … ma o isi perofeta ma Peresitene uma o le Ekalesia, ua maua ai e ia faaaliga e fai ma sui mo le Ekalesia atoa. O lenei Ekalesia o loo “ola” aua o loo i ai o tatou perofeta o loo faaauau pea ona tuuina mai ia i tatou le afioga a le Alii lea e manaomia mo o tatou taimi.

O le mafuaaga lona tolu ua avea ai la tatou Ekalesia ma ekalesia moni e tasi, ona ua ia i tatou le upumoni faaalia e uiga i le natura o le Atua ma lo tatou sootaga ia te Ia, ma o lea ua tatou maua ai se molimau tulaga ese ia Iesu Keriso. (Dallin H. Oaks, “The Only True and Living Church,” New Era, Aug. 2011, 3–5)

Valaaulia tagata aooga e faasoa atu ni mea sa latou makaina. E mafai ona latou tusia mea na latou maua i totonu o koluma e lua i luga o le laupapa. Mafaufau e fesili atu i tagata aooga pe faapefea ona faamanuiaina i tatou e le Alii i vaega taitasi o Lana Ekalesia na latou faailogaina. Ina ia fesoasoani atu i tagata aooga ia malamalama i le tulaga a Peresitene Oaks e uiga i la tatou molimau tulaga ese ia Keriso, mafaufau e fai atu ia i latou e palepalealuga manatu i upumoni e uiga i le Tama Faalelagi ma Iesu Keriso ua latou aoaoina e ala i le Perofeta o Iosefa Samita, le Tusi a Mamona, po o perofeta o aso nei. E mafai ona latou faaopoopo o latou manatu i le koluma “Moni”.

Afai e manaomia, fesoasoani i tagata aooga ia malamalama o le molimau a le Alii na tautino atu ai O Le Ekalesia a Iesu Keriso o le Au Paia o Aso e Gata Ai e na o le pau lea “o le ekalesia moni ma ola” e le faapea ai o isi ekalesia e leai ni mea moni o i ai.

Faamanuiaga o le Ekalesia a Iesu Keriso

Ina ua uma ona ta’u atu o le Ekalesia “o le ekalesia moni ma ola e tasi,” sa faaaofia ai e le Faaola nisi o mafuaaga na Ia toefuatai mai ai Lana Ekalesia. Faitau le Mataupu Faavae ma Feagaiga 1:31–33, ma vaavaai mo le mea na Ia aoao mai.

E mafai e tagata aooga ona liliu atu i se paga ma otooto mea sa latou aoaoina mai nei fuaiupu. E mafai foi ona latou talanoaina faatasi fesili nei.

• E faapefea ona fesoasoani le Ekalesia moni ma ola a Iesu Keriso ia te oe e liliu atu ai ia te Ia mo le faamagaloga?

Saunia se avanoa mo tagata aooga e faailoa mai ai mea sa latou aoaoina i le taimi o lenei lesona. O se tasi auala e faia ai lenei mea o le fai lea i tagata aooga e tusi se tali i le ata faataitai i totonu o a latou api talaaga o suesuega. A mae’a, mafaufau e valaaulia nisi o tagata aooga e faasoa mai mea sa latou tusia.

Mafaufau pe a faapea e fesili atu se tasi ia te oe po o le a le mea e ese ai lau ekalesia nai lo isi. E faapefea ona e tali atu i lenei tagata i se auala e mafai ona fesoasoani ai ia i latou ina ia iloa atili le Ekalesia? E mafai ona e faaaofia ai mea nei i lau tali:

1. O mea ua e aoaoina i le asō mai le molimau a le Alii e uiga i Lana Ekalesia ma o a ou lagona e uiga i lena molimau

2. O auala na e lagonaina pe vaaia ai e moni pe ola le Ekalesia

3. Faamanuiaga ua e oo i ai o se tagata o le Ekalesia a Keriso

E mafai ona e faaiu i le faasoa atu o lau lava molimau e uiga i faamanuiaga o le Ekalesia moni ma ola a Iesu Keriso ma pe faapefea i le auai ai ona fesoasoani ia te oe e latalata atili ai i le Faaola.

Tauloto

Atonu e te manao e fesoasoani i tagata aooga e tauloto le mau faasino ma le fuaitau autu o le mau i le taimi o lenei lesona ma iloilo i latou i lesona i le lumanai. O le fasifuaitau autu o le mau “O le ekalesia moni ma ola e tasi.” O manatu mo gaoioiga o le taulotoina o loo i ai i le vaega faaopoopo i lalo o le “O Gaoioiga Toefaamanatu o le Atamai i Aoaoga Faavae.

Punaoa Faaopoopo

Pe O Le Ekalesia a Iesu Keriso o le Au Paia o Aso e Gata Ai ua pau lea o le Ekalesia e i ai le mea moni?

Sa aoao mai Peresitene Dallin H. Oaks o le Au Peresitene Sili:

Ona o lenei tautinoga a le Alii, ua tatou faasino ai i lenei, Lana Ekalesia--la tatou Ekalesia--e “na o le pau lea o le Ekalesia moni.” O nisi taimi tatou te faia ai lenei mea i se ala e tiga tele ai tagata o isi ekalesia po o e ua lesitala i isi filosofia. Peitai e lei aoao mai e le Atua ia i tatou se mea e ono tatau ai ona tatou manatu faasausili i isi tagata. E moni o lotu uma ma filosofia e i ai elemene o upumoni, o nisi e sili atu nai lo isi. E moni e alofa le Atua i Ana fanau uma. Ma e moni foi o Lana fuafuaga o le talalelei e mo Ana fanau uma, o mea uma e tusa ai ma Lana lava taimi. (Dallin H. Oaks, “O le Ekalesia Moni ma Ola e Tasi,” New Era, Aug. 2011, 3)

Aisea tatou te manaomia ai le Ekalesia?

Na aoao mai Elder D. Todd Christoffferson o le Korama a Aposetolo e Toasefululua:

E Manaomia i Se A Le Ekalesia?

Ua faamatala e D. Todd Christofferson ni mafuaaga e manaomia ai Le Ekalesia a Iesu Keriso o le Au Paia o Aso e Gata Ai ina ia faataunuu faamoemoega o le Faaola.

E taua le iloa o le faamoemoega autu lava o le Atua o lo tatou alualu i luma. O Lona finagalo ia tatou faaauau pea “mai lea alofa tunoa i lea alofa tunoa, seia oo ina [tatou maua] se atoatoaga” [Mataupu Faavae ma Feagaiga 93:13] o mea uma e mafai ona Ia foai mai. E manaomia ai mea e sili atu nai lo le na ona fia lelei pe lagona faaleagaga. E manaomia ai le faatuatua ia Iesu Keriso, salamo, papatisoga i le vai ma le Agaga, ma tumau i le faatuatua e oo i le iuga. E le mafai e se tasi ona ausia lenei mea na o ia lava, o lea, o se mafuaaga tele ua fai ai e le Alii se ekalesia, o le fatuina lea o se nuu o le Au Paia o le a lagolago ai e le tasi le isi i le “ala sa’o ma le vaapiapi lea e tau atu i le ola e faavavau” [2 Nifae 31:18]. (D. Todd Christofferson, “E Manaomia i Se A le Ekalesia,” Liahona, Nov. 2015, 108)

Gaoioiga Faaopoopo e Aoao Ai

O se ekalesia moni e taitaia e tagata e le atoatoa

E mafai ona fesoasoani lenei gaoioiga pe afai e i ai ni fesili a au tagata aooga e uiga i le ala e mafai ai ona i ai ni taitai le atoatoa po o se pulega a le Ekalesia i le Ekalesia moni a Iesu Keriso. Sa faasoa mai e Elder Dale G. Renlund o le Korama a Aposetolo e Toasefululua ma lona faletua, o Ruta, se talafaatusa e uiga i le ala e galue ai le Atua i tagata e le atoatoa ina ia aumaia le faaolataga. Mafaufau e faaali atu le vitio lenei mai le faailo taimi 1:03 i le 5:48. Atonu e te manao e taofi le vitio i le faailo taimi 4:16 e faataga ai tagata aooga e talanoaina po o le a le uiga latou te maua i le talafaatusa. A uma tou talanoaga, e mafai ona e ki le vaega o totoe o le vitio.

“Aua le Masalosalo, ae Ia Talitonu.”

O Elder Dale G. Renlund o le Korama a Aposetolo e Toasefululua ma lona faletua, o Sister Ruth L. Renlund, o le a saunoa i le faigalotu i le lalolagi atoa mo le autalavou matutua i le Aso Sa, 13 Ianuari, 2019.

O le mataupu faavae o le faatuatua lona iva

Ina ia faamatalaina atili le uiga o le “ola,” o le Ekalesia a Iesu Keriso, mafaufau e valaaulia tagata aooga e faitau le mataupu faavae o le faatuatua lona iva, ma vaavaai pe faapefea ona atagia mai ai le natura “ola” o le Ekalesia. E mafai foi e tagata aooga ona faia se mau fefaasinoa’i i le va o lenei mataupu faavae o le faatuatua ma le Mataupu Faavae ma Feagaiga 1:30. E mafai ona e fesili atu i tagata aooga pe na faapefea ona latou molimauina le faaauau pea e le Tama Faalelagi ona faaalia mai upumoni e ala mai i perofeta soifua.

Tuuina atu o le molimau i le Ekalesia

Mafaufau e valaaulia tagata aooga e molimau aloaia atu e uiga i le Ekalesia. Atonu e te faasoa muamua atu le molimau lenei mai ia Peresitene Henry B. Eyring o le Au Peresitene Sili:

“Ou te tuuina atu ia te outou la’u molimau paia o le Ekalesia moni lenei ma le ola a Iesu Keriso. O le a tali mai e le Tama Faalelagi a outou tatalo faamaoni ina ia outou iloa ai lenei mea mo outou lava. … E sili atu foi, e mafai ona outou iloa o sauniga o loo faatinoina i totonu o lenei Ekalesia, e mafai ona faamamaina ai agaga ma fusifusia ai i le lalolagi ma le lagi, e pei ona sa i ai i aso o Peteru, Iakopo, ma Ioane. O na ki ma sauniga ua toefuatai mai nei i o latou atoatoa e ala mai i le Perofeta o Iosefa Samita ma ua tuufaasolo mai e ala mai i e na suitulaga ia te ia. O Iesu o le Keriso. O loo soifua o Ia. Ou te iloa lena mea“ (Henry B. Eyring, “O Le Ekalesia Moni ma le Ola,” Liahona, Me 2008, 24).

The True and Living Church

The Church of Jesus Christ of Latter-day Saints is true, and it lives on.

Ona mafai lea ona e fesili atu pe i ai ni tagata aooga e fia faasoa mai a latou molimau i le Ekalesia moni ma le ola. Mafaufau e faasoa atu lau oe foi molimau.