Lesona 6: Mataupu Faavae ma Feagaiga 1

Mataupu Faavae ma Feagaiga 1:37–38

“Pe i Lo’u Lava Leo po o i le Leo o A’u Auauna, Ua Tutusa Lava”

Ina ia faaiu lana faatomuaga musuia i le Tusi o Poloaiga (ua avea nei ma Mataupu Faavae ma Feagaiga), sa molimau le Alii e fetalai mai o Ia ia i tatou e ala mai i Ana perofeta. O lenei lesona e mafai ona fesoasoani i tagata aooga e suesue afioga a le Alii e ala i tusitusiga paia ma e ala i upu a perofeta o aso nei.

Gaoioiga E Ono Mafai Ona Aoao Ai

Aisea o le a tatou fia faalogo ai i le Alii?

Atonu e aoga le amata i le matamata i le “#HearHim: Ua Valaaulia i Tatou e Peresitene Nelson e Faalogo i le Siufofoga o le Alii,” o loo maua i le ChurchofJesusChrist.org, mai le faailo taimi 0:00 i le 1:14.

Mafaufau e valaaulia tagata aooga e faasoa mai mea sa latou fiafia i ai pe aoaoina mai le vitio. Ona fai atu lea ia i latou e moeiini o latou mata ma vaai faalemafaufau i le tulaga faataitai lenei a o mafaufau loloto i fesili o loo i lalo. Valaaulia tagata aooga e faasoa a latou tali pe afai e le maaleale tele.

Vaai faalemafaufau faapea sa maua le avanoa e te i ai i le potu e tasi faatasi ma le Faaola, o Iesu Keriso.

• Aisea o le a e ono fia talanoa ma faalogo ai ia te Ia?

• O a autu e te manao lua te talanoaina ma le Faaola pe tuuina mai ai se taitaiga? Aisea?

• O le a sou manatu pe faapefea ona aafia oe i lenei aafiaga?

A o e suesueina lenei lesona, saili le taitaiga mai le Agaga Paia e fesoasoani ia te oe e iloa ai pe mafai faapefea ona e faalogo i afioga a le Faaola ma faapefea ona latou faamanuiaina ai oe lava ia.

Auala e faalogo ai i le Faaola i o tatou olaga

E alofa le Faaola ia i tatou ma e mana’o ia tatou taumafai pea e faalogo i Lona siufofoga. I le faaiuga o le faatomuaga i le Mataupu Faavae ma Feagaiga, sa faamamafa mai ai e le Faaola nisi o auala e fetalai mai ai o Ia ia i tatou.

Faitau le Mataupu Faavae ma Feagaiga 1:37–38, ma vaavaai mo na auala e fetalai mai ai ia i tatou. Atonu e fesoasoani le manatua o le upu “poloaiga” e faasino i le Tusi o Poloaiga (po o le Mataupu Faavae ma Feagaiga).

O leMataupu Faavae ma Feagaiga 1:37–38 o se fuaitau o le atamai i aoaoga faavae. Mafaufau e valaaulia tagata aooga e faailoga ia fuaitau o le atamai i aoaoga faavae i se auala iloga ina ia mafai ai ona latou maua gofie.

• O a ni mea na e aoaoina mai i nei fuaiupu?

  E mafai foi ona e fai i tagata aooga e faasoa mai o latou malamalama’aga. Atonu latou te ta’ua faapea e fetalai mai le Alii ia i tatou e ala mai i tusitusiga paia ma Ana perofeta. Afai latou te le faia, mafaufau e uu i luga se kopi o le Mataupu Faavae ma Feagaiga, o se ata o perofeta o aso nei, ma se ata o le Faaola ma fesili atu i mea e tutusa ai i latou e tusa ai ma le Mataupu Faavae ma Feagaiga 1:38. Mafaufau e valaaulia tagata aooga e maka se fasifuaitau o loo aoao mai ai le upumoni lenei: pe i Lona lava leo po o le leo o Ana auauna, e tutusa lava.

  Afai e aoga, tusi fuaiupu nei i luga o le laupapa ma valaaulia tagata aooga e faitau se tasi pe lua, ma vaavaai mo mea o loo latou aoao mai e faamautu ai le upumoni o loo i luga: Teuteronome 18:18; Mataupu Faavae ma Feagaiga 18:33–36; 21:4–6. Atonu e mananao tagata aooga e tusi nei fuaiupu o ni mau faasino i le Mataupu Faavae ma Feagaiga 1:38.

• Aisea e ono faigata ai i nisi taimi ona manao e suesue i afioga a le Alii?

• E mafai faapefea e le upumoni na tatou faailoaina, po o isi fasifuaitau i le Mataupu Faavae ma Feagaiga 1:37–38, ona faaosofia oe e suesue i afioga a le Alii?

Aisea tatou te mananao ai e suesue i Ana afioga

Matamata le vitio lenei ma faitau le faamatalaga lenei, ma vaavaai mo mafuaaga atonu e te manao e suesue ai afioga a le Alii e ala i tusitusiga paia ma e ala mai i upu a perofeta o aso nei:

• “How I #HearHim: Elder David A. Bednar” (1:15)

Na aoao mai Sister Carol F. McConkie, sa avea ma fesoasoani muamua i le Au Peresitene Aoao o Tamaitai Talavou:

O [perofeta o aso e gata ai] e saunoa atu i le suafa o Keriso. Latou te vavalo atu i le suafa o Keriso. Latou te faia mea uma i le suafa o Iesu Keriso. I a latou upu tatou te faalogoina ai le siufofoga o le Alii ma e tatou te lagona ai le alofa o le Faaola. (Carol F. McConkie, “Ola e Tusa ma Upu a Perofeta,” Liahona, Nov. 2014, 77)

• O le a se mea na e fiafia i ai pe aoao mai lenei vitio ma le faamatalaga?

  Faataga i tagata aooga se taimi e mafaufau loloto ai i le fesili lenei a o lei talosagaina ni volenitia e faasoa mai. A o mafaufau loloto tagata aooga, mafaufau e faasoa atu se faataitaiga patino e mafai ona latou fesootai i ai. O le faia o lena mea e mafai ona fesoasoani ia i latou e mafaufau ai i isi faataitaiga.

• O anafea na e (po o se tasi e te iloa) lagona ai ua e mauaina se savali mai le Alii e ala i tusitusiga paia pe ala mai i upu a perofeta o aso nei?

Faataitai

O le gaoioiga lenei ua fuafuaina e fesoasoani ai i tagata aooga e faalatalata atili atu ai i le Faaola a o suesue i upu a Ana auauna. Ia mautinoa e tuu atu i tagata aooga le tele o le taimi e faauma ai ma faasoa mai o latou manatu pe a mae’a.

1. Faaalu ni nai minute e suesue ai nisi o fuaiupu nei ma upu a perofeta o aso nei. A o e suesue, vaai faalemafaufau i le Alii o fetalai atu nei upu ia te oe. (O se tomai suesue aoga lenei e mafai ona e faaaogaina i soo se taimi e te suesue ai i tusitusiga paia.) Mafaufau e faailoga mea e taua ia te oe.

   Mataupu Faavae ma Feagaiga 6:34–37; 10:5; 19:23; 27:15–18; 58:26–28; 68:5–6; 78:18–19; 82:10; 98:1–3; 112:10. (Pe filifili isi fuaiupu i le Mataupu Faavae ma Feagaiga.)

   Afai e te lagona o le a sili atu ona fetaui ma manaoga o au tagata aooga, nai lo o mea nei, mafaufau e tuufaatasi ni upusii talu ai nei mai perofeta e faatatau faapitoa i au tagata aooga. Ia mautinoa e i ai ni kopi o le lomiga o le konafesi aoao aupito lata mai o le mekasini o le Liahona .

2. Suesue nisi po o lauga uma o se konafesi aoao talu ai nei e te lagona o le a fesoasoani ia te oe lava ia.

   Valaaulia tagata aooga e faasoa mai ni o latou aafiaga. E ono aoga fesili nei:

3. O le a se mea na e aoaoina?

4. Na faapefea ona aafia ai lau suesuega i le vaai faalemafaufau ai i le Faaola o fetalai atu na upu ia te oe?

5. E mafai faapefea i le faia soo o lenei mea i au suesuega faaletagata lava ia ona aafia ai lou sootaga ma le Faaola?

A o faasoa mai tagata aooga, vaai mo auala e faamamafa ai o loo fetalai mai pea le Alii ia i tatou e ala mai i tusitusiga paia ma perofeta soifua.

Ina ia faaiu, tusi i lau api talaaga o suesuega mea e te manao e fai e faalatalata atili atu ai i le Faaola e ala i upu a Ana auauna. Atonu o nisi manatu e:

• Suesue i taimi uma i le Mataupu Faavae ma Feagaiga e pei o loo fetalai mai le Alii ia te oe.

• Faalogo i upu a perofeta a o e sauni mo le aoga i le taeao po o tofaga i le afiafi po o se isi taimi e sili atu ona aoga ia te oe.

Tauloto

Atonu e te manao e fesoasoani i tagata aooga e tauloto le mau faasino ma le fuaitau autu o le mau o le Mataupu Faavae ma Feagaiga 1:37–38 ma toe iloilo i latou i lesona i le lumanai. O le fasifuaitau autu o le mau o le “Pe i lo’u lava leo po o i le leo o a’u auauna, ua tutusa lava.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga o le Iloiloga o le Atamai i Aoaoga Faavae.”

Punaoa Faaopoopo

Aisea e tatau ai ona ou faalogo i perofeta e pei o latou saunoa mo le Alii?

Na aoao mai Peresitene M. Russell Ballard o le Korama a Aposetolo e Toasefululua:

E le o se mea itiiti, uso e ma tuafafine, le i ai o se perofeta a le Atua ma i tatou. E ofoofogia ma maoae faamanuiaga e oo mai i o tatou olaga a o tatou faalogo atu i afioga a le Alii ua tuuina mai e ala mai ia te ia. … Afai tatou te faalogo i le fautuaga a le Alii ua faailoa mai e ala i saunoaga a le Peresitene o le Ekalesia, e tatau ona sao ma vave la tatou tali. O loo faaalia i le talafaasolopito e faapea, e i ai le saogalemu, filemu, manuia ma le fiafia i le ua’i atu i fautuaga faaperofeta. (M. Russell Ballard, “His Word Ye Shall Receive,” Ensign, Me 2001, 65)

O le a se mea e tatau ona ou faia pe afai ou te tauivi pe le malamalama foi i mea e fai mai ai perofeta?

Na aoao mai Peresitene Russell M. Nelson:

Ua folafola mai e le Alii ia i tatou Na te le faatagaina le perofeta e taitai sese i tatou. Na folafola mai e Peresitene Harold B. Lee [1899–1973]: “Atonu o le a e lē fiafia i le mea e sau mai le pulega o le Ekalesia. E ono feteenai ma ou taofi faapolokiki. E ono feteenai ma ou taofi faaleagafesootai. E ono faalavelave i ni mea o lou olaga faaleagafesootai. Ae afai e te faalogo i nei mea, e pei o loo tuuina mai i le fofoga o le Alii lava Ia, faatasi ai ma le onosai ma le faatuatua, o le folafolaga e faapea, ‘o le a lē manumalo ai faitotoa o seoli ia te outou; ioe, ma o le a faamataa ese ai e le Alii le Atua mana o le pouliuli mai i o outou luma, ma faia ia luluina le lagi mo lo outou lelei, ma le mamalu o lona suafa’ (MF&F 21:6)” [Aoaoga a Peresitene o le Ekalesia: Harold B. Lee (2000), 84–85].

Atonu e te le malamalama i taimi uma i folafolaga taitasi a se perofeta soifua. Ae afai e te iloaina o le perofeta o se perofeta, e mafai ona e tatalo atu i le Alii i le lotomaualalo ma le faatuatua ma ole atu mo sa oe lava molimau e uiga i soo se mea ua folafola mai e Lana perofeta. (Russell M. Nelson, “Becoming True Millennials” [fagalotu i le lalolagi atoa mo talavou matutua, Jan. 10, 2016], broadcasts.ChurchofJesusChrist.org)

Gaoioiga Faaopoopo e Aoao Ai

O le aafiaga o se tamaitai talavou

A uma ona faasoa e tagata aooga ni mafuaaga latou te mananao ai e suesue i afioga a le Alii, mafaufau e faasoa atu le aafiaga lenei o se tamaitai talavou i le popofou o le Ekalesia o lē sa faia tusitusiga paia o le afioga a le Alii:

Sa 12 tausaga o Mary Elizabeth Rollins ina ua ia tauanauina lona tuaoi e avatu ia te ia lana Tusi a Mamona, na o le pau lea o le kopi i le eria. Sa ia suesue i ai i le leva o le po ma mulimuli ane faamaeaina le tusi atoa. Ina ua asiasi atu le Perofeta o Iosefa Samita ma faalogo e uiga i ana suesuega, sa ia fai atu ia te ia e tuu ma ia le tusi ma folafola atu o le a ia toe maua se isi kopi mo lona tuaoi.

I se tausaga pe lua mulimuli ane, na vaai ai Maria i nisi o itulau fou faatoa lolomiina o faaaliga mai le Alii o le a aofia ai i le Tusi o Poloaiga (lea ua avea nei ma Mataupu Faavae ma Feagaiga) ma faalogologo i taitai o le Ekalesia o faitau ma talanoaina. Sa ia lagonaina se uunaiga malosi mai le Agaga Paia ma se migao loloto mo faaaliga. (Tagai i le Au Paia, 1:178.)

Ina ua 15 tausaga o Maria, sa talepeina i lalo e se au faatupu faalavelave feita le falelomitusi a le Ekalesia a o lei lolomiina ma faasalalauina ia itulau o na faaaliga. Sa faatalitali Maria ma lona uso laitiiti seia toe fo’i le au faatupu faalavelave, ona lamatia ai lea o o laua ola e sefe ia itulau. Ina ua vaai atu nisi o le au faatupu faalavelave ia i laua ma tuli tausi’o i laua, sa tau tolotolo atu teineiti e toalua i se avanoa i se pa ma lalafi ai i se toga sana a o saili ma le lē manuia e tagata o le au faatupu faalavelave i laua. Na iu lava ina tuuina atu ia Maria se tusi o na faaaliga, lea sa ia “matua faatauaina lava.” (Tagai “Autobiography of Mary E. Lightner,” Utah Genealogical and Historical Magazine, vol. 17 (1926), 193–96.)

• Na faapefea ona taulima e Maria Elisapeta Rollins ia tusitusiga paia e pei o afioga a le Faaola?

• O a nisi o auala e mafai ona tatou faaaogaina ai tusitusiga paia e pei o afioga a le Faaola i aso nei?

O loo i ai foi nisi faataitaiga i le taimi nei o tagata taitoatasi o e na aoao e faataua le Mataupu Faavae ma Feagaiga o le afioga a le Atua (tagai Jennifer Ricks, “Learning to Love the Doctrine and Covenants,” New Era, Apr. 2012, 26).

Faaaoga upu a perofeta i faigalotu

Valaaulia tagata aooga e faaauau pea ona suesue i fuaiupu o tusitusiga paia ma upu a perofeta o aso e gata ai. Valaaulia i latou e feauauai i le faasoaina mai o mea o loo latou aoaoina i faigalotu a le vasega o loo loma. Uuna’ia i latou e faasoa mai mea latou te lagona o le a finagalo le Alii latou te iloa pe mafai faapefea e upumoni o le talalelei ona faamanuiaina ai i tatou i aso nei.

Ina ia faalogo i le siufofoga o le Alii

E ui ina tatou maua le avanoa i afioga a le Alii, e seāseā ona tatou faalogo i ai ma iloa i latou. Mafaufau e valaaulia tagata aooga e faitau le 3 Nifae 11:1–5, ma matau mea na faia e tagata e faalogo ai i le siufofoga o le Atua. Talanoa i mea e mafai ona tatou faia e faalogo atili ai i le siufofoga o le Alii i o tatou olaga. Mafaufau e matamata se tasi pe sili atu o vitio o le #HearHim, lea e tuuina mai ai e taitai o le Ekalesia ni faataitaiga o auala latou te faalogo ai i le Alii. O loo maua vitio i le ChurchofJesusChrist.org.